ກວຕ ສະຫຼອງສັບປະດາວິທະຍາສາດແຫ່ງຊາດ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ​ ເວ​ລາ: 16/10/2020 09:04:42 ຈຳ​ນວນ​​ຢ້ຽມ​ຊົມ 342 ຄັ້ງ

ກະຊວງ​ວິທະຍາສາດ ແລະ ເຕັກ​ໂນ​ໂລ​ຊີ (ກວຕ)ໄດ້ ຈັດ​ພິທີ​ສະເຫຼີມສະຫຼອງວັນ​ສັບປະດາ​ວິທະຍາສາດ​ແຫ່ງ​ຊາດ ປະຈຳ​ປີ 2020 ແລະ ກອງປະຊຸມ​ສໍາ​ມະ​ນາ​ວຽກ​ງານ​ວິທະຍາສາດ - ເຕັກ​ໂນ​ໂລ​ຊີ ເພື່ອ​ການ​ພັດທະນາ ໄດ້​ຈັດ​ຂຶ້ນ​ເມື່ອບໍ່​ດົນຜ່ານ​ມາ​ທີ່​ສະ​ຖາ​ບັນ​ຄຸ້ມ​ຄອງ​ວິທະຍາສາດ ແລະ ເຕັກ​ໂນ​ໂລ​ຊີ ໂດຍ​ການ​ເປັນ ປະທານ​ຂອງ ທ່ານ ຫຸມພັນ ອິນ​ທະ​ຣາດ ຮອງ​ລັດຖະມົນຕີ​ກະຊວງ​ວິທະຍາສາດ ແລະ ເຕັກ​ໂນ​ໂລ​ຊີ; ມີ​ບັນດາ​ກົມ, ຫ້ອງການ, ສະ​ຖາ​ບັນ​ພາຍ​ໃນ​ກະຊວງ ພ້ອມ​ດ້ວຍ​ຕົວ​ແທນ​ຈາກ​ມະຫາວິທະຍາໄລ​ແຫ່ງ​ຊາດ ແລະ ວິທະຍາໄລ ທີ່​ມີ​ຫຼັັກ​ສູດ​ການ​ຮຽນ​ -​ ການ​ສອນກ່ຽວ​ພັນ​ກັບ​ເຕັກນິກ - ວິທະຍາສາດ ຈຳນວນ 200 ກວ່າ​ຄົນ​ເຂົ້າ​ຮ່ວມ.

ທ່ານ ຫຸມພັນ ອິນ​ທະ​ຣາດ ໄດ້​ກ່າວໃຫ້​ເຫັນ​ເຖິງ​ຄວາມ​ເປັນ​ມາ​ຂອງ​ວັນ​ວິທະຍາສາດ​ແຫ່ງ​ຊາດ ຊຶ່ງ​ໃນ​ວັນ​ທີ 12 ຕຸ ລາ 1987 ເປັນ​ວັນ​ສ້າງຕັ້ງ​ສະ ພາ​ວິທະຍາສາດ - ເຕັກນິກ ແຫ່ງ​ລັດ ໂດຍ​ການ​ລົງ​ນາມ​ຂອງທ່ານ ໜູ​ຮັກ ພູມ​ສະຫວັນ ປະທານ​ປະເທດ ແຫ່ງ ສປປ ລາວ ໃນ​ໄລຍະ​ນັ້ນ, ນັບ​ແຕ່​ນັ້ນ​ມາ ພັກ​-​ລັດ ໄດ້​ມອບ​ໝາຍ​ໃຫ້​ນັກວິທະຍາສາດ​ລາວ ນຳ​ເອົາ​ວິທະຍາສາດ ແລະ ເຕັກ​ໂນ​ໂລ​ຊີ ທີ່​ກ້າວໜ້າ​ມາ​ນຳ​ໃຊ້​ເຂົ້າ​ໃນ​ການ​ຂັບ​ເຄື່ອນ ຊຸກຍູ້​ເສດຖະກິດ​ໃຫ້​ຂະຫຍາຍຕົວ​ຢ່າງ​ແຂງແຮງ ແລະ ຍືນ​ຍົງ ຕິດ​ພັນ​ກັບ​ການ​ຫັນ​ເປັນ​ອຸດສາຫະກຳ​ທີ່​ທັນ​ສະ ໄໝ ແລະ ພັດທະນາ​ຕາມ​ທິດ​ເສດຖະກິດ - ສັງຄົມ​ແຫ່ງ​ພູມ​ປັນ​ຍາ. ຕໍ່​ມາ​ໃນ​ກອງ​ປະຊຸມ​ສະໄໝ​ສາມັນ​ເທື່ອ​ທີ 5 ຂອງ​ສະພາ​ແຫ່ງ​ຊາດ ຊຸດ​ທີ VIII ເມື່ອ​ປີ 2013 ຮັບຮອງ​ເອົາ​ກົດໝາຍ​ວ່າ​ດ້ວຍ​ວິທະຍາສາດ ແລະ ເຕັກ​ໂນ​ໂລ​ຊີ ຊຶ່ງ​ໃນ​ນັ້ນ​ໄດ້​ກຳນົດ​ເອົາ​ວັນ​ທີ 12 ຕຸລາ ເປັນ​ວັນ​ວິທະຍາສາດ​ແຫ່ງ​ຊາດ ເປັນຕົ້ນ​ມາ.

