ກອງປະຊຸມໃຫຍ່ຄັ້ງທີ VIII ຂອງຜູ້ແທນອົງຄະນະພັກແຂວງຫຼວງພະບາງ

ເຜີຍ​ແຜ່​ໂດຍ​: ທ່ານ ຈັນ​ທະ​ໄມ​ຕ​ຣີ ເທບ​ສີ​ເມືອງ ເວ​ລາ: 02/10/2020 11:03:06 ຈຳ​ນວນ​​ຢ້ຽມ​ຊົມ 1158 ຄັ້ງ


ກອງປະຊຸມໃຫຍ່ຄັ້ງທີ VIII ຂອງຜູ້ແທນອົງຄະນະພັກແຂວງຫຼວງພະບາງໄດ້ເປີດຂຶ້ນວັນທີ່ 2 ຕຸລາ ນີ້, ທີ່ສະໂມສອນໃຫຍ່ຫ້ອງວ່າການແຂວງ ໂດຍການເຂົ້າຮ່ວມຂອງສະຫາຍ ທອງລຸນ ສີສຸລິດ ກໍາມະການກົມການເມືອງສູນກາງພັກ ນາຍົກລັດຖະມົນຕີ ພ້ອມດ້ວຍຜູ້ແທນສົມບູນ 264 ສະຫາຍ, ຍິງ 30 ສະຫາຍ ທີ່ເປັນຕົວແທນໃຫ້ສະມາຊິກພັກ ໃນທົ່ວແຂວງ 23.909 ສະຫາຍ ແລະ ຜູ້ແທນຮັບເຊີນເຂົ້າຮ່ວມ.
ກອງປະຊຸມຄັ້ງນີ້, ສະຫາຍ ຄຳຂັນ ຈັນທະວີສຸກ ກຳມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງຫຼວງພະບາງ ປະທານກອງປະຊຸມ ໄດ້ກ່າວເປີດກອງປະຊຸມ ພ້ອມທັງຜ່ານ ຮ່າງລາຍງານການເມືອງ ວ່າ: ກອງປະຊຸມໃຫຍ່ຄັ້ງນີ້, ດຳເນີນພາຍໃຕ້ຄຳຂວັນ: "ຍົກສູງຄວາມສາມາດນໍາພາ ແລະ ຄວາມເປັນແບບຢ່າງນໍາໜ້າຕໍ່ສູ້ ຂອງອົງຄະນະພັກ, ຂຸດຄົ້ນ ແລະ ເສີມຂະຫຍາຍຄວາມອາດສາມາດບົ່ມຊ້ອນ ແລະ ກຳລັງແຮງສັງລວມ ເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາຕາມແນວທາງປ່ຽນແປງໃໝ່ຂອງພັກ, ເຮັດໃຫ້ແຂວງຫຼວງພະບາງ ນັບມື້ນັບໜັກແໜ້ນ, ພັດທະນາຕໍ່ເນື່ອງ, ມີຄວາມຍືນຍົງ, ກ້າວສູ່ທັນສະໄໝ ແລະ ຍຸຕິທຳ". ໃນນັ້ນ, ໄດ້ຍົກໃຫ້ເຫັນເຖິງຜົນສຳເລັດຕະຫຼອດໄລຍະ 5 ປີ ແຫ່ງການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ X ຂອງພັກ, ມະຕິກອງປະຊຸມໃຫຍ່ ຄັ້ງທີ VII ຂອງອົງຄະນະພັກແຂວງ, ພາຍໃຕ້ການນໍາພາ-ຊີ້ນໍາ ຂອງຄະນະບໍລິຫານງານພັກແຂວງ ແລະ ຄະນະພັກທຸກຂັ້ນ, ເຮັດໃຫ້ທົ່ວແຂວງມີສະຖຽນລະພາບທາງດ້ານການເມືອງອັນໜັກແໜ້ນ, ສັງຄົມສືບຕໍ່ມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍດີຂຶ້ນກວ່າເກົ່າ, ປະກົດການຫຍໍ້ທໍ້ໃນສັງຄົມຫຼຸດລົງເປັນກ້າວໆ, ຍ້ອນຄະນະພັກ ໄດ້ຢຶດໝັ້ນ ແລະ ໄດ້ເອົາໃຈໃສ່ສຶກສາອົບຮົມປະຊາຊົນບັນດາເຜົ່າ ໃຫ້ເຊື່ອມຊຶມ ແລະ ເປັນເຈົ້າການເຂົ້າຮ່ວມປະຕິບັດແນວທາງປ້ອງກັນຊາດ-ປ້ອງກັນຄວາມສະຫງົບ ທົ່ວປວງຊົນຮອບດ້ານ ແລະ ສອດຫ້ອຍເຂົ້າໃນທຸກຂົງເຂດວຽກງານ ຕິດພັນກັບການກໍ່ສ້າງຮາກຖານການເມືອງ ແລະ ພັດທະນາຊົນນະບົດຮອບດ້ານ, ສ້າງພື້ນຖານໃຫ້ເສດຖະກິດຂອງແຂວງ ສືບຕໍ່ຂະຫຍາຍຕົວຢ່າງຕໍ່ເນື່ອງ ຕາມທິດທີ່ກໍານົດໄວ້, ຊີວິດການເປັນຢູ່ຂອງປະຊາຊົນ ໄດ້ຮັບການປົວແປງ ນັບມື້ນັນດີຂຶ້ນ, ມາເຖິງປັດຈຸບັນ ປະຊາຊົນຫຼາຍທ້ອງຖິ່ນ ໄດ້ດຳເນີນການປູກຝັງ-ລ້ຽງສັດຕາມທ່າແຮງ ແລະ ມູນເຊື້ອ ຂອງແຕ່ລະຄອບຄົວ, ດ້ວຍການນຳໃຊ້ເຕັກນິກວິຊາການໃໝ່, ເປັນຕົ້ນ ການລ້ຽງສັດແບບເປັນລັອກ, ເປັນຟາມ, ການທອມສັດໃຫຍ່ ຕິດພັນກັບການປູກຫຍ້າລ້ຽງສັດ, ການປູກຜັກປອດສານພິດ, ການປູກພືດ, ຕົ້ນໄມ້ອຸດສາຫະກໍາ ແລະ ຕົ້ນໄມ້ໃຫ້ໝາກປະເພດຕ່າງໆ, ເຮັດໃຫ້ພວກເຮົາມີຜະລິດຕະພັນສິນຄ້າກະສິກໍາເພີ່ມຂຶ້ນ ເພື່ອບໍລິໂພກພາຍໃນ ແລະ ສົ່ງອອກຫຼາຍຂຶ້ນ, ພື້ນຖານໂຄງລ່າງ ແຕ່ລະດ້ານ ໄດ້ຮັບການປັບປຸງ ແລະ ສ້າງຂຶ້ນໃໝ່ຈຳນວນໜຶ່ງ, ວຽກງານແຕ່ລະຂົງເຂດໄດ້ມີຜົນສໍາເລັດໃໝ່, ເຮັດໃຫ້ລວມຍອດມູນຄ່າຜະລິດຕະພັນພາຍໃນ (GDP) ບັນລຸໄດ້ 35.042 ຕື້ກີບ, ສະເລ່ຍ 7.008 ຕື້ກີບຕໍ່ປີ ອັດຕາການຂະຫຍາຍຕົວຂອງເສດຖະກິດ ເພີ່ມຂຶ້ນສະເລ່ຍ 7,3% ຕໍ່ປີ, ສະເລ່ຍລາຍຮັບເພີ່ມຂຶ້ນ ຈາກ 13.900.000 ກ່ວາກີບ ຫຼື 1.746 ໂດລາ ຕໍ່ຄົນຕໍ່ປີ ໃນປີ 2016 ມາເປັນ 16.800.000 ກ່ວາກີບ ຫຼື 2.110 ໂດລາ ຕໍ່ຄົນຕໍ່ປີ ໃນປີ 2020, ທຽບໃສ່ແຜນການປະຕິບັດໄດ້ 90,87%. ຄະນະພັກແຕ່ລະຂັ້ນ ໄດ້ເປັນເຈົ້າການສຶກສາອົບຮົມ ການເມືອງ-ແນວຄິດ ດ້ວຍຫຼາຍຮູບການທີ່ສອດຄ່ອງ ຢ່າງເປັນປົກກະຕິ ອັນໄດ້ເຮັດໃຫ້ສະຕິການເມືອງ ຂອງສະມາຊິກພັກ, ພະນັກງານ ແລະ ປະຊາຊົນ ສູງຂຶ້ນ; ມີຈໍານວນໜ່ວຍພັກເພີ່ມຂຶ້ນ 92 ໜ່ວຍ, ສະມາຊິກພັກເພີ່ມຂຶ້ນ 3,592 ສະຫາຍ, ຕີລາຄາປະເພດສະມາຊິກພັກ ໄດ້ປະເພດແຂງ ກວມ 76,90%, ໜ່ວຍພັກປອດໃສ, ເຂັ້ມແຂງ, ໜັກແໜ້ນກວມ 82,70%. ຈາກນັ້ນ, ຜູ້ເຂົ້າຮ່ວມກອງປະຊຸມໄດ້ຮັບຟັງການຜ່ານຮ່າງແຜນພັດທະນາເສດຖະກິດ-ສັງຄົມ 5 ປີ ຄັງທີ IX ແຕ່ປີ 2021-2025 ຂອງແຂວງຫຼວງພະບາງ, ຮັບຟັງການປະກອບຄຳເຫັນ ຂອງຂະແໜງການ-ກົມກອງ ແລະ ບັນດາຕົວແບບແຕ່ລະດ້ານ, ພ້ອມທັງດຳເນີນການປ່ອນບັດເລືອກຕັ້ງ ເອົາຄະນະບໍລິຫານງານພັກແຂວງຊຸດໃໝ່, ໃນຕອນທ້າຍກອງປະຊຸມໄດ້ຮັບຟັງການມີຄຳເຫັນຊີ້ນຳຈາກ ສະຫາຍ ທອງລຸນ ສີສຸລິດ ກໍາມະການກົມການເມືອງສູນກາງພັກ ນາຍົກລັດຖະ ມົນຕີ ຕື່ມອີກ.
ຂ່າວ: ອາພຸດເດດ ບຸບຜາ; ພາບ: ບົວວອນ ດວງສະຫວັດ


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110