ຊາວໜຸ່ມ ຄຳມ່ວນ ສ້າງຂະບວນການອະນາໄມຕາມເສັ້ນທາງຕ່າງໆ.

ເຜີຍ​ແຜ່​ໂດຍ​: ທ່ານ ຈັນ​ທະ​ໄມ​ຕ​ຣີ ເທບ​ສີ​ເມືອງ ເວ​ລາ: 29/09/2020 14:32:12 ຈຳ​ນວນ​​ຢ້ຽມ​ຊົມ 805 ຄັ້ງ

ເມື່ອບໍ່​ດົນ​ມານີ້ ສະມາຊິກຊາວໜຸ່ມ​ຢູ່​ພາຍ​ໃນ​ຮາກ​ຖານ ແລະ ໜ່ວຍ​ຊາວ​ໜຸ່ມ​ພະແນກການ​ອ້ອມ​ຂ້າງ​ແຂວງ​ຄຳ​ມ່ວນ ໄດ້​ພ້ອມ​ພາກັນ​ສ້າງ​ຂະບວນ​ການ​ອອກແຮງ​ງານ​ອະນາໄມ​ລວມຢູ່​ຕາມ​ເສັ້ນ ທາງ​ສາຍ​ຕ່າງໆພາຍ​ໃນ​ເທດ ສະບານ​ເມືອງ​ທ່າ​ແຂກ ຊຶ່ງນຳ ​ໂດຍ​ທ່​ານ ສາຍ​ຄຳ ພະ​ໄຊ​ສິດທິ​ເດດ ເລຂາ​ຄະນະ​ບໍລິຫານ​ງານ​ຊາວ​ໜຸ່ມ​ແຂວງ​ຄຳ​ມ່ວນ, ມີ​ ບັນດາ​ທ່ານສະມາຊິກຊາວໜຸ່ມ ທີ່​ມາ​ຈາກ​ຮາກ​ຖານ-ໜ່ວຍ ຊາວໜຸ່ມ ພະແນກການ​ອ້ອມ ​ຂ້າງ​ແຂວງ ເຂົ້າ​ຮ່ວມ​ຢ່າງ​ເປັນ​ຂະບວນ​ຟົດ​ຟື້ນ.
ທ່ານ ສາຍ​ຄຳ ພະ​ໄຊ​ສິດທິ​ເດດ ໄດ້​ກ່າວ​ໃຫ້​ຮູ້​ວ່າ: ການ​ອອກແຮງ​ງານ​ອະນາໄມ​ລວມໃນ​ຄັ້ງ​ນີ້ ຈຸດປະສົງກໍເພື່ອ​ສ້າງ​ຂະບວນ​ການ​ຕ້ອນຮັບ​ກອງ​ປະຊຸມ​ໃຫຍ່ ຄັ້ງ​ທີ X ອົງຄະ​ນະ​ພັກ​ແຂວງ​ຄຳ​ມ່ວນ ແລະ ກະກຽມ​ພິທີ​ປະກາດ​ຮັບຮອງ​ແຂວງຄຳ​ມ່ວນ ເປັນ​ແຂວງຄະ ນະ​ຊາວ​ໜຸ່ມ ປະຊາຊົນ ປະ​ຕິ​ ວັ​ດລາວ 4 ບຸກ ປີ​ທີ 3, ໃນການ ​ອອກແຮງ​ງານ​ຄັ້ງ​ນີ້ແມ່ນໄດ້​ ພ້ອມ​ກັນຖາງ​ຫຍ້າ ແລະ ປັດ ກວາດ​ຕາມ​ແຄມ​ທ້ອງ​ຖະໜົນ ພ້ອມໆກັບ​ການ​ຕິດ​ປ້າຍ​ຄຳ​ຂວັນ, ປະດັບ​ປະດາ​ດ້ວຍທຸງ ຊາດ, ທຸງ​ພັກ, ທຸງ​ຊາວ​ໜຸ່ມ ແລະ ທຸງ​ທິວ ໃຫ້​ມີ​ຄວາມ​ສະ ອາດ ແລະ ຄວາມ​ສວຍ​ງາມ ຊຶ່ງ ​ສະແດງ​ໃຫ້​ເຫັນ​ວ່າຊາວໜຸ່ມ ​ພວກ​ເຮົາຍາມ​ໃດ​ກໍມີ​ຄວາມ​ດຸ ໝັ່ນ​ຫ້າວຫັນ, ມີ​ຄວາມ​ສາມັກ ຄີ​ຊ່ວຍເຫຼືອ​ຊຶ່ງ​ກັນ ແລະ ກັນຕໍ່​ການ​ປະຕິບັດ​ໜ້າທີ່ວຽກງານທີ່​ການຈັດຕັ້ງພັກ-ລັດມອບ​ໝາຍ ໃຫ້ສົມ​ກັບ​ພັກ​ປະຊາຊົນ ປະຕິ ວັດ​ລາວ ທີ່​ໄດ້​ໃຫ້​ສາຍາ​ນາມ ແກ່​ຊາວ​ໜຸ່ມ​ວ່າ: “ຊາວ​ໜຸ່ມ​ເປັນ​ແຂນ​ຂວາ​ຂອງ​ພັກ ເປັນ​ກະດູກ​ສັນຫຼັງ ຂອງ​ປະເທດ​ຊາດ ” ແລະ ປະຕິບັດ​ຄຳ​ຂວັນ​ຂອງ​ຊາວ​ໜຸ່ມ​ທີ່​ວ່າ: “ ບ່ອນ​ໃດ​ຍາກ​ຊາວ​ໜຸ່ມ​ບຸກ ບ່ອນ​ໃດ​ທຸກ​ຊາວ​ໜຸ່ມ​ຜ່ານ​ຜ່າ ເມື່ອ​ໃດ​ຊາດ​ຕ້ອງການ​ຊາວ​ໜຸ່ມ​ຂານ​ອາສາ”.
(ຂ່າວ: ຈາກ​ຄະນະ​ບໍລິຫານ​ງານ​ຊາວ​ໜຸ່ມ​ແຂວງ​ຄຳ​ມ່ວນ)


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110