ໜັງສືພິມ ປະຊາຊົນ

ແຂວງຈຳປາສັກ ມອບເງິນສົດ-ວັດຖຸປັດໃຈ, ເຄື່ອງອຸປະໂພກ-ບໍລິໂພກ ມູນຄ່າ 268.000.000 ກີບ ຊ່ວຍເຫລືອປະຊາຊົນ ທີ່ໄດ້ຮັບຜົນກະທົບ ຈາກໄພນໍ້າຖ້ວມ ຢູ່ ແຂວງສະຫວັນນະເຂດ.

ເຜີຍແຜ່ໂດຍ: ທ່ານ ສິດທິພອນ ຣາຊະພົນ ເວລາ: 27/10/2020 17:51:17 ຈຳນວນຢ້ຽມຊົມ 1181 ຄັ້ງ

ໃນວັນທີ 26 ຕຸລາ 2020 ທິ່ຫ້ອງວ່າການແຂວງສະຫວັນນະເຂດ, ຄະນະພັກ ອົງການປົກຄອງແຂວງຈໍາປາສັກ ໄດ້ນຳເອົາເງິນສົດ-ວັດຖຸປັດໃຈ, ເຄື່ອງອຸປະໂພກ-ບໍລິໂພກ ປະກອບມີ: ເງິນສົດ 120.000.000 ກີບ, ເຂົ້າສານໜຽວ ຈໍານວນ 5 ໂຕນ, ນໍ້າດື່ມກາໂລມາຄຳ ຈຳນວນ 5.000 ແພັກ, ເກີບ ແລະເຄື່ອງນຸ່ງຫົ່ມ ລວມມູນຄ່າ 268.000.000 ກີບ ໄດ້ນຳມາມອບໃຫ້ ຄະນະພັກ ອົງການປົກຄອງແຂວງສະຫວັນນະເຂດ ເພື່ອນໍາສົ່ງໄປຊ່ວຍເຫລືອປະຊາຊົນ ທີ່ໄດ້ຮັບຜົນກະທົບ ຈາກໄພນໍ້າຖ້ວມ ຢູ່ ແຂວງສະຫວັນນະເຂດ. ເປັນກຽດ ມອບໂດຍທ່ານ ວິໄລວົງ ບຸດດາຄຳ ເຈົ້າແຂວງໆຈຳປາສັກ ແລະເປັນກຽດ ກ່າວຮັບໂດຍທ່ານ ສັນຕິພາບ ພົມວິຫານ ເຈົ້າແຂວງໆສະຫວັນນະເຂດ, ມີຫົວໜ້າ ພະແນກແຮງງານ ສະຫວັດດີການ ແລະສັງຄົມແຂວງ, ພາກສ່ວນກ່ຽວຂ້ອງຂອງສອງແຂວງເຂົ້າຮ່ວມ.
ໂອກາດນີ້, ທ່ານ ວິໄລວົງ ບຸດດາຄຳ ເຈົ້າແຂວງໆຈຳປາສັກ ໄດ້ກ່າວວ່າ: ເພື່ອເປັນການ ແບ່ງເບົາ, ໃນນາມ ອົງຄະນະພັກ ອົງການປົກຄອງແຂວງຈຳປາສັກ ຂໍສະແດງຄວາມທຸກໂສກ ເສຍໃຈ ແລະເປັນການໃຫ້ກຳລັງໃຈຄະນະພັກ ອົງການປົກຄອງ ກໍ່ຄື ປະຊາຊົນຊາວ ແຂວງສະຫວັນນະເຂດ ທີ່ໄດ້ຖືກ ຜົນກະທົບ ຢ່າງເປັນວົງກວ້າງ ຈາກໄພນໍ້າຖ້ວມ ໃນປີ 2020 ພ້ອມນີ້, ແຂວງຈຳປາສັກກໍ່ພ້ອມທີ່ຈະໃຫ້ການຊ່ວຍເຫຼືອ ແຂວງສະຫວັນນະເຂດ ໃນການຟື້ນຟູ ພັດທະນາ ໃນຕໍ່ໜ້າ ແລະ ເຄື່ອງທີ່ນໍາມາຊ່ວຍເຫລືອທັງໝົດນີ້, ຕົ້ນຕໍແມ່ນ ຄະນະພັກ ອົງການປົກຄອງແຂວງ ກໍ່ຄືພາກລັດ ໄດ້ຮ່ວມແຮງຮ່ວມໃຈ ສົມທົບທຶນ ຈາກ ການລະດົມ ບໍລິຈາກນຳພາກສ່ວນ ນັກທຸລະກິດ ຜູ້ປະກອບການ ທີ່ຢູ່ນະຄອນຫຼວງວຽງຈັນ ແລະໃນແຂວງຈຳປາສັກ.
ຂ່າວ: ທັດຊະນະ ແສງດາລາ.