ຈັດຕັ້ງຜັນຂະຫຍາຍວຽກງານຈຸດສຸມ ຂອງລັດຖະບານ ປະຈຳເດືອນກຸມພາ ໃຫ້ມີຜົນສຳເລັດ

ກອງປະຊຸມລັດຖະບານ ສະໄໝສາມັນ ປະຈຳເດືອນກຸມ ພາ 2019 ໄດ້ຈັດຂຶ້ນໃນວັນທີ 19-20/2/2019 ທີ່ສຳນັກງານນາຍົກລັດຖະມົນຕີ ໂດຍພາຍໃຕ້ການເປັນປະທານຂອງທ່ານ ທອງລຸນ ສີສຸລິດ ນາຍົກລັດຖະມົນຕີ.

 ກອງປະຊຸມດັ່ງກ່າວ ໄດ້ປຶກສາຫາລື ປະກອບຄຳຄິດເຫັນ ແລະ ພິຈາລະນາ ຮັບຮອງເອົາ 7 ເອກະສານສຳຄັນຄື: ບົດລາຍງານກ່ຽວກັບແຜນຜັງລວມຕົວເມືອງນະຄອນຫຼວງວຽງຈັນ ຮອດປີ 2030; ບົດລາຍງານກ່ຽວກັບຜົນການກວດກາໂຄງການເຊົ່າ-ສຳປະທານທີ່ດິນ  ໃນຂອບເຂດທົ່ວປະເທດ;  ຮ່າງກົດໝາຍ ວ່າດ້ວຍທີ່ດິນ (ສະບັບປັບປຸງ);  ດຳລັດ ວ່າດ້ວຍກອງທຶນພັດ ທະນາວິທະຍາສາດ ແລະ ເຕັກໂນໂລຊີ (ສະບັບປັບປຸງ); ບົດລາຍງານກ່ຽວກັບຄວາມຄືບໜ້າ ໃນການຈັດຕັ້ງປະຕິບັດ 10 ຕົວຊີ້ວັດ ໃນການດຳເນີນທຸລະກິດຢູ່ ສປປ ລາວ; ບົດລາຍງານກ່ຽວກັບຄວາມຄືບໜ້າ ໃນການຫັນການເກັບລາຍຮັບງົບປະມານເປັນທັນສະໄໝ; ບົດລາຍງານກ່ຽວກັບແຜນຈຸດສຸມພັດທະນາຊົນນະບົດ ຕິດພັນກັບການພັດທະນາການລົງທຶນ.

 ບັນດາ 7 ເອກະສານສຳຄັນ

ດັ່ງກ່າວ, ກອງປະຊຸມໄດ້ພິຈາລະນາຮັບຮອງເອົາ ຫຼັກການ ແລະ ຊີ້ນຳໃຫ້ພາກສ່ວນກ່ຽວຂ້ອງນຳໄປປັບປຸງ ຕາມການປະກອບຄຳເຫັນຂອງສະມາຊິກ ລັດຖະບານ.

