14 ຕຸລາ ວັນ​ມາດຕະຖານ​ໂລກ

ເຜີຍ​ແຜ່​ໂດຍ​: ທ່ານ ຈັນ​ທະ​ໄມ​ຕ​ຣີ ເທບ​ສີ​ເມືອງ ເວ​ລາ: 14/10/2020 09:09:36 ຈຳ​ນວນ​​ຢ້ຽມ​ຊົມ 391 ຄັ້ງ

   ທ່ານ ບໍ່​ວຽງ​ຄໍາ ວົງດາລາ ກໍາ​ມະ​ການ​ສູນ​ກາງພັກ ລັດ ຖະມົນຕີ​ກະຊວງ​ວິທະຍາສາດ​ແລະ ເຕັກ​ໂນ​ໂລ​ຊີ ປະທານ​ສະພາ​ວິທະຍາສາດ​ແຫ່ງ​ຊາດ, ໄດ້​ໃຫ້​ສໍາ​ພາດ​ຕໍ່​ສື່​ມວນ​ຊົນ​ໃນ​ວັນ​ທີ 13 ຕຸລາ​ນີ້ວ່າ: ວັນ​ທີ 14 ຕຸລາ ແມ່ນ​ວັນ​ມາດຕະຖານ​ໂລກ ຄົບຮອບ 73 ປີ. ໃນ​ປີ 2020 ນີ້ ສປປ ລາວ ໄດ້​ພ້ອມ​ກັບ​ບັນດາ​ປະເທດ​ສະມາຊິກ​ອົງການ​ມາດຕະຖານ​ສາກົນ (ISO) ຈັັດ​ການ​ສະເຫຼີມສະຫຼອງ​ວັນ​ດັ່ງກ່າວ​ພາຍ​ໃຕ້​ຄຳ​ຂວັນ​ທີ່​ອົງການ​ມາດຕະຖານ​ສາກົນ​ວາງ​ອອກ: “ການ​ປົກ​ປ້ອງ​ໂລກ​ດ້ວຍ​ມາດຕະຖານ” (Protecting the planet with standards) ຊຶ່ງ​ໝາຍ​ເຖິງການ​ນໍາ​ໃຊ້​ມາດຕະຖານ ເພື່ອ​ຄຸ້ມ​ຄອງ​ການ​ກະ​ທໍາ​ຂອງ​ມະນຸດ​ທີ່​ສົ່ງ​ຜົນ​ກະທົບ​ຕໍ່ ໂລກ​ພວກ​ເຮົາ, ມາດຕະຖານ​ກວມ​ເອົາ​ທຸກໆ​ຂົງເຂດ​ວຽກ​ງານ ເຊັ່ນ: ການ​ປະຢັດ​ພະລັງງານ, ຄຸນ​ນະ​ພາບ​ຂອງ​ນໍ້າ ແລະ ອາກາດ, ການ​ຄວບ​ຄຸມ​ມົນ​ລະ​ພິດ​ໂດຍ​ນໍາ​ໃຊ້​ວິທີ​ການ​ວັດແທກ ຕາມ​ມາດຕະຖານ​ສາກົນ,ການ​ນໍາ​ ໃຊ້​ມາດຕະຖານ​ຈະ​ຊ່ວຍ​ ຫຼຸດ ຜ່ອນ​ຜົນ​ກະທົບ​ຕໍ່​ສິ່ງ ແວດລ້ອມ​ຈາກ​ຂະບວນການ​ຜະລິດ​ທາງ​ດ້ານ​ອຸດສາຫະກຳ ແລະ ກະ​ສິ​ກໍາ. ນຳ​ໃຊ້​ຊັບ​ພະຍາ​ກອນ​ທໍາ​ມະ​ຊາດ​ຢ່າງ​ປະຢັດ ແລະ ເປັນ​ມິດ​ກັບ​ສິ່ງ​ແວດ​ລ້ອມ.
