ຍ່າງເພື່ອສຸຂະພາບ ສະຫຼອງວັນສະຖິຕິໂລກ

ເພື່ອສະເຫຼີມສະຫຼອງວັນສະຖິຕິໂລກ 20 ຕຸລາ 2020 ບັນດາອົງການສະຖິຕິ ຂອງແຕ່ລະປະເທດໄດ້ມີການຈັດກິດຈະກຳ ສະເຫຼີມສະຫຼອງວັນດັ່ງກ່າວດ້ວຍຫຼາຍຮູບແບບ. ສຳລັບ ສປປ ລາວ ກໍຖືໂອກາດສະຫຼອງວັນສະຖິຕິ ແຫ່ງຊາດ ແລະ ວັນສະຖິຕິໂລກ , ຊຶ່ງໃນປີນີ້ກໍບັນຈົບຄົບຮອບ 10 ປີ ໃນຫົວຂໍ້” ເຊື່ອມຕໍ່ໂລກດ້ວຍຂໍ້ມູນທີ່ເຊື່ອຖືໄດ້”, ດັ່ງນັ້ນ ເມື່ອວັນທີ 22 ຕຸລາ 2020 ທີ່ເ​ດີ່ນກິລາເຈົ້າອານຸວົງ ກົມສະຖິຕິແຫ່ງຊາດ ກະຊວງ ແຜນການ ແລະ ການລົງທຶນ ຈຶ່ງໄດ້ຈັດກິດຈະກຳ ຍ່າງເພື່ອສຸຂະພາບ, ເຕັ້ນແອໂລວິກ ແລະ ເຕະບານມິດຕະພາບ ຊຶ່ງມີທ່ານ ກິແກ້ວ ຈັນທະບູຣີ ຮອງລັດຖະມົນຕີ ກະຊວງ ແຜນການ ແລະ ການລົງທຶນ, ທ່ານ ນາງ ພອນສະຫຼີ ສຸກສະຫວັດ ຫົວໜ້າກົມສະຖິຕິແຫ່ງຊາດ ກະຊວງ ແຜນການ ແລະ ການລົງທຶນ ພ້ອມດ້ວຍອົງການ UN, ຄູ່ຮ່ວມງານທັງພາຍໃນ ແລະ ຕ່າງປະເທດເຂົ້າຮ່ວມ

   ຈຸດປະສົງກິດຈະກຳໃນຄັ້ງນີ້ ແມ່ນເພື່ອເປັນການສະເຫຼີມສະຫຼອງວັນສະຖິຕິໂລກ ໃຫ້ມີຄວາມຟົດຟື້ນມ່ວນຊື່ນ,ເຕັ້ມໄປດ້ວຍບັນຍາກາດທີ່ມີເນື້ອໃນ ແລະ ຄວາມໝາຍເລິກເຊິ່ງ ທີ່ຊີ້ໃຫ້ເຫັນຢ່າງຈະແຈ້ງວ່າ ຍາມໃດພັກ-ລັດຖະບານ ກໍ່ມີຄວາມເປັນຫ່ວງເປັນໃຍ ແລະ ໃຫ້ຄວາມສຳຄັນການພັດທະ​ນາວຽກງານສະຖິຕິ ຂອງ ສປປ ລາວ ໃຫ້ຄ່ຽງຄູ່ ໄປກັບການພັດທະນາ ເສດຖະກິດ-ສັງຄົມ ແລະ ສິ່ງແວດລ້ອມໃຫ້ນັບມື້ນັບດີຂຶ້ນເທື່ອລະກ້າວ (ຂ່າວ:ຕຸໄລເພັດ ພິມເມືອງ)