ຈົ່ງເຮັດໃຫ້ວຽກງານຍຸຕິທຳມີການຫັນປ່ຽນ ຢ່າງຕັ້ງໜ້າ

ໃນລະຫວ່າງວັນທີ  28-29  ມັງກອນ  2019  ທີ່ນະຄອນຫຼວງວຽງຈັນ ກະຊວງຍຸຕິທຳ ໄດ້ຈັດກອງປະຊຸມວຽກງານຍຸຕິທຳ ປະຈຳປີ 2018 ເພື່ອສະຫຼຸບຕີລາຄາການຈັດຕັ້ງປະຕິບັດວຽກງານກົດໝາຍ ແລະ ຍຸຕິທຳ ປະຈຳປີ 2018 ເພື່ອຊອກໃຫ້ເຫັນດ້ານດີ, ດ້ານອ່ອນ ແລະ ສາເຫດທີ່ຕ້ອງສຸມໃສ່ແກ້ໄຂ ແນໃສ່ ຮັບປະກັນການຈັດຕັ້ງປະຕິບັດຕົວຈິງໃຫ້ມີການຫັນປ່ຽນທີ່ຕັ້ງໜ້າ ແລະ ພ້ອມກັນຄົ້ນຄວ້າ, ກຳນົດທິດທາງ, ໜ້າທີ່ວຽກງານຈຸດສຸມໃນສົກປີ 2019 ໃຫ້ມີຜົນສຳເລັດເປັນກ້າວໆ.

ກອງປະຊຸມໄດ້ສັງເກດຕີລາຄາວ່າ: ຕະຫຼອດໄລຍະ 1 ປີຜ່ານມາ ຂະແໜງການຍຸຕິທຳ ໃນທົ່ວປະເທດໄດ້ມີຄວາມຕັ້ງໜ້າ ພະຍາຍາມ ບຸກບືນ ປະຕິບັດພາລະບົດບາດຂອງຕົນ ຊຶ່ງໄດ້ເຮັດໃຫ້ວຽກງານຍຸຕິທຳມີການຫັນປ່ຽນທີ່ຕັ້ງໜ້າໃນຫຼາຍດ້ານ ໃນນັ້ນໄດ້ມີຄວາມພະຍາຍາມຮ່ວມກັບຂະແໜງການອື່ນ ແລະ ອົງການປົກຄອງທ້ອງຖິ່ນຂັ້ນຕ່າງໆ ຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ X ຂອງພັກກໍຄືມະຕິກອງປະຊຸມຄົບຄະນະບໍລິຫານງານສູນກາງພັກແຕ່ລະຄັ້ງ, ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ VIII ໃນນັ້ນ ອັນພົ້ນເດັ່ນໄດ້ສຸມໃສ່ຈັດຕັ້ງປະຕິບັດພາລະບົດບາດເປັນເສນາທິການຊ່ວຍລັດຖະບານ ແລະ ອົງການປົກຄອງທ້ອງຖິ່ນ ໃນວຽກງານສ້າງ, ປັບປຸງກົດໝາຍ ແລະ ນິຕິກຳໃຕ້ກົດໝາຍ, ວຽກງານໂຄສະນາເຜີຍແຜ່ ແລະ ສຶກສາອົບຮົມກົດໝາຍ ເພື່ອສ້າງສະຕິເຄົາລົບກົດໝາຍໃຫ້ແກ່ພະນັກງານ-ລັດຖະກອນ, ທະຫານ, ຕຳຫຼວດກໍຄືປະຊາຊົນບັນດາຊັ້ນຄົນ ແລະ ເຜົ່າຕ່າງໆ, ວຽກງານກໍ່ສ້າງ ແລະ ບຳລຸງຍົກລະດັບໃຫ້ແກ່ບຸກຄະລາກອນກົດໝາຍໃນດ້ານລະດັບຄວາມຮູ້ ແລະ ດ້ານການຈັດຕັ້ງປະຕິບັດຕົວຈິງຢູ່ຮາກຖານ ໂດຍຕິດພັນກັບຂະບວນການສ້າງແຂວງເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະ ສ້າງບ້ານເປັນຫົວໜ່ວຍພັດທະນາ ຊຶ່ງຜ່ານຂະບວນການດັ່ງກ່າວ ເຮັດໃຫ້ກົງຈັກຂະແໜງຍຸຕິທຳໄດ້ຮັບການປັບປຸງ, ຖັນແຖວພະນັກງານຍຸຕິທຳໄດ້ຮັບການທົດສອບຜ່ານຂະບວນການວຽກງານຕົວຈິງ ແລະ ເຕີບໃຫຍ່ເຂັ້ມແຂງເປັນກ້າວໆ ໂດຍສະເພາະບາງຜົນງານເດັ່ນໃນໜຶ່ງປີຜ່ານມາ ໄດ້ຈັດຕັ້ງໂຄສະນາເຜີຍແຜ່ກົດໝາຍໄດ້ຈຳນວນ 5.592 ຄັ້ງ, ຂຽນບົດອະທິບາຍກົດໝາຍລົງໜັງສືພິມ ກົດໝາຍກະຊວງຍຸຕິທຳໄດ້ຈຳນວນ 539 ບົດ, ໂຄສະນາຜ່ານລາຍການໂທລະພາບ “ເພື່ອສັງຄົມຍຸຕິທຳ” ອອກອາກາດທາງໂທລະພາບກະຊວງປ້ອງກັນຄວາມສະຫງົບຈຳນວນ 364 ບົດ, ນຳເອົາກົດໝາຍ, ນິຕິກຳໃຕ້ກົດໝາຍ ແລະ ຮ່າງນິຕິກຳລົງໃນຈົດໝາຍເຫດທາງລັດຖະການຈຳນວນ 159 ສະບັບ, ປັດຈຸບັນມີນິຕິກຳທີ່ພິມລົງເວັບໄຊຈຳນວນ 723 ສະບັບ ອັນພົ້ນເດັ່ນໄດ້ສ້າງເປັນແອັບກົດໝາຍ Version ທີ 3 ສຳເລັດ ແລະ ໄດ້ຈັດພິທີເປີດນຳໃຊ້ຢ່າງເປັນທາງການ.  ປັດຈຸບັນໄດ້ເອົາກົດໝາຍ, ນິຕິກຳລຸ່ມກົດໝາຍ ແລະ ຮ່າງນິຕິກຳລົງແອັບຈຳນວນ 307 ສະບັບ, ໄດ້ຈັດຕັ້ງປະຕິບັດໜ້າທີ່ຄຸ້ມຄອງວຽກງານພິມ ແລະ ແຈກຢາຍປຶ້ມ, ວາລະສານ, ໜັງສືພິມກົດໝາຍເປັນປົກກະຕິ, ພະແນກຍຸຕິທຳແຂວງ, ນະຄອນຫຼວງວຽງຈັນ ແລະ ຫ້ອງການຍຸຕິທຳເມືອງ, ນະຄອນໄດ້ຕັ້ງໜ້າຈັດຕັ້ງການໂຄສະນາເຜີຍແຜ່ກົດໝາຍໃຫ້ປະຊາຊົນ ບັນດາເຜົ່າໃນຂອບເຂດຂອງຕົນ ໂດຍຜ່ານໂທລະໂຄ່ງຂອງແຂວງ, ຜ່ານສະຖາບັນການສຶກສາ ແລະ ອື່ນໆຢ່າງເປັນປົກກະຕິ ໃນນັ້ນ, ວຽກງານຈັດຕັ້ງປະຕິບັດຄຳຕັດສິນຂອງສານ ໂດຍອົງການຈັດຕັ້ງຄຳຕັດສິນຂອງສານແຕ່ລະຂັ້ນໄດ້ຍົກສູງຄວາມຮັບຜິດຊອບນຳເອົາຄຳຕັດສິນຂອງສານມາຈັດຕັ້ງປະຕິບັດຕາມຂັ້ນຕອນຂອງກົດໝາຍ ຊຶ່ງໃນປີທີ່ຜ່ານມາຈຳນວນຄຳຕັດສິນຂອງສານ ໃນທົ່ວປະເທດມີທັງໝົດ 29.422 ເລື່ອງ ໃນນັ້ນ ຄຳຕັດສິນທີ່ຄ້າງມາແຕ່ປີ 2017 ຈຳນວນ 21.976 ເລື່ອງ ແລະ ຄະດີເຂົ້າໃໝ່ ໃນປີ 2018 ມີ 7.446 ເລື່ອງ, ສາມາດຈັດຕັ້ງ ປະຕິບັດສຳເລັດ 1.819 ເລື່ອງ ເທົ່າກັບ 6,17% ຂອງຈຳນວນຄຳຕັດສິນຂອງສານທັງໝົດສົ່ງໃຫ້ອົງການໄອຍະການປະຊາຊົນ ຕາມຄຳສັ່ງທວງຈຳນວນຄະດີ 131 ເລື່ອງ, ປັດຈຸບັນຈຳນວນຄຳຕັດສິນຂອງສານທົ່ວປະເທດທີ່ຍັງຄ້າງ ແລະ ຈັດຕັ້ງປະຕິບັດມີທັງໝົດ 27.472 ເລື່ອງ, ຄຽງຄູ່ກັບຜົນງານດັ່ງກ່າວນັ້ນຍັງມີຂໍ້ຄົງຄ້າງທີ່ຈະຕ້ອງໄດ້ປັບປຸງ ແກ້ໄຂ ເປັນຕົ້ນແມ່ນວຽກງານສຶກສາອົບຮົມການເມືອງ-ແນວຄິດໃນທຸກກົງຈັກການຈັດຕັ້ງ, ຍົກລະດັບຄວາມຮູ້ໃຫ້ພະນັກງານ ລັດຖະກອນໃຫ້ມີຄຸນທາດການເມືອງ, ມີຄຸນສົມບັດສິນທຳປະຕິວັດຢ່າງໜັກແໜ້ນ, ມີຄວາມເປັນເຈົ້າການ ໃນການຝຶກຝົນຫຼໍ່ຫຼອມພັດທະນາຕົນເອງ ແລະ ຫັນປ່ຽນແນວຄິດອັນເກົ່າໄປສູ່ອັນໃໝ່ ເພື່ອເຮັດແນວໃດເຮັດໃຫ້ວຽກງານຮັບປະກັນໄດ້ທັງປະລິມານ ແລະ ຄຸນນະພາບ.

