ຊຽງຮ່ອນ ເປີດຊຸດຮຽນທິດສະດີການເມືອງ-ການປົກຄອງ ຮຸ່ນທີ II

ເຜີຍ​ແຜ່​ໂດຍ​: ທ່ານ ຈັນ​ທະ​ໄມ​ຕ​ຣີ ເທບ​ສີ​ເມືອງ ເວ​ລາ: 29/09/2020 14:36:12 ຈຳ​ນວນ​​ຢ້ຽມ​ຊົມ 1328 ຄັ້ງ

ພິທີ​ເປີດ​ການ​ຮຽນ​ -​ ການ​ສອນ​ທິດ​ສະ​ດີ​ການ​ເມືອງ -​ການ​ປົກຄອງ​ຂັ້ນ​ຕົ້ນ ຮຸ່ນ​ທີ II ໃຫ້​ພະນັກ​ງານ​ຢູ່​ພາຍ​ໃນ​ເມືອງ​ຊຽງ​ຮ່ອນ​ ແຂວງ​ໄຊ​ຍະ​ບູ​ລີ​ ໄດ້​ຈັດ​ຂຶ້ນ​ຢ່າງ​ເປັນ​ທາງ​ການຫວ່າງບໍ່​ດົນຜ່ານ​ມາ ທີ່​ສະໂມສອນ​ຂອງ​ເມືອງ ໂດຍ​ການ​ເປັນ​ປະທານ​ຂອງ​ທ່ານ ອິນຕາ ນິ້ມ​ນວນ ຮອງ​ເລຂາ​ຄະນະ​ບໍລິຫານ​ງານ​ພັກ​ເມືອງ​ຊຽງ​ຮ່ອນ ເປັນ​ກຽດ​ເຂົ້າ​ຮ່ວມ​ຂອງ​ທ່ານ ສີ​ສອນ​ພັນ ບຸນ​ສີ ກຳມະການ​ພັກ​ແຂວງ ຜູ້ອຳນວຍການໂຮງຮຽນ​ທິດ​ສະ​ດີ​ການ​ເມືອງ​-​ການ​ປົກຄອງ ແຂວງ​ໄຊ​ຍະ​ບູ​ລີ ມີ​ບັນດາ​ທ່ານ​ຫົວໜ້າ​ຫ້ອງການ, ຄູ​-ອາ ຈານ, ນັກຮຽນ ແລະ ຄະນະ​ຮັບຜິດຊອບ​ຈັດ​ຊຸດ​ຮຽນ​ທິດ​ສະ​ດີ​ການເມືອງ​- ການ​ປົກຄອງ​ເຂົ້າ​ຮ່ວມ.
ໃນ​ການ​ຮຽນ​-ການ​ສອນ​ຄັ້ງ​ນີ້ ມີ​ນັກຮຽນ​ມາ​ຈາກ​ບັນດາ ສຳນັກງານ, ກົມ​ກອງ​ອ້ອມ​ຂ້າງ​ພາຍ​ໃນເມືອງ ​ຈຳນວນ 45 ສະຫາຍ ຍິງ 15 ສະຫາຍ ການ​ເປີດ​ຊຸດ​ຮຽນ​ໃນ​ຄັ້ງ​ນີ້ ນັກຮຽນ​ຈະ​ໄດ້​ຮຽນ​ຮູ້​ທິດ​ສະ​ດີການ​ເມືອງ​-​ການ​ປົກຄອງທັງ​ ໝົດ ປະກອບ​ມີ 5 ພາກ​ຄື: ພາກ​ປັດ​ຊະ​ຍາ, ເສດຖະສາດ​ການ​ເມືອງ-​ການ​ຄຸ້ມ​ຄອງ​ເສດ ຖະກິດ, ລັດທິ​ສັງຄົມ​ນິຍົມ​ວິທະຍາສາດ, ບໍລິຫານ​ສາດ ແລະ ກໍ່ສ້າງ​ພັກ​-​ປະຫວັດສາດ​ພັກ ທັງ​ໝົດ​ປະກອບ​ມີ 24 ບົດ ມີ 14 ໜ່ວຍ​ກິດ ໄລຍະ​ການ​ຮຽນ​ແມ່ນ 3 ເດືອນ.
ຈາກ​ນັ້ນ​ ທ່ານ ອິນຕາ ນິ້ມ​ນວນ ໄດ້​ໃຫ້​ກຽດ​ກ່າວ​ເປີດ ການ​ຮຽນ​-​ການ​ສອນ ການ​ເມືອງ​-​ການ​ປົກຄອງ ໃນ​ຄັ້ງ​ນີ້ ຊຶ່ງ​ມີ​ຄວາມ​ໝາຍ​ຄວາມ​ສຳຄັນ, ເປັນ​ການ​ສ້າງ​ໃຫ້​ພະນັກງານ ທີ່​ສັງກັດ​ຢູ່​ບັນດາຫ້ອງການ, ກົມ​ກອງ​ພາຍ​ໃນ​ເມືອງ ໄດ້​ມີ​ລະດັບ​ຄວາມ​ຮູ້​ພື້ນຖານທາງ​ດ້ານ​ທິດ​ສະ​ດີ​ການ​ເມືອງ-ການ​ປົກຄອງ, ແນວທາງ​ຂອງ​ພັກ ການ​ຄຸ້ມ​ຄອງ​ລັດ​-​ຄຸ້ມ​ຄອງ​ສັງຄົມ, ເຮັດ​ໃຫ້​ມີ​ແນວ​ຄິດທັດສະນະ​ຫຼັກ​ໝັ້ນ ເຊື່ອ​ໝັ້ນ​ຕໍ່​ການ​ນໍາ​ພາ ມີ​ຄວາມ​ຫ້າວຫັນ​ເປັນ​ແບບຢ່າງ ເຮັດ​ໃຫ້ການ​ປະຕິບັດ​ໜ້າທີ່​ວຽກ​ງານ​ນັບ​ມື້ ນັບ​ມີ​ຄຸນ​ນະ​ພາບ​ສູງ​ຂຶ້ນ ແລະ ທ່ານ​ຍັງ​ຮຽກຮ້ອງ​ມາ​ຍັງ ຄູ​-ອາຈານ ແລະ ນັກຮຽນ​ຈົ່ງ​ພ້ອມ​ກັນ ເອົາໃຈໃສ່ຕໍ່​ກັບ​ການ​ຮຽນ​- ການ​ສອນ ໃນ​ຄັ້ງ​ນີ້ ໃຫ້​ໄດ້​ຮັບ​ຜົນສຳເລັດ​ຕາມ​ລະດັບ​ຄາດ​ໝາຍ.
(ຂ່າວ: ດອນ ຂຽວ​ພະນາ)


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110