ສະເຫຼີມສະຫຼອງວັນສ້າງຕັ້ງສາຍພົວພັນ ທາງການທູດລາວ-ຣັດເຊຍ ຄົບຮອບ 60 ປີ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ​ ເວ​ລາ: 09/10/2020 10:15:31 ຈຳ​ນວນ​​ຢ້ຽມ​ຊົມ 818 ຄັ້ງ

ກະຊວງ​ປ້ອງ​ກັນ​ປະເທດ​ໄດ້​ຈັດ​ພິທີ​ໂຮມ​ຊຸມນຸມ​ສະເຫຼີມ ສະຫຼອງ​ວັນ​ສ້າງຕັ້ງ​ສາຍ​ພົວ ພັນ​ການ​ທູດ​ລະຫວ່າງ ສປປ ລາວ​ -​ສະຫະພັນ ຣັດ​ເຊຍ ຄົບ ຮອບ 60 ປີ (7/10/1960-7/10/2020) ຂຶ້ນ​ໃນ​ວັນ​ທີ 8 ຕຸລາ​ນີ້ ທີ່​ກະຊວງ​ປ້ອງ​ກັນ​ປະເທດ, ພາຍ​ໃຕ້​ການ​ເປັນ​ປະ ທານ​ຮ່ວມ​ຂອງ​ທ່ານ ພົ.ອ ຈັນ​ສະໝອນ ຈັນ​ຍາ​ລາດ ກໍາ​ມະ​ການ​ກົມ​ການເມືອງ​ສູນ​ກາງ​ພັກ ລັດຖະມົນຕີ​ກະຊວງ​ປ້ອງ​ກັນ​ປະເທດ, ທ່ານ ວະ​ລາ​ດີ​ເມຍ ກາລີ​ນິນ ເອກ​ອັກ​ຄະ​ລັດ​ຖະ​ທູດ​ວິສາມັນ ຜູ້​ມີ​ອຳນາດ​ເຕັມ ແຫ່ງ ສ ຣັດ​ເຊຍ ປະຈຳ ສປປ ລາວ ພ້ອມ​ດ້ວຍ​ການ​ນຳ​ທັງ​ສອງ​ກະຊວງ​ລາວ ​- ຣັດ​ເຊຍ​ເຂົ້າ​ຮ່ວມ.

ທ່ານ ພົ.ອ ຈັນ​ສະໝອນ ຈັນ​ຍາ​ລາດ ກ່າວ​ວ່າ: ພາຍຫຼັງ ສປປ ລາວ ໄດ້​ຮັບ​ການ​ສະ ຖາປະນາ​ຂຶ້ນ, ອະ​ດີດ​ສະຫະ ພາບໂຊ​ວຽດ ຍັງ​ໄດ້ສືບຕໍ່ປະ ກອບສ່ວນ​ໃຫ້ການ​ຊ່ວຍເຫຼືອ ສປປ ລາວ ໃນ​ໄລ​ຍະ​ຮໍາ​ບາດ ແຜ​ສົງຄາມ ກໍ​ຄື​ໄລຍະ​ປົກ​ປັກ​ຮັກສາ ແລະ ພັດທະນາ​ປະ ເທດ​ຊາດ ເປັນຕົ້ນ​ແມ່ນ​ການ​ຊ່ວຍເຫຼືອ​ຟື້ນ​ຟູ​ພື້ນຖານ​ໂຄງ​ລ່າງ, ວັດຖຸ​ພາຫະນະ - ເຕັກນິກ, ເຂື່ອນ​ໄຟ​ຟ້າ​ນໍ້າ​ຕົກ, ຂົວ​-​ທາງ, ດ້ານ​ອຸດ​ສາຫະ​ກຳ, ກະສິກຳ, ການສຶກສາ, ສາ​ທາລະນະ​ສຸກ, ເຕັກນິກ​ການ​ທະຫານ ແລະ ອື່ນໆ ໄດ້​ກາຍເປັນ​ສັນ ຍາ​ລັກ​ແຫ່ງ​ມິດຕະພາບ​ອັນ​ດີງາມ​ລະຫວ່າງ​ປະຊາຊົນ​ສອງ​ຊາດ​ລາວ ແລະ ຣັດ​ເຊຍ. ອັນ​ພົ້ນ​ເດັ່ນ​ແມ່ນ​ການ​ກໍ່ສ້າງ​ຊັບພະຍາກອນ​ມະນຸດ ຊຶ່ງ​ໄດ້​ສ້າງ​ນັກວິຊາການ​ດ້ານ​ຕ່າງໆ​ຈໍາ​ນວນ​ຫຼວງຫຼາຍ​ໃຫ້​ແກ່ ສປປ ລາວ ແລະ ບັນດາ​ອະ​ດີດ​ນັກ​ສຶກສາ​ທີ່​ຈົບ​ມາ​ຈາກ​ອະ​ດີດ​ສະຫະພາບ​ໂຊ​ວຽດ ກໍ​ຄື ສະຫະພັນ ຣັດ​ເຊຍ​ປັດຈຸບັນ ໄດ້​ຖືກ​ບັນຈຸ​ຢູ່​ໃນ​ກົງຈັກ​ລັດ ຖະບານ, ໃນ​ຂະແໜງການ​ຕ່າງໆ, ເຂົາເຈົ້າ​ເຫຼົ່ານັ້ນ​ໄດ້​ກາຍເປັນ​ພະນັກງານ​ຫຼັກ​ແຫຼ່ງ​ໃນ​ການ​ຄຸ້ມ​ຄອງ​ລັດ, ບັນຊາ​ເຫຼົ່າ​ທັບ ແລະ ມີ​ຈໍາ​ນວນ​ບໍ່​ໜ້ອຍ​ກໍໄດ້ກາຍເປັນ​ການ​ນຳ​ໃນ​ບັນດາ​ອົງການ, ກະຊວງ​ຕ່າງໆ​ໃນ ສປປ ລາວ ລວມ​ທັງ​ການ​ນຳ​ກະຊວງ​ປ້ອງ​ກັນ​ປະເທດ ນັບ​ແຕ່​ສະໄໝ​ອະ​ດີດ​ຈົນ​ມາ​ເຖິງ​ປັດ​ຈຸ​ບັນ.

