ວັນປະກາດເອກະລາດ ຄົບຮອບ 75 ປີ

ເຜີຍ​ແຜ່​ໂດຍ​: ທ່ານ ສິດ​ທິ​ພອນ ຣາ​ຊະ​ພົນ ເວ​ລາ: 12/10/2020 21:11:45 ຈຳ​ນວນ​​ຢ້ຽມ​ຊົມ 743 ຄັ້ງ

(12/10/1945 - 12/10/2020)
..........................
ໂດຍ:ຜົນ​ບຸນ
ກ່ອນ​ໜ້າ​ນີ້​ຫຼາຍ​ສິບ​ປີ ຄື​ວັນ​ທີ 12 ຕຸລາ 1945, ໄດ້​ມີ​ການ​ໂຮມ​ຊຸມນຸມ​ໃຫຍ່​ຢູ່​ວຽງ​ຈັນ ເພື່ອ​ປະກາດ​ຄວາມ​ເປັນ​ເອກະລາດ​ຂອງ​ຊາດ​ລາວ​ເຮົາ ເປັນ​ຄັ້ງ​ທຳອິດ​ຈາກ​ແອກ​ປົກຄອງ​ຂອງ​ພວກ​ລ່າ​ເມືອງ​ຂຶ້ນ ແລະ ພວກ​ຮຸກ​ຮານ​ຕ່າງ​ຊາດ. ວັນ​ດັ່ງກ່າວ​ນັ້ນ ໄດ້​ເປັນ​ຂີດ​ໝາຍ​ແຫ່ງ​ໄຊຊະນະ​ຂອງ​ການ​ຕໍ່ສູ້​ອັນ​ພິລະ​ອາດ​ຫານ, ດ້ວຍ​ຄວາມ​ສາມັກຄີ ແລະ ການ​ເສຍສະຫຼະອັນ​ໃຫຍ່​ຫຼວງ​ຂອງ​ກອງທັບ ແລະ ປະຊາຊົນ​ເຮົາ​ພາຍ​ໃຕ້​ການ​ນຳພາ ຂອງ​ພັກ​ປະຊາຊົນ ​ປະຕິວັດ​ລາວ​ ຂອງ​ພວກ​ເຮົາ.
ຄື​ດັ່ງ​ພວກ​ເຮົາ​ຮູ້​ນຳ​ກັນ​ແລ້ວ​ວ່າ: ໃນ​ທ້າຍ​ສະຕະວັດ​ທີ 19, ພວກ​ລ່າ​ເມືອງ​ຂຶ້ນ​ຝຣັ່ງ​ໄດ້​ເຂົ້າ​ມາ​ຮຸກ​ຮານ ແລະ ຢຶດ​ຄອງ​ເອົາ​ປະເທດ​ເຮົາ​ເປັນ​ຫົວ​ເມືອງ​ຂຶ້ນ ນັບ​ແຕ່​ປີ 1893 - 1954. ປະເທດ​ລາວ​ໄດ້​ສູນ​ເສຍ​ເອກະລາດ, ປະຊາຊົນ​ລາວ​ໄດ້​ຂາດ​ອິດ​ສະລະ​ພາບ​ກາຍເປັນ​ຂ້ອຍ​ຂ້າ​ຂອງ​ຕ່າງ​ຊາດ ແລະ ຖືກ​ຂູດ​ຮີດ​ຢ່າງ​ແສນ​ສາຫັດ; ແຕ່​ດ້ວຍ​ນໍ້າ​ໃຈ​ຮັກ​ຊາດ, ຄຽດ​ແຄ້ນ ຕໍ່​ການ​ຮຸກ​ຮານ ແລະ ກົດ​ຂີ່​ຂູດ​ຮີດ ຂອງ​ພວກ​ລ່າ​ເມືອງ​ຂຶ້ນ, ປະຊາຊົນ​ລາວ​ບັນດາເຜົ່າ ຈຶ່ງ​ໄດ້​ລຸກ​ຮື​ຂຶ້ນ​ຕໍ່ສູ້​ຕ້ານ​ພວກ​ລ່າ​ເມືອງ​ຂຶ້ນ​ຝຣັ່ງ​ຢ່າງ​ເນື່ອງນິດ​ລຽນຕິດ, ໂດຍ​ເລີ່ມ​ຈາກ​ຂະບວນ​ການ​ຕໍ່ສູ້ທີ່​ບໍ່​ມີ​ພັກ​ນໍາ​ພາ ເປັນຕົ້ນ ແມ່ນ​ຂະບວນ​ການ​ຕໍ່ສູ້​ຂອງ​ປະຊາຊົນ ແຂວງ​ສະຫວັນ​ນະ​ເຂດ ພາຍ​ໃຕ້​ການ​ນໍາ​ພາ​ຂອງ​ພໍ່​ກະ​ດວດ ໃນ​ປີ 1901, ຂະບວນ​ການ​ຕໍ່ສູ້​ຂອງ​ເຈົ້າຟ້າ​ເມືອງ​ສິງ ປີ 1916, ຂະບວນ​ການ​ຕໍ່ສູ້​ຂອງ​ນາຍ​ຄູ​ຄໍາ​ຢູ່​ວຽງ​ຈັນ ປີ 1920, ຂະບວນ​ການ​ຕໍ່ສູ້​ຂອງ​ເຈົ້າຟ້າ​ປັດ​ໄຈ ປີ 1918-1922 ແລະ ຂະບວນ​ການ​ຕໍ່ສູ້​ອື່ນໆ. ຊຶ່ງ​ສະແດງ​ໃຫ້​ເຫັນ​ເຖິງ​ມູນເຊື້ອ​ອັນ​ພິລະ​ອາດ​ຫານ ຂອງ​ປະຊາຊົນ​ລາວ​ບັນດາເຜົ່າ ໃນ​ທົ່ວ​ປະເທດ ແຕ່​ໃນ​ເວລາ​ນັ້ນ ຍັງ​ບໍ່​ທັນ​ມີ​ພັກ​ນໍາ​ພາ​ຂະບວນ​ການ​ຕໍ່ສູ້​ດັ່ງກ່າວ ຈຶ່ງ​ຖືກ​ປະ​ລາ​ໄຊ. ຮອດ​ປີ 1934 ອົງຄະ​ນະ​ພັກ​ແຄ້ວນ​ລາວ ໄດ້​ຮັບ​ການ​ສ້າງຕັ້ງ​ຂຶ້ນ ການ​ຕໍ່ສູ້​ຂອງ​ປະຊາຊົນ​ລາວ ຈຶ່ງ​ໄດ້​ກ້າວ​ເຂົ້າ​ສູ່​ໄລຍະ​ໃໝ່ ດ້ວຍ​ຄຸນ​ນະ​ພາບ​ໃໝ່ ແລະ ພັກ​ໄດ້​ນໍາ​ພາ​ປະຊາຊົນ​ລາວ ລຸກ​ຮື​ຂຶ້ນ​ຢຶດ​ອໍາ​ນາດ​ການ​ປົກຄອງ​ທົ່ວ​ປະເທດ ໃນ​ວັນ​ທີ 23 ສິງຫາ 1945, ຂະບວນ​ການ​ຢຶດ​ອໍາ​ນາດ ຢູ່​ວຽງ​ຈັນ ໄດ້​ເລີ່ມ​ຈາກ​ການ​ຕໍ່ສູ້​ຂອງ​ກໍາ​ມະກອນ​ໂຮງງານ​ກັບ​ຟາ 500 ຄົນ, ງານ​ໂຮມ​ຊຸມນຸມ​ມິດ​ຕິງ ຊຶ່ງ​ມີ​ຜູ້​ເຂົ້າ​ຮ່ວມ​ໝື່ນ​ກວ່າ​ຄົນ, ຢູ່​ສະຫວັນ​ນະ​ເຂດ ປະຊາຊົນ​ໄດ້​ໂຄ່ນ​ລົ້ມ​ອໍາ​ນາດ​ການ​ປົກຄອງ​ເກົ່າ, ສ້າງ​ຕັ້​ງອໍາ​ນາດ​ການ​ປົກຄອງ​ປະຕິວັດ​ຂຶ້ນ​ແທນ ໃນ​ວັນ​ທີ 30 ສິງຫາ ແລະ ຢູ່​ທ່າ​ແຂກ ວັນ​ທີ 1 ກັນຍາ, ຢູ່​ຊໍາ​ເໜືອ ແຕ່​ວັນ​ທີ 26 ສິງຫາ ເຖິງ​ເດືອນ​ຕຸລາ ໄດ້​ມີ​ຂະບວນ​ການ​ບຸກ​ເຂົ້າ​ໂຈມ​ຕີ​ກອງ​ທະຫານ ຂອງ​ພວກ​ຮຸກ​ຮານ ແລະ ​ຢຶດ​ເອົາ​ຕົວ​ເມືອງ​ຄືນ​ໄດ້ ໃນ​ໄລຍະ​ບໍ່​ເຖິງ 1 ເດືອນ; ປະຊາຊົນ​ລາວ​ທີ່​ໄດ້​ຮັບ​ການ​ຮ່ວມ​ມື​ປະສານ​ງານ​ອັນ​ຕັ້ງໜ້າ ຂອງ​ອ້າຍ​ນ້ອງ​ຫວຽດນາມ ໄດ້​ລຸກ​ຮື​ຂຶ້ນ​ໂຄ່ນ​ລົ້ມອໍາ​ນາດ​ການ​ປົກຄອງ​ເກົ່າ ແລະ ສ້າງ​ຕັ້​ງອໍາ​ນາດ​ການ​ປົກຄອງ​ປະຕິວັດ​ຂຶ້ນ ຢູ່​ຫຼາຍ​ທ້ອງຖິ່ນ ແລະ ໄດ້​ຈັດ​ຕັ້ງ​ບັນດາ​ກອງ​ກໍາ​ລັງ ປະກອບ​ອາວຸດ​ປ້ອງ​ກັນ​ຕົວ ຢູ່​ໃນ​ຕົວ​ເມືອງ​ໃຫຍ່​ຕ່າງໆ ເຊັ່ນ: ຢູ່​ເມືອງ​ວຽງ​ຈັນ, ທ່າ​ແຂກ, ສະຫວັນ​ນະ​ເຂດ, ຊຽງ​ຂວາງ, ຊໍາ​ເໜືອ ແລະ ຫຼວງ​ພະ​ບາງ ໂດຍ​ມີ​ຕົວ​ແທນ​ຂອງ​ກໍາ​ລັງ​ປະຕິວັດ​ເປັນ​ແກ່ນ​ສານ​ນໍາ​ພາ ແລະ ປຸກລະດົມ​ມວນ​ຊົນ ສາມັກຄີ​ກັນ​ເດັດດ່ຽວ​ຕໍ່ສູ້ກູ້​ເອົາ​ເອກະລາດ ແລະ ອິດ​ສະລະ​ພາບ​ອັນ​ແທ້​ຈິງ​ມາ​ໃຫ້​ປະເທດ​ຊາດ. ຈາກ​ເຫດການ​ດັ່ງກ່າວ​ນັ້ນ ໄດ້​ສ້າງ​ເງື່ອນໄຂ​ໃຫ້​ແກ່​ການ​ລຸກ​ຮື​ຂຶ້ນ​ຢຶດ​ອໍາ​ນາດ ຈາກ​ພວກ​ລ່າ​ເມືອງ​ຂຶ້ນ ແລະ ປະກາດ​ຄວາມ​ເປັນ​ເອກະລາດ​ແຫ່ງ​ຊາດ.
ພາຍຫຼັງ​ມະຫາ​ປະຕິວັດ​ເດືອນ​ຕຸລາ ປີ 1917 ໄດ້​ຮັບ​ໄຊຊະນະ ແລະ ສະຫະພາບ​ໂຊ​ວຽດ ໄດ້​ເກີດ​ເປັນ​ລັດ​ສັງຄົມ​ນິຍົມ​ລັດ​ທໍາ​ອິດ​ໃນ​ໂລກ ແລະ ພາຍຫຼັງ​ທີ່​ປະທານ ໂຮ່​ຈິ​ມິນ ໄດ້​ຄົ້ນ​ພົບສັດ​ຈະ​ທໍາ​ທີ່​ວ່າ: ຢາກ​ກູ້​ຊາດ ແລະ ປົດ​ປ່ອຍ​ຊາດ ມັນ​ບໍ່​ມີ​ເສັ້ນທາງ​ອື່ນ​ໃດ​ນອກຈາກ​ເສັ້ນທາງ ຂອງ​ການ​ປະຕິ​ວັດ​ກໍາ​ມະ​ຊີບ”, ຂະບວນ​ການ​ປະຕິວັດ​ຂອງ​ອິນດູຈີນ​ຕິດ​ພັນ​ກັບ​ຂະບວນ​ການ​ປະຕິວັດ​ໂລກ ແລະ ເຕີບ​ໃຫຍ່​ຂຶ້ນ​ຢ່າງ​ວ່ອງ​ໄວ.
