ຊົມເຊີຍຜົນສໍາເລັດການຢ້ຽມຢາມ ສປປ ລາວ ຂອງ ທ່ານ ລັດຖະມົນຕີການຕ່າງປະເທດ ສປຈີນ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ​ ເວ​ລາ: 16/10/2020 12:54:31 ຈຳ​ນວນ​​ຢ້ຽມ​ຊົມ 427 ຄັ້ງ

ໂດຍຕອບສະໜອງຕາມການເຊື້ອເຊີນຂອງ ສະຫາຍ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ແລະ ເພື່ອເປັນການສືບຕໍ່ຜັນຂະຫຍາຍສາຍພົວພັນຮ່ວມມື ຍຸດທະສາດຮອບດ້ານ, ໝັ້ນຄົງ, ຍາວນານ ຕາມທິດ 4 ດີຄື: ການເປັນຄູ່ຮ່ວມຊາຕາກຳ ລາວ-ຈີນ, ຈີນ-ລາວ ໃຫ້ແໜ້ນແຟ້ນ ແລະ ເຂົ້າສູ່ລວງເລິກຍິ່ງໆຂຶ້ນ, ສະຫາຍ ຫວາງ ອີ້ ທີ່ປຶກສາແຫ່ງລັດ ລັດຖະມົນຕີກະຊວງການຕ່າງປະເທດ ແຫ່ງ ສປ ຈີນ ພ້ອມດ້ວຍຄະນະໄດ້ເດີນທາງມາຢ້ຽມຢາມ ສປປ ລາວ ຢ່າງເປັນທາງການ ໃນລະຫວ່າງ ວັນທີ 13-14 ຕຸລາ 2020.

ການຢ້ຽມຢາມ ສປປ ລາວ ຂອງທ່ານ ຫວັງອີ້ ໃນຄັ້ງນີ້, ສາມາດເວົ້າໄດ້ວ່າໄດ້ຮັກສາທ່ວງທ່າທີ່ສອງປະເທດຕິດຕໍ່ພົວພັນກັນຢ່າງໃກ້ຊິດ ທັງພົວພັນກັນດ້ວຍຮູບການຕ່າງໆເຊັ່ນ: ສົນທະນາກັນຜ່ານທາງໂທລະສັບ, ວິດີໂອ ແລະ ການພົບປະກັນທາງອອນລາຍ ແລະ ອື່ນໆ ພາຍຫຼັງເກີດການແຜ່ລະບາດຂອງພະຍາດໂຄວິດ-19. ນີ້ສະແດງໃຫ້ເຫັນວ່າ: ພາຍໃຕ້ສະພາບການທີ່ພະຍາດໂຄວິດ-19 ສືບຕໍ່ແຜ່ລະບາດໃນທົ່ວໂລກ, ຈີນ ແລະ ລາວ ລ້ວນແຕ່ມີຄວາມຕັດສິນໃຈ ແລະ ຄວາມຈິງໃຈ ເພື່ອຊຸກຍູ້ການຮ່ວມມືລະຫວ່າງສອງຝ່າຍຕື່ມອີກ, ການພົວພັນຄູ່ຮ່ວມມື ລະຫວ່າງ ສອງຝ່າຍມີພະລັງຊີວິດ ແລະ ມີທ່າແຮງທີ່ເຂັ້ມແຂງ, ໄດ້ຮັບໝາກຜົນຢ່າງຫຼວງຫຼາຍ, ສອງຝ່າຍຈະລົງເລິກການພົວພັນ ລະຫວ່າງ ສອງປະເທດຕື່ມອີກ ແລະ ເພີ່ມຄວາມໄວ້ເນື້ອເຊື່ອໃຈຊຶ່ງກັນ ແລະ ກັນ. ເປັນການສົ່ງສັນຍານຢ່າງຈະແຈ້ງວ່າ: ສອງຝ່າຍຈະຮ່ວມກັນຊຸກຍູ້ການສ້າງຄູ່ຮ່ວມຊາຕາກຳລາວ-ຈີນ, ຈີນ-ລາວ ແລະ ຈະເລີ່ມເປີດຊ່ອງທາງສະດວກ ໃຫ້ແກ່ການໄປມາຫາສູ່ກັນ ລະຫວ່າງ ບຸກຄະລາກອນທັງສອງປະເທດ, ເຫັນດີສ້າງ “ຊ່ອງທາງສີຂຽວ” ເພື່ອຂົນສົ່ງເຄື່ອງອຸປະກອນ ລະຫວ່າງສອງປະເທດ. ຮ່ວມກັນຕ້ານກັບການແຜ່ລະບາດຂອງພະຍາດໂຄວິດ-19 ແລະ ເພື່ອຟື້ນຟູເສດຖະກິດຮ່ວມກັນ ໂດຍສາມາດປ່ຽນວິກິດໃຫ້ເປັນໂອກາດ ແລະ ຊຸກຍູ້ການພົວພັນ ລາວ - ຈີນ ໃຫ້ກ້າວຂຶ້ນສູ່ລະດັບໃໝ່.

ໃນເວລາຢູ່ຢ້ຽມຢາມ ສປປ ລາວ ຄັ້ງນີ້, ສະ¬ຫາຍ ຫວາງ ອີ້ ພ້ອມຄະ¬ນະ ໄດ້ເຂົ້າຢ້ຽມຂ່ຳນັບ ສະ-ຫາຍ ບຸນຍັງ ວໍ¬ລະຈິດ ປະ¬ທານປະ¬ເທດ ແລະ ເຂົ້າຢ້ຽມຂ່ຳ¬ນັບ ສະຫາຍ ທອງລຸນ ສີສຸລິດ ນາ¬ຍົກລັດ¬ຖະ-ມົນ¬ຕີ ແລະ ໄດ້ມີການພົບປະສອງຝ່າຍ ກັບ ສະ¬ຫາຍ ສະ¬ເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ.

ໃນການພົບປະ, ສະຫາຍ ສະເຫຼີມໄຊ ກົມມະສິດ ໄດ້ສະແດງຄວາມຍິນດີຕ້ອນຮັບຢ່າງອົບອຸ່ນ ແລະ ຕີລາຄາສູງຕໍ່ການຢ້ຽມຢາມ ສປປ ລາວ ຄັ້ງທີ 2 ຂອງ ສະຫາຍ ຫວາງ ອີ້ ໃນປີນີ້ ໂດຍຄັ້ງທີ 1 ໄດ້ມີການພົບປະສອງຝ່າຍ ໃນເດືອນກຸມພາທີ່ຜ່ານມາ, ໃນໂອກາດເຂົ້າຮ່ວມກອງປະຊຸມລັດຖະມົນຕີຕ່າງປະເທດແມ່ນໍ້າຂອງ - ແມ່ນໍ້າລ້ານຊ້າງ ຄັ້ງທີ 5, ລວມທັງກອງປະຊຸມ ສະໄໝພິເສດ ອາຊຽນ - ຈີນ ວ່າດ້ວຍການລະບາດຂອງພະຍາດໂຄວິດ - 19 ທີ່ນະຄອນຫຼວງວຽງຈັນ.

