ທູດອົສຕຣາລີ ປະຈຳລາວ ເຂົ້າຢ້ຽມອຳລາເຈົ້າແຂວງຈຳປາສັກ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ​ ເວ​ລາ: 14/10/2020 09:12:37 ຈຳ​ນວນ​​ຢ້ຽມ​ຊົມ 580 ຄັ້ງ

ທ່ານ ວິໄລ​ວົງ ບຸດ​ດາ​ຄຳ ກຳມະການ​ສູນ​ກາງ​ພັກ ເລຂາ​ພັກ​ແຂວງ ເຈົ້າແຂວງ​ຈຳປາ​ສັກ ພ້ອມ​ຄະນະ ໄດ້​ຕ້ອນຮັບ ການ​ເຂົ້າ​ຢ້ຽມ​ອຳ​ລາ​ຂອງ​ທ່ານ ຈີນ​-​ເບີ​ນາດ ຄາ​ຣາ​ສ​ໂກ (Jean-Bernard CARRASCO) ເອກ​ອັກ​ຄະ​ລັດ​ຖະ​ທູດ ອົສ​ຕຣາ​ລີ ປະຈຳ​ລາວ ເມື່ອບໍ່​ດົນ​ຜ່ານ​ມານີ້ ທີ່​ຫ້ອງ​ວ່າການ​ແຂວງ​ຈຳປາ​ສັກ.
ໃນ​ການ​ພົບ​ປະ, ທ່ານ ຈີນ​-ເບີ​ນາດ ຄາ​ຣາ​ສ​ໂກ ເອກ​ອັກ​ຄະ​ລັດ​ຖະ​ທູດອົ​ສ​ຕຣາ​ລີ ປະຈຳ​ລາວ ໄດ້​ກ່າວ​ຄວາມ​ຮູ້ສຶກ​ເປັນ​ກຽດ​ຢ່າງ​ສູງ ທີ່ ທ່ານ​ເຈົ້າແຂວງ​ຈຳປາ​ສັກ ໄດ້​ໃຫ້ການ​ຕ້ອນຮັບ ໃນ​ການ​ຢ້ຽມຢາມ ພົບ​ປະ ເພື່ອ​ກ່າວ​ລາ​ໜ້າທີ່ໃນ​ເທື່ອ​ນີ້ ຊຶ່ງ​ຕະ​ຫຼອດ​ໄ​ລຍະ 3 ປີ ທີ່​ມາ​ດຳລົງ​ຕຳແໜ່ງ​ເປັນເອກ​ອັກ​ຄະ​ລັດ​ຖະ​ທູດປະຈຳ​ລາວ ແຂວງຈຳ ປາ​ສັກ ແມ່ນ​ເປັນ​ແຂວງ​ທຳ ອິດທີ່​ໄດ້​ມາ​ຢ້ຽມຢາມ ຊຶ່ງມັນ ​ສະແດງ​ໃຫ້​ເຫັນ​ຄວາມ​ສຳຄັນ ໂດຍ​ສະເພາະ​ແມ່ນ​ສາຍ​ພົວ ພັນ​ຮ່ວມ​ມື ໃນ​ການ​ຊຸກຍູ້ພັດ ທະນາ​ແຂວງ​ຈຳປາ​ສັກ ຮ່ວມ​ກັນ ແລະ​ ທ່ານ​ໄດ້​ຍົກ​ໃຫ້​ເຫັນ​ເຖິງ 68 ປີ ແຫ່ງ​ສາຍ​ພົວພັນ​ການ​ທູດ ລະຫວ່າງ ສປປ​ລາວ ແລະ ອົສ​ຕຣາ​ລີ.