ປີ 1930 ພັກ​ກອມ​ມູ​ນິດ​ອິນດູຈີນ ໄດ້​ກໍາ​ເນີ​ດ​ເກີດ​ຂຶ້ນ, ເຮັດ​ໃຫ້ການ​ຕໍ່ສູ້​ຂອງ​ປະຊາຊົນ ບັນດາ​ປະເທດ​ໃນ​ອິນດູຈີນ​ມີ​ແນວທາງ ແລະ ມີ​ຍຸດທະສາດ​ອັນ​ຈະແຈ້ງ; ການ​ຕໍ່ສູ້​ຂອງ​ປະຊາຊົນ​ລາວ​ບັນດາເຜົ່າ​ໄດ້​ກ້າວ​ເຂົ້າ​ສູ່​ໄລຍະ​ໃໝ່, ດ້ວຍ​ຄຸນ​ນະ​ພາບ​ອັນ​ໃໝ່​ພາຍ​ໃຕ້​ການ​ນໍາ​ພາ - ຊີ້​ນໍາ​ຂອງ​ອົງຄະ​ນະ​ພັກ​ແຄ້ວ​ນ​ລາວ, ບັນດາ​ນັກຮົບ​ກອມ​ມູ​ນິດ​ຮຸ່ນ​ທໍາ​ອິດ​ຂອງ​ລາວ​ເຮົາ ໄດ້​ເອົາ​ຕົວ​ເຈືອ​ຈານ​ເຂົ້າ​ກັບ​ປະຊາຊົນ​ບັນດາເຜົ່າ​ຢູ່​ຮາກ​ຖານ ແລະ ໄດ້​ດໍາ​ເນີນ​ການ​ໂຄສະນາ​ຂົນຂວາຍ, ຈັດ​ຕັ້ງ​ຮາກ​ຖານ​ປະຕິວັດ​ຂຶ້ນ​ແບບ​ປິດ​ລັບ ຢູ່​ຫຼາຍ​ບ່ອນ​ເປັນຕົ້ນ ຢູ່​ບໍ່​ແຮ່, ໂຮງ​ຈັກ, ໂຮງງານ, ໂຮງຮຽນ, ໃນ​ຕົວ​ເມືອງ, ຊົນ ນະບົດ, ຄ້າຍ​ທະຫານ; ໄດ້​ເຕົ້າໂຮມ ແລະ ຈັດ​ຕັ້​ງນໍາພາ​ ປະຊາຊົນ, ບັນດາ​ຊັ້ນ​ຄົນລຸກ ຂຶ້ນ​ຕໍ່ສູ້​ຕ້ານ​ພວກ​ລ່າ​ເມືອງ​ຂຶ້ນ​ຝຣັ່ງ ຢ່າງ​ພິລະ​ອາດ​ຫານ, ເນື່ອງນິດ​ລຽນຕິດ ແລະ ນັບ​ມື້​ນັບ​ເຕີບ​ໃຫຍ່​ຂະຫຍາຍຕົວ​ກວ້າງ​ອອກ​ໄປ​ໃນ​ທົ່ວ​ປະ​ເທດ. ໃນ​ຂະນະ​ດຽວ​ກັນ​ນັ້ນ​ການ​ຈັດ​ຕັ້​ງນໍາ​ພາ​-​ຊີ້​ນໍາ ກໍ​ມີ​ລັກສະນະ​ລວມ​ສູນ​ເປັນ​ເອກະ​ພາບ ມີ​ຍຸດ​ທະວີ​ທີ ທີ່​ຄ່ອງ​ແຄ້ວ ມີ​ຍຸດທະສາດ​ອັນ​ຈະແຈ້ງ ແລະ ມີ​ແກນ​ນໍາ​ທີ່​ສະຫຼຽວ​ສະຫຼາດ​ເຂັ້ມ​ແຂງ.
