ເອົາໃຈໃສ່ຊີ້ນຳ-ນຳພາຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ຄືກັບຍຸດທະບັ້ນຮົບເສດຖະກິດ

ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານ ແລະ ແຜນເງິນຕາ ປະຈຳປີ 2019 ແລະ ທິດທາງແຜນການປະຈຳປີ 2020 ນັ້ນ ກອງປະຊຸມຄົບຄະ ນະຂອງຄະນະບໍລິຫານງານສູນກາງພັກ ຄັ້ງທີ 9 ສະໄໝທີ X ໄດ້ຕີລາຄາວ່າ: ໃນໜຶ່ງປີຜ່ານມາດ້ວຍຄວາມບຸກບືນສູ້ຊົນຂອງທົ່ວພັກ, ທົ່ວລັດ ແລະ ທົ່ວປວງຊົນໄດ້ເຮັດໃຫ້ແຜນພັດທະນາເສດຖະກິດ-ສັງຄົມ, ແຜນງົບປະມານ ແລະ ແຜນເງິນຕາສ່ວນໃຫຍ່ ບັນລຸໝາກຜົນຕາມຄາດໝາຍທີ່ວາງໄວ້, ເສດຖະກິດຍັງ ສືບຕໍ່ຂະຫຍາຍຕົວໃນລະດັບ 6,4%, ຂະແໜງກະສິກຳ, ຂະ ແໜງອຸດສາຫະກຳ, ຂະແໜງບໍລິການ, ການລົງທຶນສືບຕໍ່ຂະ ຫຍາຍຕົວຕໍ່ເນື່ອງ, ການນຳເຂົ້າ-ສົ່ງອອກໃນປີນີ້ເກີນດູນ.

ສຳລັບທິດທາງແຜນການ ໃນປີ 2020 ນັ້ນ ມະຕິ 9 ສະໄໝທີ X ຂອງພັກ ໄດ້ເນັ້ນວ່າ: ຄາດໝາຍໃຫຍ່ ແມ່ນສືບຕໍ່ແກ້ໄຂບັນຫາ ແລະ ສາເຫດຕ່າງໆທີ່ຍັງຄົງຄ້າງ; ສືບຕໍ່ຢຶດໝັ້ນ ແລະ ຄຸ້ມຄອງເສດຖະກິດມະຫາພາກໃຫ້ມີຄວາມໝັ້ນທ່ຽງ,  ຖືເປັນໜ້າທີ່ໃຈກາງໃນການສຸມໃສ່ແກ້ໄຂໜີ້ສິນ, ປັບຄວາມຄ່ອງຕົວຂອງເສດຖະກິດມະຫາພາກ ໂດຍສ້າງຄວາມເຂັ້ມແຂງຂອງງົບປະມານ ແລະ ເງິນຕາ;

ອັນສໍາຄັນຕ້ອງຢຶດໝັ້ນ ແລະ ຕັ້ງໜ້າຜັນຂະຫຍາຍຈັດຕັ້ງປະ ຕິບັດທິດນໍາທີ່ວາງອອກໃນມະຕິ 7 ຂອງຄະນະບໍລິຫານງານສູນກາງພັກ ໂດຍສະເພາະ 9 ມາດຕະການຮີບດ່ວນ ຊຶ່ງຕ້ອງໄດ້ຊີ້ນໍາ - ບັນຊາ ຄືກັບ “ຍຸດທະບັ້ນຮົບ ເສດຖະກິດ” ເພື່ອບຸກແກ້ບັນຫາຢ່າງເດັດຂາດ, ເປັນລະບົບ ແລະ ຕໍ່ເນື່ອງ ເອົາໃຈໃສ່ຄົ້ນຄວ້າຈັດສັນວຽກບຸລິມະສິດທີ່ມີຄວາມສໍາຄັນ ແລະ ຈໍາເປັນອັນຮີບດ່ວນໃນສະເພາະໜ້າເຊັ່ນ: ການຟື້ນຟູພື້ນຖານໂຄງລ່າງ, ຊີວິດການເປັນຢູ່ຂອງປະຊາຊົນ ກໍຄືການຜະລິດ - ທຸລະກິດ ທີ່ຖືກຜົນກະທົບຈາກໄພທໍາມະຊາດ; ສືບຕໍ່ເປັນເຈົ້າການແກ້ໄຂ ແລະ ຕອບສະໜອງຄວາມຮຽກຮ້ອງຕ້ອງການຂອງປະຊາຊົນ ດ້ວຍການສົມທົບຢ່າງກົມກຽວ ລະຫວ່າງເສດຖະກິດ ຕິດພັນກັບການປົກປັກຮັກສາສິ່ງແວດລ້ອມ, ເດັດດ່ຽວ ແລະ ເດັດຂາດໃນການແກ້ໄຂປະກົດການຫຍໍ້ທໍ້ໃນສັງຄົມ ໃຫ້ມີການຫັນປ່ຽນຢ່າງຕັ້ງໜ້າ.

