ເປີດສູນກູ້ໄພສຸກເສີນແຂວງຄຳມ່ວນ

ເຜີຍ​ແຜ່​ໂດຍ​: ທ່ານ ສິດ​ທິ​ພອນ ຣາ​ຊະ​ພົນ ເວ​ລາ: 13/10/2020 17:44:41 ຈຳ​ນວນ​​ຢ້ຽມ​ຊົມ 388 ຄັ້ງ

ໃນວັນທີ  9 ຕຸລາ 2020 ຜ່ານ​ມາ ອົງການກາແດງລາວເປີດ​ສູນກູ້ໄພສຸກເສີນທີ່ອົງການກາແດງແຂວງຄຳມ່ວນ ພ້ອມທັງ​ໄດ້ມອບ​ລົດ​ ແລະ ອຸ​ປະ​ກອນຄົບຊຸດ ໃຫ້​ແກ່ກາແດງແຂວງຄຳມ່ວນເພື່ອນຳໃຊ້ເຂົ້າໃນການຊ່ວຍເຫຼືອປະຊາຊົນ​ພາຍໃນແຂວງທີ່​ເກີດ​ອຸ​ບັດ​ເຫດທາງຖະໜົນ ແລະ ເຫດການສຸກ​ເສີນອື່ນ.

ໂດຍການເຂົ້າ​ຮ່ວມຂອງ ທ່ານ ຄຳຮຸ່ງ ເຮືອງວົງສີ ປະທານອົງການກາແດງລາວ, ທ່ານ ປອ ແກ້ວອຸດອນ ບຸດສິງຂອນ ຮອງເຈົ້າແຂວງຄຳມ່ວນ, ຫົວໜ້າຫ້ອງການອົງການກາແດງລາວ, ພະແນກການ ອ້ອມຂ້າງແຂວງ ແລະ ພາກສ່ວນກ່ຽວຂ້ອງເຂົ້າຮ່ວມ.

ໃນປັດຈຸບັນ ແຂວງຄຳມ່ວນມີ​ອຸ​ບັດ​ເຫດເກີດຂື້ນເລື້ອຍໆ ສາຍເຫດຍ້ອນພາຫະນະເພີ່ມຂຶ້ນ ຈຶ່ງເຮັດໃຫ້ການເກີດອຸບັດເຫດນັບມື້ຫຼາຍຂຶ້ນຍ້ອນນັກຂັບຂີ່ບໍ່ປະຕິບັດກົດໝາຍຈາລາຈອນ, ດື່ມ​ສິ່ງ​ມືນ​ເມົາ​ແລ້ວ​ຂັບ ແລະ ອື່ນໆ. ດັ່ງນັ້ນ ການນຳພັກ-ລັດ ຈຶ່ງໄດ້ເຫັນຄວາມສຳຄັນ​ເຖິງຊີວິດຂອງພໍ່ແມ່ປະຊາຊົນ ເອົາໃຈໃສ່ສ້າງຕັ້ງ​ຂະ​ຫຍາຍສູນກູ້ໄພສຸກເສີນ​ອອກ​ສູ່​ບັນ​ດາ​ແຂວງເພື່ອຊ່ວຍເຫຼືອຜູ້ປະສົບອຸບັດເຫດໃຫ້ທັນການ ແລະ ຫຼຸດຜ່ອນອັດຕາການບາດເຈັບ, ການເສຍຊີວິດ ແລະ ສາມາດນຳສົ່ງໂຮງໝໍໄດ້ທັນການ ໂດຍສະເພາະພາຍໃນແຂວງຄຳມ່ວນ ແລະ ເຂດໃກ້ຄຽງ ​ສູນ​ກູ້​ໄພ​ແຂວງ​ຄຳ​ມ່ວນແມ່ນ​ສູນ​ກູ້​ໄພ​ທີ່ 6 ຂອງ​ອົງ​ການ​ກາ​ແດງ​ລາວ​ທີ່​ໄດ້​ຂະ​ຫຍາຍ​ອອກ​ສູ່​ບັນ​ດາ​ແຂວງ​ ຊຶ່ງໝາຍ​ເລກ​ໂທ​ລະ​ສັບ​ແມ່ນ 051 1625 ໃນ​ນັ້ນ​ໄດ້​ມີ​ນ້ອງໆ​ອາ​ສາ​ສະ​ໝັກ​ຈຳ​ນວນ 30 ຄົນ,  ຍິງ 13 ຄົນ ໄດ້​ປະ​ຈຳ​ການ​ຕະຫຼອດ 24 ຊົ່ວ​ໂມງ​ເພື່ອ​ໃຫ້​ການ​ຊ່ວຍ​ເຫຼືອ​ສັງ​ຄົມ.

   ໃນໂອກາດດັ່ງກ່າວ ທ່ານ ປະທານອົງການກາແດງລາວ  ຍັງໄດ້ຍົກໃຫ້ເຫັນ ການເກີດອຸ​ບັດ​ເຫດ ທົ່ວປະເທດມີຈຳນວນເພີ່ມຂຶ້ນພ້ອມທັງຮຽກຮ້ອງໃຫ້ສັງຄົມ, ປະຊາຊົນລາວຕ້ອງນັບຖືກົດ​ໝາຍຈາລາຈອນເພື່ອບໍ່ໃຫ້ເກີດອຸບັດເຫດ ແລະ ເກີດໜ້ອຍທີ່ສຸດ. ຖ້າພົບເຫັນອຸ​ບັດເຫດ, ອຸທົກກະໄພ, ເຫດການຕ່າງໆທີ່ເກີດຂຶ້ນ ພາຍໃນແຂວງຄຳມ່ວນ ສາມາດໂທແຈ້ງເຂົ້າເບີ 051 1625 ເພື່ອຊ່ວຍເຫຼືອເບື້ອງຕົ້ນ ແລະ ນຳສົ່ງຄົນເຈັບໄປໂຮງໝໍທັນທີ.

ໂດຍ: ອົງ​ການ​ກາ​ແດງ​ລາວ


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110