ຜົນສຳເລັດຂອງການລົງທຶນຕ່າງປະເທດໃນວຽກງານກະສິກຳຢູ່ປະເທດເຮົາ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ​ ເວ​ລາ: 16/10/2020 11:07:04 ຈຳ​ນວນ​​ຢ້ຽມ​ຊົມ 491 ຄັ້ງ

ໂດຍ: ລູກເຂົ້າໜຽວ

ຈາກຜົນສຳເລັດຂອງການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຢູ່ປະເທດເຮົາໃນໄລຍະຜ່ານມາເວົ້າລວມແລະການພັດທະນາດ້ານກະສິກຳເວົ້າສະເພາະ,ປັດໄຈໜຶ່ງທີ່ພາໃຫ້ມີຜົນສຳເລັດກໍແມ່ນຍ້ອນພັກ ແລະ ລັດຖະ ບານເຮົາມີແນວທາງ ແລະນະໂຍບາຍທີ່ຖືກຕ້ອງໃນການດຶງດູດແລະສົ່ງເສີມການລົງທຶນຂອງຜູ້ປະກອບການທັງພາຍໃນແລະຕ່າງປະເທດໃນວຽກງານກະສິກຳ ທ່ານ ອາໂນສັກ ແພງທິມມະວົງ ຮອງຫົວໜ້າກົມແຜນການແລະການເງິນກະຊວງກະສິກຳແລະປ່າໄມ້ໄດ້ມີຄຳເຫັນເມື່ອບໍ່ດົນມານີ້ກ່ຽວກັບຜົນສຳເລັດຂອງການລົງທຶນຕ່າງປະເທດໃນວຽກງານກະສິກຳຢູ່ປະເທດເຮົາໃນໄລຍະຜ່ານມາວ່າ:ອີງໃສ່ວິໄສທັດຮອດປີ2030ແລະຍຸດທະສາດຮອດປີ2025ຂອງຂົງເຂດກະສິກຳ,ບັນຫາທຳອິດທີ່ຕ້ອງຮັບປະກັນແມ່ນຕ້ອງຜະລິດສະບຽງອາຫານໃຫ້ພຽງພໍກັບຄວາມຕ້ອງການພາຍໃນແລະມີສິນຄ້າສົ່ງອອກຈຳນວນໜຶ່ງ.ສອງ,ຕ້ອງສຸມໃສ່ການຜະລິດສິນຄ້າກະສິກຳທີ່ມີຕາມທ່າແຮງຢ່າງຕໍ່ເນື່ອງຕາມທິດທີ່ມີຄຸນນະພາບ, ສີຂຽວ ແລະ ຍືນຍົງ, ທັງຖືເອົາການປົກປັກຮັກສາສິ່ງແວດລ້ອມເປັນສິ່ງຈຳເປັນ ໂດຍມີການຄຸ້ມຄອງແລະນຳໃຊ້ຊັບພະຍາກອນທຳມະຊາດຢ່າງມີປະສິດທິຜົນ,ກໍ່ສ້າງໃຫ້ມີການຫັນປ່ຽນຮູບແບບການພັດທະນາຕາມທິດເສີມຂະຫຍາຍທ່າແຮງບົ່ມຊ້ອນແລະຂໍ້ໄດ້ປຽບຂອງປະເທດເຮົາ.ພ້ອມນັ້ນກໍເຂົ້າຮ່ວມໃນການເຊື່ອມໂຍງກັບພາກພື້ນແລະສາກົນຢ່າງເປັນເຈົ້າການ.ສາມ,ຫັນວຽກງານກະສິກຳໄປສູ່ຄວາມທັນສະໄໝໃຫ້ຫຼາຍຂຶ້ນກວ່າເກົ່າ ຊຶ່ງມາຮອດປັດຈຸບັນພວກເຮົາມີໂຮງອົບເຂົ້າເປືອກຫຼາຍຂຶ້ນ,ມີເຮືອນຮົ່ມປູກຜັກ,ປູກພືດນອກລະດູແບບກະສິກຳອິນຊີຫຼາຍຂຶ້ນ.