ເພື່ອເປັນເຂັ້ມທິດຊີ້ເຍືອງທາງໃນການຈັດຕັ້ງປະຕິບັດທິດທາງແຜນການໃນຕໍ່ໜ້ານັ້ນ ໃນໂອກາດໃຫ້ກຽດເຂົ້າຮ່ວມ ແລະ ໂອ້ລົມຕໍ່ກອງປະຊຸມທ່ານ ພັນຄຳ ວິພາວັນ ຮອງປະທານປະເທດໄດ້ເນັ້ນໃຫ້ຂະແໜງຍຸຕິທຳປະຕິບັດແຜນການ ໃນປີ 2019 ໃຫ້ມີຜົນສຳເລັດເປັນກ້າວໆ ຊຶ່ງກ່ອນອື່ນຕ້ອງກຳແໜ້ນຖານະບົດບາດໜ້າທີ່ຂອງຂະແໜງຍຸຕິທຳ ເພາະມີຄວາມໝາຍສຳຄັນຍິ່ງຕໍ່ການກໍ່ສ້າງ ແລະ ຂະຫຍາຍລະບອບປະຊາທິປະໄຕ ປະຊາຊົນສ້າງປະຖົມປັດໄຈກ້າວສູ່ສັງຄົມນິຍົມ, ກ່ຽວກັບການສ້າງ ແລະ ປັບປຸງກົດໝາຍຕ້ອງຮັບປະກັນລັກສະນະຊົນຊັ້ນ ແລະ ໃຫ້ຄົບຖ້ວນສົມບູນ, ການປະຕິບັດກົດໝາຍຕ້ອງໃຫ້ມີຄວາມສັກສິດ, ເຂັ້ມງວດ, ຮັບປະກັນຄວາມຍຸຕິທຳນີ້ເປັນສິ່ງທີ່ສັງຄົມ ແລະ ປະຊາຊົນເປັນຫ່ວງເປັນໄຍ ແລະ ເລັ່ງ ທວງໃຫ້ການນຳພາຂອງພັກ ແລະ ການຄຸ້ມຄອງຂອງລັດເຮົາຈັດຕັ້ງປະຕິບັດໃຫ້ດີກ່ວາເກົ່າ, ການຕິດຕາມກວດກາຂະບວນການຈັດຕັ້ງປະຕິບັດກົດໝາຍມີຄວາມຈຳເປັນຕ້ອງໄດ້ເພີ່ມທະວີໃຫ້ສູງກວ່າເກົ່າ ເພື່ອຮັບປະກັນເຮັດໃຫ້ການຈັດຕັ້ງປະຕິບັດກົດໝາຍມີຄວາມສັກສິດ, ມີຄວາມຍຸຕິທຳ, ການຍົກສູງຄຸນນະພາບຂອງວຽກງານພັດທະນາບຸກຄະລາກອນກົດໝາຍ ເພື່ອຕອບສະໜອງໃຫ້ແກ່ການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມດ້ວຍກົດໝາຍແມ່ນມີຄວາມສຳຄັນທີ່ສຸດ ໃນນີ້ໃຫ້ເອົາໃຈໃສ່ເປັນພິເສດກ່ຽວກັບການສ້າງຄຸນທາດການເມືອງ, ຄຸນສົມບັດ ແລະ ຈັນຍາທຳຂອງນັກກົດໝາຍ, ຄວາມທ່ຽງທຳ, ຄວາມຊື່ສັດບໍລິສຸດ ແລະ ຈິດໃຈຮັບໃຊ້ປະເທດຊາດ, ຮັບໃຊ້ປະຊາຊົນຢ່າງໜັກແໜ້ນ, ບັນຫາການຊີ້ນຳ-ນຳພາຂອງພັກແຕ່ລະຂັ້ນຕໍ່ວຽກງານຍຸຕິທຳຕ້ອງໄດ້ເພີ່ມທະວີການຊີ້ນຳ-ນຳພາຢ່າງໃກ້ຊິດຕິດແທດ ແລະ ເບິ່ງແຍງດູແລຂອງຄະນະພັກທຸກຂັ້ນຕໍ່ວຽກງານຍຸຕິທຳ.

