ຫວຽດນາມ ປະສົບໄພພາຍຸ LINFA

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ​ ເວ​ລາ: 13/10/2020 09:50:48 ຈຳ​ນວນ​​ຢ້ຽມ​ຊົມ 566 ຄັ້ງ

ວິທະຍຸ​ກະຈາຍສຽງ​ຫວຽດ ນາມ​ລາຍ​ງານ​ວ່າ: ພາຍຸ LINFA ສ້າງ​ຄວາມ​ເສຍ​ຫາຍ​ໜັກ​ແກ່​ພາກ​ກາງ ແລະ ເຂດ​ໄຕ​ຫ​ງວຽນ ຂອງ​ຫວຽດນາມ, ມີ 9 ຄົນ​ເສຍ​ຊີວິດ, 11 ຄົນ​ຫາຍ​ສາບ​ສູນ, ເຮືອນ​ຊານ​ບ້ານ​ຊ່ອງ 33.400 ຫຼັງ​ຖືກ​ເປ່​ເພ, ທາງ​ລົດໄຟ​ເໜືອ​-​ໃຕ້ ທີ່​ແລ່ນ​ຜ່ານ​ແຂວງ​ເທື່ອ​ທຽນ​ເ​ຫວ້ ຖືກ​ນ້ຳ​ຖ້ວມ.
ຂ່າວ​ລະບຸ​ວ່າ: ສະພາບ​ຝົນຕົກ, ນ້ຳ​ຖ້ວມ​ຍ້ອນ​ໄພ​ພາຍຸ “LINFA”, ໃນ​ຊຸມ​ມື້​ຜ່ານ​ມາ ໄດ້​ສ້າງ​ຄວາມ​ເສຍ​ຫາຍ​ຢ່າງ​ໜັກໜ່ວງ​ຢູ່​ບັນດາ​ແຂວງ​ທາງ​ພາກ​ກາງ ແລະ ເຂດ​ໄຕ​​ຫງວຽນ. ຕາມ​ຂໍ້​ມູນ​ຂ່າວ​ຈາກ​ຫ້ອງການ​ປະຈຳ​ຄະນະ​ຊີ້​ນຳ​ສູນ​ກາງ​ກ່ຽວ​ກັບ​ການ​ປ້ອງ​ກັນ, ຕ້ານ​ໄ​ພ​ທຳ​ມະ​ຊາດ, ​ມາ​ຮອດ​ວັນ​ທີ 10 ຕຸລາ​ຜ່ານ​ມາ, ມີ 9 ຄົນ​ເສຍ​ຊີວິດ, 11 ຄົນ​ຫາຍ​ສາບ​ສູນ, ເຮືອນ 33.400 ຫຼັງ​ຖືກ​ເປ່​ເພ, ທາງ​ລົດໄຟ​ເໜືອ​-​ໃຕ້ ທີ່​ແລ່ນ​ຜ່ານ​ແຂວງ​ເທື່ອ​ທຽນ​ເຫວ້ ຖືກ​ນ້ຳ​ຖ້ວມ. 
ຕາມ​ສູນ​ອຸຕຸນິຍົມ​ອຸ​ທົກ​ກະ​ສາດ​ແຫ່ງ​ຊາດ​ລາຍ​ງານ​ວ່າ: ໃນ​ເວລາ 10 ໂມງ​ຂອງ​ວັນ​ທີ 11 ຕຸລາ​ຜ່ານ​ມາ, ພາຍຸ​ຫົວທີ 6 ປີ 2020 ມີ​ຊື່​ສາກົນ “LINFA” ໄດ້​ເຂົ້າ​ຝັ່ງ​ບັນດາ​ແຂວງ ກວາງ​ນາມ, ກວາງຫງາຍ ແລະ ອ່ອນ​ລົງ​ເປັນຄວາມ​ດັນ​ອາກາດ​ຕ່ຳ. ບັນດາ​ແຂວງ​ທີ່​ຖືກ​ຜົນ​ກະທົບ​ມີ, ແຂວງ​ເທື່ອ​ທຽນ​ເ​ຫວ້,  ກວາງ​ ນາມ, ກວາງ​ຫ​ງາຍ ເກີດ​ຝົນຕົກ​ໜັກ. ສະພາບ​ນ້ຳ​ຖ້ວມ​ຢູ່​ບັນດາ​ແຂວງ​ດັ່ງກ່າວ, ສືບຕໍ່​ມີ​ການ​ຜັນ​ແປ​ຢ່າງ​ສັບ​ສົນ. ບັນດາ​ແຂວງ​ທາງ​ພາກ​ກາງ ພວມ​ຮີບ​ຮ້ອນ​ແກ້​ໄຂ​ຜົນ​ຮ້າຍ​ຢ້ອນ​ຫຼັງ​ຈາກ​ພາຍຸ​ກໍ່​ຂຶ້ນ, ໜູນ​ຊ່ວຍ​ການ​ດຳລົງ​ຊີວິດ​ຂອງ​ປະຊາຊົນ​ໃຫ້​ກັບ​ຄືນ​ສູ່​ສະພາບ​ເປັນ​ປົກ​ກະ​ຕິ.
 


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110