ເມື່ອ​ກາລະ​ໂອກາດ​ໄດ້​ມາ​ເຖິງ, ເປັນຕົ້ນ​ແມ່ນ​ໃນ​ປີ 1945 ທີ່​ກອງທັບ​ແດງ​ໂຊ​ວຽດ​ໄດ້​ຜາບ​ແພ້​ພວກ​ຟາດ​ຊິດ​ເຢຍ​ລະ​ມັນ ໃນ​ສົງຄາມ​ໂລກ​ຄັ້ງ​ທີ​ສອງ, ສ່ວນ​ຢູ່​ຫວຽດນາມ ການ​ປະຕິວັດ​ເດືອນ​ສິງຫາ ໄດ້​ຮັບ​ໄຊຊະນະ ແລະ ສ້າງຕັ້ງ ສາທາລະນະ​ລັດ ປະຊາທິປະໄຕ ຫວຽດນາມ​ຂຶ້ນ ໃນ​ວັນ​ທີ 2/9/1945. ສ່ວນ​ລາວ​ເຮົາ ກໍ​ໄດ້​ຖື​ເອົາ​ກາລະ​ໂອກາດ​ສຳຄັນ​ດັ່ງກ່າວ ປະກາດ​ເອກະລາດ​ແຫ່ງ​ຊາດ ວັນ​ທີ 12 ຕຸລາ 1945, ແມ່ນ​ວັນ​ໜຶ່ງ​ທີ່​ມີ​ຄວາມ​ໝາຍ​ສໍາ​ຄັນ ໃນ​ປະຫວັດສາດ​ການ​ຕໍ່ສູ້​ອັນ​ຍືດ​ເຍື້ອ​ຍາວ​ນານ ເພື່ອ​ຄວາມ​ເປັນ​ເອກະລາດ​ຂອງ​ຊາດ​ລາວ​ເຮົາ; ເປັນ​ຄັ້ງ​ທໍາ​ອິດ​ທີ່​ໄດ້​ປະກາດ​ຄວາມ​ເປັນ​ເອກະລາດ ຈາກ​ແອກ​ປົກຄອງ​ຂອງ​ພວກ​ລ່າ​ເມືອງ​ຂຶ້ນ ແລະ ພວກ​ຮຸກ​ຮານ​ຕ່າງ​ຊາດ, ວັນ​ປະກາດ​ເອກະລາດ ໄດ້​ເປັນ​ຂີດ​ໝາຍ​ແຫ່ງ​ໄຊຊະນະ ຂອງ​ການ​ຕໍ່ສູ້​ອັນ​ພິລະ​ອາດ​ຫານ, ດ້ວຍ​ຄວາມ​ສາມັກຄີ ແລະ ການ​ເສຍສະຫຼະ​ອັນ​ໃຫຍ່​ຫຼວງ​ຂອງ​ກອງທັບ ແລະ ປະຊາຊົນ​ເຮົາ ພາຍ​ໃຕ້​ການ​ນໍາ​ພາ ຂອງ​ພັກ​ປະຊາຊົນ​ປະຕິວັດ​ລາວ.
ວັນ​ທີ 12 ຕຸລາ 1945 ໄດ້​ກາຍເປັນ​ເຫດການ​ທີ່​ມີ​ຄວາມ​ໝາຍ​ປະຫວັດສາດ​ຂອງ​ຊາດ​ລາວ​ເຮົາ ຍ້ອນ​ວ່າ​ແມ່ນ​ມື້​ທີ່​ມີ​ການ​ໂຮມ​ຊຸມນຸມ, ທີ່​ສະໜາມກິລາ​ແຫ່ງ​ຊາດ (ສະໜາມກິລາ​ເຈົ້າ​ອານຸວົງ ໃນ​ປັດຈຸບັນ) ຊຶ່ງ​ມີ​ມວນ​ຊົນ​ເຂົ້າ​ຮ່ວມ​ກວ່າ 2 ໝື່ນ​ຄົນ. ໃນ​ມື້ນີ້, ລັດຖະບານ​ລາວ​ອິດສະຫຼະ ໄດ້​ເປັນ​ຕົວ​ແທນ​ໃຫ້​ແກ່​ວົງ​ຄະນາ​ຍາດ​ແຫ່ງ​ຊາດ ປະກາດ​ຄວາມ​ເປັນ​ເອກະລາດ ຂອງ​ປະເທດ​ລາວ ຕໍ່​ໂລກ ຢ່າງ​ເປັນ​ທາງ​ການ, ປະ ກາດ​ໂຮມ​ແຜ່ນດິນ​ລາວ​ເປັນ​ເອກະ​ພາບ; ພ້ອມ​ກັນ​ນັ້ນ ກໍ​ໄດ້​ອອກ​ຖະແຫຼງການ​ກ່ຽວ​ກັບ​ການ​ປ່ຽນແປງ​ການ​ປົກຄອງ, ລຶບ​ລ້າງ​ທຸກໆ​ສັນຍາ​ທີ່​ລາວ​ໄດ້​ເຊັນ​ກັບ​ຝຣັ່ງ, ປະກາດ​ໃຊ້​ລັດ​ຖະ​ທໍາ​ມະນູນ​ສະ​ບັ​ບທໍາ​ອິດ, ປະກາດ​ໃຊ້​ເພງ​ຊາດ, ທຸງຊາດ, (ທຸງຊາດ​ລາວ​ປັດຈຸບັນ) ປະກາດ​ແຕ່ງຕັ້ງ​ຄະນະ​ລັດຖະບານ​ຊົ່ວຄາວ ຊຶ່ງ​ມີ​ສະເດັດ​ເຈົ້າ​ສຸພາ​ນຸ​ວົງ ເປັນ​ລັດຖະມົນຕີ ວ່າການ​ກະຊວງ​ການ​ຕ່າງປະເທດ ແລະ ຕໍ່​ມາ​ໄດ້​ດໍາ​ລົງ​ຕໍາ ແໜ່​ງ​ເປັນ​ຜູ້​ບັນຊາ​ການ​ທະຫານ​ສູງ​ສຸດ​ອີກ​ດ້ວຍ...ການ​ປະກາດ​ເອກະລາດ​ວັນ​ທີ 12 ຕຸລາ 1945 ໄດ້​ເຮັດ​ໃຫ້​ຊາວ​ໂລກ ໄດ້​ຮັບ​ຮູ້​ກ່ຽວ​ກັບ​ຄວາມ​ເປັນ​ຊາດ​ລາວ ຂອງ​ພວກ​ເຮົາ, ຮັບ​ຮູ້​ອະທິປະ​ໄຕ ແລະ ເຂດ​ນໍ້າ​ແດນ​ດິນ​ຂອງ​ລາວ; ພ້ອມ​ກັນ​ນັ້ນ ກໍ​ຮັບ​ຮູ້​ລັດຖະບານ​ຊົ່ວຄາວ​ຂອງ​ລາວ ແລະ ຮັບ​ຮູ້​ວ່າ​ຊາດ​ລາວ - ຄົນ​ລາວ​ກໍ​ເປັນ​ຄົນ​ທີ່​ມີ​ກຽດ​ສັກ​ສີ​ເໝືອນ​ຄົນ​ຊາດ​ອື່ນໆ ແລະ ຢາກ​ມີ​ອິດ​ສະລະ​ພາບ, ເປັນ​ເຈົ້າ​ຊາຕາ​ກໍາ​ຂອງ​ຕົນ​ເອງ ແລະ ຢາກ​ມີ​ການ​ພັດທະນາ​ຕົນ​ເພື່ອ​ຄວາມ​ຢູ່​ດີ​ກິນ​ດີ ແລະ ຄວາມ​ຈະເລີນ​ວັດທະນາ, ຍ້ອນ​ແນວ​ນັ້ນ​ພວກ​ເຮົາ​ຈຶ່ງ​ຖື​ເອົາ​ວັນ​ປະ​​ກາດເອກະລາດ 12 ຕຸລາ 1945 ເປັນ​ວັນ​ປະຫວັດສາດ​ທີ່​ສໍາ​ຄັນ​ຂອງ​ຊາດ, ເປັນ​ວັນ​ແຫ່ງ​ຄວາມ​ເອກອ້າງ​ທະ​ນົງ​ໃຈ ຕໍ່​ຄວາມ​ອາດ​ຫານ​ຊານ​ໄຊ ໃນ​ການ​ຕໍ່ສູ້​ບົນ​ຈິດໃຈ​ຍອມ​ຕາຍ​ດີ​ກວ່າ​ເປັນ​ຂ້ອຍ​ຂ້າ; ຕາຍ​ເພື່ອ​ເອກະລາດ​ດີກ​ວ່າ​ຢູ່​ພາຍ​ໃຕ້​ແອກ​ປົກຄອງ​ຂອງ​ຕ່າງ​ຊາດ; ຈາກ​ນັ້ນ​ມາ​ນໍ້າ​ໃຈ​ວັນ​ທີ 12 ຕຸລາ ຈຶ່ງ​ກາຍເປັນ​ມູນເຊື້ອ​ແຫ່ງ​ການ​ຕໍ່ສູ້​ມີ​ໄຊ ຂອງ​ຄົນ​ລາວ​ຜູ້​ຮັກ​ຊາດ ພາຍ​ໃຕ້​ການ​ນໍາ​ພາ​ຂອງ​ພັກ, ສາມາດ​ປົດ​ປ່ອຍ​ຊາດ​ໄດ້​ຢ່າງ​ສົມບູນ ແລະ ໄດ້​ສະຖາປະນາ​ເປັນ​ສາທາລະນະ​ລັດ ປະຊາທິປະໄຕ ປະຊາຊົນ​ລາວ ໃນ​ວັນ​ທີ 2 ທັນວາ 1975.