ມະຕິດັ່ງກ່າວ ຍັງໄດ້ເນັ້ນອີກວ່າ: ຕ້ອງສຸມໃສ່ແກ້ໄຂຄວາມທຸກຍາກ ແລະ ຍົກລະດັບຊີວິດການເປັນຢູ່ຂອງປະຊາຊົນ ເປັນຕົ້ນຢູ່ຕາມເຂດພູດອຍ, ຊົນນະບົດ ແລະ ເຂດທຸລະກັນດານ ຫ່າງໄກສອກຫຼີກ ຢ່າງມີຈຸດສຸມ ແລະ ມີປະສິດທິຜົນ, ຮັບປະກັນການຊຸກຍູ້ສົ່ງເສີມການລົງທຶນ ກໍຄືການເຄື່ອນໄຫວຜະລິດ - ທຸລະກິດຂອງທຸກພາກສ່ວນເສດຖະກິດ ເພື່ອເລັ່ງໃສ່ສ້າງພື້ນຖານລາຍຮັບພາຍໃນໃຫ້ມີຄວາມໝັ້ນຄົງ, ຫຼຸດຜ່ອນການກູ້ຢືມທີ່ບໍ່ຈໍາເປັນ ແລະ ຫຼຸດຜ່ອນການເອື່ອຍອີງໃສ່ແຫຼ່ງທຶນຕ່າງປະເທດມາດຸ່ນດ່ຽງງົບປະມານ ໃນນີ້ໃຫ້ເບິ່ງບັນຫາການເພີ່ມລາຍຮັບພາຍໃນ ແລະ ຫຼຸດຜ່ອນລາຍຈ່າຍ ເພື່ອສ້າງຄວາມສົມດູນ ແລະ ກ້າວໄປເຖິງການເກີນດູນງົບປະມານ ເພື່ອເປັນພື້ນຖານໃຫ້ແກ່ການຊໍາລະໜີ້ສິນ ແນໃສ່ຮັບປະກັນໃຫ້ມີການສະສົມທາງດ້ານການເງິນ ເພື່ອມີງົບປະມານຮອງຮັບການແກ້ໄຂກໍລະນີຕ່າງໆທີ່ອາດຈະເກີດຂຶ້ນກໍຄືການໃຊ້ຈ່າຍຮັບໃຊ້ກະກຽມ ແລະ ດໍາເນີນກອງປະຊຸມໃຫຍ່ຂອງພັກຂັ້ນຕ່າງໆ, ການສະເຫຼີມສະຫຼອງວັນສໍາຄັນຂອງພັກ-ຂອງຊາດ; ການສືບຕໍ່ກູ້ຢືມ, ການສືບຕໍ່ອອກພັນທະບັດ ເພື່ອມາຊໍາລະໜີ້ສິນພາຍໃນ ແລະ ຕ່າງປະເທດ ເຫັນວ່າມີຄວາມຈໍາເປັນ  ເພື່ອຫຼຸດຜ່ອນການແບກຫາບພາລະໜີ້ສິນ ແຕ່ກໍເປັນພຽງການແກ້ໄຂສະເພາະໜ້າ ແລະ ບໍ່ແມ່ນທາງອອກສໍາລັບການແກ້ໄຂບັນຫາເສດຖະກິດຂອງປະເທດເຮົາ, ມອບໃຫ້ລັດຖະບານສືບຕໍ່ຄົ້ນຄວ້າເຖິງແຜນການໄລຍະຍາວ ແລະ ມີລັກສະນະຍຸດທະສາດຕໍ່ບັນຫາດັ່ງກ່າວ.