ການ​ສະເຫຼີມສະຫຼອງ​ວັນ​ສັບປະດາ​ວິທະຍາສາດ​ແຫ່ງ​ຊາດ ແລະ ກອງ​ປະ​ຊຸມ​ສໍາ​ມະ​ນາ​ວຽກ​ງານ​ວິທະຍາສາດ - ເຕັກ​ໂນ​ໂລ​ຊີ ຄັ້ງ​ນີ້, ຍັງ​ເປັນ​ການ​ເພີ່ມ​ຄວາມ​ຮູ້​ຄວາມ​ເຂົ້າໃຈ​ຕໍ່​ກັບ​ບົດບາດ​ຄວາມ​ສຳຄັນ​ຂອງ​ວຽກ​ງານ​ວິທະຍາສາດ, ເຕັກ​ໂນ​ໂລ​ຊີ ແລະ ນະ​ວັດຕະ​ກຳ ປະກອບສ່ວນ​ເຂົ້າ​ໃນ​ການ​ຂັບ​ເຄື່ອນ​ເສດຖະກິດ - ສັງ​ຄົມ. ນອກ​ນີ້, ຍັງ​ເປັນ​ການ​ເພີ່ມ​ທະວີ​ຄວາມ​ເອົາໃຈໃສ່ ໃນ​ການ​ນໍາ​ໃຊ້​ຄວາມ​ຮູ້​ດ້ານ​ວິທະຍາສາດ ເຂົ້າ​ໃນ​ການ​ພັດທະນາ ເພື່ອ​ຍົກ​ສູງ​ຊີວິດ​ການ​ເປັນ​ຢູ່​ຂອງ​ປະຊາຊົນ ແລະ ການ​ຂະຫຍາຍຕົວ​ຂອງ​ເສດຖະກິດ​ແບບ​ຍືນ​ຍົງ ຄຽງ​ຄູ່​ກັບ​ການ​ປົກ​ປັກ​ຮັກສາ​ສະ ພາບ​ແວດ​ລ້ອມ ໂດຍ​ໄດ້​ກຳ​ນົດບັນດາ​ຫົວຂໍ້​ດັ່ງນີ້: ການ​ພັດທະນາ​ວິທະຍາສາດ ແລະ ເຕັກ​ໂນ​ໂລ​ຊີ​ຂອງ​ໂລກ ແລະ ຂອງ ສປປ ລາວ; ການ​ຄຸ້ມຄອງ​ ລັດວຽກ​ງານ​ວິທະຍາສາດ ແລະ ລັງ​ສີ​ - ​ນິວ​ເຄຣຍ; ການ​ນໍາໃຊ້​ ວິທະຍາສາດ​ເຂົ້າ​ໃນ​ການ​ຮຽນ​ -​ ການ​ສອນ; ການ​ຄຸ້ມ​ຄອງ​ລັດ​ກ່ຽວ​ກັບ​ວຽກ​ງານ​ເຕັກ​ໂນ​ໂລ​ຊີ​ດີຈີ​ຕອນ; ວຽກ​ງານ​ການ​ຄົ້ນຄວ້າ​ເຕັກ​ໂນ​ໂລ​ຊີ​ຄອມພິວ ​ເຕີ ແລະ ເອ​ເລັກ​ໂຕ​ຣ​ນິກ; ວຽກ​ງານ​ຄົ້ນຄວ້າ​ພະລັງງານ​ທົດ​ແທນ ແລະ ວັດ​ສະ​ດຸ​ສາດ ຂອງມະຫາວິທະຍາໄລ​ແຫ່ງ​ຊາດ; ເຕັກ​ໂນ​ໂລ​ຊີ​ຊີວະ​ພາບ ໃນ​ຍຸກ 4.0 ແລະ ຫົວຂໍ້ ການ​ຄຸ້ມ​ຄອງ​ກອງ​ທຶນ​ພັດທະນາ​ວິ ທະຍາສາດ ແລະ ເຕັກ​ໂນ​ໂລ​ຊີ.

(ຂ່າວ​-​ພາບ: ສຸກ​ສະຫວັນ)


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110