ເຊີດຊູເສີມຂະຫຍາຍມູນເຊື້ອ ກຳມະບານລາວ

ມື້ນີ້ (1/2/2019) ຊົນຊັ້ນກຳມະກອນ ແລະ ຊາວຜູ້ອອກແຮງງານລາວບັນດາເຜົາໃນທົ່ວປະເທດ ມີຄວາມປິຕິຊົມຊື່ນເປັນຢ່າງຍິ່ງ ທີ່ໄດ້ພ້ອມກັນຈັດຕັ້ງສະເຫຼີມສະຫຼອງວັນສ້າງຕັ້ງກຳມະບານລາວ ຄົບຮອບ 63 ປີ (1/2/1956-1/2/2019).

ກ່ອນໜ້ານີ້ 63 ປີ, ພັກໄດ້ສ້າງຕັ້ງຮາກຖານກຳມະບານຂຶ້ນ ໃນວັນທີ 1/2/1956 ທີ່ເຂດປົດປ່ອຍ ເພື່ອເປັນກຳລັງປົກປັກຮັກສາ 2 ແຂວງເຕົ້າໂຮມ ແຂວງຫົວພັນ ແລະ ແຂວງຜົ້ງສາລີ ໂດຍແມ່ນທ່ານ ສີສົມພອນ ລໍວັນໄຊ ເປັນຜູ້ນຳ, ຕໍ່ມາໃນວັນທີ 1/2/1966 ສູນກາງພັກ ໄດ້ຕົກລົງປັບປຸງການຈັດຕັ້ງກຳມະບານ ໂດຍແມ່ນທ່ານ ໜູຮັກ ພູມສະຫວັນ ເປັນຜູ້ຊີ້ນຳໂດຍກົງ ພາຍໃຕ້ຄຳຂວັນທີ່ວ່າ: “ທຸກສິ່ງທຸກຢ່າງ ເພື່ອແນວໜ້າ, ເພື່ອໄຊຊະນະ ຂອງການປະຕິວັດປົດປ່ອຍຊາດ”. ເຖິງວ່າ ອົງການກຳມະບານລາວ ໄດ້ກຳເນີດຂຶ້ນຢູ່ໃນເຂດປົດປ່ອຍໃນສະພາບເງື່ອນໄຂຂອງປະເທດເຮົາ ຍັງດຳເນີນການຕໍ່ສູ້ປົດປ່ອຍຊາດອັນດູດດື່ມຂ້ຽວຂາດຢ່າງເອົາເປັນ-ເອົາຕາຍ, ພື້ນຖານອຸດສາຫະກຳຫາກໍ່ຈໍ່ແໜງ ແລະ ເງື່ອນໄຂເສດຖະກິດມີຄວາມຫຍຸ້ງຍາກກໍຕາມ. ແຕ່ອົງການກຳມະບານລາວ ກໍມີຄວາມເປັນເອກະພາບກັນທາງດ້ານແນວຄິດການເມືອງ ແລະ ການຈັດຕັ້ງ ພ້ອມທັງໄດ້ເຄື່ອນໄຫວຢູ່ພາຍໃຕ້ຄັນທຸງອັນສະຫງ່າງາມຂອງພັກ. ສະມາຊິກກຳມະບານໃນເວລານັ້ນ ເຖິງວ່າຈະມີຕົ້ນກຳເນີດມາຈາກຊົນຊັ້ນຕ່າງໆໃນສັງຄົມ, ລະດັບຄວາມຮູ້ທາງດ້ານສັງຄົມ ແລະ ທຳມະຊາດແຕກຕ່າງຫຼຸດໂຕນກັນປານໃດກໍຕາມ, ແຕ່ຜ່ານການທົດສອບຢູ່ໃນແປວໄຟສົງຄາມ ໄດ້ຮັບການອົບຮົມບົ່ມສອນຈາກພັກໂດຍກົງ, ຄວາມຕື່ນຕົວທາງຊົນຊັ້ນຂອງພະນັກງານ ແລະ ສະມາຊິກກຳມະບານ ກໍໄດ້ຮັບການຍົກຂຶ້ນເປັນກ້າວໆ, ເຂດປົດປ່ອຍກໍໄດ້ຮັບການປັບປຸງໃຫ້ເຂັ້ມແຂງຮອບດ້ານ, ໜໍ່ແໜງອຸດສາຫະກຳໄດ້ເຕີບໃຫຍ່ຂະຫຍາຍຕົວ, ຮາກຖານກຳມະບານໂຮງງານຕ່າງໆ ໄດ້ກຳເນີດຂຶ້ນເຊັ່ນ: ໂຮງງານກີ່ກະຕຸກ 12 ຕຸລາ, ໂຮງງານຕີເຫຼັກ, ໂຮງພິມ, ໂຮງງານສ້ອມແປງລົດ ແລະ ສ້ອມແປງອາວຸດ, ໂຮງງານຜະລິດເຂົ້າໜົມ, ໂຮງງານຜະລິດຢາປົວພະຍາດ, ໂຮງຮຽນ, ໂຮງໝໍ ແລະ ອື່ນໆ. ຕະຫຼອດໄລຍະສົງຄາມອັນດຸເດືອດ, ອົງການກຳມະບານໄດ້ປຸກລະດົມຂົນຂວາຍກຳມະກອນ-ລັດຖະກອນສະໝັກໃຈໄປລຳລຽງຂົນສົ່ງສະບຽງອາຫານ ອາວຸດຍຸດໂທປະກອນໄປໃຫ້ແນວໜ້າ, ເຂົ້າຮ່ວມໃນການກໍ່ສ້າງສາຍທາງຕ່າງໆ, ເຂົ້າຮ່ວມຂະບວນການກໍ່ສ້າງເສດຖະກິດ ແລະ ການເມືອງ, ເຂົ້າຮ່ວມວຽກງານປ້ອງກັນຊາດ-ປ້ອງກັນຄວາມສະຫງົບ, ເຂົ້າຮ່ວມວຽກງານກໍ່ສ້າງສະຖານທີ່ສຳນັກງານຕ່າງໆ, ວຽກງານຕິດຕໍ່ສື່ສານ ແລະ ປຸກລະດົມຂົນຂວາຍກໍ່ສ້າງພື້ນຖານປະຊາຊົນ.