ລາວ ແລະ ຣັດ​ເຊຍ ມີ​ການ​ພົວພັນ​ອັນ​ລໍ້າ​ຄ່າ​ຮ່ວມ​ກັນ​ມາບົນ​ພື້ນຖານ​ມູນເຊື້ອ​ແຫ່ງ​ສາຍ​ພົວພັນ​ມິດຕະພາບ ແລະ ການ​ຮ່ວມ​ມື​ອັນ​ດີງາມ​ມາ​ດົນ​ນານ, ມີ​ຄວາມ​ໄວ້​ເນື້ອ​ເຊື່ອ​ໃຈ ແລະ ຊ່ວຍເຫຼືອ​ຊຶ່ງ​ກັນ ແລະ ກັນ. ເປັນ​ສາຍ​ພົວພັນ​ມິດຕະພາບ​ທີ່​ຮັດ​ແໜ້ນ ແລະ ເປັນ​ຄູ່​ຮ່ວມ​ມື​ທີ່​ມີ​ມາ​ຍາວ​ນານ, ເປັນ​ປະເທດ​ເພື່ອນ​ມິດ​ທີ່​ໃກ້ຊິດ ແລະ ຄູ່​ຮ່ວມ​ມື​ຍຸດທະສາດ, ໃຫ້ການ​ສະໜັບ​ໜູນ​ຊຶ່ງ​ກັນ ແລະ ກັນ​ໃນ​ເວທີ​ພາກ​ພື້ນ ແລະ ສາ​ກົນ.

ການ​ພົວພັນ​ຮ່ວມ​ມື​ໃນ​ຂົງເຂດ​ການ​ທະຫານ ລະຫວ່າງ​ສອງ​ຊາດ ລາວ - ຣັດ​ເຊຍ ໂດຍ​ສະເພາະ​ແມ່ນລະຫວ່າງ​ສອງ​ກະຊວງ​ປ້ອງ​ກັນ​ປະເທດ ໄດ້​ມີ​ບາດກ້າວ​ຂະຫຍາຍຕົວ​ຂຶ້ນ​ຢ່າງ​ບໍ່​ຢຸດ​ຢັ້ງ. ໂດຍ​ປະຕິບັດ​ຕາມ​ການ​ເຊື້ອ​ເຊີນ​ຂອງ​ລັດ ຖະມົນຕີ​ກະຊວງ​ປ້ອງ​ກັນ​ປະ ເທດ ແຫ່ງ ສ ຣັດ​ເຊຍ ຄະນະ​ຜູ້​ແທນ​ກະຊວງ​ປ້ອງ​ກັນ​ປະເທດ ແຫ່ງ ສປປ ລາວ ກໍໄດ້​ເດີນທາງ​ໄປ​ຮ່ວມ​ກອງ​ປະຊຸມ​ຄວາມ​ໝັ້ນຄົງ​ສາກົນ ມົ​ສ​ກູ ຄັ້ງ​ທີ 6, 7, 8, 9 ຢູ່ ສະຫະພັນ​ຣັດ​ເຊຍ ​ເປັນ​ປະ​ຈໍາ​ທຸກໆ​ປີ ໃນ​ແຕ່​ລະ​ຄັ້ງ​ກໍມີ​ການ​ພົບ​ປະ​ສອງ​ຝ່າຍ​ລະຫວ່າງ​ການ​ນຳ​ຂັ້ັນ​ສູງ​ຂອງ​ສອງ​ກະຊວງ​ປ້ອງ​ກັນ​ປະ​ເທດ. ນອກຈາກ​ນີ້, ກະຊວງ​ປ້ອງ​ກັນ​ປະເທດ ແຫ່ງ ສະຫະພັນ ຣັດ​ເຊຍ ຍັງ​ໄດ້​ໃຫ້ການ​ຊ່ວຍເຫຼືອ​ທາງ​ດ້ານ​ພາຫະນະ​ເຕັກນິກ ພ້ອມ​ທັງ​ຝຶກ​ອົບຮົມ​ການ​ນໍາ​ໃຊ້​ໃຫ້​ແຕ່​ລະ​ເຫຼົ່າ​ຮົບ​ຂອງ​ກອງທັບ​ປະຊາຊົນ​ລາວ​ເປັນຕົ້ນ​ເຫຼົ່າຮົບ​ລົດ​ຕັງ ​- ​ຍານ​ເກາະ, ເຫຼົ່າ​ຮົບ​ທະຫານ​ອາກາດ, ເຫຼົ່າ​ຮົບ​ປືນ​ໃຫຍ່, ເຫຼົ່າ​ຮົບ​ຊ່າງ​ແສງ, ເຫຼົ່າ​ຮົບ​ແຜນທີ່ ແລະ ເຫຼົ່າ​ຮົບ​ອື່ນໆ.

