ຈົ່ງສະຫຼອງສົ່ງທ້າຍປີເກົ່າ ແລະ ຕ້ອນຮັບປີໃໝ ດ້ວຍບັນຍາກາດເບີກບານມ່ວນຊື່ນ

ວັນທີ 20/1/2019 ແມ່ນວັນຄົບຮອບ 70 ປີແຫ່ງການສ້າງຕັ້ງກອງທັບປະຊາຊົນລາວ ຊຶ່ງໃນໄລຍະດັ່ງກ່າວ  ກອງທັບປະຊາຊົນລາວ ໄດ້ເຕີບໃຫຍ່ເຂັ້ມແຂງ, ມີຜົນງານ ແລະ ໄຊ ຊະນະທີ່ໃຫຍ່ຫຼວງ.

ພວກເຮົາສຸດທີ່ເອກອ້າງທະນົງໃຈທີ່ເຫັນວ່າ: ກວ່າເຄິ່ງສະຕະວັດແຫ່ງການຕໍ່ສູ້ອັນອົງອາດກ້າແກ່ນນັ້ນ  ກຳລັງປະກອບອາວຸດຂອງພວກເຮົາ ໄດ້ມີຜົນງານ ແລະ ໄຊຊະນະທີ່ນັບມື້ນັບ ໃຫຍ່ຫຼວງຂຶ້ນເລື້ອຍໆ, ສ້າງວິລະກຳລຳ້ເລີດປະກອບສ່ວນຢ່າງສຳຄັນ ແລະ ສົມກຽດເຂົ້າໃນໄຊຊະນະລວມຂອງປະເທດຊາດ ກໍຄືການຂຽນໜ້າປະຫວັດສາດຍຸກໃໝ່ຂອງຊາດລາວທີ່ ສະຫວ່າງສະໄຫວ. ພັກ ແລະ ລັດເຮົາ ຍາມໃດກໍມີຄວາມພາກພູມໃຈ ແລະ ເຊື່ອໝັ້ນຢ່າງໜັກແໜ້ນຕໍ່ຖັນແຖວພະນັກງານ-ນັກຮົບໃນກຳລັງປະກອບອາວຸດ ກໍຄືພະນັກງານປະຕິວັດອາວຸໂສ (ພະນັກງານບຳນານ) ຊຶ່ງຍາມໃດກໍໄດ້ເສີມຂະຫຍາຍທາດແທ້ ແລະ ມູນເຊື້ອວິລະຊົນຂອງກອງທັບປະຕິວັດ. ເຖິງຈະຕົກຢູ່ໃນສະພາບທີ່ມີຄວາມຫຍຸ້ງຍາກທຸລະກັນດານພຽງໃດກໍຕາມ. ແຕ່ກໍຍັງຢຶດໝັ້ນໃນຄວາມຈົງຮັກພັກດີ, ຊື່ສັດບໍລິສຸດຢ່າງສຸດຊຶ້ງຕໍ່ພັກ, ຕໍ່ປະເທດຊາດ

ແລະ ປະຊາຊົນ, ບໍ່ຢ້ານກົວຕໍ່ອຸປະສັກ ແລະ ການເສຍສະຫຼະໃດໆ. ພາຍຫຼັງປະເທດຊາດໄດ້ຮັບການປົດປ່ອຍ ໂດຍກຳແໜ້ນ 2 ໜ້າທີ່ຍຸດທະສາດຂອງພັກ, ກອງທັບເຮົາໄດ້ເສີມຂະຫຍາຍ ແລະ ມູນເຊື້ອຂອງຕົນ, ອອກແຮງປັບປຸງກໍ່ສ້າງລະບົບປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນ ແລະ ຮອບດ້ານ, ຍາມໃດກໍໄດ້ເຊີດຊູສະຕິລະວັງຕົວ, ຝຶກແອບຮ່ຳຮຽນ, ກຽມພ້ອມສູ້ຮົບເປັນກຳລັງຫຼັກແຫຼ່ງສະກັດກັ້ນ ແລະ ທັບມ້າງທຸກກົນອຸບາຍຂອງພວກອິດທິກຳລັງປໍລະປັກ ທີ່ຫວັງມ້າງເພທຳລາຍ, ເກາະຜິດດ້ວຍອາວຸດຢຶດຊາຍແດນໄດ້ຢ່າງທັນການ, ພິລະອາດຫານ ແລະ ມີໄຊ, ປົກປັກຮັກສາເອກະລາດ, ອຳນາດອະທິປະໄຕ ແລະ ຜືນແຜ່ນດິນອັນຄົບຖ້ວນຂອງປະເທດຊາດໄວ້ໄດ້ຢ່າງໝັ້ນຄົງ, ຮັບປະກັນສະຖຽນລະພາບ ແລະ ຄວາມສະຫງົບທາງການເມືອງໄວ້ໄດ້ຢ່າງໜັກແໜ້ນ, ປະກອບສ່ວນຢ່າງໃຫຍ່ຫຼວງເຂົ້າໃນການພັດທະນາເສດຖະກິດ-ສັງຄົມຂອງຊາດ.

