ນະວັດຕະກຳພະລັງງານສະອາດໃນແອັສປາຍ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ​ ເວ​ລາ: 13/10/2020 09:54:23 ຈຳ​ນວນ​​ຢ້ຽມ​ຊົມ 741 ຄັ້ງ

(ເນື່ອງ​ໃນ​ໂອ​ກາດ​ວັນ​ຊ​າ​ດ​ລາ​ຊະ​ອາ​ນາ​ຈັກ​ແອັ​ສ​ປາຍ 12 ຕຸ​ລາ 2020)

 ຮຽບຮຽງໂດຍ: ລຸ້ງ​ດາວ ບຸນ​ມີ

ລາຊະ​ອານາຈັກ ແ​ອັສ​ປາຍ ຕັ້ງ​ຢູ່​ທາງ​ດ້ານ​ຕາເວັນຕົກ​ສ່ຽງ​ໃຕ້​ຂອງ​ທະວີບ​ເອີ​ຣົບ ໃນ​ເຂດ​ແຫຼມ​ໄອ​ບີ​ຣຽນ. ແ​ອັສ​ປາຍ ມີ​ເນື້ອທີ່​ທັງ​ໝົດ 505.992 ກິໂລ​ຕາ​ແມັດ, ໃຫຍ່​ເປັນ​ອັນ​ດັບ 51 ຂອງ​ໂລກ. ປະເທດ​ນີ້​ມີ​ຊາຍ​ແດນ​ທາງ​ດ້ານ​ໃຕ້ ແລະ ດ້ານ​ຕາເວັນ​ອອກ ຕິດ​ກັບ​ທະເລ​ເມ​ດີ​ເຕຣາ​ນຽນ, ຍົກເວັ້ນ​ດິນ​ສ່ວນ​ໜ້ອຍ​ໜຶ່ງ​ແມ່ນ​ຕິດ​ກັບ ກີບ​ຣານ​ຕາ​ຂອງ​ອັງ​ກິດ. ສ່ວນ​ທາງ​ທິດເໜືອ ຕິດ​ກັບ​ປະເທດ​ຝຣັ່ງ, ອັງ​ໂດ​ຣາ ແລະ ອ່າວ​ບິ​ສ​ເຄ. ສ່ວນ​ດ້ານ​ຕາເວັນຕົກ​ສ່ຽງ​ເໜືອ ແລະ ໃຕ້ ແມ່ນ​ຕິດ​ກັບ​ມະຫາ​ສະ​ໝຸດ​ອັດ​ລັງ​ຕິກ ແລະ ປະເທດ​ປອກ​ຕຸຍ​ການ. ມີ​ພົນລະເມືອງ​ທັງ​ໝົດ 48.958.000 ກວ່າ​ຄົນ (ຂໍ້​ມູນ​ປີ 2017), ອັດຕາ​ການ​ເຕີບ​ໂຕ​ຂອງ​ພົນລະເມືອງ 0,8%, ນະຄອນຫຼວງ​ແມ່ນ ມາດ​ຣິດ.
