ສື່ມວນຊົນທັດສະນະສະຖານທີ່ທ່ອງທ່ຽວຢູ່ 2 ແຂວງພາກເໜືອ

ເຜີຍ​ແຜ່​ໂດຍ​: ທ່ານ ສິດ​ທິ​ພອນ ຣາ​ຊະ​ພົນ ເວ​ລາ: 09/10/2020 11:21:25 ຈຳ​ນວນ​​ຢ້ຽມ​ຊົມ 766 ຄັ້ງ

     ກົມໂຄສະນາການທ່ອງທ່ຽວ ກະຊວງຖະແຫຼງຂ່າວ,ວັດທະນະທໍາ ແລະ ທ່ອງທ່ຽວ(ຖວທ) ຮ່ວມກັບກົມການຂ່າວ ພະແນກ ຖວທ ແຂວງອຸດົມໄຊ, ຫຼວງພະບາງ ແລະ ຂະແໜງການກ່ຽວຂ້ອງ  ໄດ້ຈັດກິດຈະກໍາທັດສະນະຢ້ຽມຊົມແຫຼ່ງທ່ອງທ່ຽວທີ່ສໍາຄັນຂອງສອງແຂວງຄື: ແຂວງອຸດົມໄຊ ແລະ ແຂວງຫຼວງພະບາງ ໃນລະຫວ່າງ ວັນທີ 8 - 13 ຕຸລາ 2020 ນີ້ ຊຶ່ງໄດ້ຮັບການສະໜັບສະໜູນຈາກໂຄງການພັດທະນາໂຄງລ່າງພື້ນຖານ ເພື່ອສົ່ງເສີມການທ່ອງທ່ຽວໄລຍະ 2 ຂອງທະນາຄານພັດທະນາອາຊີ (ADB).

     ທ່ານ ຄົມ ດວງຈັນທາ ວ່າການຫົວໜ້າກົມໂຄສະນາການທ່ອງທ່ຽວ ກະຊວງ ຖວທ ໄດ້ກ່າວວ່າ: ໃນໂອກາດເຂົ້າຮ່ວມໂຄງການທັດສະນະຢ້ຽມຢາມແຫຼ່ງທ່ອງທ່ຽວໃຫ້ແກ່ສື່ມວນຊົນທັງພາຍໃນ ແລະ ຕ່າງປະເທດໃນຄັ້ງນີ້, ເພື່ອເປັນການຈັດຕັ້ງຜັນຂະຫຍາຍແຜນຟື້ນຟູການທ່ອງທ່ຽວລາວ ແລະ ເປັນການຊຸກຍູ້ຜູ້ປະກອບການທຸລະກິດການທ່ອງທ່ຽວ ໂຮງແຮມ, ຮ້ານອາຫານ, ແຫຼ່ງທ່ອງທ່ຽວ, ຮ້ານຂາຍເຄື່ອງຫັດຖະກຳ ແລະ ຫົວໜ່ວຍທຸລະກິດທີ່ປິ່ນອ້ອມໃຫ້ມີຄວາມພ້ອມເພື່ອເປີດບໍລິການໂຄງການລາວທ່ຽວລາວ,ເພື່ອບໍລິການໃຫ້ແກ່ນັກທ່ອງທ່ຽວພາຍຫຼັງການລະບາດຂອງໂຄງວິດ-19  ພ້ອມກັນນັ້ນ, ຍັງເປັນການສົ່ງເສີມທ່າແຮງບົ່ມຊ້ອນ ແລະ ເຂົ້າເຖິງບັນດາແຫຼ່ງທ່ອງທ່ຽວທີມີຄວາມໂດດເດັ່ນໃຫ້ມີການໂຄສະນາຢ່າງກວ້າງຂວາງຢູ່ພາຍໃນ ແລະ ຕ່າງປະເທດ. ນອກຈາກນັ້ນ, ຍັງເປັນການສ້າງຄວາມເຊື່ອໝັ້ນໃຫ້ແກ່ນັກທ່ອງທ່ຽວລາວ ກໍຄືນັກທ່ອງທ່ຽວສາກົນໂດຍຜ່ານພາຫະນະສື່ມວນຊົນທັງພາຍໃນ ແລະ ຕ່າງປະເທດ. ຖ້າຫາກມີການເດີນທາງລະຫວ່າງແຂວງຕໍ່ແຂວງ, ເມືອງຕໍ່ເມືອງ ຈຶ່ງກໍ່ເກີດມີການໃຊ້ຈ່າຍຄ່າບໍລິການຕ່າງໆ, ເກີດມີການຊື້-ຂາຍ, ການຈ້າງງານ ເຮັດໃຫ້ມີການໝູນວຽນທາງດ້ານການເງິນພາຍໃນປະເທດໃຫ້ຫຼາຍຂຶ້ນ.

      ໂຄງການທັດສະນະຢ້ຽມຊົມແຫຼ່ງທ່ອງທ່ຽວໃຫ້ແກ່ສື່ມວນຊົນທັງພາຍໃນ ແລະ ຕ່າງປະເທດໃນຄັ້ງນີ້, ບັນດາສື່ຈະໄດ້ທັດສະນະ ແລະ ຢ້ຽມຢາມສະຖານທີ່ທ່ອງທ່ຽວທີ່ມີຊື່ສຽງຂອງແຂວງອຸດົມໄຊຄື: ​ແຫຼ່ງ​ທ່ອງ​ທ່ຽວ ນໍ້າກັດຢໍລະປາ, ວັດຈອມອອງ ແລະ ສະຖານທີ່ທ່ອງທ່ຽວຂອງແຂວງຫຼວງພະບາງຄື: ແຫຼ່ງ​ທ່ອງ​ທ່ຽວຕາດຮ້ອຍຄົວ, ຫໍພິພິທະພັນ,ພະທາດພູສີ, ຕະຫຼາດກາງຄືນ, ບ້ານຈ່ານເໜືອ, ບ້ານຊ່າງໄຫ ແລະ ແຫຼ່ງ​ທ່ອງ​ທ່ຽວຕາດກວາງຊີ.

ຂ່າວ-ພາບ: ຍຸພິນ


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110