ຫວນຄືນ 70 ປີທີ່ຜ່ານມາ, ຜົນງານໄຊຊະນະອັນເປັນປະຫວັດສາດຂອງກອງທັບເຮົານັ້ນ  ກ່ອນອື່ນໝົດແມ່ນໄດ້ມາຈາກການນຳພາອັນຖືກຕ້ອງສະຫຼາດສ່ອງໃສຂອງພັກ  ປະຊາຊົນ ປະຕິວັດລາວ ຊຶ່ງພັກເປັນຜູ້ສ້າງຕັ້ງນຳພາ ແລະ ສຶກສາອົບຮົມກອງທັບເຮົາຕະຫຼອດມາ. ພັກໄດ້ວາງແນວທາງລວມ ແລະ ແນວທາງການທະຫານຢ່າງປະດິດສ້າງຖືກກັບເງື່ອນໄຂຂອງສະພາບການແຕ່ລະໄລຍະ, ໄດ້ວາງຍຸດທະສາດການຕໍ່ສູ້ທີ່ຖືກຕ້ອງ ແລະ ຍຸດໂທບາຍທີ່ຄ່ອງແຄ້ວ, ມີໄຫວພິບໄດ້ນຳໃຊ້ ແລະ ສົມທົບບັນດາຮູບການຕໍ່ສູ້ຢ່າງຊຳນິຊຳນານ, ເສີມຂະ ຫຍາຍທຸກກຳລັງບົ່ມຊ້ອນພາຍໃນປະເທດ ໂດຍສົມທົບຢ່າງແໜ້ນກັບກຳລັງແຮງຂອງຍຸກສະໄໝ, ຮ່ວມສຳພັນສູ້ຮົບກັບກອງທັບ ແລະ ປະຊາຊົນຫວຽດນາມອ້າຍນ້ອງ, ຍາດແຍ່ງເອົາການສະໜັບສະໜູນຈາກປະເທດເພື່ອນມິດ ແລະ ບັນດາກຳລັງທີ່ກ້າວໜ້າໃນທົ່ວໂລກ. ກອງທັບປະຊາຊົນລາວ ໄດ້ພ້ອມກັບປະຊາຊົນລາວທັງຊາດ ດຳເນີນການຕໍ່ສູ້ຢ່າງອົງອາດກ້າຫານ, ທົນທານໜຽວແໜ້ນ ແລະ ບໍ່ຍອມຈຳນົນ ເຮັດໃຫ້ການປະຕິວັດເຮົາໄດ້ຮັບໄຊຊະນະອັນສະຫງ່າງາມເລື້ອຍໆມາ, ສາມາດຕີຊະນະຈັກກະພັດຜູ້ຮຸກຮານໃຫ້ປະລາໄຊຢ່າງອັບອາຍຂາຍໜ້າ, ລົບລ້າງລະບອບເກົ່າທີ່ຄົງຕົວມາຫຼາຍຮ້ອຍປີ, ໄດ້ສະຖາປະນາລະບອບໃໝ່ ລະບອບທີ່ປະຊາຊົນທຸກເຜົ່າຊົນ ເປັນເຈົ້າປະເທດຊາດຢ່າງແທ້ຈິງ. ພ້ອມກັນນັ້ນ ກອງທັບປະຊາຊົນລາວ ໄດ້ສ້າງມູນເຊື້ອອັນສະຫງ່າງາມຂອງຕົນໄວ້ຄື: ມີຄວາມຈົງຮັກພັກດີຕໍ່ພັກ, ຕໍ່ປະເທດຊາດ, ຕໍ່ປະຊາຊົນ ແລະ ອຸດົມການສັງຄົມນິຍົມ; ມີນ້ຳໃຈຕໍ່ສູ້ພິລະອາດຫານ, ກ້າແກ່ນໜຽວແໜ້ນ, ມີໄຫວພິບ ແລະ ປະດິດສ້າງ; ມີນ້ຳໃຈດຸໝັ່ນຂະຫຍັນພຽນ, ອອກແຮງເພີ່ມພູນຜະລິດຜົນ ແລະ ປະຢັດມັດທະຍັດ; ມີຄວາມສາມັກຄີອັນແໜ້ນແຟ້ນກັບປະຊາຊົນບັນດາເຜົ່າ; ໄດ້ສາມັກຄີກັບກອງທັບບັນດາປະເທດສັງຄົມນິຍົມອ້າຍນ້ອງ  ແລະ  ບັນດາປະເທດເພື່ອນມິດທີ່ກ້າວໜ້າໃນໂລກ  ໂດຍສະເພາະແມ່ນສາມັກຄີຮ່ວມສຳພັນສູ້ຮົບແບບພິເສດກັບກອງທັບປະຊາຊົນຫວຽດນາມອ້າຍນ້ອງ. ກອງທັບປະຊາຊົນລາວ ເວລາໃດກໍຮັກສາມູນເຊື້ອອັນດີງາມ, ມີປະຊາທິປະໄຕ ແລະ ມີລະບຽບວິໄນ.