   ຈຸດປະສົງ​ຂອງ​ການສະ ເຫຼີມສະຫຼອງ​ວັນ​ມາດຕະຖານ ​ໂລກ ແມ່ນ​ເພື່ອ​ສ້າງ​ຈິດສຳນຶກ ​ໃຫ້​ແກ່​ທຸກ​ຄົນ​ໃນ​ສັງຄົມ ເປັນ ຕົ້ນ​ແມ່ນ ຜູ້​ສ້າງລະບຽບ​ການ ແລະ ຄຸ້ມ​ຄອງ​ມາດຕະຖານ, ຜູ້​ປະກອບ​ການ​ລົງທຶນ, ນັກທຸ ລະກິດ, ຜູ້​ຜະລິດ ແລະ ຜູ້​ຊົມໃຊ້​ເຂົ້າໃຈ​ຢ່າງ​ເລິກເຊິ່ງ ກ່ຽວ​ກັບ​ບົດບາດ ແລະ ຄວາມ​ສຳຄັນ​ຂອງ​ວຽກ​ງານ​ມາດຕະຖານ ຕໍ່​ກັບ​ການ​ພັດທະນາເສດ​ຖະ​ກິດ​-​ສັງຄົມ ໃນ​ລະດັບ​ຊາດ, ພາກ ​ພື້ນ ແລະ ສາ​ກົນ. ພ້ອມ​ກັນ​ນັ້ນ ກໍເພື່ອ​ພັດທະນາ​ວຽກ​ງານ​ມາດຕະຖານ ຊຸກຍູ້​ສົ່ງເສີມ​ການ​ຄ້າ, ການ​ຜະລິດ ແລະ ການ​ຖ່າຍ​ທອດ​ເຕັກ​ໂນ​ໂລ​ຊີ​ທີ່​ກ້າວໜ້າ​ຂອງ​ໂລກ. ເພື່ອ​ການ​ພັດທະນາ​ແບບ​ຍືນຍົງ. ການ​ຢັ້ງຢືນ​ຮັບຮອງ​ເອົາ​ມາດ ຕະຖານ​ຂອງ​ຜະລິດ​ຕະ​ພັນ, ລະບົບ​ການ​ກວດ​ສອບ, ການ​ຢັ້ງຢືນ​ຄຸນ​ນະ​ພາບ​ຂອງ​ຜະລິດ​ຕະ​ພັນ ແລະ ສິນຄ້າ, ຍັງ​ຊ່ວຍ​ຍົກ​ສູງ​ສະມັດ​​ຖະ​ພາບ​ການ​ຜະລິດ ແລະ ສ້າງ​ຄວາມ​ເຊື່ອ​ໝັ້ນ​ໃຫ້​ແກ່​ຜູ້​ຊົມໃຊ້​ອີກ​ດ້ວຍ.
   ອົງການ​ມາດຕະຖານ​ໂລກ​ສ້າງຕັ້ງ​ຂຶ້ນ​ໃນ​ປີ 1947 ແລະ ເລີ່ມ​ແຕ່​ປີ 1993 ເປັນ ຕົ້ນມາ ຢູ່ ສປປ ລາວ ໄດ້ເລີ່ມ ​ມີ​ການເຄື່ອນໄຫວ​ວຽກ​ງານ ມາດຕະຖານ​ຢ່າງ​ເປັນ​ທາງ​ການ. ສປປ ລາວ ໄດ້​ເຂົ້າເປັນ​ ສະມາຊິກ​ຜູ້​ສັງເກດ​ການຂອງ ​ອົງການ​ມາດຕະຖານ​ສາກົນ ເລີ່ມ​ແຕ່​ເດືອນ​ມັງກອນ 2007 ແລະ ໄດ້​ເຂົ້າ​ຮ່ວມ​ຄະ​ນະ​ກໍາ​ ມະ​ການ​ທີ່​ປຶກສາ​ດ້ານ​ມາດ ຕະຖານ ແລະ ຄຸນ​ນະ​ພາບ​ຂອງ​ອາ​ຊຽນ (ACCSQ) ໃນ​ປີ 1998. ໃນ​ປັດຈຸບັນ ສປປ ລາວ ກໍ​ໄດ້​ຍົກ​ລະດັບ​ຈາກ​ການ​ເປັນ​ສະມາຊິກ​ຜູ້​ສັງເກດ​ການ​ມາ​ເປັນ​ສະມາຊິກ​ເຄິ່ງ​ສົມບູນ​ຂອງ​ອົງການ​ມາດຕະຖານ​ສາກົນ ໃນ​ເດືອນ ມັງກອນ ຕົ້ນ​ປີ 2017 ທີ່​ຜ່ານ​ມາ ແລະ ຍັງ​ໄດ້​ສົ່ງ​ບັນດາ​ຄະ​ນະ​ກໍາ​ມະ​ການ​ເຕັກນິກ​ແຫ່ງ​ຊາດ​ເຂົ້າ​ຮ່ວມ​ເປັນ ຄະ​ນະ​ກໍາ​ມະ​ການ​ເຕັກນິກ ຂອງ​ອົງການ​ມາດຕະຖານ​ສາ​ກົນ.
