ເມືອງເງິນ ເຜີຍແຜ່ຜົນສຳເລັດກອງປະຊຸມໃຫຍ່ ຜູ້ແທນອົງຄະນະພັກແຂວງ

ເຜີຍ​ແຜ່​ໂດຍ​: ທ່ານ ຈັນ​ທະ​ໄມ​ຕ​ຣີ ເທບ​ສີ​ເມືອງ ເວ​ລາ: 06/10/2020 10:37:07 ຈຳ​ນວນ​​ຢ້ຽມ​ຊົມ 1032 ຄັ້ງ

ໃນ​ທ້າຍ​ເດືອນ​ກັນ​ຍາ ຜ່ານມານີ້ ​ທີ່​ສະໂມສອນໃຫຍ່ ເມືອງ​ເງິນ ແຂວງໄຊ​ຍະ​ບູ​ລີ ໄດ້​ຈັດ​ກອງ​ປະຊຸມ​ເຜີຍ ແຜ່​ຜົນສຳເລັດ​ກອງ​ປະຊຸມ ​ໃຫຍ່​ຜູ້​ແທນ​ອົງຄະ​ນະ​ພັກ ແຂວງໄຊ​ຍະ​ບູ​ລີ ສະໄໝ​ທີ VII ຂຶ້ນ​ຢ່າງ​ເປັນ​ທາງ​ການ. ຊຶ່ງ​ມີ​ຄະນະ​ປະຈຳ​ພັກ​ເມືອງ, ກຳມະການ​ພັກ​ເມືອງ, ຫົວໜ້າ​ຫ້ອງການ, ກົມ​ກອງ, ລັດ​ວິ​ສາ​ຫະ​ກິດ, ພະ ນັກງານ​ອາ​ວຸ​ໂສ​ບໍາ​ນານ, ນັກ ທຸລະກິດ​ຜູ້​ປະກອບ​ການ, ເລຂາ​ໜ່ວຍ​ພັກ​ບ້ານ, ເທດສະບານ ຕະຫຼອດ​ຮອດ​ພະນັກ​ງານ ​-​ ລັດ​​ຖະ​ກອນ​ທົ່ວ​ເມືອງ​ເຂົ້າ​ຮ່ວມ.
   ໂອກາດ​ນີ້ ສະຫາຍ ອາ​ເມ ຊົງ​ເຢຍ​ເລັງ ຄະນະ​ປະຈຳ​ພັກ​ແຂວງ ຫົວໜ້າ​ຄະນະໂຄ​ສະ​ນາ​ອົບຮົມ​ແຂວງ ໄດ້​ລາຍ​ງານ​ກ່ຽວ​ກັບ​ຜົນສຳເລັດ​ແຫ່ງ​ການ​ດຳເນີນ​ກອງ​ປະຊຸມ​ໃຫຍ່​ຜູ້​ແທນ​ອົງຄະ​ນະ​ພັກແຂວງໄຊ​ຍະ​ບູ​ລີ ສະໄໝ​ທີ VII ທີ່​ໄດ້​ດຳເນີນ​ມາ​ເປັນເວລາ 2 ວັນ​ເຕັມ ນັບ​ແຕ່​ວັນ​ທີ 8-9 ກັນຍາ 2020 ຜ່ານ​ມາ ຊຶ່ງ​ສະຫາຍ​ໄດ້​ຍົກ​ໃຫ້​ເຫັນເຖິງ​ຜົນງານ ແລະ ໄຊຊະນະ​ທ່ີ​ອົງຄະ​ນະພັກ ​ແຂວງ ສະໄໝ​ທີ VI ໄດ້​ຊີ້​ນຳ​-​ນຳພາ ແລະ ຍາດ​ມາ​ໄດ້ ໃນ​ໄລຍະ 5 ປີ​ຜ່ານ​ມາ. ອັນ​ທີ່​ພົ້ນ​ເດັ່ນ​ຄື ແຂວງ ໄຊ​ຍະ​ບູ​ລີ ຍັງ​ຮັກສາ​ໄດ້​ສະຖຽນ​ລະ​ພາບ​ທາງ​ດ້ານ​ການເມືອງ​ຢ່າງ​ໜັກ​ແໜ້ນ, ການ​ພັດທະນາ​ເສດ​ຖະ​ກິດ​-​ສັງຄົມ ແມ່ນ​ມີ​ບາດກ້າວ ແລະ ທ່ວງ​ທ່າ​ຂະຫຍາຍຕົວ​ດີ​ຂຶ້ນ, ໂຄງ​ປະກອບ​ເສດຖະກິດ​ຍັງ​ສືບຕໍ່ຂະຫຍາຍຕົວ ແລະ ຫັນປ່ຽນ​ຕາມ​ທິດ​ຢ່າງ​ຕັ້ງໜ້າ, ອັດຕາ​ການ​ຂະ​​ຫຍາຍ​ຕົວໃນ ລະດັບ 6,7% ຕໍ່​ປີ, ລວມຍອດ ຜະລິດ​ຕະ​ພັນ​ພາຍ​ໃນ (GDP) ບັນລຸ​ໄດ້ 10.706 ຕື້​ກີບ. ສະເລ່ຍ​ໃສ່​ຫົວ​ຄົນ​ໜຶ່ງ​ໄດ້ 3.031 ໂດ​ລາ​ ທຽບໃສ່​ມະຕິ​ກອງ​ປະຊຸມ​ໃຫຍ່​ຄັ້ງ​ທີ VI ເພີ່ມ​ຂຶ້ນ 618 ໂດ​ລາ​. ຈາກ​ນັ້ນ ສະ ຫາຍ​ກໍໄດ້​ແຈ້ງ​ຜົນ​ຂອງ​ການ​ເລືອກ​ຕັ້ງ​ເອົາ​ຄະນະ​ບໍລິຫານ​ງານ​ພັກ​ແຂວງ​ສະໄໝ​ທີ VII.
   ຕອນ​ທ້າຍ ສະຫາຍ ຍັງ​ໄດ້​ເນັ້ນ​ໜັກ ໃຫ້​ອົງການ​ປົກຄອງ​ເມືອງ ສືບຕໍ່​ນຳ​ເອົາ​ຜົນສຳເລັດ​ກອງ​ປະຊຸມ​ໃຫຍ່​ຜູ້​ແທນ​ອົງຄະ​ນະ​ພັກ ແຂວງ ໄຊ​ຍະ​ບູ​ລີ ສະໄໝ​ທີ VII ລົງ​ເຜີຍແຜ່​ໃຫ້​ປະຊາຊົນ​ຊາວ​ເມືອງ​ເງິນ ໃຫ້​ທົ່ວ​ເຖິງ​ທຸກ​ເປົ້າ​ໝາຍ, ກວ້າງຂວາງ ແລະ ໃຫ້​ທ່ວງ​ທັນ​ກັບ​ເວລາ ເພື່ອ​ພ້ອມ​ກັນ​ຈັດ​ຕັ້ງ​ຜັນ​ຂະຫຍາຍ​ເນື້ອ​ໃນ​ດັ່ງກ່າວ.
(ຂ່າວ: ອິນ​ແປງ ແຫວນ​ຄຳ) 


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110