ຄະນະພັກ ແຂວງຫຼວງພະບາງ ເຂົ້າວາງພວງມາລາ ແລະ ກະຕ່າດອກໄມ້

ເຜີຍ​ແຜ່​ໂດຍ​: ທ່ານ ຈັນ​ທະ​ໄມ​ຕ​ຣີ ເທບ​ສີ​ເມືອງ ເວ​ລາ: 01/10/2020 11:49:56 ຈຳ​ນວນ​​ຢ້ຽມ​ຊົມ 1056 ຄັ້ງ

   (ເນື່ອງໃນໂອກາດເປີດກອງປະຊຸມໃຫຍ່ ຜູ້ແທນອົງຄະນະພັກແຂວງ ຄັ້ງທີ VIII).
ໃນໂອກາດທີ່ກອງປະຊຸມໃຫຍ່ ຜູ້ແທນອົງຄະນະພັກແຂວງຫຼວງພະບາງ ຄັ້ງທີ VIII ຈະເປີດຂຶ້ນໃນລະຫວ່າງວັນທີ 2-3 ຕຸລາ ນີ້, ຄະນະບໍລິຫານງານພັກແຂວງຊຸດທີ VII ນຳໂດຍທ່ານ ຄໍາຂັນ ຈັນທະວີສຸກ ກໍາມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງຫຼວງພະບາງ ພ້ອມດ້ວຍຄະນະ ໄດ້ເຂົ້າວາງພວງມາລາ ຢູ່ອະນຸສາວະລີນັກຮົບນິລະນາມ ແລະ ວາງກະຕ່າດອກໄມ້ ຢູ່ອະນຸສອນສະຖານຂອງປະທານ ໄກສອນ ພົມວິຫານ ແລະ ອະນຸສອນສະຖານປະທານສຸພານຸວົງ ໃນຕອນເຊົ້າຂອງວັນທີ 1 ຕຸລານີ້ ເພື່ອລະນຶກເຖິງບຸນຄຸນ ຄຸນງາມຄວາມດີຂອງນັກຮົບປະຕິວັດ ກໍ່ໍຄືຜູ້ນຳທີ່ແສນເຄົາລົບຮັກຂອງປວງຊົນລາວທັງຊາດ ທີ່ໄດ້ເສຍສະຫຼະຊີວິດໃນພາລະກິດຕໍ່ສູ້ປົດປ່ອຍຊາດໃນເມື່ອກ່ອນ ກໍຄືພາລະກິດປົກປັກຮັກສາ ແລະ ສ້າງສາພັດທະນາປະເທດຊາດໃນໄລຍະໃໝ່. ພາຍຫຼັງສຳເລັດການວາງພວງມາລາ ແລະ ກະຕ່າດອກໄມ້ ຜູ້ແທນກອງປະຊຸມໃຫຍ່ໄດ້ເຂົ້າເຊື່ອມຊືມກົດລະບຽບ ແລະ ວາລະຂອງການດຳເນີນກອງປະຊຸມ, ພ້ອມທັງເຂົ້າຮ່ວມຊົມການວາງສະແດງຮູບພາບ ຜົນງານການເຄື່ອນໄຫວຂອງພະແນກການ-ກົມກອງ ແລະ ຜະລິດຕະພັນສີໄມ້ລາຍມື ຂອງສະຖາບັນການສຶກສາ ແລະ ຫົວໜ່ວຍທຸລະກິດພາຍໃນແຂວງ ຕື່ມອີກ.
ຂ່າວ-ພາບ: ຈາກແຂວງຫຼວງພະບາງ.


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110