ສະນັ້ນ ເພື່ອເຮັດໃຫ້ວຽກງານຍຸຕິທຳໄດ້ຮັບການປັບປຸງໃຫ້ມີບາດກ້າວໃໝ່ ແລະ ທິດທາງແຜນການໄດ້ຮັບການຈັດຕັ້ງປະຕິບັດໃຫ້ມີຜົນສຳເລັດຕາມຄາດໝາຍນັ້ນ, ຄະນະນຳກະຊວງບັນດາພະນັກງານ ວິຊາການ ໃນຂົງເຂດວຽກງານຍຸຕິທຳຂັ້ນຕ່າງໆຕ້ອງພ້ອມກັນເພີ່ມທະວີຄວາມສາມັກຄີເປັນເອກະພາບ, ເຊີດຊູຄວາມຮັບຜິດຊອບການເມືອງຂອງຕົນໃຫ້ສູງຂຶ້ນກ່ວາເກົ່າ, ພ້ອມກັນສູ້ຊົນຈັດຕັ້ງປະຕິບັດໃຫ້ໄດ້ຕາມເນື້ອໃນມະຕິກອງປະຊຸມໃຫຍ່ ຄັ້ງທີ X ຂອງພັກກໍຄືມະຕິຂອງຄະນະບໍລິຫານງານສູນກາງພັກ ວ່າດ້ວຍການຍົກສູງປະສິດທິພາບຄຸ້ມຄອງລັດ, ຄຸ້ມຄອງສັງຄົມດ້ວຍກົດໝາຍໃຫ້ປະກົດຜົນເປັນຈິງ, ປະກອບສ່ວນເຂົ້າໃນການສ້າງສາ ແລະ ພັດທະນາປະເທດຊາດໃຫ້ມີຄວາມຮຸ່ງເຮືອງສີວິໄລຂຶ້ນເລື້ອຍໆ ໂດຍສະເພາະເອົາໃຈໃສ່ສູ້ຊົນປະຕິບັດທິດທາງແຜນການ ໃນຕໍ່ໜ້າໃຫ້ປະກົດຜົນເປັນຈິງ ເປັນຕົ້ນສືບຕໍ່ເພີ່ມທະວີວຽກງານສຶກສາອົບຮົມການເມືອງ-ແນວຄິດໃຫ້ເປັນປົກກະຕິ, ຕັ້ງໜ້າຈັດຕັ້ງຄົ້ນຄວ້າ, ເຊື່ອມຊຶມແນວທາງ, ນະໂຍບາຍຂອງພັກແຕ່ລະໄລຍະໃຫ້ທັນກັບສະພາບການ, ນຳພາຜັນຂະຫຍາຍບັນດາມະຕິຄະນະບໍລິຫານງານສູນກາງພັກ ພ້ອມທັງຫັນເປັນລະອຽດຂອງຂະແໜງຍຸຕິທຳ, ສືບຕໍ່ບຸກທະລຸດ້ານຈິນຕະນາການ ໂດຍເລີ່ມຈາກການປັບປຸງແບບແຜນນຳພາ, ວິທີເຮັດວຽກ, ເພີ່ມທະວີຄວາມເປັນແບບຢ່າງນຳໜ້າຂອງຄະນະພັກ, ຄະນະນຳແຕ່ລະຂັ້ນ, ສຸມໃສ່ສ້າງ ແລະ ປັບປຸງກົດໝາຍໃຫ້ສຳເລັດຕາມແຜນການ ແລະ ມີຄຸນນະພາບ, ສ້າງກົນໄກ, ລະບຽບການກ່ຽວກັບການປະເມີນຜົນນິຕິກຳ, ສືບຕໍ່ຍູ້ແຮງໂຄສະນາເຜີຍແຜ່ກົດໝາຍໃຫ້ກວ້າງຂວາງ ແລະ ດ້ວຍຫຼາຍຮູບການ, ວິທີການ ແທດເໝາະກັບລະດັບຄວາມຮູ້ ແລະ ຊີວິດການເປັນຢູ່ຂອງປະຊາຊົນບັນດາເຜົ່າ, ຄົ້ນຄວ້າ, ສ້າງປຶ້ມຄູ່ມືກ່ຽວກັບການໂຄສະນາເຜີຍແຜ່ກົດໝາຍ ແລະ ສືບຕໍ່ເອົາໃຈໃສ່ວຽກງານ ອື່ນໆຕື່ມອີກໃຫ້ມີຜົນສຳເລັດ ເພື່ອເຮັດແນວໃດໃຫ້ວຽກງານຍຸຕິທຳໃຫ້ເປັນທີ່ຍອມຮັບຂອງສັງຄົມໃນປັດຈຸບັນ.

(ໂດຍ: ສຳນານ ພົມພັກດີ)