ຈົ່ງຮ່ວມມືກັນໃນການກັນ ແລະ ຄວບຄຸມ ພະຍາດອັກເສບປອດ ຈາກເຊື້ອຈຸລະໂຣກ ສາຍພັນໃໝ່

ຕາມການລາຍງານຂອງອົງການອະນາໄມໂລກ ມີການລະບາດພະຍາດອັກເສບປອດຈາກເຊື້ອຈຸລະໂຣກສາຍ ພັນໃໝ່ (Novel Corona Virus-nCOV) ຢູ່ເມືອງອູຫັ້ນ  ແຂວງຫູເປີຍ ສປ ຈີນ, ໃນວັນທີ 13 ມັງກອນ 2020, ຫ້ອງວິເຄາະຢັ້ງຢືນວ່າມີ 41 ກໍລະນີ, ໃນນັ້ນ 7 ກໍລະນີຮຸນແຮງ, ເສຍຊີວິດ 1 ກໍລະນີ, ຕິດຕາມເຝົ້າລະວັງກໍລະນີສໍາຜັດ 763 ກໍລະນີ ແລະ ມີທ່າອ່ຽງເພີ່ມຂຶ້ນ; ສະເພາະ ສປປ ລາວ ແມ່ນບໍ່ມີລາຍງານກໍລະນີເທື່ອ.

ດັ່ງນັ້ນ, ຫ້ອງການ, ກະຊວງສາທາລະນະສຸກ ຈຶ່ງໄດ້ອອກແຈ້ງການສະບັບເລກທີ 030/ຫກ ລົງວັນທີ 20/1/2020 ວ່າດ້ວຍການກະກຽມຄວາມພ້ອມຢູ່ດ່ານ ເພື່ອຮັບມືໃນການກັນ ແລະ ຄວບຄຸມພະຍາດອັກເສບປອດຈາກເຊື້ອຈຸລະໂຣກສາຍພັນໃໝ່ (Novel Corona Virus-nCOV) ເມືອງອູຫັ້ນ ແຂວງ ຫູເປີຍ ສປ ຈີນ ເຖິງທ່ານຫົວໜ້າກອງບັນຊາການປ້ອງກັນຄວາມສະຫງົບ ແຂວງ ແລະ ນະຄອນຫຼວງວຽງຈັນ.

ທ່ານຫົວໜ້າກົມການບິນພົນລະເຮືອນ, ກະຊວງໂຍທາທິການ ແລະ ຂົນສົ່ງ

ທ່ານຫົວໜ້າພະແນກສາທາລະນະສຸກນະຄອນຫຼວງວຽງຈັນ, ແຂວງໃນຂອບເຂດທົ່ວປະເທດ ຊຶ່ງເນື້ອໃນແຈ້ງການໄດ້ລະບຸວ່າ:

1. ຂໍໃຫ້ທ່ານຜັນຂະຫຍາຍ ແຈ້ງການສະບັບນີ້ ໄປເຖິງຫົວໜ້າດ່ານສາກົນທາງບົກ ແລະ ດ່ານສະໜາມບິນ

2. ອໍານວຍຄວາມສະດວກໃຫ້ແກ່ທີມງານຈາກກະຊວງສາທາລະນະສຸກ, ພະແນກສາທາລະນະສຸກນະຄອນຫຼວງ  ແລະ ແຂວງ ໃນການເຄື່ອນໄຫວຕິດຕາມຊຸກຍູ້ ແລະ ສ້າງຄວາມເຂັ້ມແຂງຂອງວຽກການກັນ ແລະ ຄວບຄຸມພະຍາດຕິດຕໍ່.