ທ່ານອາໂນສັກແພງທິມມະວົງ ໃຫ້ຮູ້ຕື່ມອີກວ່າ: ມາຮອດປັດຈຸບັນການລົງທຶນຂອງເອກະຊົນພາຍໃນແລະຕ່າງປະເທດໃນຂົງເຂດກະສິກຳແລະ ປ່າໄມ້ໃນຂອບເຂດທົ່ວປະເທດເຮົາແມ່ນລວມມີທັງໝົດ 1.562 ບໍລິສັດ, ດ້ວຍມູນຄ່າການລົງທຶນທັງໝົດ 4,2 ຕື້ໂດລາ, (ທຶນຈົດທະບຽນ2,6ຕື້ໂດລາ) ໃນເນື້ອທີ່ດິນສຳປະທານທັງໝົດ 208.000 ກວ່າເຮັກ ຕາ. ໃນນັ້ນເປັນການລົງທຶນຂອງຕ່າງປະເທດໃນທຸລະກິດກະສິກຳມີ 515 ບໍລິສັດດ້ວຍທຶນທັງໝົດ 2,2 ຕື້ໂດລາ (ທຶນຈົດທະບຽນ 876,2ລ້ານໂດລາ). ປະເທດທີ່ມາລົງທຶນແມ່ນມາຈາກສະຫະພາບເອີຣົບ, ຈີນ,ຫວຽດນາມ, ໄທ, ຍີ່ປຸ່ນ,ມາເລເຊຍ,ອິນໂດເນເຊຍ, ສ. ເກົາຫຼີ,ຝຣັ່ງ,..ໃນນັ້ນສປຈີນເປັນອັນດັບໜຶ່ງໃນການລົງທຶນດ້ານກະສິກຳຢູ່ປະເທດເຮົາ,ຈຳນວນ239ບໍລິສັດ, ມີມູນຄ່າການລົງທຶນທັງໝົດ 589 ລ້ານໂດລາ. ອັນດັບສອງແມ່ນສສ ຫວຽດນາມມີ 60 ບໍລິສັດເຂົ້າມາລົງທຶນ, ດ້ວຍມູນຄ່າການລົງທຶນ 268 ລ້ານໂດລາ, ອັນດັບສາມແມ່ນປະເທດໄທມີ60ບໍລິສັດແລະມູນຄ່າການລົງທຶນ 200 ກວ່າລ້ານໂດລາ.ສະເພາະປີ2020ສິນຄ້າສົ່ງອອກຂາຍຕ່າງປະເທດອັນດັບທີ່ໜຶ່ງແມ່ນອ້ອຍບັນລຸສົ່ງອອກຂາຍໃຫ້ ສປ ຈີນ 300.000ໂຕນ, ຖັດມາແມ່ນມັນຕົ້ນ, ສາລີ, ກ້ວຍ, ໝາກໂມ, ມັນດ້າງ, ຕະກຸນຖົ່ວ ແລະ ພືດຜັກຊະນິດອື່ນໆ. ສະເພາະເຂົ້າສານຕາມແຜນຈະສົ່ງຂາຍໃຫ້ສປຈີນ 50.000 ໂຕນ, ມາຮອດປັດຈຸບັນໄດ້ສົ່ງຂາຍອອກໄປແລ້ວ15.000ໂຕນແລະ ປັດຈຸບັນກຳລັງກະກຽມສືບຕໍ່ສົ່ງຂາຍຕື່ມໃຫ້ສຳເລັດຕາມແຜນການທີ່ໄດ້ກຳນົດໄວ້.

ໂດຍລວມການລົງທຶນໃນຂະແໜງກະສິກຳໄດ້ປະກອບສ່ວນໃຫ້ແກ່ການພັດທະນາເສດຖະກິດ-ສັງຄົມຢູ່ປະເທດເຮົາໃຫ້ມີການຂະຫຍາຍຕົວຢ່າງຕໍ່ເນື່ອງ.ໃນນັ້ນໄດ້ປະກອບສ່ວນ 80% ຂອງລວມຍອດຜະ ລິດຕະພັນພາຍໃນ(GDP)ໃນຂະແໜງກະສິກຳ ແລະ ປ່າໄມ້.ໝາຍວ່າໃນGDPແຫ່ງຊາດຈະມີລາຍຮັບຈາກຂະແໜງກະ ສິກຳກວມອັດຕາສ່ວນ 15% ແລະ ໃນ 15% ນັ້ນຈະມີການລົງທຶນດ້ານກະສິກຳກວມເອົາ80%. ນອກນັ້ນການລົງທຶນຂອງຜູ້ປະກອບການທັງພາຍໃນແລະຕ່າງປະເທດໄດ້ສ້າງວຽກເຮັດງານທຳໃຫ້ແກ່ປະຊາຊົນໃນເຂດຊົນນະບົດ,ເພີ່ມລາຍຮັບໃຫ້ແກ່ຄອບຄົວ,ແກ້ໄຂໄດ້ຊີວິດການເປັນຢູ່ໃຫ້ດີຂຶ້ນເປັນກ້າວໆ. ຢ່າງໃດກໍຕາມ,ຄຽງຄູ່ກັບຈຸດດີແລະຜົນງານໃນການລົງທຶນຂອງຜູ້ປະກອບການ,ກໍບໍ່ອາດປະຕິເສດໄດ້ບາງຈຸດອ່ອນຂໍ້ຄົງຄ້າງທີ່ພວກເຮົາຕ້ອງໄດ້ຮ່ວມກັນແກ້ໄຂ ແລະ ບໍ່ໃຫ້ເກີດມີອີກ, ເປັນຕົ້ນແມ່ນບໍລິສັດລົງທຶນຈຳນວນໜຶ່ງບໍ່ປະຕິບັດຕາມກົດໝາຍແລະລະບຽບການລົງທຶນຂອງປະເທດເຮົາ,ບາງບໍລິສັດກໍດຳເນີນທຸລະກິດບໍ່ໄປຕາມບົດວິພາກຂອງຕົນເອງ,ເຮັດໃຫ້ມີຜົນກະທົບຕໍ່ສິ່ງແວດລ້ອມ,ຕໍ່ຊີວິດການເປັນຢູ່ຂອງປະຊາຊົນ ອ້ອມຂ້າງແລະບັນຫາອື່ນໆຕາມມາ.