   ປັດຈຸບັນ​ນີ້ ວຽກ​ງານ​ມາດຕະຖານ ຢູ່ ສປປ ລາວ ໄດ້​ມີ​ການເຄື່ອນໄຫວ​ພາຍ​ໃຕ້​ຄວາມ​ຮັບ​ຜິດ ຊອບ​ຂອງ ກົມ​ມາດຕະຖານ ແລະ ວັດແທກ, ກະຊວງ​ວິທະຍາສາດ ແລະ ເຕັກ​ໂນ​ໂລ​ຊີ. ໃນ​ຊຸມ​ປີ​ທີ່​ຜ່ານ​ມາ, ໄດ້​ສ້າງ​ນິຕິ​ກໍາ ໃນ​ການ​ຄຸ້ມ​ຄອງ, ພັດທະນາ ແລະ ບໍລິການ​ວຽກ​ງານ​ມາດຕະຖານ​ເປັນຕົ້ນ​ແມ່ນ: ສ້າງ​ກົດໝາຍ, ດຳລັດ, ບັນດາ​ນິຕິ​ກໍາ ລຸ່ມ​ກົດໝາຍ ແລະ ບັນດາ​ມາດຕະຖານ​ແຫ່ງ​ຊາດ​ສຳລັບ​ຜະລິດ​ຕະ​ພັນ​ໃນ​ແຕ່​ລະ​ຂົງເຂດ​ຕ່າງໆ ເພື່ອ​ໃຫ້​ສອດຄ່ອງ​ກັບ​ລະບຽບ​ການ​ຂອງ​ອົງການ​ການ​ຄ້າ​ໂລກ ໄດ້​ຮັບຮອງ​ເອົາ ມາດຕະຖານ​ເຄື່ອງໃຊ້​ໄຟຟ້າ​-​ເອ​ເລັກໂຕຣ ​ນິກ​ສາກົນ (IEC) ແລະ ມາດ ຕະຖານ​ສາກົນ (ISO) ມາ​ເປັນ ມາດຕະຖານ​ແຫ່ງ​ຊາດ​ຈໍາ​ນວນ 450 ມາດຕະຖານ ແລະ ຢູ່​ໃນ​ຂັ້ນ​ຕອນ​ລໍຖ້າການຮັບຮອງ​ອີກ​ຈຳນວນ 50 ມາດຕະຖານ, ປັດຈຸບັນ​ນີ້ ໄດ້​ມີ​ມາດຕະຖານ​ແຫ່ງ​ຊາດ​ລາວ​ທີ່​ປະກາດ​ໃຊ້​ຢ່າງ​ເປັນ​ທາງ​ການ ແລ້ວ 492 ມາດຕະຖານ, ໄດ້​ອະນຸ​ຍາດ​ນໍາ​ໃຊ້​ກາ​ໝາຍ​ມາດຕະຖານ​ແຫ່ງ​ຊາດ ໃຫ້​ແກ່ 30 ຜະລິດ​ຕະ​ພັນ, ຢັ້ງຢືນ​ຄຸນ​ນະ​ພາບ​ອຸປະກອນ​ພິເສດ​ໃຫ້ 19 ບໍລິສັດ ແລະ ຢັ້ງຢືນ​ລະບົບ​ມາດຕະຖານ​ສາກົນ ISO/IEC ໃຫ້ 25 ບໍລິສັດ, ຢັ້ງຢືນ​ການ ຄຸ້ມ​ຄອງ​ບໍລິຫານ​ຫ້ອງ​ທົດ​ລອງ (ISO/IEC 17025) ໃຫ້​ແກ່ 3 ຫ້ອງ​ທົດ​ລອງ​ເຊັ່ນ: ຫ້ອງ​ທົດ​ລອງ​ໄຟຟ້າ, ຫ້ອງ​ທົດ​ລອງ ນໍ້າ​ໜັກ ແລະ ຫ້ອງ​ທົດ​ລອງ​ອຸນຫະ​ພູມ. ນອກ​ນັ້ນ ຍັງ​ມີ​ການ​ຮ່ວມ​ມື​ກັບ​ພາກ​ເອກະ​ຊົນ​ເພື່ອ​ສ້າງ​ຫ້ອງ​ທົດ​ລອງ, ສ້າງ​ລະບົບ​ການ​ປະຕິບັດ​ວຽກ​ງານ​ກວດກາ ແລະ ການ​ຢັ້ງຢືນ​ຄຸນ​ນະ​ພາບ​ຜະລິດ​ຕະ​ພັນ ແລະ ສິນຄ້າ, ເປັນຕົ້ນ​ແມ່ນອອກ​ໃບຢັ້ງຢືນ​ຄຸນ​ນະ​ພາບ​ອຸປະກອນ​ພິເສດ​ຂອງ​ໂຄງການ​ທາງ​ລົດໄຟ, ໄດ້​ສ້າງຕັ້ງ ແລະ ປະຕິບັດ​ການ​ກວດກາ​ຄຸນ​ນະ​ພາບ​ນໍ້າ​ມັນ​ເຊື້ອ​ໄຟ ແລະ ອາຍ​ແກັດ ຢູ່​ຕາມ​ແຕ່​ລະ​ດ່ານ​ຊາຍ​ແດນ​ສາກົນ ໄດ້​ທັງ​ໝົດ 18 ດ່ານ​ໃນ​ຂອບ​ເຂດ​ທົ່ວ​ປະ​ເທດ.
   ໃນ​ການຈັດຕັ້ງ​ປະຕິບັດ​ຂອງ​ກອງ​ປະຊຸມ​ໃຫ່​ຍ​ຄັ້ງ​ທີ X ຂອງ​ພັກ​ປະຊາຊົນ​ປະຕິວັດ​ລາວ ແລະ ປະຕິບັດ​ຍຸດທະສາດ​ຫັນ​ເປັນ​ອຸດສາຫະກຳ, ຫັນ​ເປັນ​ທັນ​ສະໄໝ​ນັ້ນ ວຽກ​ງານ​ມາດຕະຖານ ໄດ້​ຕິດ​ພັນ​ກັບ​ທຸກໆ​ຂົງເຂດ​ວຽກ​ງານ ແລະ ຂະແໜງການ​ທັງ​ພາກ​ລັດ ແລະ ພາກ​ເອກະ​ຊົນ ເພື່ອ​ຫັນ​ການ​ຜະລິດ ແລະ ການ​ບໍລິການ​ເຂົ້າ​ສູ່​ລວງ​ເລິກ, ຍົກ​ສູງສະມັດ​ຖະ​ພາບ​ການ​ຜະລິດ ແລະ ຄຸນ​ນະ​ພາບ​ຂອງ​ຜະລິດ​ຕະ​ພັນ. ສະນັ້ນ ວຽກ​ງານ​ມາດຕະຖານ ຈຶ່ງ​ມີ​ບົດບາດ​ສຳຄັນ ໃນ​ການ ຈັດຕັ້ງ​ປະ​ຕິ​ບັັັດ​ໜ້າທີ່​ຈຸດ​ສຸມ​ດັ່ງກ່າວ ເພື່ອ​ຜັນ​ຂະຫຍາຍ​ມະຕິ​ກອງ​ປະຊຸມ​ໃຫຍ່​ຄັ້ງ​ທີ X ຂອງ​ພັກ ແລະ ແຜນ ພັດທະນາ​ເສດ​ຖະ​ກິດ​-​ສັງຄົມ 5 ປີ ຄັ້ງ​ທີ VIII ໃຫ້​ປະກົດ​ຜົນ​ເປັນ​ຈິງ.
