ເຈົ້າແຂວງໄຊຍະບູລີ ລົງຊຸກຍູ້ວຽກງານຮອບດ້ານຢູ່ເມືອງເງິນ

ເຜີຍ​ແຜ່​ໂດຍ​: ທ່ານ ຈັນ​ທະ​ໄມ​ຕ​ຣີ ເທບ​ສີ​ເມືອງ ເວ​ລາ: 02/10/2020 11:00:05 ຈຳ​ນວນ​​ຢ້ຽມ​ຊົມ 926 ຄັ້ງ

   ທ່ານ ພົງ​ສະຫວັນ ສິດ​ທະ​ວົງ ເຈົ້າແຂວງໄຊ​ຍະ​ບູ​ລີ ພ້ອມ​ດ້ວຍ​ທີ​ມ​ງານ ໄດ້​ລົງ​ເຄື່ອນໄຫວ​ຊຸກຍູ້​ວຽກ​ງານ​ຮອບດ້ານຢູ່​ເມືອງ​ເງິນ ແຂວງ​ໄຊ​ຍະ​ບູ​ລີ ເມື່ອ​ບໍ່​ດົນ​ຜ່ານ​ມານີ້.
ໃນ​ໂອກາດ​ທີ່​ລົງ​ມາ​ເຄື່ອນ​ໄຫວ​ຊຸກຍູ້​ວຽກ​ງານ​ໃນ​ຄັ້ງ​ນີ້ ທ່ານໄດ້ໂອ້​ລົມຕໍ່ຄະນະ​ນຳ​ຂອງ​ເມືອງ ຊຶ່ງ​ທ່ານໄດ້​ເນັ້ນ​ໜັກ​ບາງ​ບັນຫາ​ທີ່​ສໍາ​ຄັນ​ດັ່ງນີ້: ໃຫ້​ເອົາໃຈໃສ່​ໃນ​ການຈັດຕັ້ງຜັນ​ ຂະຫຍາຍ​ມະຕິ​ກອງ​ປະຊຸມ​ໃຫຍ່ ຄັ້ງ​ທີ VII ຂອງ​ອົງຄະ​ນະ​ພັກ​ແຂວງ ກໍຄືມະຕິ​ກອງ​ປະຊຸມ​ໃຫຍ່​ ຄັ້ງ​ທີ V ຂອງ​ອົງ ຄະ​ນະ​ພັກ​ເມືອງ. ໂດຍ​ຫັນ​ມາ​ເປັນ​ແຜນການ, ແຜນ​ງານ, ໂຄງການລະອຽດແບ່ງ​ບຸກຄົນ​ຮັບຜິດຊອບ ໃນ​ການຈັດຕັ້ງ​ປະຕິບັດ​ທຸກໆ​ຂົງເຂດ​ວຽກ​ງານ ເປັນຕົ້ນ ວຽກ​ງານ​ປ້ອງ​ກັນ​ຊາດ ​-​ ປ້ອງ​ກັນ​ຄວາມ​ສະຫງົບ, ວຽກ​ງານ​ເສດຖະກິດ, ວຽກ​ງານ​ວັດທະນະ​ທຳ​ -​ ສັງ​ຄົມ ແລະ ໃຫ້​ສືບຕໍ່ລົງ​ເຜີຍແຜ່ຜົນສຳເລັດ​ກອງ​ປະຊຸມ​ໃຫຍ່ ຄັ້ງ​ທີ VII ຂອງ​ອົງຄະ​ນະ​ພັກ​ແຂວງ​ໄຊຍະ ​ບູ​ລີ ໃຫ້​ພໍ່​ແມ່​ປະຊາຊົນ​ຊາວ​ເມືອງ​ເງິນ ໄດ້​ຮັບ​ຮູ້ຢ່າງ​ກວ້າງຂວາງ ທົ່ວ​ເຖິງ ແລະ​ ໃຫ້​ສຳເລັດຢູ່​ໃນ​ເດືອນ​ຕຸລາ 2020 ນີ້.
ຕອນ​ທ້າຍ​ທ່ານ ຍັງ​ໄດ້​ເນັ້ນ​ໜັກ ໃຫ້​ຄະນະ​ພັກ ອົງການ​ປົກຄອງ​ເມືອງ ກໍຄື​ພາກສ່ວນ​ທີ່​ກ່ຽວຂ້ອງ ພ້ອມ​ກັນ​ເອົາໃຈໃສ່​ຜັນຂະຫຍາຍ ຄຳ​ສັ່ງ​ແນະນຳ​ຂອງ​ທ່ານ​ເຈົ້າແຂວງ ສະບັບ​ເລກ​ທີ 270/ຈຂ ຊຍ ລົງ​ວັນ​ທີ 22 ກັນຍາ 2020 ວ່າ​ດ້ວຍການ ​ປ້ອງ​ກັນ ແລະ ສະກັດ​ກັ້ນ​ພະ ຍາດອະຫິ​ວາ​ໝູອາ​ຟຣິກ​ກາ ທີ່​ພວມ​ລະບາດ​ຢູ່​ບັນດາເມືອງ​ໃກ້​ຄຽງ​ໃນ​ປັດຈຸບັນ​ນີ້ ເປັນຕົ້ນ ເມືອງ​ຊຽງ​ຮ່ອນ, ເມືອງ​ຄອບ. ໃຫ້​ແຕ່ງຕັ້ງ​ຄະນະ​ສະເພາະ​ກິດ ຕ້ານ ແລະ ສະກັດ​ກັ້ນຕໍ່ພະ ຍາດ​ດັ່ງກ່າວ ໃຫ້​ເຂັ້ມ​ງວດເພາະ​ ເມືອງ​ເງິນ ເຄີຍ​ມີ​ການລະບາດ ພະຍາດອະຫິ​ວາ​ໝູອາ​ຟຣິກາ ມາ​ແລ້ວ 1 ຄັ້ງ​ໃນ​ທ້າຍ​ປີ 2019 ຜ່ານ​ມາ. ເພື່ອ​ເປັນ​ການ​ຮັບ ປະກັນ​ບໍ່​ໃຫ້​ມີ​ການ​ລະບາດ ເກີດຂຶ້ນ​​ຕື່ມອີກ​ເມືອງ​ຈະ​ຕ້ອງ​ໄດ້​ຕັ້ງ​ຈຸດ​ກວດກາ​ສີດ​ພົ່ນ​ຢາ​ຂ້າ​ເຊື້ອລະຫວ່າງ​ເມືອງ​ຕໍ່​ເມືອງ, ຫ້າມ​ບໍ່​ໃຫ້​ມີ​ການ​ນຳ​ເຂົ້າ, ສົ່ງ​ອອກ , ເຄື່ອນ​ຍ້າຍ, ຊື້, ຂາຍ, ບໍລິໂພກ ແລະ ຜະລິດ​ຕະ​ພັນ​ໝູ​ທຸກ​ຊະນິດຢ່າງ​ເດັດ​ຂາດ.
(ຂ່າວ: ອິນ​ແປງ ແຫວນ​ຄຳ)


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110