ລມຕ ກະຊວງອຸດສາຫະກຳ ແລະ ການຄ້າ ຢ້ຽມຢາມໂຮງງານ ອຸດສາຫະກຳ ໂຕໂຢລາວ ຈຳກັດຜູ້ດຽວ

ເຜີຍ​ແຜ່​ໂດຍ​: ທ່ານ ຈັນ​ທະ​ໄມ​ຕ​ຣີ ເທບ​ສີ​ເມືອງ ເວ​ລາ: 02/10/2020 10:51:15 ຈຳ​ນວນ​​ຢ້ຽມ​ຊົມ 1090 ຄັ້ງ

ທ່ານ ນາງ ເຂັມມະນີ ພົນເສນາ ລັດຖະມົນຕີວ່າການ ກະຊວງອຸດສາຫະກໍາ ແລະ ການຄ້າ ພ້ອມດ້ວຍຄະນະໄດ້ ່ ລົງຢ້ຽມຢາມ ໂຮງງານອຸດສາຫະກຳໂຕໂຢລາວຈຳກັດຜູ້ດຽວ ທີ່ບ້ານໂພຄໍາ ເມືອງໄຊທານີ ນະຄອນຫຼວງວຽງຈັນ ໃນວັນ ທີ່ 1 ຕຸລານີ້ ໂດຍໄດ້ຮັບການຕ້ອນຮັບຂອງທ່ານ ລັງກອນ ໄຊຍະວົງ ປະທານ ໂຮງງານອຸດສາຫະກາໍໂຕໂຢລາວ ຈາໍກັດຜູ້ດຽວ.
ໃນໂອກາດລົງຢ້ຽມຢາມຄັ້ງນີ້ ທ່ານລັດຖະມົນຕີພ້ອມ ຄະນະໄດ້ຮັບຟັງການລາຍງານ ກ່ຽວກັບ ການຂະຫຍາຍຕົວ ຂອງບໍລິສັດໂດຍຫຍໍ້ຊຶ່ງສະເຫນີ ໂດຍທ່ານ ລັງກອນ ໄຊຍະວົງ ໃຫ້ຮູ້ວ່າ : ໂຮງງານອຸດສາຫະ ກຳໂຕໂຢລາວຈຳກັດ ໄດ້ສ້າງຕັ້ງຂຶ້ນໃນປີ 2016 ເພື່ອຜະລິດທໍ່ ແລະ ອຸປະກອນກໍ່ສ້າງລະບົບນ້ໍາ, ໄດ້ຮັບການຖ່າຍທອດເຕັກໂນໂລຊີຈາກຕ່າງປະເທດ, ປັດຈຸບັນປະກອບມີ 2 ສາຂາ ແລະ 800 ກວ່າຕົວແທນຈຳໜ່າຍທົ່ວປະເທດ, ໃນນັ້ນຕັ້ງຢູ່ ບ້ານໄຊສະຫວ່າງ 1 ສາງໃຫຍ, ບ້ານສະພັງມຶກ ເມືອງໄຊທານີ, ບ້ານສີບຸນເຮືອງ ເມືອງຈັນທະບູລີ, ບ້ານຫນອງໜຽວ ເມືອງສີໂຄດຕະບອງ ແລະ ໂຮງງານ ອຸດສາຫະກຳໂຕໂຢລາວຈຳກັດ ຜູ້ດຽວ, ບ້ານ ໂພຄໍາ ເມືອງໄຊທານີ, ສ່ວນວັດຖຸດິບ ໄດ້ນຳເຂົ້າມາຈາກຕ່າງປະເທດຄື: ໄທ, ຫວຽດນາມ, ສິງກະໂປ, ແຄວນໄຕ້ຫວັນ.
ທ່ານ ລັງກອນ ໄຊຍະວົງ ໄດ້ກ່າວໃຫ້ຮູ້ຕື່ມອີກວ່າ : ສາໍລັບທິດທາງພັດທະນາ ໃນ ອະນາຄົດ ແມ່ນຈະໄດ້ສືບຕໍ່ພັດທະນາເຄື່ອງຈັກ ແລະ ເຕັກໂນໂລຊີ ເພື່ອຜະລິດທໍ່ ແລະ ອຸປະກອນມາຮັບໃຊ້ລະບົບນ້ຳກະເສດ (ປູກຝັງ ແລະ ລ້ຽງສັດ) ເພື່ອສະຫນອງ ໃຫ້ທັນການ ແລະ ຊ່ວຍຫຼຸດຕົ້ນທຶນການຜະລິດຂອງຊາວກະສິກອນ ແລະ ຜູ້ລົງທຶນໃນຂະແຫນງການກະເສດ, ສືບຕໍ່ສ້າງບຸກຄະລາກອນ ໃຫ້ມີຄວາມຊ່ຽວຊານໃນການຄຸມຄອງຜະລິດ ແລະ ການອອກແບບລະບົບນ້ໍາປະເພດຕ່າງໆ ເພື່ອບໍລິການລູກຄ້າໃນ ສປປ ລາວ ໃຫ້ມີຄວາມຍືນຍົງ, ສືບຕໍ່ສ້າງຍີ່ຫໍ້ສິນຄ້າ (ແບຣນ) ແລະ ສ້າງຄ່ານິຍົມໃນການໃຊ້ຜະລິດຕະພັນລາວທີ່ໄດ້ຄຸນນະພາບພາຍໃຕ້ກິດຈະກຳ ຜະລິດໃນລາວ ຫຼື Made in Laos, ສືບຕໍ່ຂະຫຍາຍ ຕະຫຼາດໄປຫາບັນດາໂຄງການລົງທຶນຂອງ ຕ່າງປະເທດ ເພື່ອສົ່ງເສີມການສົ່ງອອກກັບທີ່ ເພື່ອຊອກຫາແຫຼ່ງທຶນຕ່າງປະເທດເພື່ອເປັນແຫຼ່ງທຶນ ໃນການຈັດຊື້ວັດຖຸດິບຈາກຕ່າງປະເທດ.
ຕໍ່ມາທ່ານນາງ ເຂັມມະນີ ພົນເສນາ ພ້ອມດ້ວຍຄະນະ ກໍ່ໄດ້ໄປຢ້ຽມຢາມຫໍພິພິທະພັນ ໄມ້ລາວ, ທີ່ເມືອງໄຊທານີ ນະຄອນຫຼວງວຽງຈັນ.
(ຂາວ-ພາບ : ສຸກສາຄອນ)


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110