  ໃນເດືອນມັງກອນທີ່ຜ່ານມາ, ລັດຖະບານ ໄດ້ສຸມໃສ່ຈັດຕັ້ງປະຕິບັດວຽກງານຈຸດສຸມທີ່ສຳຄັນ ຈຳນວນໜຶ່ງເຊັ່ນ: ໄດ້ສະຫຼຸບຕີລາຄາ ແລະ ຊີ້ນໍາການຟື້ນຟູ ແລະ ຊ່ວຍເຫຼືອປະຊາຊົນ ທີ່ໄດ້ຮັບຜົນກະທົບຈາກໄພພິບັດນຳ້ຖ້ວມ ຢູ່ເມືອງສະໜາມໄຊ ແຂວງອັດຕະປື ໂດຍສະເພາະ ແມ່ນການຮີບຮ້ອນແກ້ໄຂເຮືອນຢູ່ຊົ່ວຄາວໃຫ້ປະຊາຊົນ, ການຟື້ນຟູພື້ນຖານໂຄງລ່າງ, ການຈັດສັນເຂດຜະລິດ ແລະ ເຂດຕັ້ງຖິ່ນຖານຖາວອນໃຫ້ແກ່ປະຊາຊົນ; ໄດ້ກະກຽມ ແລະ ເຂົ້າຮ່ວມການສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ຄົບຮອບ 70 ປີ, ໄດ້ເຂົ້າຮ່ວມສະຫຼຸບຕີລາຄາ ແລະ ຊີ້ນໍາການປະຕິບັດພາລະບົດບາດ, ໜ້າທີ່ ແລະ ວຽກຈຸດສຸມຂອງຫຼາຍກະຊວງ ແລະ ຄະນະກໍາມະການຕ່າງໆ, ໄດ້ຄົ້ນຄວ້າ, ພິຈາລະນາ ແລະ ຮັບຮອງເອົາ 5 ກົດໝາຍ ເພື່ອຈະສະເໜີຕໍ່ກອງປະຊຸມສະພາແຫ່ງຊາດ ສະໄໝສາມັນ ເທື່ອທີ 7 ໃນເດືອນພຶດສະພາ  ຄື: ຮ່າງກົດໝາຍ ວ່າດ້ວຍອາຊີວະສຶກສາ (ສະບັບປັບປຸງ); ຮ່າງກົດໝາຍ ວ່າດ້ວຍການຄຸ້ມຄອງໄພພິບັດ, ຮ່າງກົດໝາຍ ວ່າດ້ວຍການຕອບໂຕ້ ການທຸ້ມຕະຫຼາດ ແລະ ການອຸດໜູນສິນຄ້ານຳເຂົ້າ, ຮ່າງກົດໝາຍ ວ່າດ້ວຍປ່າໄມ້ (ສະບັບປັບປຸງ), ຮ່າງກົດໝາຍ ວ່າດ້ວຍທີ່ດິນ (ສະບັບປັບປຸງ). ນອກນີ້ ຍັງໄດ້ຄົ້ນຄວ້າ ແລະ ອອກນິຕິກຳລຸ່ມກົດໝາຍ ຈຳນວນໜຶ່ງ ເປັນຕົ້ນແມ່ນ ດຳລັດ, ຂໍ້ຕົກລົງ, ຄຳແນະນຳ ແລະ ແຈ້ງການຂອງລັດຖະບານ ແລະ ໃນລະດັບຂະແໜງການລວມທັງໝົດຫຼາຍກວ່າ  165 ສະບັບ; ໄດ້ລົງຊຸກຍູ້ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຢູ່ຫຼາຍທ້ອງຖິ່ນ, ນາຍົກ ແລະ ສະມາຊິກລັດຖະບານ ຈຳນວນໜຶ່ງໄດ້ເຄື່ອນໄຫວຢ້ຽມຢາມທາງການຢູ່ປະເທດບຣູໄນ, ໄດ້ສະຫຼຸບຕີລາຄາການຈັດຕັ້ງປະຕິບັດປີທ່ອງທ່ຽວ ລາວ 2018 ແລະ ຈັດຕັ້ງດໍາເນີນການເປີດປີທ່ອງທ່ຽວລາວ-ຈີນ ປີ 2019 ຢ່າງເປັນທາງການ.