ໂອກາດ​ດຽວ​ກັນ​ນີ້, ທ່ານ ວະ​ລາ​ດີ​ເມຍ ກາລີ​ນິນ ໄດ້​ໃຫ້​ຮູ້​ວ່າ: ເລີ່ມ​ຕັ້ງແຕ່​ການ​ປະກາດ​ສະຖາປະນາ ສາທາລະນະ​ລັດ ປະຊາທິປະໄຕ ປະຊາຊົນ​ລາວ, ຣັດ​ເຊຍ ໄດ້​ໃຫ້ການ​ຊ່ວຍເຫຼືອ​ສະໜັບສະໜູນ​ຢ່າງ​ເປີດ​ກ​ວ້າງ ໃຫ້​ແກ່​ປະເທດ​ລາວ​ໂດຍ​ສະເພາະ​ທຶນ​ການ​ສຶກສາ, ກະສິກຳ, ວຽກ​ງານ​ປ່າໄມ້, ການ​ແພດ, ການ​ທະຫານ (ປ້ອງ​ກັນ​ຊາດ), ຄຽງ​ຄູ່​ໄປ​ກັບ​ການ​ຟື້ນ​ຟູ​ໂຄງ​ລ່າງ​ພື້ນຖານ​ຕ່າງໆ ທີ່​ຖືກ​ທຳລາຍ​ໃນ​ສະໄໝ​ສົງຄາມ ເຊັ່ນ: ສ້ອມແປງ​ເສັ້ນທາງ, ສ້າງ​ຂົວ​ແຫ່ງ​ຕ່າງໆ ແລະ ດຳເນີນ​ວຽກ​ງານ​ສຳຫຼວດ​ດ້ານ​ທໍລະນີ​ສາດ. ການ​ຮ່ວມ​ມື​ທາງ​ດ້ານ​ການ​ທະຫານ ແລະ ດ້ານ​ເຕັກ ນິກ​ການ​ທະຫານກັບ​ປະເທດ​ລາວ ເປັນ​ວຽກ​ງານ​ທີ່​ມີ​ຄວາມ​ໝາຍ​ສຳຄັນສຳລັບ​ປະເທດ​ຂອງ​ພວກ​ຂ້າພະເຈົ້າ, ໃນ​ໄລ ຍະ​ຫຼາຍ​ປີຜ່ານມາ ພວກ​ເຮົາ​ສາມາດ​ສັງເກດ​ເຫັນ​ໄດ້​ວ່າ: ການ​ພົວພັນ​ປະສານ​ງານ​ໃນ​ຂົງເຂດ​ປ້ອງ​ກັນ​ຊາດ ແລະ ຄວາມ​ໝັ້ນຄົງ ລະຫວ່າງ​ສອງ​ຊາດ ກຳລັງ​ສືບຕໍ່​ຂະຫຍາຍຕົວ​ຢ່າງ​ຕໍ່​ເນື່ອງ.

ທ່ານ​ກ່າວ​ຕື່ມ​ວ່າ: ຂ້າ ພະເຈົ້າ​ເຊື່ອ​ໝັ້ນ​ວ່າການ​ຮ່ວມ​ມື​ດ້ານ​ການ​ທະຫານ ແລະ ເຕັກນິກ​ການ​ທະຫານ​ຂອງ​ພວກ​ເຮົາ ຍັງ​ຈະ​ສືບຕໍ່​ເຕີບ​ໃຫຍ່​ຂະຫຍາຍຕົວ ແລະ ຊ່ວຍ​ຊຸກຍູ້​ການ​ຮັບປະກັນ​ຄວາມ​ເປັນ​ເອກະລາດ ຂອງ ສປປ ລາວ ພ້ອມ​ທັງ​ຮັກສາ​ຄວາມ​ອາດ​ສາມາດ​ດ້ານ​ວຽກ​ງານ​ປ້ອງ​ກັນ​ຊາດ​ຂອງ ສປປ ລາວ ໃຫ້​ຢູ່​ໃນ​ລະດັບ​ສູງ.

(ຂ່າວ​-​ພາບ: ພູ​ວັນ)


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110