ໜັງສືພິມ ປະຊາຊົນ

ລັດຖະບານຄາດຄະເນເສດຖະກິດ ຈະຂະຫຍາຍຕົວ 3,3% ໃນປີນີ້

ເຜີຍແຜ່ໂດຍ: ທ່ານ ສິດທິພອນ ຣາຊະພົນ ເວລາ: 28/10/2020 09:13:18 ຈຳນວນຢ້ຽມຊົມ 1424 ຄັ້ງ

ລັດຖະບານຄາດຄະເນວ່າ ເສດຖະກິດຈະຂະຫຍາຍຕົວພຽງ 3,3% ຊຶ່ງຕ່ຳກວ່າແຜນດັດແກ້, ໃນຂະນະທີ່ແຜນພັດ ທະນາເສດຖະກິດ-ສັງຄົມ ປະ ຈຳປີ 2021 ແມ່ນເປັນການຜັນຂະຫຍາຍແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX ໂດຍຈະສຸມໃສ່ນຳພາປະເທດໃຫ້ຫຼຸດພົ້ນອອກຈາກປະເທດດ້ອຍພັດທະນາ; ປະຕິບັດເປົ້າໝາຍພັດທະນາແບບຍືນຍົງ; ຜັນຂະຫຍາຍຍຸດທະສາດ ການເຕີບໂຕສີຂຽວ; ຮັບປະກັນການພັດທະນາໄປຕາມທິດຍືນຍົງ; ຮັບປະກັນໃຫ້ເສດຖະກິດມະຫາພາກມີສະຖຽນລະພາບ ແລະ ສົມດຸນກວ່າເກົ່າ.
ທ່ານ ທອງລຸນ ສີສຸລິດ ນາຍົກລັດຖະມົນຕີ ໄດ້ລາຍງານການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານ ແລະ ແຜນເງິນຕາປະຈຳປີ 2020 ແລະ ທິດທາງແຜນການປະຈຳປີ 2021 ຕໍ່ກອງປະຊຸມສະໄໝສາມັນເທື່ອທີ 10 ຂອງສະພາແຫ່ງຊາດຊຸດທີ VIII ໃນວັນທີ 27 ຕຸລານີ້ ໃຫ້ຮູ້ວ່າ: ເສດຖະກິດຂອງ ສປປ ລາວໃນປີນີ້ ຄາດວ່າຈະຂະຫຍາຍຕົວພຽງແຕ່ 3,3% ມູນຄ່າຕາມລາຄາໃນ ປີ ປະມານ 173.138 ຕື້ກີບ, ໃນນີ້ຂະແໜງກະສິກໍາຂະ ຫຍາຍຕົວຕາມແຜນດັດແກ້ 2,3% ກວມເອົາ 16,6% ຂອງ GDP; ຂະແໜງອຸດສາຫະກໍາ ຂະຫຍາຍຕົວ 9,8% ກວມເອົາ 33% ຂອງ GDP (ແຜນດັດແກ້ ຂະຫຍາຍຕົວ 6,8%) ແລະ ຂະແໜງບໍລິການ -1,6% ກວມເອົາ 39,5% ຂອງ GDP (ແຜນດັດແກ້ ຂະຫຍາຍຕົວ 1,7%).
ໃນຂະນະທີ່ມູນຄ່າການ ນໍາເຂົ້າ-ສົ່ງອອກສິນຄ້າ ປະຕິ ບັດໄດ້ 75.267 ຕື້ກີບ ເທົ່າກັບ 67,79% ຂອງແຜນດັດແກ້, ທຽບໃສ່ໄລຍະດຽວກັນຂອງປີ ຜ່ານມາ ຫຼຸດລົງ 5,6%, ໃນນັ້ນ, ການສົ່ງອອກ ປະຕິບັດໄດ້ 4.278 ລ້ານໂດລາ ເທົ່າກັບ 70,84% ຂອງແຜນດັດແກ້ (6.039 ລ້ານໂດລາ), ການນໍາເຂົ້າປະຕິບັດໄດ້ 3.824 ລ້ານໂດລາ ເທົ່າກັບ 64,68% ຂອງແຜນດັດແກ້ (5.912 ລ້ານໂດລາ), ສາມາດເກີນດຸນ 454 ລ້ານໂດລາ (ແຜນການໃຫ້ເກີນ ດຸນ 127 ລ້ານໂດລາ). ຄາດວ່າໝົດປີ ມູນຄ່າການນໍາເຂົ້າ-ສົ່ງອອກ ຈະສາມາດປະຕິບັດໄດ້ບັນລຸແຜນດັດແກ້ 11.951 ລ້ານໂດລາ ຫຼື 111.024,79 ຕື້ກີບ.