ພາຍຫຼັງປະເທດຊາດໄດ້ຮັບການປົດປ່ອຍຢ່າງສົມບູນ ໃນປີ 1975 ຄະນະຂົນຂວາຍສ້າງຕັ້ງກຳມະບານລາວ ໄດ້ຖືກແຕ່ງຕັ້ງຂຶ້ນ ເພື່ອຂົນຂວາຍເຕົ້າໂຮມເອົາຖັນແຖວຊົນຊັ້ນກຳມະກອນ ແລະ ສະມາຊິກກຳມະບານໃນສອງເຂດເຂົ້າໃນອົງການກຳມະບານອັນດຽວກັນ ໂດຍພາຍໃຕ້ການນຳພາຂອງພັກ. ໜ້າທີ່ຕົ້ນຕໍຂອງຄະນະຂົນຂວາຍໃນໄລຍະນັ້ນແມ່ນຖືເອົາວຽກງານຈັດຕັ້ງ, ສຶກສາອົບຮົມ, ຂົນຂວາຍກຳມະກອນ, ລັດຖະກອນ ເຂົ້າໃນພາລະກິດປົກປັກຮັກສາ ແລະ ສ້າງສາປະເທດຊາດ. ໃນເວລານັ້ນ ທຸກແຂວງ, ກະຊວງ ແລະ ຮາກຖານການຜະລິດ ໄດ້ມີການຈັດຕັ້ງກຳມະບານຢ່າງທົ່ວເຖິງ. ການເຕີບໃຫຍ່ເຂັ້ມແຂງຂອງອົງການຈັດຕັ້ງກຳມະບານ ໄດ້ຄ່ອຍໆປະກົດຕົວຂຶ້ນເທື່ອລະກ້າວ. ຊົນຊັ້ນກຳມະກອນ ແລະ ສະມາຊິກກຳມະບານ ກໍມີຄວາມເຊື່ອໝັ້ນຕໍ່ການນຳພາຂອງພັກ, ເຊື່ອໝັ້ນຕໍ່ກຳລັງແຮງຂອງຊົນຊັ້ນຕົນ.

