ຫົວ​ຂໍ້ : ເພີ່ມ​ປະ­ສິດ​ທິ​ຜົນ​ການ​ປະ­ຕິ­ບັດ​ສົນ­ທິ­ສັນ­ຍາ UNCLOS

ເຜີຍ​ແຜ່​ໂດຍ​: admin ເວ​ລາ: 27/12/2019 15:46:44 ຈຳ​ນວນ​ຜູ້​ເຂົ້າ​ຢ້ຽມ​ຊົມ 260 ຄັ້ງ

ວິທະຍຸ​ກະຈາຍສຽງ​ຫວຽດ ນາມ​ລາຍ​ງານ​ວ່າ: ວັນ​ທີ 13 ພະຈິກ​ຜ່ານ​ມາ, ກອງ​ປະຊຸມ​ສຳ​ມະ​ນາ​ເວທີ​ປາ​ໄສ​ພາກ​ພື້ນ​ອາ​ຊຽນ (ARF) ຄັ້ງ​ທີ 2 ກ່ຽວ​ກັບ​ການ​ປະຕິບັດ​ສົນທິສັນຍາ​ຂອງ ສປຊ ກ່ຽວ​ກັບ​ກົດໝາຍ​ທະເລ​ປີ 1982 (UNCLOS) ແລະ ບັນດາ​ເອກະສານ​ນິຕິ​ກຳ​ຕ່າງໆ​ໃນ​ການ​ຮັບ​ມື​ກັບ​ສິ່ງ​ທ້າ​ທາຍ ໂດຍ​ຫວຽດນາມ, ກາ​ນາ​ດາ ແລະ ສະຫະພາບ​ເອີ​ຣົບ (EU) ເປັນ​ປະທານ​ຮ່ວມ, ໄດ້​ເປີດຂຶ້ນ​ຢູ່​ນະຄອນຫຼວງ​ຮ່າ​ໂນ້ຍ ປະເທດ​ຫວຽດນາມ. 

   ຂ່າວ​ລະບຸ​ວ່າ: ເຂົ້າ​ຮ່ວມ​ກອງ​ປະຊຸມ​ສຳ​ມະ​ນາ, ມີ​ເຈົ້າ​ໜ້າ​ທີ່, ນັກ​ຊ່ຽວຊານ, ນັກຮຽນ​ຮູ້​ກ່ຽວ​ກັບ​ການ​ຄຸ້ມ​ຄອງ​ທະເລ 100 ທ່ານ ທີ່​ມາ​ຈາກ 20 ປະເທດ ARF. ໃນ​ພິທີ​ເປີດ​ງານ​ສໍາ​ມະ​ນາ​ຄັ້ງ​ນີ້, ທ່ານ ນາງ ເລ​ທິ​ຕວຽດ​ມາຍ ຫົວໜ້າ​ກົມ​ກົດໝາຍ ແລະ ສົນທິສັນຍາ​ສາກົນ​ເນັ້ນ​ໜັກ​ວ່າ: ເປົ້າ​ໝາຍ​ຕົ້ນຕໍ​ຂອງ ກອງ​ປະຊຸມ​ສຳ​ມະ​ນາ ແນໃສ່​ສ້າງ​ເວທີ​ປາ​ໄສ ເພື່ອ​ໃຫ້​ບັນດາ​ນັກ​ຊ່ຽວຊານ, ນັກຮຽນ​ຮູ້ ແລະ ເຈົ້າ​ໜ້າທີ່​ບັນດາ​ຂອງ​ປະເທດ​ສະມາຊິກ ARF ແລກ​ປ່ຽນ​ຄໍາ​ເຫັນ​ກ່ຽວ​ກັບ​ບັນດາ​ວິທີ​ການ ເພື່ອ​ໝູນ​ໃຊ້​ບັນດາ​ເອກະສານ​ສາກົນ​ກ່ຽວ​ກັບ​ທະເລ​ຢ່າງ​ມີ​ປະສິດ​ທິ​ຜົນ, ພິເສດ​ແມ່ນ UNCLOS-1982, ເພື່ອ​ແກ້​ໄຂ​ບັນດາ​ສິ່ງ​ທ້າ​ທາຍ​ໃນ​ການ​ຄຸ້ມ​ຄອງ​ທະເລ​ໃນ​ປັດ ຈຸບັນ, ປະກອບສ່ວນ​ຍົກ​ສູງ​ຄວາມ​ຮັບ​ຮູ້​ກ່ຽວ​ກັບ​ບັນດາ​ສິ່ງ​ທ້າ​ທາຍ​ຕໍ່​ຄວາມ​ໝັ້ນຄົງ​ທາງ ​ທະເລ​ທີ່​ພວມ​ພົ້ນ​ເດັ່ນ​ຂຶ້ນ, ແບ່ງປັນ​ຄວາມ​ຮັບ​ຮູ້, ບົດຮຽນ ແລະ ພຶດຕິ​ກຳ​ຕົວ​ຈິງ​ທີ່​ດີ​ກ່ຽວ​ກັບ​ການ​ປະຕິບັດ​ກົດໝາຍ​ວ່າ​ດ້ວຍ​ທະເລ ແລະ ເພື່ອ​ກຳນົດ​ໂອກາດ, ວິທີ​ການ​ແກ້​ໄຂ​ຊຸກຍູ້​ການ​ຮ່ວມ​ມື​ກ່ຽວ​ກັບ​ທະເລ ລະຫວ່າງ ບັນດາ​ສະມາຊິກ ARF.