3. ໃຫ້ເອົາໃຈໃສ່ປັບປຸງວຽກງານສາທາລະນະສຸກປະຈໍາດ່ານ ແລະ ນໍາໃຊ້ເຄື່ອງວັດແທກອຸນຫະພູມ (ສໍາລັບບ່ອນທີ່ມີເງື່ອນໄຂ) ເພື່ອຕິດຕາມເຝົ້າລະວັງ, ລາຍງານກໍລະນີສົງໃສຢ່າງໃກ້ຊິດ, ເນັ້ນໜັກ ແຂວງທີ່ມີຊາຍແດນຕິດຈອດກັບ ສປ ຈີນ ເຊັ່ນ: ແຂວງຜົ້ງສາລີ, ຫຼວງນຳ້ທາ ແລະ ອຸດົມໄຊ  ຊຶ່ງໃຫ້ເອົາໃຈໃສ່ໃນດ່ານສາກົນ ແລະ ດ່ານທ້ອງຖິ່ນ ທີ່ມີຜູ້ໂດຍສານ ແລະ ການຂົນສົ່ງເຂົ້າ-ອອກ, ນອກຈາກນັ້ນຍັງລວມໄປເຖິງ ສະໜາມບິນສາກົນ ຕ່າງໆ ເຊັ່ນ: ສະໜາມບິນສາກົນວັດໄຕ, ສະໜາມບິນສາກົນຫຼວງພະບາງ ແລະ ດ່ານ ອື່ນໆ.

4 ເມື່ອມີລາຍງານກໍລະນີສົງໃສ ໃຫ້ຮີບຮ້ອນລາຍງານ ຫາພະນັກງານສາທາລະນະສຸກປະຈໍາດ່ານ ຫຼື ໜ່ວຍງານລະບາດຂັ້ນເມືອງ ແລະ ແຂວງ, ເພື່ອດໍາເນີນການສອບສວນ ແລະ ວາງແຜນປະຕິບັດມາດຕະການສະກັດກັ້ນ ແລະ ໂຕ້ຕອບຕໍ່ເຫດການ ຊຶ່ງພະແນກສາທາລະນະສຸກແຂວງ, ນະຄອນຫຼວງຈະໄດ້ ລາຍງານເຫດການດັ່ງກ່າວຕາມສາຍຕັ້ງຂອງຕົນ.

5. ອໍານວຍຄວາມສະດວກ ໃນການໃຫ້ຂໍ້ມູນຂ່າວສານແກ່ຜູ້ໂດຍສານທີ່ເດີນທາງເຂົ້າ - ອອກຢູ່ດ່ານຕ່າງໆ ໂດຍນຳໃຊ້ສື່ສິ່ງພິມ ແລະ ການປະກາດເທິງເຮືອບິນ.

6. ອໍານວຍຄວາມສະດວກ ໃນການຈັດສັນກະກຽມສະຖານທີ່ ເພື່ອກັ່ນກອງຜູ້ໂດຍສານເດີນທາງມາຈາກ ສປ.ຈີນ ທີ່ມີອາການສົງໃສອັກເສບລະບົບຫາຍໃຈ ເພື່ອຕິດຕາມອາການ ແລະ ສອບຖາມປະຫວັດຂອງການເດີນທາງ ແລະ ກໍານົດເສັ້ນທາງການເຄື່ອນຍ້າຍຄົນເຈັບຈາກດ່ານ ໄປຍັງໂຮງໝໍທີ່ຖືກກໍານົດໄວ້.

7. ອໍານວຍຄວາມສະດວກໃນການຈັດປະຊຸມເຜີຍແຜ່ຂໍ້ມູນຂ່າວສານກ່ຽວກັບການລະບາດຂອງພະຍາດ, ຈັດຝຶກອົບຮົມກ່ຽວກັບວຽກງານ ກັນ ແລະ ຄວບຄຸມພະຍາດຕິດຕໍ່ໃຫ້ພະນັກງານປະຈໍາດ່ານ.

8. ທ່ານສາມາດປະສານ ຫາພະນັກງານປະຈໍາການ ຂອງຈຸດປະສານງານແຫ່ງຊາດຂອງກົດລະບຽບສາກົນ  ດ້ານສາທາລະນະສຸກ, ກົມຄວບຄຸມພະຍາດຕິດຕໍ່ໄດ້ທີ່ເບີ 020 54066777 (ຕະຫຼອດ 24 ຊົ່ວໂມງ) ໃນກໍລະນີພົບຄວາມຫຍຸ້ງຍາກໃນການປະສານງານ.