ໃນວັນທີ 14-16/12/1983, ສູນກາງພັກໄດ້ຕົກລົງເປີດກອງປະຊຸມໃຫຍ່ ສະຫະພັນກຳມະບານລາວທົ່ວປະເທດ ຄັ້ງທີ I ຂຶ້ນທີ່ນະຄອນຫຼວງວຽງຈັນ ເພື່ອກຳນົດຫຼັກການ, ທີ່ຕັ້ງບົດບາດ, ໜ້າທີ່ວິທີເຮັດວຽກຂອງກຳມະບານ. ໃນມະຕິຂອງກອງປະຊຸມຄັ້ງນີ້ ກໍໄດ້ຮັບຮອງເອົາວັນທີ 1/2/1956 ເປັນວັນສ້າງຕັ້ງກຳມະບານລາວ.

ໃນໄລຍະຜ່ານມາ ສະຫະພັນກຳມະບານລາວ ໄດ້ຕັ້ງໜ້າປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ, ໄດ້ຕັ້ງໜ້າພະຍາຍາມສຶກສາອົບຮົມການເມືອງແນວຄິດ ແລະ ວັດທະນະທຳໃຫ້ສະມາຊິກກຳມະບານ, ພະນັກງານ, ນັກສຶກສາປັນຍາຊົນ, ກຳມະກອນ ແລະ ຊາວຜູ້ອອກແຮງງານລາວບັນດາເຜົ່າ ຊຶ່ງເຮັດໃຫ້ເຂົາເຈົ້າໄດ້ເພີ່ມທະວີແນວຄິດຮັກຊາດ, ຈົງຮັກພັກດີຕໍ່ພັກ, ຕໍ່ລະບອບປະຊາທິປະໄຕ ປະຊາຊົນ, ເຊີດຊູຄຸນສົມບັດສິນທຳປະຕິວັດ ແລະ ຕື່ນຕົວປະຕິບັດລະບຽບກົດໝາຍວາງອອກ, ເປັນເຈົ້າການປະກອບສ່ວນເຂົ້າໃນການປົກປັກຮັກສາຄວາມສະຫງົບ ແລະ ປະຕິບັດແຜນພັດທະນາເສດຖະກິດ-ສັງຄົມດ້ວຍຄວາມຫ້າວຫັນ, ມີຄວາມສາມັກຄີເປັນປຶກແຜ່ນແໜ້ນໜາ, ສ້າງຄວາມເຂັ້ມແຂງດ້ວຍຕົນເອງ ເຮັດໃຫ້ຊີວິດການເປັນຢູ່ຂອງຊາວຜູ້ອອກແຮງງານບັນດາເຜົ່າດີຂຶ້ນເທື່ອລະກ້າວ, ມີຄວາມເຊື່ອໝັ້ນຕໍ່ການນຳພາຂອງພັກ-ລັດ ແລະ ປະຊາຊົນສູງຂຶ້ນ, ເຊີດຊູບົດບາດຂອງປະເທດເຮົາ ໃນເວທີສາກົນຢ່າງບໍ່ຢຸດຢັ້ງ. ການກໍ່ສ້າງພະນັກງານ-ສະມາຊິກກຳມະບານ ນັບມື້ນັບສູງຂຶ້ນ, ບັນດາສະຫະພັນກຳມະບານລາວຂັ້ນຕ່າງໆ ກໍໄດ້ສູ້ຊົນສ້າງຂະບວນການປັບປຸງ ແລະ ຂະຫຍາຍການຈັດຕັ້ງກຳມະບານຢ່າງເຂັ້ມແຂງ ແລະ ຕໍ່ເນື່ອງ. ການຈັດຕັ້ງກຳມະບານຂັ້ນຕ່າງໆ ກໍໄດ້ເອົາໃຈໃສ່ວຽກງານປົກປ້ອງສິດຜົນປະໂຫຍດອັນຊອບທຳຂອງຊາວຜູ້ອອກແຮງງານລາວບັນດາເຜົ່າ, ໄດ້ເອົາໃຈໃສ່ຕິດຕາມດູແລບັນຫາເງິນເດືອນ-ຄ່າແຮງງານ ແລະ ບັນດານະໂຍບາຍຕ່າງໆ, ຍູ້ຂະບວນການຫັນລົງຮາກຖານ, ວຽກງານຂະບວນການແຂ່ງຂັນນ້ຳໃຈຮັກຊາດ, ຂະບວນການແຂ່ງຂັນ 2 ດີ 5 ເປັນເຈົ້າ, ວຽກງານກອງທຶນ ແລະ ກອງທຶນຊ່ວຍເຫຼືອຊຶ່ງກັນ ແລະ ກັນ, ການຊອກຫາແຫຼ່ງລາຍຮັບ ເພື່ອກຸ້ມຕົນເອງເທື່ອລະກ້າວ.

