ຍອດວົງເງິນການຄ້າຫວຽດນາມ-ອິນເດຍຈະເພີ່ມຂຶ້ນ 1,1 ຕື້ໂດລາ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ​ ເວ​ລາ: 16/10/2020 09:39:31 ຈຳ​ນວນ​​ຢ້ຽມ​ຊົມ 354 ຄັ້ງ

ວິທະຍຸ​ກະຈາຍສຽງຫວຽດນາມ​ລາຍ​ງານ​ວ່າ: ວັນ​ທີ 13 ຕຸລາ​ຜ່ານ​ມາ, ທະນາຄານ Standard Chartered (ຫວຽດ ນາມ) ໄດ້​ປະກາດ​ບົດ​ລາຍງານ ​ກາລະ​ໂອກາດ​ການຄ້າ​ສາກົນ ຊຶ່ງ​ສະແດງ​ໃຫ້​ເຫັນ​ວ່າ: ບັນດາ​ ວິ​ສາ​ຫະ​ກິດ ຫວຽດນາມ ສາ ມາດ​ເພີ່ມ​ວົງ​ເງິນ​ສົ່ງ​ອອກ​ໄປ​ ຍັງ ອິນ​ເດຍ ຕື່ມ​ອີກ 663 ລ້ານ​ໂດ​ລາ. ໃນ​ຂະນະ​ດຽວ​ກັນ, ບັນດາ​ວິ​ສາ​ຫະ​ກິດ ອິນ​ເດຍ ກໍສາມາດ​ຊຸກຍູ້​ການ​ສົ່ງ​ອອກ​ມາ​ຍັງ ຫວຽດນາມ ຕື່ມ​ອີກ 475 ລ້ານ​ໂດ​ລາ ໃນ​ແຕ່​ລະ​ປີ ດ້ວຍ​ຄວາມ​ສາມາດ​ບົ່ມ​ຊ້ອນ, ຍອດ​ວົງ​ເງິນ​ການ​ຄ້າ​ສອງ​ຝ່າຍ​ລະຫວ່າງ ຫວຽດນາມ ແລະ ອິນ​ເດຍ ອາດ​ຈະ​ເພີ່ມ​ຂຶ້ນ​ຕື່ມ​ອີກ 1,1 ຕື້​ໂດ​ລາ.
ຂ່າວ​ລະບຸ​ວ່າ: ໃນ​ສະພາບ​ການ​ບັນດາ​ຕະຫຼາດ​ພວມ​ຟື້ນ​ຟູ ພາຍຫຼັງ​ໄດ້​ຮັບ​ຜົນ​ກະທົບ​ຈາກ​ໂຣກ​ລະບາດ​ໂຄ​ວິດ-19, ບົດ​ລາຍ​ງານ​ໃຫ້​ຂໍ້​ສັງເກດ​ວ່າ: ການ​ຄ້າ​ທົ່ວ​ໂລກ ແມ່ນ​ປັດໄຈ​ສຳຄັນ​ທີ່​ສຸດ ເພື່ອ​ຊຸກຍູ້​ການ​ພັດທະນາ ແລະ ວັດທະນາ​ຖາ​ວອນ. ໃນ​ນັ້ນ, ໄດ້​ເນັ້ນ​ໜັກ​ເຂົ້າ​ໃນ​ບັນດາ​ຂົງເຂດ​ທີ່​ມີ​ກາລະ​ໂອກາດ​ເຕີບ​ໂຕ​ສູງ​ສຸດ. ຂົງເຂດ​ຂາຍຍ່ອຍ ແລະ ຂາຍຍົກ ຂອງ ຫວຽດນາມ ມີ​ຄວາມ​ສາມາດ​ບົ່ມ​ຊ້ອນ​ເຕີບ​ໂຕ​ສົ່ງ​ອອກ​ໄປ​ຍັງ ອິນ​ເດຍ ຫຼາຍ​ທີ່​ສຸດ, ຢູ່​ໃນ​ລະດັບ 87 ລ້ານ​ໂດ​ລາ; ການ​ບໍລິການ​ຂົນສົ່ງ ແລະ ສາງ​ເກັບ​ມ້ຽນ​ສິນຄ້າ ກໍອາດ​ຈະ​ເພີ່ມ​ຂຶ້ນ​ຕື່ມ​ອີກ 86 ລ້ານ​ໂດ​ລາ. ບັນດາ​ຂົງເຂດ​ອື່ນ​ຂອງ ຫວຽດນາມ ມີ​ຫຼາຍ​ກາລະ​ໂອກາດ​ດ້ານ​ການ​ຄ້າ​ກັບ ອິນ​ເດຍ ລວມ​ມີ ບັນດາ​ປະເພດ​ສິນຄ້າ​ຕາໍ່​ແຜ່ນ, ແພຝ້າຍ ແລະ ບັນດາ​ບໍລິການ​ຊ່ວຍ​ໜູນ​ດຳເນີນ​ທຸລະ​ກິດ​ອື່ນໆ. ອິນ​ເດຍ ແມ່ນ​ໜຶ່ງ​ໃນ 10 ຄູ່​ຮ່ວມ​ມື​ສຳຄັນ​ຂອງ ຫວຽດນາມ.
 


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110