ຈາກ​ບັນຍາກາດ, ຄວາມ​ງາມ​ຂອງ​ທິວ​ທັດ ແລະ ພູມ​ສັນຖານ​ໃນ​ປະ​ເທດ​ແ​ອັສ​ປາຍ ເຫັນ​ໄດ້​ຢ່າງ​ຈະແຈ້ງ​ວ່າ: ເປັນ​ປະເທດ​ທີ່​ມີ​ແດດ​ຫຼາຍ, ລົມ​ແຮງ ຈົນ​ກາຍເປັນ​ແຫຼ່ງ​ຮຽນ​ຮູ້​ດ້ານ​ພະລັງງານ​ສະອາດ​ແຫ່ງ​ໜຶ່ງ​ຂອງ​ເອີ​ຣົບ, ທີ່​ມີ​ຊື່​ສຽງ​ດ້ານ​ການ​ສ້າງ​ນະ​ວັດຕະ​ກຳ ແລະ ເຕັກ​ໂນ​ໂລ​ຊີ ຜະລິດ​ໄຟຟ້າ​ຈາກ​ພະລັງງານ​ສະອາດ ເພື່ອ​ໃຫ້​ສາມາດ​ນຳ​ໃຊ້​ໄດ້​ຕາມ​ຄວາມ​ເໝາະ​ສົມ​ຂອງ​ແຕ່​ລະ​ພື້ນ​ທີ່ ໃຫ້​ເໝາະ​ສົມ​ກັບ​ເງື່ອນ​ໄຂ. ພື້ນ​ທີ່ ແລະ ວິຖີ​ຊີວິດ​ຂອງ​ປະຊາຊົນ​ທີ່​ອາໄສ​ຢູ່ ເພື່ອ​ໃຫ້​ແຫຼ່ງ​ຜະລິດ​ໄຟຟ້າ ສາມາດ​ຢູ່​ຮ່ວມ​ກັບ​ຊຸມ​ຊົນ​ໄດ້​ແບບ​ຍືນ​ຍົງ.
ສຳລັບ​ນະ​ວັດ​ຕະ​ກໍາ​ໄຟ ຟ້າ​ແຫ່ງ​ທຳອິດ​ທີ່ La Plana Hybrid Prototype ແລະ Test Plant ຢູ່​ເມືອງ​ຊາ​ຣາ​ໂກ​ຊາ ທີ່​ເປັນ​ແຫຼ່ງ​ທົດ​ລອງ​ລະບົບ​ການ​ຜະລິດ​ໄຟຟ້າ​ແບບ​ປະສົມ​ປະສານ ຫຼື ລະບົບ​ໄຮ​ບຣິດ ທີ່​ຜະລິດ​ໄຟຟ້າ​ຈາກ​ພະລັງງານ​ລົມ, ພະລັງງານ​ແສງຕາ​ເວັນ​ເປັນ​ຫຼັກ ແລະ ໃຊ້​ນໍ້າ​ມັນ​ກາ​ຊວນ​ເປັນ​ພະລັງງານ​ສຳ​ຮອງ. ໄດ້​ຕິດ​ຕັ້ງ​ລະບົບ​ເກັບ​ຮັກສາ​ພະລັງງານ Lithium Ion Battery ແລະ Redox-Flow Battery ເພື່ອ​ເພີ່ມ​ສະຖຽນ​ລະ​ພາບ​ໃນ​ການ​ຜະລິດ​ໄຟຟ້າ ພ້ອມ​ທັງ​ພັດທະນາ​ຊອບ​ແວ​ລະບົບ​ຄວບ​ຄຸມ​ເພື່ອ​ຊີ້​ນຳ, ຄຸ້ມ​ຄອງ​ຂັ້ນ​ຕອນ​ການ​ຜະລິດ ແລະ ການ​ນຳ​ໃຊ້​ໄຟຟ້າ​ໃນ​ພື້ນ​ທີ່​ດ້ວຍ​ລະບົບ​ຂອງ​ຕົນ​ເອງ ໂດຍ​ບໍ່​ຈຳເປັນ​ຕ້ອງ​ອີງໃສ່​ລະບົບ​ແຫ່ງ​ຊາດ. ນີ້​ແມ່ນ​ການ​ເລີ່ມ​ຕົ້ນ​ຂອງ​ລະບົບ microgrid.
