ໜັງສືພິມ ປະຊາຊົນ

ກອງປະຊຸມໃຫຍ່ຄະນະພັກນະຄອນຫຼວງວຽງຈັນຄັ້ງທີ VII ເປິດຂຶ້ນຢ່າງເປັນທາງການ

ເຜີຍແຜ່ໂດຍ: ທ່ານ ສິດທິພອນ ຣາຊະພົນ ເວລາ: 28/10/2020 16:54:40 ຈຳນວນຢ້ຽມຊົມ 2042 ຄັ້ງ

ກອງປະຊຸມໃຫຍ່ຜູ້ແທນອົງຄະນະພັກນະຄອນຫຼວງວຽງຈັນ ຄັ້ງທີ VII ໄດ້ເປີດຂຶ້ນຢ່າງເປັນທາງການໃນວັນທີ 28 ຕຸລານີ້ ທີ່ນະຄອນຫຼວງວຽງຈັນ ພາຍໃຕ້ການເປັນປະທານຂອງ ສະຫາຍ ສິນລະວົງ ຄຸດໄພທູນ ກຳມະການກົມການ ເມືອງສູນກາງພັກ ເລຂາຄະນະພັກ ເຈົ້າຄອງນະຄອນຫຼວງວຽງຈັນ ໂດຍການໃຫ້ກຽດເຂົ້າຮ່ວມຂອງສະຫາຍ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານງານສູນກາງພັກ ປະທານປະເທດ, ມີບັນດາສະ ຫາຍຜູ້ແທນສົມບູນ ຊຶ່ງເປັນຕົວແທນໃຫ້ສະມາຊິກພັກທົ່ວນະຄອນຫຼວງວຽງຈັນເຂົ້າຮ່ວມ.
ໃນພິທີ ສະຫາຍ ສິນລະວົງ ຄຸດໄພທູນ ໄດ້ກ່າວບາງຕອນສຳຄັນໃຫ້ຮູ້ວ່າ: ຄະນະບໍລິ ຫານງານພັກ ສະໄໝທີ VI ໄດ້ເປັນເຈົ້າການກະກຽມເນື້ອໃນ, ບຸກຄະລາກອນ, ທັງສ້າງຂະ ບວນການດ້ານຕ່າງໆຕາມລະ ບຽບຂອງພັກ ແລະ ຄຳສັ່ງຂອງ ຄະນະເລຂາທິການສູນກາງພັກ ມາເກືອບ 2 ປີ, ພວກເຮົາໄດ້ດຳເນີນການປັບປຸງປົວແປງພັກ, ເປີດບັ້ນດຳເນີນຊີວິດການ ເມືອງ, ສຳເລັດການດຳເນີນກອງປະຊຸມໃຫຍ່ໜ່ວຍພັກ ຮາກຖານບ້ານ, ໜ່ວຍພັກຮາກຖານ, ຄະນະພັກຮາກຖານຫ້ອງການອ້ອມຂ້າງເມືອງ, ກອງປະຊຸມໃຫຍ່ອົງຄະນະພັກເມືອງ, ກອງບັນຊາການ, ໜ່ວຍພັກຮາກ ຖານ, ຄະນະພັກຮາກຖານ, ພະແນກການ-ອົງການທຽບເທົ່າອ້ອມຂ້າງນະຄອນຫຼວງວຽງຈັນ, ຕິດພັນກັບການເສີມຂະຫຍາຍປະຊາທິປະໄຕພາຍໃນພັກ ແລະ ທົ່ວສັງຄົມເຂົ້າໃນການຄົ້ນຄວ້າປະກອບຄຳເຫັນຕໍ່ເນື້ອໃນຮ່າງລາຍງານການເມືອງ ແລະ ການທາບທາມບຸກຄະລາກອນຂອງກອງປະຊຸມໃຫຍ່, ຂະບວນການດັ່ງກ່າວເປັນການສ້າງບັນຍາກາດທາງການເມືອງອັນດີໃຫ້ອົງຄະນະພັກ, ທັງຮັບ ປະກັນໃຫ້ນະຄອນຫຼວງວຽງຈັນມີສະຖຽນລະພາບທາງການເມືອງ, ມີຄວາມສະຫງົບ ແລະ ເປັນລະບຽບຮຽບຮ້ອຍທາງສັງຄົມໂດຍພື້ນຖານ, ເສດ ຖະກິດເຖິງວ່າຈະພົບຄວາມຫຍຸ້ງຍາກແຕ່ກໍຍັງສືບຕໍ່ຂະ ຫຍາຍຕົວຢ່າງຕໍ່ເນື່ອງ, ການພັດທະນາຕົວເມືອງ ແລະ ຊານເມືອງໄດ້ມີບາດກ້າວຫັນ ປ່ຽນຢ່າງຕັ້ງໜ້າ, ລະບົບການ ເມືອງປະຊາທິປະໄຕປະຊາຊົນ ແຕ່ນະຄອນຫຼວງວຽງຈັນລົງ ຮອດຮາກຖານໄດ້ຮັບການປັບ ປຸງໃຫ້ມີຄວາມໜັກແໜ້ນຂຶ້ນຕື່ມ.
ກອງປະຊຸມໃຫຍ່ ຄັ້ງທີ VII ນີ້ແມ່ນມີຄວາມໝາຍສຳຄັນ ຊຶ່ງພວກເຮົາຈະໄດ້ສຸມໃສ່ຕີລາຄາຜົນການຈັດຕັ້ງປະ ຕິບັດມະຕິກອງປະຊຸມໃຫຍ່ຄັ້ງທີ VI ຂອງອົງຄະນະພັກ ແລະ ແຜນພັດທະນາ ເສດຖະກິດ-ສັງຄົມ 5 ປີຄັ້ງທີ VIII ຂອງນະຄອນຫຼວງວຽງຈັນ, ພ້ອມທັງຖອດຖອນບົດຮຽນຈາກ ພຶດຕິກຳຕົວຈິງ, ພວກເຮົາຈະໄດ້ຄົ້ນຄວ້າກຳນົດທິດທາງ, ໜ້າທີ່ ແລະ ຄາດໝາຍໃຫຍ່ໃນການ ພັດທະນານະຄອນຫຼວງວຽງຈັນກໍຄືແຜນພັດທະນາເສດຖະກິດ-ສັງຄົມ 5 ປີຄັ້ງທີ IX (2021-2025), ພ້ອມດຽວກັນນັ້ນຜູ້ແທນສົມບູນກອງປະຊຸມໃຫຍ່ຈະໄດ້ໃຊ້ສິດປະຊາທິປະໄຕຂອງຕົນປ່ອນບັດເລືອກຕັ້ງເອົາຄະນະບໍລິຫານງານພັກນະຄອນຫຼວງວຽງຈັນ ສະໄໝທີ VII ແລະ ປ່ອນບັດເອົາຜູ້ແທນໄປຮ່ວມກອງປະຊຸມໃຫຍ່ ຄັ້ງທີ XI ຂອງພັກ.
(ຂ່າວ-ພາບ : ສຸກສາຄອນ)