ໃນການພົບປະຄັ້ງນີ້, ສອງຝ່າຍໄດ້ຕີລາຄາສູງຕໍ່ການພົວພັນແບບຄູ່ຮ່ວມມືຍຸດທະສາດຮອບດ້ານ, ໝັ້ນຄົງ, ຍາວນານ, ຕາມທິດ 4 ດີ ແລະ ການເປັນຄູ່ຮ່ວມຊາຕາກຳ ລາວ-ຈີນ ແລະ ຈີນ-ລາວ ລະຫວ່າງ ສອງພັກ ແລະ ສອງລັດຖະບານ ກໍຄືປະຊາຊົນສອງຊາດ ຊຶ່ງນັບມື້ນັບໄດ້ຮັບການເສີມຂະຫຍາຍດ້ວຍຄຸນນະພາບໃໝ່ຢ່າງບໍ່ຢຸດຢັ້ງ ເປັນຕົ້ນແມ່ນການແລກປ່ຽນການຢ້ຽມຢາມຂອງຄະນະຜູ້ແທນຂັ້ນສູງຂອງສອງປະເທດ ຢ່າງເປັນປົກກະຕິ. ສປປ ລາວ ໄດ້ສະແດງຄວາມຊົມເຊີຍ ແລະ ສະໜັບສະໜູນຕໍ່ຂໍ້ລິເລີ່ມທີ່ ສະຫາຍ ຫວາງ ອີ້ ໄດ້ສະເໜີຢູ່ໃນກອງປະຊຸມສາກົນຜ່ານລະບົບທາງໄກ ກ່ຽວກັບຄວາມໝັ້ນຄົງທາງດ້ານຂໍ້ມູນຂ່າວສານສາກົນ (Global Initiative on Data Security), ໃນວັນທີ 8 ກັນຍາຜ່ານມາ ຊຶ່ງເປັນຂໍ້ລິເລີ່ມທີ່ມີຄວາມໝາຍຄວາມສໍາຄັນ ແລະ ເປັນປະໂຫຍດຕໍ່ກັບຫຼາຍປະເທດ ໃນພາກພື້ນ ແລະ ສາກົນ ໃນການພັດທະນາເສດຖະກິດ-ສັງຄົມ ເພື່ອຄວາມກ້າວໜ້າທາງເຕັກໂນໂລຊີ, ຄວາມປອດໄພທາງດ້ານຂໍ້ມູນຂ່າວສານ, ລວມທັງຄວາມໝັ້ນຄົງຂອງຊາດ ແລະ ຜົນປະໂຫຍດສ່ວນລວມ. ພ້ອມກັນນີ້, ສປປ ລາວ ສະໜັບສະໜູນຢ່າງເຕັມປ່ຽມ ຕໍ່ເນື້ອໃນບົດປາໄສຂອງ ສະຫາຍ ປະທານປະເທດ ສີ ຈິ້ນຜິງ ທີ່ໄດ້ກ່າວຜ່ານກອງປະຊຸມທາງໄກ ໃນໂອກາດວັນສ້າງຕັ້ງ ສປຊ ຄົບຮອບ 75 ປີ ໂດຍເນັ້ນ 6 ບັນຫາສໍາຄັນຄື: ການເປັນຄູ່ຮ່ວມຊາຕາກໍາຂອງມວນມະນຸດ, ການຮ່ວມມືຕ່າງຝ່າຍຕ່າງມີຜົນປະໂຫຍດ, ການສົ່ງເສີມການຄ້າຫຼາຍຝ່າຍ, ແນວຄິດການພັດທະນາແບບໃໝ່, ການຮ່ວມມືໃນຂອບຫຼາຍຝ່າຍ ແລະ ການສະໜັບສະໜູນຄວາມເປັນແກນກາງຂອງສປຊ ແລະ ອື່ນໆ. ສອງຝ່າຍ ໄດ້ເຫັນດີເປັນເອກະພາບ ຕໍ່ການຕີລາຄາການຮ່ວມມືສອງຝ່າຍ ກໍຄືລະຫວ່າງສອງກະຊວງການຕ່າງປະເທດ ໃນໄລຍະຜ່ານມາ ພາຍໃຕ້ສະຖານະການໃໝ່ຂອງການແຜ່ລະບາດໂຄວິດ - 19 ແລະ ສະພາບການສາກົນໃນປັດຈຸບັນ, ສອງຝ່າຍ ໄດ້ມີການຮ່ວມມືກັນຢ່າງໃກ້ຊິດ ແລະ ແລກປ່ຽນຂໍ້ມູນ ຊຶ່ງກັນ ແລະ ກັນ ຢ່າງເປັນປະຈຳ ເຮັດໃຫ້ຊາຍແດນ ລາວ - ຈີນ ເປັນຊາຍແດນມິດຕະພາບ, ບ້ານໃກ້ເຮືອນຄຽງຕາມທິດ 4 ດີ ແລະ ຄູ່ຮ່ວມຊາຕາກຳອັນແທ້ຈິງ. ດ້ານເສດຖະກິດ ແລະ ການຄ້າ, ສອງຝ່າຍ ໄດ້ສະແດງການສະໜັບສະໜູນນະໂຍບາຍ “ໜຶ່ງແລວໜຶ່ງເສັ້ນທາງ” ຂອງ ສປ ຈີນ ຊຶ່ງຈະນໍາຜົນປະໂຫຍດອັນໃຫຍ່ຫຼວງ ມາໃຫ້ແກ່ບັນດາປະເທດຕ່າງໆທີ່ເຂົ້າຮ່ວມ.