ເພື່ອເຊີດຊູເສີມຂະຫຍາຍມູນເຊື້ອ ແລະ ຜົນງານຂອງສະຫະພັນກຳມະບານລາວທີ່ຍາດມາໄດ້ນັ້ນ ຈຶ່ງຮຽກຮ້ອງມາຍັງອົງການຈັດຕັ້ງກຳມະບານທຸກຂັ້ນ, ສະມາຊິກກຳມະບານ, ກຳມະກອນ ແລະ ຊາວຜູ້ອອກແຮງງານລາວບັນດາເຜົ່າໃນທົ່ວປະເທດ ຈົ່ງພ້ອມກັນເສີມຂະຫຍາຍມູນເຊື້ອອັນດີງາມຂອງຊາດ, ຕັ້ງໜ້າປັບປຸງກໍ່ສ້າງສະຫະພັນກຳມະບານທຸກຂັ້ນໃຫ້ເຕີບໃຫຍ່ຂະຫຍາຍຕົວ ແລະ ເພື່ອກໍ່ສ້າງຊົນຊັ້ນກຳມະກອນ ແລະ ຊາວຜູ້ອອກແຮງງານລາວບັນດາເຜົ່າ ໃຫ້ກາຍເປັນກຳລັງການຜະລິດ ທີ່ກ້າວໜ້າ, ນຳໜ້າພາທາງໃນການສ້າງເສດຖະກິດ ແລະ ບູລະນະລະບອບປະຊາທິປະໄຕ ປະຊາຊົນ ໃຫ້ຈະເລີນກ້າວໄປຕາມທິດສັງຄົມນິຍົມ, ສະຫະພັນກຳມະບານລາວທຸກຂັ້ນ ຈົ່ງສາມັກຄີທົ່ວປວງຊົນເປັນປຶກແຜ່ນແໜ້ນໜາ, ສືບຕໍ່ຜັນຂະຫຍາຍຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ X ຂອງພັກ ແລະ ແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ VIII, ຈັດຕັ້ງຂະບວນການແຂ່ງຂັນ 2 ດີ 5 ເປັນເຈົ້າ, ສືບຕໍ່ປຸກລະດົມ ແລະ ເປັນເຈົ້າການຊຸກຍູ້ຂະບວນການຜະລິດເປັນສິນຄ້າໃຫ້ຫຼາຍດ້ວຍຄຸນນະພາບດີ, ເປັນແບບຢ່າງນຳໜ້າໃນການຫັນລົງຮາກຖານຮອບດ້ານ, ສ້າງບ້ານ ແລະ ກຸ່ມບ້ານພັດທະນາ, ສ້າງກອງທຶນພັດທະນາຂັ້ນບ້ານ, ປະກອບສ່ວນແກ້ໄຂຄວາມທຸກຍາກຂອງປະຊາຊົນ, ເປັນເຈົ້າການເຂົ້າຮ່ວມໃນການປົກປັກຮັກສາຄວາມສະຫງົບ-ຄວາມເປັນລະບຽບຮຽບຮ້ອຍ ແລະ ໃນການຕ້ານ-ສະກັດກັ້ນປະກົດການຫຍໍ້ທໍ້ຕ່າງໆໃນສັງຄົມ.

ຊົມເຊີຍກຳມະບານລາວພ້ອມກັບທົ່ວພັກ, ທົ່ວລັດ, ທົ່ວກອງທັບ ແລະ ທົ່ວປວງຊົນລາວທັງຊາດ ສາມັກຄີກັນອາດຫານກ້າວຂຶ້ນ. ສ້າງ ສປປ ລາວ ໃຫ້ເປັນປະເທດສັນຕິພາບ, ເອກະລາດ, ປະຊາທິປະໄຕ, ເອກະພາບ, ວັດທະນາຖາວອນໄປຕາມທິດສັງຄົມນິຍົມ.

ນ້ຳໃຈວັນທີ 1 ກຸມພາໝັ້ນຍືນ !

                                              (ໂດຍ: ມິ່ງໂກ)