ເພື່ອ​ສືບຕໍ່​ເສີມ​ຂະຫຍາຍ​ມູນເຊື້ອ 12 ຕຸລາ​ມະຫາ​ໄຊ ຄະນະ​ພັກ - ຄະ​ນະ​ນໍາ​ທຸກ​ຂັ້ນ​ຕ້ອງ​ເອົາໃຈໃສ່ໂຄສະນາ​ສຶກສາ​ອົບຮົມ​ການເມືອງ - ແນວ​ຄິດ ຂອງ​ພະນັກງານ ສະມາຊິກ​ພັກ ແລະ ປະຊາຊົນ​ບັນດາ​ຊັ້ນ​ຄົນທີ່​ຂຶ້ນ​ກັບ​ການ​ນໍາ​ພາ - ຄຸ້ມ​ຄອງ​ຂອງ​ຕົນ ເຊີດ​ຊູ​ນ້ໍາ​ໃຈ​ຮັກ​ຊາດ​ຕິດ​ພັນ​ກັບ​ການ​ຊຸກຍູ້ ການ​ພັດທະນາ​ໃຫ້​ດໍາ​ເນີນ​ໄປ​ຢ່າງ​ຕັ້ງໜ້າ ແລະ ເປັນ​ຂະບວນ​ການ​ຕໍ່​ເນື່ອງ​ດັ່ງນີ້:
1. ສືບຕໍ່​ຈັດ​ຕັ້ງ​ການ​ຮຽນ, ຄົ້ນຄວ້າ​ເຊື່ອມ​ຊຶມ​ມະຕິ​ກອງ​ປະຊຸມ​ໃຫຍ່​ຂອງ​ພັກ ໃຫ້​ເລິກເຊິ່ງ ທົ່ວ​ເຖິງ​ທຸກ​ເປົ້າ​ໝາຍ; ຫັນ​ຄວາມ​ຮັບ​ຮູ້ - ເຂົ້າໃຈ​ໃຫ້​ກາຍເປັນ​ການ​ກະ​ທໍາ​ຕົວ​ຈິງ​ນັ້ນ​ຄື: ການ​ຜັນ​ຂະຫຍາຍ​ເປັນ​ແຜນ​ງານ - ເປັນ​ໂຄງການ​ເຄື່ອນ​ໄຫວ​ລະ​ອຽ​ດສໍາ​ລັບ​ແຕ່​ລະ​ໄລຍະ ໂດຍ​ແມ່ນ ຄະນະ​ພັກ​ນໍາ​ພາ​-​ຊີ້​ນໍາ ເຮັດ​ໃຫ້​ສອດຄ່ອງ​ກັບ​ໜ້າທີ່​ການເມືອງ ແລະ ໜ້າທີ່​ວິຊາ​ສະເພາະ ຂອງ​ແຕ່​ລະ​ກົມ​ກອງ ຂະແໜງການ​ໜ່ວຍ​ງານ; ທັງ​ມີ​ການ​ແບ່ງ​ງານ​ມອບ​ໝາຍ​ຄວາມ​ຮັບຜິດຊອບ​ຈັດ​ຕັ້ງ​ປະຕິບັດ​ໃຫ້​ຈະ​ແຈ້ງ.
2. ເພີ່ມ​ທະວີ​ຄວາມ​ສາມັກຄີ​ປອງ​ດອງຂອງປະ ຊາຊົນ​ບັນດາເຜົ່າ ພາຍ​ໃຕ້​ການ​ນໍາ​ພາ​ຂອງ​ພັກ, ເອົາໃຈ​ໃສ່​ຈໍາ​ກັດ ແລະ ແກ້​ໄຂ​ປະກົດ​ການ​ຫຍໍ້ທໍ້​ຕ່າງໆ​ໃນ​ສັງຄົມ, ສ້າງ​ບັນຍາກາດ​ເບີກບານ​ມ່ວນຊື່ນ, ເຮັດ​ໃຫ້​ປະເທດ​ຊາດ​ມີ​ຄວາມ​ສະຫງົບ​ປອດ​ໄພ, ມີ​ຄວາມ​ເປັນ​ລະບຽບ​ຮຽບຮ້ອຍ, ເປັນ​ປະເທດ​ທີ່​ໜ້າ​ທ່ຽວ​ໜ້າ​ຊົມ.
3. ເອົາໃຈໃສ່​ວຽກ​ງານ​ກໍ່ສ້າງ​ຮາກ​ຖານ​ການເມືອງ ແລະ ພັດທະນາ​ຊົນນະບົດ​ຮອບດ້ານ, ເປັນຕົ້ນ​ແມ່ນ​ໃຫ້​ສະຫຼຸບ​ຕີ​ລາຄາ​ຢ່າງ​ຖືກຕ້ອງ, ຊອກ​ໃຫ້​ເຫັນ​ຕົວ​ແບບ​ດີເດັ່ນ ແລະ ປັດ​ໄຈ​ໃໝ່ ເພື່ອ​ເສີມ​ຂະຫຍາຍ; ຄົ້ນຄວ້າ​ໃຫ້​ເລິກ​ກ່ຽວ​ກັບ​ທິດ​ທາງ ແລະ ມາດ​ຕະການ ເພື່ອ​ສ້າງ​ແຂວງ​ໃຫ້​ເປັນ​ຫົວໜ່ວຍຍຸດທະສາດ, ສ້າງ​ເມືອງ​ເປັນ​ຫົວໜ່ວຍ​ເຂັ້ມແຂງ​ຮອບດ້ານ ແລະ ສ້າງ​ບ້ານ​ເປັນ​ຫົວໜ່ວຍ​ພັດທະນາ ພ້ອມ​ກັນ​ນັ້ນ​ກໍ​ໃຫ້​ກະກຽມ​ບົດ​ລາຍ​ງານ - ບົດ​ປະກອບ​ຄວາມ​ເຫັນ​ໃຫ້​ກະທັດ​ຮັດ, ຈະແຈ້ງ ເພື່ອ​ປະກອບສ່ວນ​ເຂົ້າ​ໃນ​ການຈັດຕັ້ງ​ປະຕິບັດ ທິດ​ນໍາ​ຍຸດທະສາດ​ດັ່ງກ່າວ​ນັ້ນ ໃຫ້​ເປັນ​ຈິງ.
