ໂຮງຮຽນສິລະປະແຫ່ງຊາດ ສະຫຼອງວັນຄູແຫ່ງຊາດ ແລະ ເປີດຫ້ອງວາງສະແດງ

ເຜີຍ​ແຜ່​ໂດຍ​: ທ່ານ ຈັນ​ທະ​ໄມ​ຕ​ຣີ ເທບ​ສີ​ເມືອງ ເວ​ລາ: 07/10/2020 23:31:37 ຈຳ​ນວນ​​ຢ້ຽມ​ຊົມ 1116 ຄັ້ງ

   ໂຮງຮຽນສິລະປະແຫ່ງຊາດ ກະຊວງ ຖະແຫຼງຂ່າວ, ວັດທະນະທຳ, ແລະ ທ່ອງທ່ຽວ (ຖວທ) ໄດ້ຈັດພິທີສະຫຼອງວັນຄູແຫ່ງຊາດ 7 ຕຸລາ ແລະ ເປີດຫ້ອງວາງສະແດງມູນເຊື້ອຂອງໂຮງຮຽນຂຶ້ນໃນວັນທີ 6 ຕຸລາຜ່ານມານີ້, ທີ່ໂຮງຮຽນດັ່ງກ່າວ ໂດຍການເຂົ້າຮ່ວມຂອງທ່ານ ກິແກ້ວ ໄຂຄໍາພິທູນ ລັດຖະມົນຕີກະຊວງ ຖວທ, ມີທ່ານ ຮອງລັດຖະມົນຕີ, ຫົວໜ້າກົມ ແລະ ແຂກຖືກເຊີນເຂົ້າຮ່ວມ.
ທ່ານ ວຽງພອນ ສຸກຂະວົງ ຜູ້ອໍານວຍການໂຮງຮຽນສິລະປະແຫ່ງຊາດໄດ້ກ່າວວ່າ: ໃນການສະຫຼອງວັນຄູປີນີ້, ແມ່ນມີຄວາມໝາຍຄວາມສຳຄັນ ທັງເປັນການສະຫຼອງຜົນງານ ຄວາມກະຕັນຍູຮູ້ບຸນຄຸນຂອງຄູ-ອາຈານ ຍ້ອງຍໍຊົມເຊີຍຜົນງານຄູ-ອາຈານສອນດີສອນເກັ່ງ ພ້ອມທັງໄດ້ຮຽນຮູ້ເອົາຄຸນງາມຄວາມດີຂອງຄູ-ອາຈານ ທີ່ໄດ້ອຸທິດຊີວິດຂອງຕົນ ຕະຫຼອດໄລຍະການຮຽນ-ການສອນໂດຍສະເພາະວຽກງານສິລະປະການສະແດງ ທັງເປັນການເສີມສ້າງທັກສະ, ຄວາມສາມາດໃຫ້ແກ່ນັກຮຽນໄດ້ກ້າສະແດງອອກໃນເວທີການສະແດງ.
   ໂອກາດນີ້, ໂຮງຮຽນຍັງໄດ້ເປີດຫໍວາງສະແດງມູນເຊື້ອຂອງໂຮງຮຽນເພື່ອເປັນການຮຽນຮູ້ປະຫວັດຄວາມເປັນມາ ແລະ ການເຕີບໃຫຍ່ຂະຫຍາຍຕົວຂອງໂຮງຮຽນສິລະປະແຫ່ງຊາດ ແຕ່ເລີ່ມສ້າງຕັ້ງເມື່ອປີ 1969 ມາຮອດປັດຈຸບັນ. ຫ້ອງວາງສະແດງມູນເຊື້ອເປັນບ່ອນສະສົມ ທ້ອນໂຮມເຄື່ອງວັດຖຸພັນກ່ຽວກັບສິລະປະການສະແດງໃນຫຼາຍຍຸກຫຼາຍສະໄໝທີ່ຜ່ານມາ. ໃນເມື່ອກ່ອນໂຮງຮຽນແຫ່ງນີ້, ມີຊື່ວ່າໂຮງຮຽນສິລະປະດົນຕີແນວລາວຮັກຊາດ. ພາຍຫຼັງປະເທດຊາດໄດ້ຮັບການປົດປ່ອຍ ໃນວັນທີ 2 ທັນວາ 1975, ໂຮງຮຽນໄດ້ຍ້າຍມາວຽງຈັນເມື່ອປີ 1976 ຢູ່ທີ່ບ້ານອານຸ, ເມືອງຈັນທະບູລີ, ນະຄອນຫຼວງວຽງຈັນ. ຈາກນັ້ນ, ໂຮງຮຽນກໍໄດ້ເອົາໂຮງຮຽນສິລະປະດົນຕີແນວລາວສ້າງຊາດ ແລະ ໂຮງຮຽນນາດຕະສິນ-ດຸລິຍາງເຂົ້າກັນເປັນໂຮງຮຽນສິລະປະດົນຕີ. ມາເຖິງປີ 2010 ກະຊວງ ຖວທ ໄດ້ປ່ຽນຊື່ມາເປັນໂຮງຮຽນສິລະປະແຫ່ງຊາດ ຈົນເຖິງທຸກວັນນີ້.
   ໂຮງຮຽນສິລະປະແຫ່ງຊາດເປັນກອງວິຊາການໜຶ່ງທີ່ມີສາຍວິຊາການຂຶ້ນກັບກົມສິລະປະການສະແດງ, ມີພາລະບົດບາດ ໃນການກໍ່ສ້າງຖັນແຖວນັກສະແດງສິລະປະອາຊີບຕາມ 5 ຫຼັກມູນຂອງກະຊວງສຶກສາທິການ ແລະ ກິລາວາງອອກ ຊຶ່ງມີຫຼັກສູດການຮຽນ-ການສອນ ໃນລະດັບຊັ້ນກາງ ແລະ ຈັດເຝິກອົບຮົມທາງດ້ານອາຊີບສິລະປະການສະແດງເປັນຕົ້ນຕໍ. ໂຮງຮຽນ ປະກອບມີ 13 ຂະແໜງຄື: ຂະແໜງບໍລິຫານ, ວິຊາການ, ດົນຕີພື້ນເມືອງ, ດົນຕີສາກົນ, ຟ້ອນພື້ນເມືອງ, ຟ້ອນຊົນເຜົ່າ-ສາກົນ, ຮ້ອງເພງ-ຂັບລໍາ, ລະຄອນ, ກາຍະສິນ, ທິດສະດີ, ປະດິດແຕ່ງ-ບັນຊາ, ສາມັນສຶກສາ, ຄຸ້ມຄອງນັກສຶກສາ ແລະ ຫ້ອງສະໝຸດ.
ຂ່າວ: ມະລິ


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110