ສຳລັບໃນເດືອນມີນາ, ລັດຖະບານ ຈະສຸມໃສ່ປະຕິບັດວຽກຈຸດສຸມຕົ້ນຕໍຈໍານວນໜຶ່ງເຊັ່ນ: ສືບຕໍ່ເອົາໃຈໃສ່ແກ້ໄຂປະກົດການຫຍໍ້ທໍ້ ໃນສັງຄົມ ເປັນຕົ້ນແມ່ນອຸບັດເຫດຕາມທ້ອງຖະໜົນ, ການຄ້າຂາຍຜິດກົດໝາຍ, ການປຸ້ນຈີ້ຊີງຊັບ ແລະ ອື່ນໆ, ສຸມໃສ່ການເກັບລາຍຮັບໃຫ້ໄດ້ຕາມແຜນແຕ່ຕົ້ນປີ ແລະ ໃນທ້າຍເດືອນມີນາ ຕ້ອງສູ້ຊົນໃຫ້ບັນລຸ 25% ຫຼືຢ່າງໜ້ອຍກໍບໍ່ຄວນຫຼຸດ 20% ຂອງແຜນການປີ,  ເອົາໃຈໃສ່ແກ້ໄຂບັນຫາທີ່ເປັນຂອດອຸດຕັນ ແລະ ຖ່ວງດຶງຄວາມສະດວກໃນການດໍາເນີນທຸລະກິດ ໂດຍສະເພາະບັນດາຕົວຊີ້ວັດ ທີ່ປະເທດເຮົາບໍ່ເປັນໂຕເລກທີ່ດີ, ເລັ່ງຟື້ນຟູເຂດຖືກຜົນກະທົບຈາກໄພພິບັດຢູ່ເມືອງສະໜາມໄຊ  ແຂວງອັດຕະປື ໃຫ້ໄວ ແລະ ມີປະສິດທິຜົນກວ່າເກົ່າ, ກະກຽມຮອບດ້ານໃຫ້ແກ່ການເຄື່ອນໄຫວວຽກງານຕ່າງປະເທດ ທີ່ສໍາຄັນຂອງລັດຖະບານ, ພ້ອມນີ້ ກໍໃຫ້ເອົາໃຈໃສ່ຕິດຕາມ, ວິເຄາະ, ວິໄຈ ແລະ ລາຍງານສະພາບການພາກພື້ນ ແລະ ສາກົນຢ່າງໃກ້ຊິດ; ກະກຽມເນື້ອໃນກອງປະຊຸມລັດຖະບານປະຈໍາເດືອນມີນາ  ຊຶ່ງຈະມີທັງກອງປະຊຸມວິສາມັນ ເພື່ອພິຈາລະນາຮ່າງກົດໝາຍ ແລະ ກອງປະຊຸມສາມັນເພື່ອພິຈາລະນາ ບັນດາຫົວຂໍ້ທີ່ຕິດພັນກັບການຈັດຕັ້ງປະຕິບັດແຜນພັດທະນາເສດຖະ ກິດ-ສັງຄົມ 2019 ແລະ ນໍາເອົາບັນດາກົດໝາຍທີ່ຜ່ານ ເພື່ອສະເໜີຕໍ່ກອງປະຊຸມສະພາສະໄໝສາມັນເທື່ອທີ 7 ໃນເດືອນພຶດສະພາ 2019.

 ເພື່ອຈັດຕັ້ງປະຕິບັດວຽກງານຈຸດສຸມຂອງລັດຖະບານ ໃນເດືອນມີນາ ໃຫ້ປະກົດເປັນຈິງນັ້ນ ພາກສ່ວນກ່ຽວຂ້ອງຈົ່ງຍົກສູງຄວາມເປັນເຈົ້າການ ແລະ ຄວາມຮັບຜິດຊອບ ໃນການນຳເອົາເນື້ອໃນຈິດໃຈ ຂອງກອງປະຊຸມລັດຖະບານຄັ້ງນີ້ ໄປຈັດຕັ້ງຜັນຂະຫຍາຍ ເຂົ້າໃນວຽກງານຕົວຈິງ ທີ່ຕົນຮັບຜິດຊອບໃຫ້ມີຜົນສຳເລັດ. ພ້ອມນີ້, ຮຽກຮ້ອງມາຍັງທົ່ວສັງຄົມ ຈົ່ງຍົກສູງນ້ຳໃຈເປັນເຈົ້າປະເທດ, ເພີ່ມທະວີຄວາມສາມັກຄີເປັນປຶກແຜ່ນໃນທົ່ວວົງສາຄະນາຍາດແຫ່ງຊາດ, ຕັ້ງໜ້າປະຕິບັດໜ້າທີ່ປົກປັກຮັກສາ ແລະ ສ້າງສາພັດທະນາປະເທດຊາດ, ເດັດດ່ຽວສະກັດກັ້ນ ແລະ ຕ້ານກົນອຸບາຍແບ່ງແຍກ, ການໃສ່ຮ້າຍປ້າຍສີຂອງກຸ່ມຄົນທີ່ບໍ່ຫວັງດີຢູ່ພາຍໃນ ແລະ ຕ່າງປະເທດ.

                                              ໂດຍ: ມິງໂກ