ເພື່ອສືບຕໍ່ຮັກສາ ແລະ ເສີມຂະຫຍາຍມູນເຊື້ອອັນສະຫງ່າອົງອາດກ້າຫານຂອງກອງທັບປະຊາຊົນລາວ ເຂົ້າໃນການປົກປັກຮັກສາ ແລະ ສ້າງສາພັດທະນາປະເທດຊາດ, ຕອບສະໜອງກັບຄວາມຮຽກຮ້ອງຕ້ອງການຂອງສະພາບການໃໝ່ ແລະ ໜ້າທີ່ໄລຍະໃໝ່ນັ້ນ  ຕ້ອງສືບຕໍ່ເອົາໃຈໃສ່ສຶກສາອົບຮົມມູນເຊື້ອ, ທາດແທ້ປະຕິວັດ ແລະ ທາດແທ້ປະຊາຊົນຂອງກອງທັບປະຊາຊົນລາວ ໃຫ້ເລິກເຊິ່ງ ແລະ ໜັກແໜ້ນ, ເປັນກຳລັງທີ່ຈົງຮັກພັກດີ ແລະ ເຄື່ອນໄຫວຢູ່ພາຍໃຕ້ການນຳພາເດັດຂາດໂດຍກົງ ແລະ ຮອບດ້ານຂອງພັກ;  ຕັ້ງໜ້າສຶກສາອົບຮົມປຸກລະດົມທົ່ວພັກ, ທົ່ວລັດ ແລະ ທົ່ວປວງຊົນລາວເຮົາເຂົ້າຮ່ວມວຽກງານກໍ່ສ້າງຮາກຖານການເມືອງ ແລະ ພັດທະນາຊົນນະບົດຮອບດ້ານໃຫ້ເປັນຂະບວນການກວ້າງຂວາງ  ແລະ  ແຂງແຮງກວ່າເກົ່າ, ເອົາ ໃຈໃສ່ພັດທະນາເສດຖະກິດ-ສັງຄົມຕິດແໜ້ນກັບການສ້າງ ທ່າສະໜາມປ້ອງກັນຊາດທົ່ວປວງຊົນ, ສຸມໃສ່ການແກ້ໄຂຄວາມທຸກຍາກຂອງປະຊາຊົນໃຫ້ເປັນຈິງ; ຕັ້ງໜ້າປັບປຸງກໍ່ ສ້າງກຳລັງຫຼວງໃຫ້ມີກຳລັງແຮງສູ້ຮົບເປັນຫຼັກແຫຼ່ງ ແລະ ສາ ມາດຕອບຕ້ານ, ແກ້ໄຂສະພາບການທີ່ເກີດຂຶ້ນໄດ້ຢ່າງມີປະ ສິດທິພາບ, ເພີ່ມທະວີການປັບປຸງກໍ່ສ້າງກຳລັງທ້ອງຖິ່ນ ແລະ ຮາກຖານໃຫ້ສາມາດເປັນກຳລັງຈັ້ງທ່າ, ຊ່ວຍໜູນ ແລະ ແກ້ໄຂ ສະພາບການທີ່ເກີດຂຶ້ນຢູ່ທ້ອງຖິ່ນຕົນ, ປົກປັກຮັກສາລະບອບປະຊາທິປະໄຕ ປະຊາຊົນໄວ້ຢ່າງໝັ້ນຄົງ; ປະກອບພາຫະນະ-ເຕັກນິກທີ່ທັນສະໄໝໃຫ້ແກ່ກົມກອງເຫຼົ່າຮົບ ແລະ ຍົກລະ ດັບພະນັກງານ, ນັກຮົບໃນກຳລັງປະກອບອາວຸດດ້ວຍການ ຈັດຕັ້ງຝຶກແອບຢ່າງເປັນປະຈຳ ເພື່ອໃຫ້ສາມາດເຄື່ອນໄຫວ ປະຕິບັດວຽກງານວິຊາສະເພາະໄດ້ດີ, ມີຄວາມຊຳນານໃນການເຄື່ອນໄຫວສູ້ຮົບ ແລະ ອອກແຮງງານປະດິດສ້າງ; ປັບປຸງວຽກງານພະລາທິການ ແລະ ການລ້ຽງດູກອງທັບ, ປະຕິບັດລະບອບນະໂຍບາຍຕ່າງໆຕໍ່ນາຍ ແລະ ພົນທະຫານໃຫ້ດີຂຶ້ນເປັນກ້າວໆ.                          

                                            (ໂດຍ: ມິງໂກ)