ບ້ານຄຳແກ້ວ ເມືອງຫີນບູນ ເປັນຕົວເມືອງນ້ອຍໃນຊົນນະບົດ

ເຜີຍ​ແຜ່​ໂດຍ​: ທ່ານ ຈັນ​ທະ​ໄມ​ຕ​ຣີ ເທບ​ສີ​ເມືອງ ເວ​ລາ: 14/10/2020 09:12:05 ຈຳ​ນວນ​​ຢ້ຽມ​ຊົມ 534 ຄັ້ງ

   ພິທີ​ປະກາດ ແລະ ຮັບຮອງ​ເອົາ​ບ້ານ​ຄຳ​ແກ້ວ ເມືອງ​ຫີນ​ບູນ ແຂວງ​ຄຳ​ມ່ວນ ເປັນ​ຕົວ​ເມືອງ​ນ້ອຍ​ໃນ​ຊົນນະບົດ ໄດ້​ຈັດ​ຂຶ້ນ​ເມື່ອບໍ່​ດົນ​ຜ່ານ​ມາ​ນີ້ ໂດຍ​ການ​ເຂົ້າ​ຮ່ວມ​ຂອງ​ທ່ານ ໂອ​ໄດ ສຸ ດາ​ພອນ ເຈົ້າແຂວງຄຳ​ມ່ວນ, ທ່ານ ຄຳ​ສິງ ອໍລະ​ວັນ ເຈົ້າເມືອງ​ຫີນ​ບູນ, ມີ​ບັນດາ​ທ່ານ​ການນຳ ​ຂັ້ນ​ແຂວງ, ເມືອງ​ອ້ອມ​ຂ້າງ, ພະແນກການ, ຕະຫຼອດ​ເຖິງ ຂະ ແໜງການ​ຕ່າງໆ​ໃນ​ທົ່ວເມືອງ ​ຫີນ​ບູນ ພ້ອມ​ດ້ວຍ​ອຳນາດ​ການ​ປົກຄອງ ແລະ ພໍ່​ແມ່​ປະຊາຊົນ​ພາຍ​ໃນບ້ານ​ຄຳ​ແກ້ວເຂົ້າ​ຮ່ວມ.
ທ່ານ ກອບ​ແກ້ວ ດວງ​ພະ ຈັນ ນາຍບ້ານ​ຄຳ​ແກ້ວ ໄດ້​ຜ່ານ ​ສະຫຼຸບ​ຕີ​ລາຄາ​ການຈັດຕັ້ງ​ປະ ຕິບັດ​ແຜນ​ພັດທະນາ ບ້ານ​ຄຳ​ແກ້ວ ໃນ​ໄລຍະ​ຜ່ານ​ມາ ຊຶ່ງ​ບ້ານ​ຄຳ​ແກ້ວ ແມ່ນ​ນອນ​ຢູ່​ໃນ​ການ​ກຳນົດ​ເປັນ​ຈຸດ​ສຸມ​ຂອງ​ເມືອງ ແລະ ແຂວງ ຊຶ່ງ​ໄດ້​ຮັບ​ການ​ສ້າງຕັ້ງ​ຂຶ້ນ​ໃນ​ປີ 2015, ຢູ່​ຫ່າງ​ຈາກ​ເທດສະ​ບານ​ເມືອງ​ຫີນ​ບູນ 27 ກິໂລແມັດ ແລະ ຫ່າງ​ຈາກ​ເທດສະ​ບານແຂວງ​ຄຳ​ມ່ວນ 50 ກິໂລແມັດ, ປະ ກອບ​ມີ 277 ຄອບ​ຄົວ. ໃນ​ນັ້ນ​ມີ​ຄອບຄົວ​ພະນັກງານ​ກວມ ​ເອົາ 44%, ຄອບຄົວຊາວຄ້າ ຂາຍ​ກວມ 14% ແລະ ຄອບຄົວ​ປະຊາຊົນ 42%, ມີ​ພົນລະ ເມືອງ 