ແນວໃດກໍຕາມ ຄວາມຫຍຸ້ງຍາກໃນການຄຸ້ມຄອງເສດ ຖະກິດມະຫາພາກ ທີ່ແກ່ຍາວມາຫຼາຍປີ, ບັນຫາໄພທໍາມະຊາດທີ່ເກີດຂຶ້ນຢ່າງຕໍ່ເນື່ອງ ແລະ ການແຜ່ລະບາດຂອງພະຍາດໂຄວິດ-19 ທີ່ສົ່ງຜົນກະທົບໂດຍກົງຢ່າງໜັກໜ່ວງ ຕໍ່ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຂອງພວກເຮົາ ເຮັດໃຫ້ຫຼາຍຄາດໝາຍ ຈະບໍ່ສາມາດບັນລຸໄດ້ຕາມແຜນທີ່ວາງໄວ້.
ສຳລັບແຜນພັດທະນາເສດຖະກິດ-ສັງຄົມປີ 2021 ທ່ານນາຍົກລັດຖະມົນຕີ ກ່າວວ່າ: ແຜນພັດທະນາເສດຖະກິດ-ສັງຄົມ ປະຈໍາປີ 2021 ແມ່ນເພື່ອຜັນຂະຫຍາຍແຜນ ພັດທະນາເສດຖະກິດ-ສັງຄົມ 5 ປີ ຄັ້ງທີ IX (2021-2025) ປະກອບມີ (1) ນໍາພາປະເທດ ຊາດໃຫ້ສາມາດບັນລຸເງື່ອນ ໄຂ ການຫຼຸດພົ້ນອອກຈາກສະຖາ ນະພາບຄວາມດ້ອຍພັດທະ ນາ(LDC),ປະຕິບັດເປົ້າ ໝາຍພັດທະນາແບບຍືນຍົງ (SDGs), ຜັນຂະຫຍາຍຍຸດທະ ສາດການເຕີບໂຕສີຂຽວ; (2) ຮັບປະກັນການພັດທະນາໄປຕາມທິດຍືນຍົງ, ສົມດຸນ ແລະ ສີຂຽວ; (3) ຮັບປະກັນໃຫ້ເສດຖະກິດມະຫາພາກມີສະຖຽນລະພາບ ແລະ ສົມດຸນກວ່າເກົ່າ.
ສຳລັບທິດທາງລວມ ມີດັ່ງນີ້:
1) ຮັບປະກັນໃຫ້ມີສະຖຽນລະພາບທາງດ້ານການເມືອງ, ຄວາມສະຫງົບ ແລະ ຄວາມເປັນລະບຽບຮຽບຮ້ອຍໃນສັງ ຄົມຢ່າງໜັກແໜ້ນ, ສ້າງສັງ ຄົມ ສາມັກຄີປອງດອງ, ປອດໄພ, ສີວິໄລ ແລະ ຍຸຕິທໍາ;
2) ປະຕິຮູບໂຄງສ້າງເສດຖະກິດ ເພື່ອຍູ້ເສດຖະກິດໃຫ້ສືບຕໍ່ຂະຫຍາຍຕົວ ດ້ວຍຄຸນນະພາບທີ່ດີຂຶ້ນ ດ້ວຍ ການປະຕິຮູບໂຄງສ້າງເສດຖະກິດໃຫ້ມີຄວາມສົມດຸນຕາມຂົງເຂດ, ຂະ ແໜງການ ແລະ ທ້ອງຖິ່ນ;
3) ພັດທະນາຊັບພະຍາ ກອນມະນຸດ ໃຫ້ມີຄຸນນະພາບດີຂຶ້ນຕື່ມ ເພື່ອເປັນປັດໄຈຊຸກຍູ້ການພັດທະນາເສດຖະກິດ-ສັງຄົມ, ພັດທະນາຊົນນະບົດ ແລະ ແກ້ໄຂຄວາມທຸກຍາກຂອງປະຊາຊົນໃຫ້ມີຄຸນນະພາບຊີວິດທີ່ດີຂຶ້ນ;