4. ເພີ່ມ​ທະວີ​ຄວາມ​ເອົາໃຈໃສ່​ຕໍ່​ການ​ຄຸ້ມ​ຄອງ​ເສດຖະກິດ - ຄຸ້ມ​ຄອງ​ສັງຄົມ ໂດຍ​ສະເພາະແມ່ນ​ການ​ຄຸ້ມ​ຄອງ​ຕະຫຼາດບໍ່​ໃຫ້​ມີ​ການ​ຂາດ ແຄນ​ສິນຄ້າ​ອັນ​ຈໍາ​ເປັນ, ຕົ້ນຕໍ ແລະ ບໍ່​ໃຫ້​ມີ​ການ​ປັ່ນ​ປ່ວນ, ເພີ່ມ​ທະວີ​ການ​ຄຸ້ມ​ຄອງ​ລາຄາ​ສິນຄ້າ ແລະ ຄ່າ​ບໍລິການ ເພື່ອ​ບໍ່​ໃຫ້​ມີ​ການ​ສວຍໂອກາດກອບ​ ໂກຍ​ກໍາ​ໄລ, ຮັບປະກັນ​ໃຫ້​ຄ່າ​ຄອງ​ຊີບ ແລະ ຊີວິດ​ການ​ເປັນ​ຢູ່​ຂອງ​ພະນັກງານ, ທະຫານ, ຕໍາ​ຫຼວດ ແລະ ພໍ່​ແມ່​ປະຊາຊົນ​ເປັນ​ປົກ​ກະ​ຕິ. ເພີ່ມ​ທະວີ​ຄວາມ​ສັກສິດ ໃນ​ການ​ຄຸ້ມ​ຄອງ​ສັງຄົມ ຕາມ​ລະບຽບ​ກົດຫມາຍ ໂດຍ​ສະເພາະແມ່ນ​ການ​ແກ້​ໄຂ​ບັນຫາ​ໄພ​ສັງຄົມ ແລະ ປະກົດ​ການ​ຫຍໍ້ທໍ້​ຕ່າງໆ​ດ້ວຍ​ມາດ​ຕະການ​ສັງ​ລວມ ແລະ ດ້ວຍ​ກໍາ​ລັງ​ແຮງ​ຂອງ​ທົ່ວ​ສັງຄົມ, ພ້ອມ​ກັນ​ນັ້ນ​ກໍ​ຍູ້​ແຮງ​ວຽກ​ງານ​ການ​ສຶກສາ ແລະ ສາທາລະນະ​ສຸກ ແລະ ການ​ປະຕິບັດ​ນະໂຍບາຍ ຕໍ່​ຜູ້​ມີ​ຄຸນງາມຄວາມດີ ຕໍ່​ປະເທດ​ຊາດ ແລະ ການປະ ຕິວັດ; ເສີມ​ສ້າງ​ຄວາມ​ເປັນ​ທໍາ ແລະ ຄຸນ​ນະ​ທໍາ​ໃນ​ສັງ​ຄົມ.
5. ປະຕິບັດ​ແນວທາງ​ການ​ຕ່າງປະເທດ ສັນຕິພາບ, ເອກະລາດ, ມິດຕະພາບ ແລະ ຮ່ວມ​ມືຢ່າງ​ຕັ້ງໜ້າ​ເປັນ​ເຈົ້າ​ການ; ເສີມ​ຂະຫຍາຍ​ຄວາມ​ຮັບຜິດຊອບ ແລະ ຄວາມ​ເປັນ​ເຈົ້າ​ການ​ຂອງ​ພວກເຮົາ​ໃຫ້​ສູງ​ຂຶ້ນ​ຕື່ມ​ອີກ​ໃນ​ການ​ພົວພັນ​ຮ່ວມ​ມືກໍ​ຄື​ການຈັດຕັ້ງ​ປະຕິບັດ​ແຜນການ ແລະ ຂໍ້​ຕົກລົງ​ວ່າ​ດ້ວຍ​ການ​ຮ່ວມ​ມື​ກັບ​ບັນດາ​ປະເທດ​ເພື່ອນ​ມິດ​ຍຸດທະສາດ, ບັນດາ​ປະເທດ​ອາ​ຊຽນ, ປະເທດ​ເພື່ອນ​ມິດ ແລະ ອົງ ການ​ຈັດ​ຕັ້ງ​ສາກົນ ລວມ​ທັງ​ຂອບ​ການ​ຮ່ວມ​ມື​ອື່ນໆ.


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110