   ໃນ​ໂອກາດ​ວັນ​ມາດຕະ ຖານ​ໂລກ​ນີ້, ຂ້າພະເຈົ້າ​ຂໍ​ອວຍພອນ​ອັນ​ປະເສີດ​ມາ​ຍັງ​ບັນດາ​ທ່ານ​ຜູ້​ນໍາ​ພັກ​-​ລັດ ຈົ່ງ ມີ​ພາລະ​ນາໄມ​ເຂັ້ມແຂງ, ຂໍ​ອວຍພອນ​ແກ່​ປວງ​ຊົນ​ລາວ​ບັນດາເຜົ່າ, ພະນັກງານ, ທະ ຫານ, ຕໍາ​ຫຼວດ, ນັກ​ປະດິດ​ສ້າງ, ນັກ​ວິ​ທະ ຍາ​ສາດ, ນັກຮຽນ​ຮູ້​ປັນຍາ​ຊົນ ຕະຫຼອດ​ເຖິງ​ບັນດາ​ຜູ້​ປະກອບ​ການ​ທຸລະ​ກິດ​ຕ່າງໆ ຈົ່ງ​ມີ​ສຸຂະພາບ​ເຂັ້ມແຂງ ສຸມ​ທຸກ​ເຫື່ອແຮງ ແລະ ສະຕິປັນຍາ ເຂົ້າ​ໃນ​ການ​ປະຕິບັດ 2 ໜ້າທີ່​ຍຸດທະສາດ​ປົກ​ປັກ​ຮັກສາ ແລະ ສ້າງສາ​ພັດທະນາປະເທດ​ຊາດ, ຊຸກຍູ້​ສົ່ງເສີມ​ການ​ຄົ້ນ​ຄວ້າ​ພັດທະນາ​ວິທະຍາສາດ ແລະ ເຕັກ​ໂນ​ໂລ​ຊີ, ເຮັດ​ໃຫ້​ວຽກ​ງານ​ມາດຕະຖານ ຂອງ ສປປ ລາວ ໄດ້​ຮັບ​ການ​ພັດທະນາ ແລະ ຍົກ​ລະດັບ​ຂຶ້ນ​ຢ່າງ​ບໍ່​ຢຸດ​ຢັ້ງ ເພື່ອ​ການ​ປະກອບສ່ວນ​ເຂົ້າ​ໃນ​ການ​ພັດທະນາ​ເສດ​ຖະ​ກິດ​-​ສັງຄົມ ຂອງ​ປະເທດ​ຕາມ​ທິດ​ສີຂຽວ​ແບບ​ຍືນ​ຍົງ ເຮັດ​ໃຫ້​ປະຊາຊົນ​ມີ​ຄວາມ​ຮັ່ງມີ​ຜາ​ສຸກ, ປະເທດ​ຊາດ​ມັ່ງ​ຄັ່ງ​ເຂັ້ມແຂງ, ສັງຄົມ​ມີ​ຄວາມ​ສາມັກຄີ​ປອງ​ດອງ, ປະຊາທິປະໄຕ, ຍຸຕິ​ທຳ ແລະ ສີ​ວິ​ໄລ.
(ຂ່າວ: ແສງ​ຈັນ) 


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110