ສຳລັບ ສປປ ລາວ ແມ່ນໄດ້ໃຫ້ຄວາມສຳຄັນ ແລະ ເຂົ້າຮ່ວມຢ່າງຕັ້ງໜ້າ ໂດຍໄດ້ເຊື່ອມໂຍງ ລະຫວ່າງ ຍຸດທະສາດ “ການຫັນປະເທດທີ່ບໍ່ມີຊາຍແດນຕິດກັບທະເລ ເປັນປະເທດເຊື່ອມໂຍງເຊື່ອມຈອດ” ຂອງ ສປປ ລາວ ເຂົ້າກັບຍຸດທະສາດ “ໜຶ່ງແລວ ໜຶ່ງເສັ້ນທາງ” ຂອງ ສປ ຈີນ, ຖືເອົາການກໍ່ສ້າງທາງລົດໄຟ ລາວ - ຈີນ ແລະ ທາງດ່ວນ ວຽງຈັນ - ວັງວຽງ, ວັງວຽງ-ຫຼວງພະບາງ, ຫຼວງພະບາງ - ອຸດົມໄຊ ໄປຈົນຮອດຊາຍແດນ ລາວ - ຈີນ ດ່ານບໍ່ເຕ່ນ -ບໍ່ຫານ ເປັນໜຶ່ງໃນການເຊື່ອມໂຍງຍຸດທະສາດສຳຄັນຂອງສອງປະເທດ ແລະ ຖືເປັນສອງເສັ້ນທາງທີ່ສຳຄັນ ໃນການປະຕິບັດແລວເສດຖະກິດ ລາວ- ຈີນ, ຈີນ - ລາວ.

ໃນປັດຈຸບັນ, ໂຄງການກໍ່ສ້າງທາງລົດໄຟ ລາວ - ຈີນ ແມ່ນມີຄວາມຄືບໜ້າຫຼາຍກວ່າ 90,7% ແລະ ໂຄງການທາງດ່ວນ ວຽງຈັນ - ວັງວຽງ ກໍມີຄວາມຄືບໜ້າຫຼາຍກວ່າ 90% ຊຶ່ງຄາດວ່າ: ຈະເປີດນຳໃຊ້ ໃນວັນທີ 2 ທັນວາ 2020. ໃນປີ 2019 ສປ ຈີນ ເປັນປະເທດລົງທຶນອັນດັບ 1 ຢູ່ ສປປ ລາວ ມີຈຳນວນເຖິງ 785 ໂຄງການ, ລວມມູນຄ່າ 12 ຕື້ໂດລາ ແລະ ປະເທດຄູ່ຄ້າລາຍໃຫຍ່ ອັນດັບ 2 ຂອງ ສປປ ລາວ, ມີມູນຄ່າການຄ້າ ບັນລຸ 3.540 ລ້ານໂດລາ, ເພີ່ມຂຶ້ນ 17,4%, ມູນຄ່າການນໍາເຂົ້າມີ 1.600 ລ້ານໂດລາ, ເພີ່ມຂຶ້ນ 29,6% ແລະ ມູນຄ່າສົ່ງອອກມີ 1.940 ລ້ານໂດລາ, ເພີ່ມຂຶ້ນ 8,9% ເມື່ອທຽບໃສ່ໄລຍະດຽວກັນຂອງປີຜ່ານມາ. ສອງຝ່າຍ ຍັງຕົກລົງເຫັນດີ ໃນການຈັດຕັ້ງປະຕິບັດຊ່ອງທາງໄວຮ່ວມກັນ (Fast-Track Lane) ໃນໄລຍະການແຜ່ລະບາດຂອງ ພະຍາດ ໂຄວິດ-19 ເພື່ອສົ່ງເສີມການໄປມາຫາສູ່ກັນລະຫວ່າງພະນັກງານ, ເຈົ້າໜ້າທີ່ກ່ຽວຂ້ອງກໍຄືແຮງງານ ແລະ ຊ່ຽວຊານ ສຳລັບໂຄງການໃຫຍ່ໆທີ່ສຳຄັນ ລະຫວ່າງ ສອງປະເທດ.

ຊ່ອງທາງດັ່ງກ່າວ ຈະເປັນການປະກອບສ່ວນເຂົ້າໃນການສົ່ງເສີມການຮ່ວມມື ເພື່ອຊ່ວຍຟື້ນຟູເສດຖະກິດຂອງ ສປປ ລາວ ກໍຄືເຮັດໃຫ້ການປະຕິບັດໂຄງການຕ່າງໆຂອງ ສປ ຈີນ ຢູ່ ສປປ ລາວ ສຳເລັດຕາມຄາດໝາຍ. ພ້ອມນັ້ນ, ສອງຝ່າຍ ຍັງເຫັນດີໃນດ້ານຫຼັກການ ໃຫ້ເປີດນຳໃຊ້ຊ່ອງທາງສີຂຽວ ເພື່ອອຳນວຍຄວາມສະດວກໃຫ້ແກ່ລົດບັນທຸກສິນຄ້າຜ່ານແດນ ລາວ-ຈີນ, ຈີນ-ລາວ ຢູ່ດ່ານສາກົນບໍ່ເຕ່ນ-ບໍ່ຫານ, ແຂວງຫຼວງນໍ້າທາ ໃຫ້ມີຄວາມວ່ອງໄວຂຶ້ນ.

