ການນຳສູນກາງ ແລະ ທ້ອງຖິ່ນ ຢ້ຽມຢາມການຜະລິດຂອງໂຮງງານຊັນເປເປີ້

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ​ ເວ​ລາ: 01/10/2020 08:36:56 ຈຳ​ນວນ​​ຢ້ຽມ​ຊົມ 843 ຄັ້ງ

ເມື່ອບໍ່​ດົນຜ່ານ​ມານີ້, ທ່ານ ຄຳ​ມະນີ ອິນ​ທິ​ລາດ ລັດຖະ ມົນຕີ​ກະຊວງ​ພະລັງງານ ແລະ​ ບໍ່​ແຮ່, ທ່ານ ຈະເລີນ ເຢຍ​ປາວ​ເຮີ ລັດຖະມົນຕີ​ປະຈຳ​ສຳນັກງານ​ນາຍົກລັດຖະມົນຕີ ພ້ອມ​ດ້ວຍ​ທ່ານ​ຫົວໜ້າ​ກົມ, ຮອງ​ກົມໄດ້​ລົງ​​ຢ້ຽມຢາມ​ເບິ່ງ​ການ​ຜະລິດ​ຂອງ​ບໍລິສັດ ຊັນ​ເປ​ເປີ້ ໂຮ​ນ​ດິ້ງ​ລາວ ຈຳກັດ ທີ່​ເມືອງ​ເຊ​ໂປນ ໂດຍ​ມີ ທ່ານ ສັນຕິພາບ ພົມວິຫານ ເຈົ້າແຂວງ​ສະຫວັນ​ນະ​ເຂດ ພ້ອມ​ຄະນະ ​ແລະ ​ພະແນກການ​ກ່ຽວຂ້ອງ​ຂອງ​ແຂວງ ເຂົ້າ​ຮ່ວມ​ນຳ.

ບໍລິສັດ​ຊັນ​ເປ​ເປີ້ ໄດ້​ເຂົ້າ​ມາ​ລົງທຶນ​ໃນ ສປປ ລາວ ແຕ່​ປີ 2008 ເພື່ອ​ສ້າງຕັ້ງ​ໂຄງການ​ປູກ​ໄມ້​ອຸດສາຫະກຳ ປ້ອນ​ໂຮງງານ​ຜະລິດ​ເຫຍື່ອ​ເຈ້ຍ, ມາ​ຮອດ​ປັດຈຸ​ບັນ​ໄດ້​ລົງທຶນ​ໄປ​ແລ້ວ 9.139 ຕື້​ກວ່າ​ກີບ ຫຼື​ ປະມານ 1,69 ຕື້​ໂດ​ລາ, ໄດ້​ບຸກເບີກເນື້ອ ທີ່ ແລະ ​ປູກໄມ້ 32 ພັນເຮັກ ຕາ, ໃນ​ນັ້ນ ປູກ​ຮ່ວມ​ກັບ​ປະ ຊາ ຊົນ 6.400 ເຮັກຕາ. ມາຮອດ​ ປີ 2017 ໄດ້​ເປີດ​ ການກໍ່ສ້າງ ​ໂຮງງານ​ຜະລິດ​ເຫຍື່ອ​ເຈ້ຍຂະ ໜາດ​ໃຫຍ່ສາມາດ​ຜະລິດ​ໄດ້ 3 ແສນໂຕນຕໍ່​ປີ ຊຶ່ງ​ໄດ້​ເລີ່ມ​ທົດ​ລອງ ແລະ ດຳເນີນການ​ຜະລິດ ເລີ່ມ​ແຕ່ເດືອນພຶດສະພາ ປີ 2018 ເປັນຕົ້ນ​ມາ. ມາ​ຮອດ​ປັດ ຈຸ​ບັນ ນອກຈາກ​ຈະ​ມີ​ໂຮງງານ​ຜະລິດ​ໄຟ ຟ້າດ້ວຍ​ພະລັງງານ​ຄວາມ​ຮ້ອນທີ່​ໃຊ້​ສິ່ງ​ເສດ​ເຫຼືອ​ຈາກ​ໄມ້ ທີ່​ບໍ່​ສາມາດ​ຜະລິດ​ເຫຍື່ອ​ເຈ້ຍ​ໄດ້​ແລ້ວ,ກຳລັງ​ສ້າງ​ໂຮງງານ​ຜະລິດ​ໄຟ ຟ້າ ດ້ວຍ​ພະລັງງານ​ຄວາມ ຮ້ອນທີ່​ໃຊ້​ຖ່ານ​ຫີນ​ຂະໜາດ 110 ເມັກ​ກາ​ວັດ ເພື່ອ​ນຳ​ໃຊ້​ໃນ​ໂຮງງານ ແລະ​ຂາຍ​ອອກ​ຈຳນວນ​ໜຶ່ງ.

ຜ່ານ​ການ​ດຳເນີນ​ວຽກ​ງານ​ເປັນ​ເວລາ 10 ກວ່າ​ປີ ສາມາດ​ສ້າງ​ວຽກ​ເຮັດ​ງານ​ທຳ​ໃຫ້​ແກ່ ແຮງ​ງານ​ລາວ​ຈຳນວນ​ໜຶ່ງ, ປະຊາຊົນ​ສາມາດ​ມີ​ລາຍ​ໄດ້ ຈາກ​ການ​ປູກ​ໄມ້​-​ຂາຍ​ໄມ້​ເຂົ້າ​ສູ່​ໂຮງງານ, ພື້ນຖານ​ໂຄງ​ລ່າງ​ຂອງ​ບ້ານ​ໃກ້​ຄຽງ ໄດ້​ຮັບ​ການ​ປັບປຸງກໍ່ສ້າງ ເປັນຕົ້ນ​ແມ່ນຖະໜົນຫົນທາງ, ໂຮງຮຽນ ແລະ​ອື່ນໆ, ຄຽງ​ຄູ່​ກັນ​ນັ້ນ ກໍໄດ້​ຊ່ວຍເຫຼືອ​ສັງຄົມ ໃນ​ຍາມ​ເກີດ ໄພພິບັດ​ຕ່າງໆເປັນ​ຈຳນວນ​ເງິນ​ຫຼາຍ​ຕື້​ກີບ.

ໂອກາດ​ດັ່ງກ່າວ ທ່ານ​ລັດຖະມົນຕີ ແລະ​ທ່ານ​ເຈົ້າແຂວງ ພ້ອມ​ຄະນະ ກໍໄດ້​ເລາະ​ຢ້ຽມ​ຊົມ​ຂະບວນ​ການ​ຜະລິດຂອງ​ໂຮງງານ, ຂັ້ນ​ຕອນ​ການ​ຜະລິດ ແລະ​ ຜະລິດ​ຕະ​ພັນ​ຂອງ​ໂຮງງານ​ຕື່ມ​ອີກ.

(ຂ່າວ: ຕຸກຕຸກ)


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110