ໃນຕໍ່ໜ້າ ຕ້ອງຈໍາກັດການສ້າງໜີ້ນອກລະບົບງົບປະມານຂອງລັດ ຕິດພັນກັບການສ້າງແຜນຊໍາລະໜີ້ເກົ່າໃຫ້ຕົກໄປເປັນກ້າວໆນັ້ນ  ຕ້ອງສືບຕໍ່ປະຕິບັດນະໂຍບາຍປະຢັດແຫ່ງຊາດ, ຕ້ານການຟຸມເຟືອຍຢ່າງຖືກຕ້ອງ ແລະ ເຄັ່ງຄັດ ດ້ວຍການອັດໃຫ້ໄດ້ໝົດຊ່ອງຫວ່າງທີ່ເຮັດໃຫ້ງົບປະມານຮົ່ວໄຫຼ, ຈໍາກັດຂອດການໃຊ້ຈ່າຍທີ່ບໍ່ຈໍາເປັນ,  ຟຸມເຟືອຍ;  ສືບຕໍ່ຜັນຂະຫຍາຍທິດຊີ້ນໍາ  ໃນການປັບປຸງລັດວິສາຫະກິດໃຫ້ເຂັ້ມແຂງ, ຫັນກິດ ຈະການຂອງລັດຈໍານວນໜຶ່ງໄປສູ່ຮູບການອື່ນທີ່ມີປະສິດທິຜົນ ພ້ອມທັງກວດກາ ແລະ ເອົາໃຈໃສ່ປັບປຸງປະເມີນຄືນການນໍາໃຊ້ດ້ານບໍ່ແຮ່ທີ່ມີຢູ່  ເພື່ອສ້າງເປັນຖານລາຍຮັບຕົວຈິງໃຫ້ແກ່ເສດຖະກິດແຫ່ງຊາດ;  ຮັບປະກັນສະຖຽນລະພາບທາງດ້ານເງິນຕາ,  ນະໂຍບາຍເງິນຕາ  ຕ້ອງຮັບໃຊ້ແນວທາງນະໂຍບາຍຂອງພັກ-ລັດ ເພື່ອກະຕຸກຊຸກຍູ້ ແລະ ສົ່ງເສີມການຜະລິດພາຍໃນ, ແກ້ໄຂຄວາມທຸກຍາກຂອງປະຊາຊົນ ໂດຍສະເພາະແມ່ນການເຂົ້າເຖິງແຫຼ່ງທຶນຮັບໃຊ້ການຜະລິດ, ບໍລິການທີ່ມີຕົ້ນທຶນຕໍ່າ, ເອົາໃຈໃສ່ພັດທະນາ ແລະ ຄຸ້ມຄອງສະຖາບັນການເງິນ, ນັບທັງສະຖາບັນການເງິນຈຸລະພາກໃຫ້ຂະຫຍາຍຕົວຢ່າງກວ້າງຂວາງ ແລະ ເຄື່ອນໄຫວຖືກຕ້ອງຕາມລະບຽບການຢ່າງເຂັ້ມງວດ; ສືບຕໍ່ປະຕິບັດນະໂຍບາຍສົ່ງເສີມການສົ່ງອອກໃຫ້ຫຼາຍ ໂດຍໃຫ້ມີແຜນການຈັດຕັ້ງການຜະລິດຕົວຈິງ ປະເພດສິນຄ້າທີ່ເພື່ອນມິດຍຸດທະສາດເປີດຕະຫຼາດໃຫ້ແລ້ວນັ້ນ (ງົວ, ເຂົ້າສານ, ກາເຟ ແລະ ອື່ນໆ) ແລະ ຈໍາກັດການນໍາເຂົ້າສິ່ງຂອງຟຸມເຟືອຍ, ບໍ່ຮັບໃຊ້ການຜະລິດ-ທຸລະກິດ ດ້ວຍຮູບການຕ່າງໆ, ປ້ອງກັນອັນທີ່ພາຍໃນຜະລິດໄດ້ມີນໍ້າຕານ, ເຈ້ຍ, ເຄື່ອງດື່ມ ແລະ ອື່ນໆ...ທີ່ຕິດພັນກັບການຫັນໄປສູ່ການຊົມໃຊ້ວັດຖຸ-ເຕັກນິກ ທີ່ເຮົາມີທ່າແຮງ ແລະ ເປັນທາງເລືອກທີ່ດີ ເພື່ອຈໍາກັດການນໍາເຂົ້າ; ສືບຕໍ່ເຊີດຊູບົດບາດຂອງຄະນະພັກແຕ່ລະຂັ້ນໃນການນໍາພາ - ຊີ້ນໍາ - ບັນຊາ ຈັດຕັ້ງແຜນ ປະຈໍາປີ 2020 ກໍຄືແກ້ໄຂບັນຫາເສດຖະກິດ - ສັງຄົມ ຢ່າງເປັນລະບົບ ແລະ ມີປະສິດທິຜົນໄປພ້ອມໆກັບການປັບປຸງພາຍໃນໃຫ້ປອດໃສ ເຂັ້ມແຂງ ແລະ ໜັກແໜ້ນ.                

            (ໂດຍ: ຣັດສະໝີ ດວງສັດຈະ)