1.451 ຄົນ, ມີ​ເນື້ອທີ່​ທັງໝົດ 12.557.065 ຕາ​ແມັດ, ພື້ນ​ທີ່​ສ່ວນ​ໃຫຍ່​ເປັນ​ເຂດ​ທົ່ງພຽງມີ​ສາຍ​ນຳ້​ຫີນ​ບູນ​ໄຫຼ​ຜ່ານ ຊຶ່ງ​ເໝາະ​ແກ່​ການ​ສ້າງຊົນລະ​ປະທານ​ເຂົ້າ​ໃນ ​ການ​ປູກຝັງ, ລ້ຽງສັດ ແລະ ການ​ປະມົງ ພ້ອມ​ທັງ​ມີ​ທາງ​ຫຼວງ​ແຫ່ງ​ຊາດ ເລກ​ທີ 13 ຕັດ​ ຜ່ານ ຊຶ່ງ​ເປັນໃຈ​ກາງ​ທາງດ້ານ​ ເສດຖະ​ກິດ​-​ສັງຄົມ​ຂອງ​ຈຸດ ​ສຸມ. ພາຍ​ໃນ​ບ້ານ​ແມ່ນ​ມີ​ລະ ບົບ​ກົນ​ຈັກ​ທີ່​ທັນ​ສະໄໝນຳ​ໃຊ້​ເຂົ້າ​ໃນການ​ຜະລິດ​ກະສິກຳ, ມີ​ຫຼາຍ​ຄອບຄົວ​ທີ່​ປະກອບ​ອາຊີບ​ລ້ຽງສັດ​ແບບ​ເປັນ​ຟາມ ເປັນຕົ້ນ​ລ້ຽງ​ງົວ, ແບ້, ປາ ແລະ ສັດ​ປີກ ຊຶ່ງ​ສາມາດ​ສ້າງ​ລາຍ​ຮັບ​ໄດ້​ຢ່າງ​ໝັ້ນຄົງ. ນອກ​ນັ້ນ​ຍັງ​ມີ​ລະ ບົບ​ພື້ນຖານ​ໂຄງ​ລ່າງ​ອຳນວຍ​ຄວາມ​ສະດວກ​ອື່ນໆ ທີ່​ເປັນ ທ່າແຮງ​ໃນ​ການ​ພັດທະນາ​ເສດ​ຖະ​ກິດ​-​ສັງຄົມ​ຂອງ​ບ້ານ.
ທ່ານ ຄຳ​ສິງ ອໍລະ​ວັນ ເຈົ້າເມືອງ​ຫີນ​ບູນ ກໍໄດ້​ຜ່ານ​ການ​ປະ​ເມີນ​ສ້າງ​ບ້ານ​ຄຳ ແກ້ວ ເປັນ​ຕົວເມືອງ​ນ້ອຍ ໃນ​ຊົນນະບົດ ໂດຍ​ສອດຄ່ອງ​ຕາມ​ດຳລັດ​ເລກ​ທີ 348/ລບ ລົງ​ວັນ​ທີ 16 ພະຈິກ 2017 ວ່າ​ດ້ວຍ​ມາດຖານ​ພົ້ນ​ທຸກ ແລະ ມາດຖານ​ພັດທະນາ ຊຶ່ງ​ບ້ານ​ຄຳ​ແກ້ວ ໄດ້​ປະກາດ​ຮັບຮອງ​ເປັນ​ບ້ານ​ພັດທະນາ​ໃນ​ປີ 2012, ມີ​ຫົວໜ່ວຍ​ຜະລິດ ການ​ກະເສດ​ຕະ​ກອນ 3 ຫົວໜ່ວຍ​ທີ່​ໝັ້ນຄົງ, ເປັນໃຈ​ກາງ​ທາງ​ດ້ານ​ເສດຖະກິດ, ມີ​ເສັ້ນທາງ​ຄົມມະນາຄົມ​ເຊື່ອມ​ຈອດກັບ​ບັນດາ​ບ້ານ​ໃນ​ເທດສະ​ບານ ແລະ ບ້ານ​ອ້ອມ​ຂ້າງ​ພາຍ​ໃນ​ເມືອງ ສາມາດ​ທຽວ​ໄດ້ 2 ລະ ດູ, ມີ​ພື້ນຖານ​ການ​ຜະລິດຂອງ​ປະຊາຊົນ ທີ່​ຮັບປະກັນ​ທາງ​ດ້ານ​ສະບຽງ​ອາຫານ ແລະ ຜະລິດ​ເປັນ​ສິນຄ້າ, ມີ​ຕະຫຼາດ​ຖາວອນ, ສູນ​ບໍລິການທາງ​ດ້ານ​ໂທລະ​ຄົມມະນາຄົມ, ສູນ​ລວມ​ບໍລິການ​ເຕັກນິກ​ກະ​ສິ​ກໍາ, ໜ່ວຍ​ບໍລິການ​ທະນາຄານ, ໂຮງຮຽນ, ໂຮງໝໍ, ລະບົບ​ໄຟຟ້າ, ປະຊາຊົນ​ມີ​ລາຍ​ຮັບ​ສະເລ່ຍ 17 ລ້ານ​ກວ່າ​ກີບ​ຕໍ່​ຄົນ​ຕໍ່​ປີ ແລະ ມາດຖານ​ອື່ນໆ.
ຜ່ານ​ການ​ຕີ​ລາຄາ​ປະ​ເມີນ​ຜົນ ຂອງ​ຄະນະ​ກຳມະການ​ແຕ່​ລະ​ຂັ້ນຕາມ 16 ມາດຖານ ເຫັນ​ວ່າ: ຈຸ​ມ​ສຸມ ຄຳ​ແກ້ວ ມີ 15 ມາດຖານ ທີ່​ຄົບ​ຖ້ວນ​ຕາມ​ ດຳລັດ 348/ລບ ຊຶ່ງ​ກວມ​ເອົາ 93,75% ຂອງ​ມາດຖານ​ສ້າງ​ເປັນຕົວ​ເມືອງ​ນ້ອຍ, ຍັງ 1 ມາດຖານ ກໍຄື ບໍ່​ມີ​ລະ​ບົບ ນໍ້າ​ປະປາ ແຕ່​ບົນ​ພື້ນຖານ​ປະ ຊາຊົນ​ບ້ານ​ຄຳ​ແກ້ວ ແມ່ນ​ໄດ້​ຊົມໃຊ້ ນ້ຳ​ສະອາດ​ກວມ 100% ຂອງ​ຈຳນວນ​ຄອບຄົວ​ທັງ​ໝົດ ແລະ ໄດ້​ສຳເລັດ​ການ​ສຳຫຼວດ​ອອກ​ແບບ​ນໍ້າ​ປະປາ​ຊຸມ​ຊົນ ເພື່ອ​ສະ ເໜີ​ເຂົ້າ​ງົບປະມານ​ຂອງ​ລັດ​ໃນ​ຕໍ່​ໜ້າ. ຈາກ​ນັ້ນ​ທ່ານ​ເຈົ້າແຂວງ​ຄຳ​ມ່ວນ ກໍໄດ້​ມອບ​ໃບຢັ້ງຢືນ​ຮັບຮອງ​ເອົາ ບ້ານ​ຄຳ​ແກ້ວ ເປັນ​ຕົວ​ເມືອງ​ນ້ອຍ​ໃນ​ຊົນນະບົດ ພ້ອມ​ທັງ​ຮ່ວມ​ເປີດ​ປ້າຍ ເພື່ອ​ຢັ້ງຢືນ​ຢ່າງ​ເປັນທາງ​ການ.
(ຂ່າວ: ກອງ​ຄຳ) 


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110