ຕະຫຼາດແຮງງານຫວຽດນາມ ມີການປັບປຸງໃນໄຕມາດ 3

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ​ ເວ​ລາ: 08/10/2020 10:16:48 ຈຳ​ນວນ​​ຢ້ຽມ​ຊົມ 906 ຄັ້ງ

ວິທະຍຸ​ກະຈາຍສຽງ​ຫວຽດ ນາມ​ລາຍ​ງານ​ວ່າ: ຫວຽດນາມ ມີ 31,8 ລ້ານ​ຄົນ ໃນ​ເກນ​ອາຍຸ 15 ປີ​ຂຶ້ນ​ໄປ ຖືກ​ຜົນ​ກະທົບ​ຫຍໍ້ທໍ້​ຍ້ອນ​ໂຣກ​ລະບາດ​ໂຄ​ວິດ-19, ໃນ​ນັ້ນ ຜູ້​ມີ​ລາຍ​ຮັບ​ຫຼຸດ​ລົງ​ເຖິງ 69%.
ໃນ​ກອງ​ປະຊຸມ​ຖະແຫຼງ​ຂ່າວ​ກ່ຽວ​ກັບ​ສະພາບ​ແຮງ​ງານ, ວຽກ​ເຮັດ​ງານ​ທຳ​ໄຕ​ມາດ 3  ແລະ 9 ເດືອນ​ຕົ້ນ​ປີ 2020, ໃນ​ວັນ​ທີ 6 ຕຸລາ​ຜ່ານ​ມາ, ຢູ່​ນະຄອນຫຼວງ​ຮ່າ​ໂນ້ຍ, ທ່ານ ນາງ ຫ​ງວຽນ​ທິ​ເຮືອງ ຫົວໜ້າ​ກົມ​ໃຫຍ່​ສະຖິຕິໃຫ້​ຮູ້​ວ່າ: ໃນ​ໄຕ​ມາດ 3, ບັນດາ​ຂະ ແໜງການ​ຖືກ​ຜົນ​ກະທົບ​ຢ່າງ​ໜັກໜ່ວງ ຍ້ອນ​ຜົນ​ກະທົບ​ຂອງ​ໂຣກ​ລະບາດ​ໂຄ​ວິດ-19 ລ້ວນ​ແຕ່​ມີ​ສັນຍານ​ເຕີບ​ໂຕ​ຄືນ​ໃໝ່. ສະພາບ​ແຮງ​ງານ, ວຽກ​ເຮັດ​ງານ​ທຳ ແລະ ລາຍ​ຮັບ​ຂອງ​ຊາວ​ຜູ້​ອອກແຮງ​ງານ ໃນ​ໄຕ​ມາດ 3 ປີ 2020 ກໍ່​ໄດ້​ຮັບ​ການ​ປັບປຸງ​ດີ​ຂຶ້ນ​ເມື່ອ​ທຽບໃສ່​ໄຕ​ມາດ 2. ມາຮອດ​ເດືອນກັນຍາ ປີ 2020, ຫວຽດນາມ ມີ 31,8 ລ້ານຄົນ ໃນ​ເກນ​ອາຍຸ 15 ປີ​ຂຶ້ນໄປຖືກ ​ຜົນ​ກະທົບ​ຫຍໍ້ທໍ້​ຍ້ອນ​ໂຣກ​ລະ ບາດ​ໂຄ​ວິດ-19, ໃນ​ນັ້ນ ຜູ້​ມີ​ລາຍ​ຮັບ​ຫຼຸດ​ລົງ​ເຖິງ 69%.
ທ່ານ ນາງ ວາ​ເລັນ​ຕິ​ນາ ບາ​ຊູ​ຊີ ຮອງ​ຫົວໜ້າ​ອົງການ​ແຮງ​ງານ​ສາກົນ​ປະຈຳ ຫວຽດນາມ ໃຫ້​ຮູ້​ວ່າ: ໂຕ​ເລກ​ສະຖິຕິ ແມ່ນ​ມາດ​ຕະການ​ຊ່ວຍ​ໃຫ້​ມີ​ຄຳ​ຕອບ​ກ່ຽວ​ກັບ​ສະພາບ​ແຮງ​ງານ ແລະ ວຽກ​ເຮັດ​ງານ​ທຳ; ພ້ອມ​ທັງ​ຊ່ວຍ​ທົບ​ທວນຄືນ​ຜົນ​ກະທົບ​ຈາກ​ໂຣກ​ລະບາດ​ໂຄ​ວິດ-19 ທີ່​ມີ​ຕໍ່​ຊາວ​ຜູ້​ອອກແຮງ​ງານ ຄື​ແນວໃດ​ໃນ​ຊຸມ​ເດືອນ​ຜ່ານ​ມາ. ອົງການ​ແຮງ​ງານ​ສາກົນ ປະຈຳ ຫວຽດນາມ ປາຖະໜາ​ຢາກ​ສືບຕໍ່​ຮ່ວມ​ມື​ກັບ​ກົມ​ໃຫຍ່​ສະຖິຕິ ໃນ​ການ​ສຳຫຼວດ​ແຮງ​ງານ ແລະ ວຽກ​ເຮັດ​ງານ​ທຳ​ໃນ​ໄລຍະ​ຈະ​ມາ​ເຖິງ.
 


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110