ທ່ານ ວິໄລ​ວົງ ບຸດ​ດາ​ຄຳ ເຈົ້າແຂວງ​ຈຳປາ​ສັກ ໄດ້​ກ່າວ​ຕ້ອນຮັບ ແລະ ຕີ​ລາຄາ​ສູງ ຕໍ່​ການ​ມາ​ຢ້ຽມຢາມ​ຂອງ​ທ່ານ​ເອກ​ອັກ​ຄະ​ລັດ​ຖະ​ທູດ ອົສ​ຕຣາ​ລີ ປະຈຳ​ລາວ ໃນ​ເທື່ອ​ນີ້ ແລະ ທ່ານ​ໄດ້​ລາຍ​ງານ​ໃຫ້​ຮູ້​​ເຖິງ​ການຈັດຕັ້ງ​ປະຕິບັດ​ວຽກ​ງານ, ສາຍ​ພົວພັນ​ການ​ຮ່ວມ​ມື ລະຫວ່າງ​ອົ​ສຕຣາ​ລີ ແລະ ແຂວງ​ຈຳປາ​ສັກ ຊຶ່ງ​ຜ່ານ​ມາການ​ລົງທຶນ, ການ​ຮ່ວມມື ແລະ ການ​ຊ່ວຍເຫຼືອຂອງພາກ​ ລັດ ແລະ ເອກະ​ຊົນ​ຂອງ​ປະ ເທດ​ອົສ​ຕຣາ​ລີ ມີ​ຈຳນວນທັງ​ໝົດ 17 ໂຄງການ ໃນ​ນັ້ນໂຄງ ການ​ລົງທຶນ​ມີ 1 ໂຄງການ​ມູນ​ຄ່າ 385.411 ໂດ​ລາ ແລະ​ໂຄງການ​ຊ່ວຍເຫຼືອ ເພື່ອ​ການ​ພັດທະນາ​ມີ 16 ໂຄງການ, ມູນ​ຄ່າ 4,89 ລ້ານໂດ​ລາ. ກວມ​ເອົາ 4 ຂະແໜງການ​ຂອງ​ແຂວງ​ຄື ຂະແໜງ​ແຮງ​ງານ ແລະ ສະຫວັດດີ​ການ​-​ສັງຄົມ, ຂະແໜງ​ສາທາລະນະ​ສຸກ, ຂະແໜງ​ພະລັງງານ ແລະ ​ບໍ່​ແຮ່ ແລະ ຂະແໜງ​ພັດທະນາ​ຊົນນະບົດ ແລະ ລຶບລ້າງ​ຄວາມທຸກ​ຍາກ.
ໂອກາດ​ດັ່ງກ່າວ, ທ່ານ​ເຈົ້າແຂວງ​ຈຳປາ​ສັກ ໄດ້​ສະແດງ​ຄວາມ​ຂອບໃຈ ຜ່ານທ່ານ ເອກ​ອັກ​ຄະ​ລັດ​ຖະ​ທູດ ປະຈຳ ສປປ ລາວ ໄປ​ຍັງ​ລັດຖະບານ ປະເທດ​ອົສ​ຕຣາ​ລີ ທີ່​ຍາມໃດ​ ກໍໄດ້​ໃຫ້​ຄວາມ​ເອົາໃຈໃສ່ ຊ່ວຍ ເຫຼືອ​ລັດຖະບານ​ລາວ, ໂດຍ​ສະເພາະ ໃຫ້ການ​ຮ່ວມ​ມືໃນ​ການ​ພັດທະນາ ແຂວງຈຳປາ​ສັກ ແລະ ຂໍ​ໃຫ້ການ​ຮ່ວມ​ມື ລະຫວ່າງ ສປປ ລາວ ແລະ ປະເທດ​ອົສຕຣາ​ລີ ເຕີບ​ໃຫຍ່​ຂະຫຍາຍຕົວ​ຂຶ້ນ​ຢ່າງ​ບໍ່​ຢຸດ​ຢັ້ງ ແລະ ອວຍພອນ​ແດ່​ທ່ານ ຈີນ​-​ເບີ​ນາດ ຄາ​ຣາ​ສ​ໂກ ເອກ​ອັກຄະ​ລັດ​ຖະ​ທູດ ແລະ ຄອບຄົວ ຈົ່ງ​ມີ​ສຸຂະພາບ​ເຂັ້ມແຂງ, ປະ ສົບຜົນສຳເລັດ ໃນ​ພາລະກິດ ທີ່​ມີ​ກຽດ​ສະ​ຫງ່າ. 
(ຂ່າວ: ທັດ​ຊະນະ ແສງ​ດາລາ)
 


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110