ໂດຍ: ຍຸພິນ
ແຫຼ່ງທ່ອງທ່ຽວນໍ້າຕົກຕາດກວາງຊີ ເປັນອີກສະຖານທີ່ໜຶ່ງທີ່ໂດດເດັ່ນດ້ານທໍາມະຊາດທີ່ສວຍງາມຂອງແຂວງຫຼວງພະບາງ, ພາຍຫຼັງລັດຖະບານອອກມາດຕະການຜ່ອນຜັນການປ້ອງກັນ, ຄວບຄຸມ ແລະ ແກ້ໄຂການລະບາດພະຍາດໂຄວິດ-19 ແຫຼ່ງທ່ອງທ່ຽວຫຼາຍແຫ່ງທົ່ວປະເທດເລີ່ມຄຶກຄັກ ຊຶ່ງແຫຼ່ງທ່ອງທ່ຽວຕາດກວາງຊີກໍເລີ່ມມີສັນຍານດີຂຶ້ນຫຼາຍ ຫຼັງສ້າງລາຍຮັບໄດ້ບໍ່ໜ້ອຍກວ່າ 1 ລ້ານກີບຕໍ່ມື້.
ທ່ານ ບຸນມີ ອຸ່ນນາທີ ຜູ້ຮັບຜິດຊອບຕາດກວາງຊີ ໄດ້ໃຫ້ສໍາພາດຕໍ່ສື່ມວນຊົນ ເມື່ອບໍ່ດົນມານີ້ວ່າ: ກ່ອນເກີດການລະບາດພະຍາດໂຄວິດ-19, ພວກເຮົາສ້າງລາຍຮັບຈາກການບໍລິການຕ່າງໆມື້ໜຶ່ງບໍ່ຫຼູດ 10 ລ້ານກີບ, ແຕ່ຖ້າແມ່ນວັນສໍາຄັນຕ່າງໆຈະສ້າງລາຍຮັບໄດ້ບໍ່ໜ້ອຍກວ່າ 15 ລ້ານກີບ, ເນື່ອງຈາກນັກທ່ອງທ່ຽວຕ່າງປະເທດເຂົ້າມາທ່ຽວເປັນຈໍານວນຫຼາຍ ໂດຍຫຼາຍກວ່າໝູ່ແມ່ນນັກທ່ອງທ່ຽວຈີນ. ແນວໃດກໍດີຈາກການລະບາດພະຍາດໂຄວິດ-19 ກໍໄດ້ປິດການບໍລິການຕາມ ຄໍາສັ່ງແນະນໍາຂອງລັດຖະບານເພື່ອປ້ອງກັນການລະບາດຂອງພະຍາດດັ່ງກ່າວ, ແຕ່ພາຍຫຼັງລັດຖະບານອອກມາດຕະການຜ່ອນຜັນການປ້ອງກັນ, ຄວບຄຸມ ແລະ ແກ້ໄຂການລະບາດພະຍາດໂຄວິດ-19, ນັກທ່ອງທ່ຽວກໍເລີ່ມເຂົ້າມາທ່ຽວຕາດກວາງຊີນັບມື້ຫຼາຍຂຶ້ນ ຊຶ່ງສ່ວນຫຼາຍແມ່ນນັກທ່ອງທ່ຽວພາຍໃນປະເທດ, ສ່ວນນັກທ່ອງທ່ຽວຕ່າງປະເທດມີໜ້ອຍ ແລະ ກໍເປັນພຽງນັກທ່ອງທ່ຽວວິຊາການ ຫຼື ຊ່ຽວຊານທີ່ມາເຮັດວຽກຢູ່ລາວເທົ່ານັ້ນ ໂດຍສະເລ່ຍແລ້ວມື້ໜຶ່ງສ້າງລາຍຮັບໄດ້ 1 ລ້ານກວ່າກີບ.
ທ່ານ ບຸນມີ ອຸ່ນນາທີ ກ່າວຕື່ມວ່າ: ລາຍຮັບທີ່ໄດ້ນີ້ເຖິງວ່າບໍ່ຫຼາຍເມື່ອທຽບໃສ່ກ່ອນເກີດການລະບາດພະຍາດໂຄວິດ-19 ແຕ່ຖືເປັນສັນຍານດີຂຶ້ນ ເນື່ອງຈາກນັກທ່ອງທ່ຽວພາຍໃນເຂົ້າມາທ່ຽວມີທ່າອ່ຽງເພີ່ມຂຶ້ນ. ໃນໂອກາດນີ້, ກໍຂໍເຊີນຊວນນັກທ່ອງທ່ຽວພາຍໃນປະເທດເຂົ້າມາທ່ຽວຕາດກວາງຊີ ກໍຄືສະຖານທີ່ທ່ອງທ່ຽວອື່ນໆຢູ່ແຂວງຫຼວງພະບາງໃຫ້ຫຼາຍຂຶ້ນກວ່າເກົ່າ ຕາມຄຳຂວັນທີ່ວ່າ ລາວທ່ຽວລາວ ໂດຍສະເພາະຕາດກວາງຊີ ທີ່ໄດ້ປັບປຸງຫຼາຍຢ່າງດີຂຶ້ນ ແລະ ສວຍງາມກວ່າເກົ່າ. ສໍາລັບຄ່າເຂົ້າຊົມສໍາລັບຄົນລາວຜຸ້ໜຶ່ງ 10.000 ກີບ, ຄົນຕ່າງປະເທດ 20.000 ກີບ, ສ່ວນເດັກນ້ອຍອາຍຸໜ້ອຍກວ່າ 8 ປີ ບໍ່ໄດ້ເສຍຄ່າ.