4) ຫັນເປັນອຸດສາຫະກໍາ ແລະ ທັນສະໄໝ ທີ່ຕິດພັນກັບອຸດສາຫະກໍາປຸງແຕ່ງ ແລະ ການຜະລິດເປັນສິນຄ້າ ໂດຍສະເພາະໃນຂະແໜງການ ແລະ ທ້ອງຖິ່ນ ທີ່ມີເງື່ອນໄຂຕິດພັນກັບການສົ່ງເສີມການຜະລິດ ແລະ ບໍລິການຕາມແລວທາງລົດໄຟລາວ-ຈີນ ໃນພື້ນທີ່ ທີ່ມີທ່າແຮງຜະລິດເພື່ອເປັນສິນຄ້າ, ປັບປຸງການເຊື່ອມໂຍງ ແລະ ເຊື່ອມຈອດກັບພາກພື້ນ ແລະ ສາກົນ;
5) ພັດທະນາເສດຖະກິດທີ່ສະອາດ ແລະ ເປັນມິດຕໍ່ສິ່ງແວດລ້ອມ, ປົກປັກຮັກສາ ແລະ ນໍາໃຊ້ ຊັບພະຍາກອນທໍາມະຊາດຢ່າງສົມເຫດສົມຜົນ, ຍືນຍົງ, ປະຢັດ ແລະ ມີປະສິດທິຜົນສູງສຸດ; ສົ່ງເສີມການຜະລິດອຸດສາຫະກໍາຂະໜາດນ້ອຍ ແລະ ຂະໜາດກາງ (SMEs), ສ້າງ ແລະ ຂະຫຍາຍຕົວແບບໃນການຜະລິດໃຫ້ຫຼາຍຂຶ້ນ ແລະ ກະກຽມຂະຫຍາຍກວ້າງອອກ;
6) ເອົາໃຈໃສ່ປະຕິຮູບລະບົບການບໍລິການຂອງລັດ ໃຫ້ມີຄວາມໂລ່ງລ່ຽນ, ກະທັດຮັດ, ວ່ອງໄວ, ໂປ່ງໃສ ໂດຍການຫັນເປັນທັນສະໄໝ ບົນຈິດໃຈຮັບໃຊ້ ແລະ ບໍລິການປະຊາ ຊົນຢ່າງແທ້ຈິງ;
7) ເພີ່ມທະວີການຮ່ວມມືກັບບັນດາປະເທດເພື່ອນມິດ ແລະ ຄູ່ຮ່ວມພັດທະນາ, ຕາມຫຼັກການຕ່າງຝ່າຍຕ່າງໄດ້ຮັບຜົນປະໂຫຍດ, ເປັນເຈົ້າການເຂົ້າຮ່ວມຂະບວນການເຊື່ອມໂຍງ ແລະ ເຊື່ອມຈອດກັບພາກພື້ນ ແລະ ສາກົນ;
8) ສືບຕໍ່ພັດທະນາຊົນນະບົດ ແລະ ແກ້ໄຂຄວາມທຸກຍາກຕິດພັນກັບວຽກງານສ້າງ ແຂວງເປັນຫົວໜ່ວຍຍຸດທະ ສາດ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະ ສ້າງບ້ານເປັນຫົວໜ່ວຍພັດທະນາ (3 ສ້າງ) ຢ່າງແຂງແຮງ ແລະ ເຂົ້າສູ່ລວງເລິກຕື່ມອີກ;
9) ສ້າງສະຕິສັງຄົມ, ສັງ ຄົມໃຫ້ຫັນປ່ຽນການດໍາລົງຊີວິດປະຈໍາວັນ, ການທໍາມາຫາກິນ ດ້ວຍວິຖີໃໝ່ແບບປົກ ກະຕິ (New Normal) ເຖິງແມ່ນວ່າ ສະພາບການລະບາດຂອງພະຍາດໂຄວິດ-19 ຢູ່ລາວ ຍັງຢູ່ໃນໄລຍະຫຼໍ່ແຫຼມຢູ່ ຫຼື ພາຍຫຼັງໄດ້ມີການຄວບຄຸມໄດ້ແລ້ວນັ້ນ, ຢາກໃຫ້ສັງຄົມຂອງປະເທດເຮົາ ຫັນໄປສູ່ອັນ ໃໝ່ທີ່ກ້າວໜ້າ ທັນສະໄໝ ແລະ ມີລະບຽບວິໄນດີຂຶ້ນກວ່າເກົ່າ.
(ຂ່າວ: ຄຳເຮືອງ, ພາບ: ສຸກສະຫວັນ)