ຄອບຄົວສ້າງ ຄູສິດສອນ ກໍ່ໃຫ້ເກີດປັນຍາ ພັດທະນາສັງຄົມ.

ເຜີຍ​ແຜ່​ໂດຍ​: ທ່ານ ສິດ​ທິ​ພອນ ຣາ​ຊະ​ພົນ ເວ​ລາ: 08/10/2020 10:24:53 ຈຳ​ນວນ​​ຢ້ຽມ​ຊົມ 813 ຄັ້ງ

ໂດຍ: ວັນໄຊ ຕະວິນຍານ
.........................
...ບໍ່ວ່າຍຸກໃດ ສະໄໝໃດ ການສຶກສາເປັນສິ່ງທີ່ຊົງຄຸນຄ່າອັນມະຫາສານໃຫ້ກັບມະນຸດ.ຜ່ານການສຶກສາຄົ້ນຄ້ວາຮໍ່າຮຽນ ຈຶ່ງເກີດປັນຍາ ຜ່ານປະສົບການ ມະນຸດຈຶ່ງຮູ້ຈັກແກ້ໄຂບັນຫາ ເພື່ອຄວາມຢູ່ຫລອດ ແລະ ວິວັດທະນາການຈົນມາເຖິງປັດຈຸບັນນີ້.
ໃນຍຸກນີ້,ແມ່ນຍຸກແຫ່ງເຕັກໂນໂລຊີ,ຍຸກແຫ່ງຂໍ້ມູນຂ່າວສານ ການສຶກສາຍິ່ງມີບົດບາດສໍາຄັນຕໍ່ສັງຄົມ ແລະ ມີຄວາມຮຽກຮ້ອງຕ້ອງການຄົນທີ່ມີຄວາມຮູ້ ຄວາມສາມາດ ບວກກັບເງື່ອນໄຂອື່ນໆ ໄປປະກອບອາຊີບການງານພັດທະນາສັງຄົມ.ເມື່ອເວົ້າເຖິງການສຶກສາ ພວກເຮົາຕ້ອງເບິ່ງຈຸດເລີ້ມຕົ້ນ,ຈຸດເລີ້ມຕົ້ນ ອັນທໍາອິດແມ່ນຄອບຄົວ ຊຶ່ງແມ່ນສະຖາບັນທີ່ສະຫງົບສຸກ ພໍ່ - ແມ່ ຫຼື ຜູ້ປົກຄອງມີໜ້າທີ່ລ້ຽງດູ ອົບຮົມບົ່ມສອນແນວຄິດພື້ນຖານຂອງລູກເຕົ້າ,ໃຫ້ລູກຮູ້ແນວທາງອັນດີ ມີຄວາມກ້າວໜ້າ ຮູ້ ສິ່ງທີ່ຖືກຕ້ອງ ສິ່ງທີ່ຜິດພາດ ໃຫ້ລູກກ້າວເດີນຕາມຄວາມມຸ້ງຫວັງອັນດີຂອງພໍ່-ແມ່ ສາມາດຢູ່ຮ່ວມກັນກັບສັງຄົມໄດ້.ສະນັ້ນ ຄອບຄົວຈຶ່ງເປັນແບບຢ່າງອັນດີ ທາງດ້ານຄຸນສົມບັດ ດ້ານຈິດໃຈ ການປະພືດປະຕິບັດ ແລະ ການຊົມໃຊ້ວັດຖຸ ອັນເປັນຄ່ານິຍົມແບບບໍ່ຈົບສີ້ນ.ດັງສຸພາສິດບູຮານເຄີຍເວົ້າວ່າ: ນາດີຍ້ອນກ້າ ພ້າເຂົ້າຍ້ອນຫີນລັບ.ເລືອກຊ້າງໃຫ້ເບິ່ງຫາງ ເລືອກນາງໃຫ້ເບິ່ງແມ່....ນອກຈາກຄອບຄົວແລ້ວ ບັນຫາສໍາຄັນ ອີກອັນນຶ່ງ ແມ່ນຄູ ຜູ້ສິດສອນ ເຊິ່ງມີບົດບາດອັນສູງສົ່ງຕໍ່ການສອນ-ການຮຽນ ເສີມສ້າງຄວາມຮັບຮູ້ ກໍ່ໃຫ້ເກີດປັນຍາ ນໍາເອົາແສງສະຫວ່າງມາສູ່ຊີວິດຂອງທຸກໆຄົນ.ຄູຜູ້ສິດສອນ ມີໜ້າທີ່ພັດທະນາຄວາມຮູ້,ແນວຄວາມຄິດ ສອນໃຫ້ຄົນມີລະບຽບວິໄນ ເກີດມະໂນພາບ ແລະ ຈິນຕະນາການ.ຢາກໃຫ້ການສຶກສາດີ ຄູຕ້ອງມີຄຸນນະພາບ.ຢາກໃຫ້ຄູ ມີຄຸນນະພາບ ຕ້ອງ ກວດສອບຄັດເລືອກ ເອົາໃຈໃສ່ບໍາລຸງ ຍົກລະດັບຢ່າງຕໍ່ເນື່ອງ ເພື່ອໃຫ້ຄູໄດ້ຮັບຮູ້ສິ່ງໃໝ່ໆ ແລະ ມີວິໄສທັດທີ່ດີ.ໄປພ້ອມກັບປະຕິບັດນະໂຍບາຍ ທາງດ້ານວັດຖຸ ແລະ ຈິດໃຈຕໍ່ຄູຢ່າງເໜາະສົມ ແລະ ທົ່ວເຖິງ.ເມື່ອເວົ້າເຖິງສັງຄົມ ກໍ່ໜາຍເຖິງ ການພັວພັນລະຫວ່າງຄົນກັບຄົນ.ຂອງການຈັດຕັ້ງໃດນຶ່ງ.ສັງຄົມມີໜ້າທີ່ຄັດເລືອກ ສັບຊ້ອນ ນໍາໃຊ້ບຸກຄະລາກອນໄປຕາມວິຊາຄວາມຮູ້ ຄວາມສາມາດ ຕາມ ທີ່ສໍາເລັດການສຶກສາໃນລະດັບຕ່າງໆຈາກການສິດສອນຂອງຄູ,ພ້ອມທັງສົ່ງເສີມໃຫ້ມີຄວາມກ້າວໜ້າ.ເມື່ອເປັນແນວນັ້ນ ຈຶ່ງສາມາດສະຫລຸບໄດ້ວ່າ: ການພັດທະນາຄົນ ແມ່ນ ເລີ້ມຈາກຄອບຄົວ ສະຖານການສຶກສາ ແລະ ສັງຄົມ ບວກກັບສິ່ງແວດລ້ອມ. ໂດຍບໍ່ສາມາດຕັດແຍກອອກຈາກກັນໄດ້.
ເພື່ອເຮັດໃຫ້ການສຶກສາຂອງປະທດລາວເຮົາ ມີການພັດທະນາຂະຫຍາຍຕົວ ກ້າວໄກ
ທຸກພາກສ່ວນ ຕ້ອງເພີ່ມຄວາມຮັບຜິດຊອບ ຕັ້ງໜ້າເຮັດໜ້າທີ່ຂອງໃຜຂອງລາວ ໃນການສຶກສາອົບຮົ່ມບົ່ມເພາະລູກຫລານ ໃຫ້ກາຍເປັນຄົນດີ ປະກອບສ່ວນສ້າງສາພັດທະນາສັງຄົມ ກໍ່ຄື ປະເທດຊາດ ໃຫ້ມີສັນຕິສຸກ ແລະ ຈະເລີນສີວິໄລ.


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110