ຂະແໜງການກ່ຽວຂ້ອງພາກລັດ,ຜູ້ປະກອບການ ແລະ ອົງການປົກຄອງບ້ານກົງຕາຢູນ ເມືອງທ່າແຕງ ແຂວງ ເຊກອງລົງສຳຫຼວດຕາດໝາໄນທີ່ມີພື້ນທີ່ກວມ 5 ເຮັກຕາ ເພື່ອພັດທະນາໃຫ້ເປັນແຫຼ່ງທ່ອງທ່ຽວທາງທໍາມະຊາດແຫ່ງໃໝ່ ເມື່ອວ​ບໍ່​ດົນ​​ມານີ້.

      ນ້ຳຕົກຕາດໝາ​ໄນ ຖືເປັນອີກສະຖານທີ່ທ່ອງທ່ຽວທາງທໍາມະຊາດທີ່ສວຍງາມແຫ່ງໜຶ່ງຂອງເມືອງທ່າແຕງ ເນື່ອງຈາກວ່າ ຕາດດັ່ງກ່າວຍັງມີຄວາມອຸດົມສົມບູນແບບທຳມະຊາດເປັນຢ່າງດີ, ບໍ່ວ່າຈະເປັນພູຜາປ່າໄມ້, ຫ້ວຍນ້ຳລຳທານ ແລະ ໂງ່ນຫີນ ກໍຍັງມີສະພາບເດີມໂດຍບໍ່ໄດ້ມີການດັດສ້າງ ຫຼື ຕົບແຕ່ງແຕ່ຢ່າງໃດ ຍັງມີ​ຄວາມງົດງາມທີ່ເຕັມໄປດ້ວຍທຳມະຊາດ, ທີ່ກາຍເປັນມົນສະເໜ່ດຶງດູດຈິດໃຈຂອງຜູ້ປະກອບການລົງທຶນ, ພ້ອມ​ທີ່ຈະພັດທະນານ້ຳຕົກຕາດໝາ​ໄນແຫ່ງນີ້ ໃຫ້ເປັນແຫຼ່ງທ່ອງທ່ຽວ ໃນອະນາຄົດໃກ້ໆນີ້.

ທ່ານ ພູວົງ ກອງຊັບ ຫົວໜ້າຫ້ອງການຖະແຫຼງຂ່າວ, ວັດທະນະທຳ ແລະ ທ່ອງທ່ຽວເມືອງທ່າແຕງ ກ່າວໃນໂອກາດລົງສຳຫຼວດພື້ນທີ່ນ້ຳຕົກຕາດໝາ​ໄນ ຄັ້ງນີ້ວ່າ: ຄຳຄິດ, ຄຳເຫັນຂອງຂະແໜງການກ່ຽວຂ້ອງທີ່ໄດ້ແລກປ່ຽນກັນຢ່າງກົງໄປກົງມາ ແລະ ເປັນເອກະພາບກັນແລ້ວ ພ້ອມຈະນໍາສະເໜີຂັ້ນເທິງພິຈາລະນາຮັບຮອງເປັນແຫຼ່ງທ່ອງທ່ຽວ ແລະ ໃຫ້ຜູ້ປະກອບການລົງທຶນພັດທະນາຕາດດັ່ງກ່າວຕາມເຈດຈຳນົງ ແລະ ລະບຽບການທີ່ວາງໄວ້.

ຂ່າວ: ເຈີນ ແດນວົງວິຈິດ