ເພື່ອແກ້ໄຂບັນຫາຄົງຄ້າງ,ທັງເປັນການສົ່ງເສີມການລົງທຶນຂອງຕ່າງປະເທດໃນວຽກງານກະສິກຳ ໃຫ້ຫຼາຍແລະມີຜົນສຳເລັດດີຂຶ້ນກວ່າເກົ່າ,ກ່ອນອື່ນໝົດກໍຍັງແມ່ນຄວາມຮັບຜິດຊອບແລະຄວາມເປັນເຈົ້າການຂອງໝົດທຸກຄົນພາຍໃນສັງຄົມບວກກັບຄວາມຕື່ນຕົວຂອງຜູ້ປະກອບການໃນການປະຕິບັດຢ່າງເຂັ້ມງວດຕາມລະບຽບກົດໝາຍຂອງປະເທດເຮົາ.ພັກເຮົາຍາມໃດກໍຢຶດໝັ້ນການພັດທະນາເສດຖະກິດເປັນໃຈກາງຕິດພັນກັບການພັດທະນາສັງຄົມແລະການປົກປັກຮັກສາສິ່ງແວດລ້ອມໄປຕາມທິດພັດທະນາແບບຍືນຍົງ, ດຳເນີນນະໂຍບາຍສົ່ງເສີມຢ່າງແຂງແຮງກຳລັງແຮງຂອງທຸກພາກສ່ວນເສດຖະກິດທັງພາຍໃນແລະຕ່າງປະເທດ, ສ້າງເງື່ອນໄຂທີ່ຈຳເປັນເພື່ອກະຕຸ້ນການຂະຫຍາຍຕົວຂອງທຸລະກິດຂະໜາດນ້ອຍ, ກາງແລະໃຫຍ່ໄປ ພ້ອມໆກັນ. ທັງໝົດນັ້ນແມ່ນແນໃສ່ພັດທະນາກະສິກຳຢູ່ປະເທດເຮົາໃຫ້ຕິດພັນກັບການປຸງແຕ່ງແຕ່ຫົວທີ, ສ້າງໃຫ້ເປັນພື້ນຖານຂອງການພັດທະນາທີ່ຍືນຍົງ, ຜະລິດສິນຄ້າໃຫ້ຫຼາຍຂຶ້ນທາງດ້ານປະລິມານ ແລະ ດ້ານຄຸນນະພາບ,ຮັບປະກັນມາດຕະຖານຄວາມສະອາດ, ຄວາມປອດໄພແລະສ້າງມູນຄ່າເພີ່ມໃຫ້ຜົນຜະລິດ, ບົນພື້ນຖານການນຳໃຊ້ເຕັກນິກເຕັກໂນໂລຊີທີ່ທັນສະໄໝ,ສ້າງຄວາມໝັ້ນຄົງດ້ານສະບຽງອາຫານ, ຊຸກຍູ້ສົ່ງເສີມການຜະລິດແບບຄອບຄົວ,ແບບຟາມ, ແບບຮ່ວມມື,ແບບສະຫະກອນແລະແບບເປັນນິຄົມກະເສດອຸດສາຫະກຳໃນແຕ່ລະເຂດ, ແຕ່ລະບໍລິເວນຢ່າງເໝາະສົມ.


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110