   ໃນ​ຂະນະ​ນັ້ນ, ທ່ານ ນາງ ເດ​ໂບ​ຣາ ພາວ ເອກ​ອັກ​ຄະ​ລັດ​ຖະ​ທູດ ກາ​ນາ​ດາ ປະຈຳ ຫວຽດນາມ ແລະ ທ່ານ ຈີ​ອໍ​ໂກ ອາ​ໂລ​ເບີ​ຕີ ເອກ​ອັກ​ຄະ​ລັດ​ຖະ​ທູດ​ສະຫະພາບ​ເອີ​ຣົບ ປະຈຳ ຫວຽດນາມ ຢັ້ງຢືນ​ເຖິງ​ບົດບາດ​ສຳຄັນ​ຂອງ UNCLOS-1982, ໃນ​ການ​ຄຸ້ມ​ຄອງ​ການເຄື່ອນໄຫວ​ຂອງ​ບັນດາ​ປະເທດ​ຢູ່​​ຕະຫຼອດ​ເວລາ 25 ປີ​ທີ່​ຜ່ານ​ມາ.

   ກອງ​ປະຊຸມ​ສຳ​ມະ​ນາ​ຄັ້ງ​ນີ້, ໄດ້​ສຸມ​ໃສ່​ປຶກສາ​ຫາລື​ບັນດາ​ມາດ​ຕະການ, ຍົກ​ສູງ​ປະສິດ​ທິ​ຜົນ​ຂອງ​ການ​ປະຕິບັດ UNCLOS-1982 ແລະ ບັນດາ​ເອກະສານ​ນິຕິ​ກຳ​ສາກົນ​ທີ່​ກ່ຽວຂ້ອງ​ເຖິງ​ການ​ແກ້​ໄຂ​ບັນດາ​ສິ່ງ​ທ້າ​ທາຍ​ຄວາມ​ໝັ້ນຄົງ​ຢູ່​ທະເລ, ເພື່ອ​ສະເໜີ​ບັນດາ​ຂໍ້​ສະເໜີ​ແນະ ເພື່ອ​ປັບ ປຸງ​ການ​ຮ່ວມ​ມື ລະຫວ່າງ​ບັນດາ​ປະເທດ, ເພີ່ມ​ທະວີ​ບົດບາດ​ຂອງ​ບັນດາ​ກົນ​ໄກ ແລະ ຂອບ​ເຂດ​ພາກ​ພື້ນ​ໃນ​ການ​ຄຸ້ມ​ຄອງ​ທະເລ ແລະ ມະຫາ​ສະ​ໝຸດ.

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110