ຫົວ​ຂໍ້ : ເມືອງແກ່ນທ້າວ ກະກຽມກອງປະຊຸມຖອດຖອນບົດຮຽນ ການຈັດລະບຽບສັງຄົມ

ເຜີຍ​ແຜ່​ໂດຍ​: admin ເວ​ລາ: 27/12/2019 16:07:13 ຈຳ​ນວນ​ຜູ້​ເຂົ້າ​ຢ້ຽມ​ຊົມ 367 ຄັ້ງ

 ກອງປະຊຸມປຶກສາຫາລືເພື່ອກະກຽມໃຫ້ແກ່ກອງປະຊຸມຖອດຖອນບົດຮຽນການຈັດລະ ບຽບສັງຄົມ ທີ່ເມືອງແກ່ນທ້າວ ແຂວງໄຊຍະບູລີ ຊຶ່ງຈະໄດ້ຈັດຂຶ້ນໃນລະຫວ່າງວັນທີ 4 - 5 ພະຈິກ 2019 ທີ່ຈະມາເຖິງ ໄດ້ຈັດຂຶ້ນໃນວັນທີ 28 ຕຸລາຜ່ານມາທີ່ຫ້ອງປະຊຸມກອງບັນຊາການ ປກສ ແຂວງ ໂດຍໃຫ້ກຽດເຂົ້າຮ່ວມເປັນປະທານຂອງທ່ານ ພົງສະຫວັນ ສິດທະວົງ ເຈົ້າແຂວງໄຊຍະບູລີ ປະທານ ປກຊ - ປກສ ແຂວງ, ທ່ານ ພັອ ຄໍາແພງ ເພັດ ຫົວໜ້າກອງບັນຊາການ ປກສ ແຂວງ, ມີຄະນະພັກ - ຄະນະບັນຊາ ກອງບັນຊາການ ປກສ ແຂວງ, ພະແນກການທີ່ກ່ຽວຂ້ອງເຂົ້າຮ່ວມ. ທ່ານ ອໍາຄາ ລັດສະໝີ ວ່າການເຈົ້າເມືອງໆແກ່ນທ້າວ ໄດ້ຂຶ້ນຜ່ານແຜນການຈັດຕັ້ງ ປະຕິບັດໂຄງການຈັດລະບຽບສັງຄົມທີ່ຈະນໍາໄປລາຍງານຕໍ່ກອງປະຊຸມ ຊຶ່ງມີ 4 ໜ້າວຽກ ໃຫຍ່ຄື: ການຄຸ້ມຄອງພົນລະເມືອງ, ຄຸ້ມຄອງຄົນຕ່າງປະເທດ; ການຈັດສັນທີ່ດິນທໍາການຜະລິດ, ດິນທີ່ຢູ່ອາໄສ; ການຄຸ້ມຄອງປ່າໄມ້ ແລະ ທຸລະກິດໄມ້ ຕິດພັນກັບຄໍາສັ່ງເລກທີ 15/ນຍ ແລະ ການແກ້ໄຂປະກົດຫຍໍ້ທໍ້ທີ່ເກີດຂຶ້ນໃນສັງຄົມ, ຈຸດປະສົງເພື່ອແນໃສ່ເຮັດໃຫ້ການຈັດຕັ້ງປະຕິບັດເນື້ອໃນຄາດໝາຍ ມະຕິກອງປະຊຸມໃຫຍ່ ຄັ້ງທີ X ຂອງພັກ, ມະຕິກອງປະຊຸມໃຫຍ່ຄັ້ງທີ VI ຂອງອົງຄະນະພັກແຂວງ, ອົງຄະນະພັກເມືອງແກ່ນທ້າວ ແລະ ການຈັດຕັ້ງຜັນຂະຫຍາຍບັນດາມະຕິຄໍາສັ່ງ, ຂໍ້ກໍານົດຕ່າງໆໃຫ້ປະກົດຜົນເປັນຈິງ ຮັບປະກັນໃຫ້ເມືອງແກ່ນທ້າວ ມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍທາງດ້ານວັດທະນະທໍາ - ສັງ ຄົມ, ມີສະຖຽນລະພາບດ້ານການເມືອງ ທັງເປັນການປັບປຸງບູລະນະ ກົງຈັກການຈັດຕັ້ງຂັ້ນຕ່າງໆ ໃຫ້ມີຄວາມໜັກແໜ້ນ ເພີ່ມທະວີຄວາມສາມັກຄີເປັນເອກະພາບ, ຄວາມສາມັກຄີປອງດອງເປັນປຶກແຜ່ນຂອງປະຊາຊົນບັນດາເຜົ່າ, ເດັດດ່ຽວຕ້ານ - ສະກັດກັ້ນ, ທັບມ້າງທຸກກົນອຸບາຍຫັນປ່ຽນໂດຍສັນຕິຂອງສັດຕູ, ຄົນບໍ່ດີ ແລະ ແກ້ໄຂໜໍ່ແໜງທຸກປະກົດການຫຍໍ້ທໍ້ຕ່າງໆໃນສັງຄົມ ພ້ອມນີ້ກອງປະຊຸມຍັງໄດ້ຄົ້ນຄວ້າ ປະກອບຄໍາຄິດ, ຄໍາເຫັນຢ່າງກົງ ໄປກົງມາ ເພື່ອເປັນການຖອດຖອນບົດຮຽນຊຶ່ງກັນ ແລະ ກັນ. (ຂ່າວ: ສາຄອນ ໄຊສົມຮັກສາ)

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110