ສໍາ​ລັບ ໂຮງງານ​ໄຟຟ້າ​ທີ່​ຜະລິດ​ຈາກ​ສິ່ງ​ເສດ​ເຫຼືອ (ຂີ້​ເຫຍື້ອ) ໃນ​ເມືອງ​ບິນ​ເບົາ ທີ່​ສ້າງ​ຂຶ້ນ​ມາ​ເພື່ອ​ປ່ຽນ​ສິ່ງ​ເສດ​ເຫຼືອ ທີ່​ບໍ່​ມີຄ່າ​ມາ​ໃຊ້​ຜະລິດ​ໄຟຟ້າ ໃຫ້​ເກີດ​ປະໂຫຍດ​ສູງ​ສຸດ ໂດຍ​ໃຊ້​ສິ່ງ​ເສດ​ເຫຼືອ​ເປັນ​ເຊື້ອ​ໄຟ​ຕົ້ນຕໍ ແລະ ແ​ກັສ​ທຳ​ມະ​ຊາດ ເປັນ​ເຊື້ອ​ໄຟ​ເສີມ. ເມືອງ​ບິນ​ເບົາ ໄດ້​ໂຄສະນາ​ໃຫ້​ປະຊາຊົນ​ຮູ້​ວິທີ​ແຍກ​ປະເພດ​ສິ່ງ​ເສດ​ເຫຼືອ​ໃຫ້​ຖືກຕ້ອງ, ກ່ອນ​ທີ່​ຈະ​ລວບ​ລວມ ແລະ ສົ່ງ​ໄປ​ໂຮງງານ​ໄຟຟ້າ​ສິ່ງ​ເສດ​ເຫຼືອ.
 ສ່ວນ​ໂຮງງານ​ໄຟຟ້າ​ພະລັງງານ​ຄວາມ​ຮ້ອນ​ແສງຕາ​ເວັນ Valle 1-2 ໃນ ເມືອງ​ກາ​ດິສ ຊຶ່ງ​ກໍ່​ຕັ້ງ​ໂດຍ​ບໍລິສັດ Torresol, ໃນ​ເນື້ອທີ່ 6.336 ໄລ່, ເປັນ​ພື້ນ​ທີ່​ທີ່​ມີຄ່າ​ຄວາມ​ເຂັ້ມ​ຂອງ​ແສງ​ແດດ​ສູງ ຈຶ່ງເໝາະ​ສົມ​ກັບ​ການ​ນຳ​ໃຊ້​ພະລັງງານ​ຄວາມ​ຮ້ອນ​ຈາກ​ແສງຕາ​ເວັນ ເພື່ອ​ໃຊ້​ຜະລິດ​ກະແສ​ໄຟຟ້າ ທີ່​ມີ​ກຳລັງ​ຕິດ​ຕັ້ງ​ທັງ​ໝົດ 100 ເມ​ກາ​ວັດ, ສາມາດ​ຜະລິດ​ກະແສ​ໄຟຟ້າ​ໄດ້​ປະມານ 320 ລ້ານ​ໜ່ວຍ​ຕໍ່​ປີ ຫຼື ສະໜອງ​ໄຟຟ້າ​ໃຫ້​ປະຊາຊົນ​ໄດ້​ເຖິງ 80.000 ຄົວ​ເຮືອນ. ໂຮງງານ​ໄຟຟ້າ​ແຫ່ງ​ນີ້, ຜະລິດ​ກະແສ​ໄຟຟ້າ​ຈາກ​ພະລັງງານ​ແສງຕາ​ເວັນ ຄວບ​ຄູ່​ກັບ​ການ​ໃຊ້​ລະບົບ​ເກັບ​ຮັກສາ​ພະລັງງານ​ໃນ​ຮູບ​ແບບ​ເກືອ​ແຫຼວ (Molten Salt) ຊຶ່ງ​ສາມາດ​ສະໜອງ​ໄຟຟ້າ​ໄດ້​ຢ່າງ​ຕໍ່​ເນື່ອງ. ນອກຈາກ​ນັ້ນ, ແຜງ​ໂຊ​ລາ​ເຊວ ຍັງ​ມີ​ຄວາມ​ໂດດ​ເດັ່ນ ແລະ ສວຍ​ງາມ ຊຶ່ງ​ມີ​ລັກສະນະ​ເປັນ​ແວ່ນ​ໂຄ້ງ​ທາງ​ພາ​ຣາ​ໂບ​ລ່າ ທີ່​ສາມາດ​ປັບ​ທິດ​ທາງ​ຕາມ​ການ​ເຄື່ອນ​ຍ້າຍ​ຂອງ​ດວງ​ຕາເວັນ​ໄດ້​ດ້ວຍ​ລະບົບ​ໄຮ​ໂດ​ຼຣລິກ ຊຶ່ງ​ຈະ​ສະທ້ອນ​ລວມ​ລັງສີ​ຄວາມ​ຮ້ອນ​ຈາກ​ແສງຕາ​ເວັນ ແລະ ຖືກ​ໂອນ​ໄປ​ຕາມ​ທໍ່​ຄວາມ​ຮ້ອນ​ທີ່ຢູ່​ໃຈກາງ​ຂອງ​ແກ້ວ​ໂຄ້ງ, ພາຍ​ໃນ​ທໍ່​ບັນຈຸ​ນ້ຳມັນ​ຮ້ອນ (Heat Oil) ທີ່​ສາມາດ​ສະ​ສົມ​ຄວາມ​ຮ້ອນ​ໄດ້ ຊຶ່ງ​ອຸນຫະພູມ​ຂອງ​ນ້ຳມັນ​ຮ້ອນ, ຫຼັງ​ຈາກ​ໄດ້​ຮັບ​ຄວາມ​ຮ້ອນ​ຈະ​ມີຄ່າ​ສູງ​ເຖິງ 393°C (393 ອົງສາ​ເຊ), ທີ່​ສາມາດ​ເກັບ​ຮັກສາ​ພະລັງງານ​ຄວາມ​ຮ້ອນ​ໄດ້​ດົນ​ເຖິງ 7,5 ຊົ່ວ​ໂມງ. ຄວາມ​ຮ້ອນ​ທີ່​ເກັບ​ສະ​ສົມ​ຢູ່​ໃນ​ນ້ຳມັນ​ຮ້ອນ​ດັ່ງກ່າວ, ສ່ວນ​ໜຶ່ງ​ຈະ​ຖືກ​ນໍາ​ໄປ​ຜະລິດ​ກະແສ​ໄຟຟ້າ, ສ່ວນ​ທີ່​ເຫຼືອ​ຈະ​ຖືກ​ຖ່າຍ​ເທ​ໄປ​ເກັບ​ຮັກສາ​ໄວ້​ໃນ​ຖັງ​ເກືອ​ແຫຼວ​ຮ້ອນ ເພື່ອ​ກຽມ​ທີ່​ຈະ​ນຳໄປ​ຜະລິດ​ກະແສ​ໄຟຟ້າ​ໃນ​ເວລາ​ກາງ​ຄືນ. ຫຼັງ​ຈາກ​ທີ່​ຄວາມ​ຮ້ອນ​ຂອງ​ເກືອ​ແຫຼວ ໄດ້​ຖືກ​ນຳໄປ​ໃຊ້​ແລ້ວ, ເກືອ​ແຫຼວ​ເຫຼົ່ານັ້ນ, ຈະ​ຖືກ​ນໍາ​ໄປ​ເກັບ​ໄວ້​ໃນ​ຖັງ​ເກືອ​ເຢັນ ເພື່ອ​ລໍຖ້າ​ການ​ນຳໄປ​ໃຊ້​ເປັນ​ຕົວ​ເກັບ​ຮັກສາ​ພະລັງງານ​ຄວາມ​ຮ້ອນ​ຕໍ່​ໄປ.
ສປປ ລາວ ແລະ ​ລາ​ຊະ​ອານາຈັກ ແ​ອັສ​ປາຍ ສ້າງຕັ້ງ​ສາຍ​ພົວພັນ​ທາງ​ການ​ທູດ​ນຳ​ກັນ, ໃນ​ວັນ​ທີ 20 ມີນາ ປີ 1964.


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110