ນອກຈາກນີ້, ສອງຝ່າຍ ຍັງໄດ້ປຶກສາຫາລື ກ່ຽວກັບທິດທາງແຜນການຮ່ວມມືໃນຕໍ່ໜ້າ ໂດຍ ສະເໜີແຜນການສະເຫຼີມສະຫຼອງ ວັນສ້າງຕັ້ງສາຍພົວພັນການທູດ ລາວ-ຈີນ, ຈີນ-ລາວ ຄົບຮອບ 60 ປີ ແລະ ປີມິດຕະພາບ ລາວ-ຈີນ ໃນປີ 2021, ປຶກສາຫາລືກ່ຽວກັບ ການສືບຕໍ່ຮ່ວມມືກັນຢ່າງໃກ້ຊິດ ແລະ ຊ່ວຍເຫຼືອຊຶ່ງກັນ ແລະ ກັນ ໃນການປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດ ໂຄວິດ-19 ເພື່ອປ້ອງກັນບໍ່ໃຫ້ກັບມາລະບາດອີກຮອບໃໝ່.

ໂອກາດດຽວກັນນີ້, ສະຫາຍ ສະເຫຼີມໄຊ ກົມມະສິດ ໄດ້ສະແດງຄວາມຊົມເຊີຍຕໍ່ຜົນສຳເລັດທີ່ ພັກ ແລະ ລັດຖະບານ ແຫ່ງ ສປ ຈີນ ຍາດມາໄດ້ໃນການຄວບຄຸມ ແລະ ສະກັດກັ້ນການແຜ່ລະບາດ ໂຄວິດ-19, ພ້ອມທັງສະແດງຄວາມຂອບໃຈ ແລະ ຮູ້ບຸນຄຸນຕໍ່ ສປ ຈີນ ທີ່ໄດ້ໃຫ້ການການຊ່ວຍເຫຼືອ ແກ່ ສປປ ລາວ ໃນການປ້ອງກັນ ແລະ ຕໍ່ສູ້ກັບພະຍາດໂຄວິດ-19 ນັບແຕ່ຕົ້ນຈົນເຖິງປັດຈຸບັນ, ເປັນການປະກອບສ່ວນສຳຄັນເຮັດໃຫ້ ສປປ ລາວ ປະສົບຜົນສຳເລັດຢ່າງສູງ ໃນການປ້ອງກັນ ແລະ ຄວບຄຸມພະຍາດ ໃນປັດຈຸບັນ. ເຊື່ອໝັ້ນຢ່າງໜັກແໜ້ນຕໍ່ບົດຮຽນ ແລະ ມາດຕະການທີ່ມີປະສິດທິຜົນສູງ, ສປ ຈີນ ຈະສາມາດຄວບຄຸມພະຍາດດັ່ງກ່າວໄດ້ຢ່າງສິ້ນເຊີງ ແລະ ປະສົບຜົນສຳເລັດໃນການຜະລິດວັກຊິນ ອອກມາ ຮັບໃຊ້ສັງຄົມໃນໄວໆນີ້.

ໃນການພົບປະ, ສອງຝ່າຍໄດ້ມີການແລກປ່ຽນຈົດໝາຍ, ແລກປ່ຽນໂຄງການຊ່ວຍເຫຼືອ 3 ສະບັບຄື: ໂຄງການຊ່ວຍເຫຼືອກ່ຽວກັບອຸປະກອນຕ້ານໄຂ້ເລືອດອອກ, ໂຄງການພື້ນຖານໂຄງລ່າງການພັດທະນາຊົນນະບົດໄລຍະ 2 ແລະ ໂຄງການແລກປ່ຽນລະຫວ່າງລັດຖະບານ ແຫ່ງ ສປປ ລາວ ແລະ ລັດຖະບານ ແຫ່ງ ສປ ຈີນ ກ່ຽວກັບການຮັບເອົາສິດພິເສດທາງດ້ານພາສີ 0% ໃຫ້ແກ່ 97% ຂອງລາຍການສິນຄ້າທັງໝົດ (GSP 97%).

ໂດຍ: ສີວັນ


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110