ຫົວ​ຂໍ້ : ອັດຕະປື ເຜີຍແຜ່ຜົນສຳເລັດກອງປະຊຸມເຂດສາມຫຼ່ຽມພັດທະນາ ກຳປູເຈຍ - ລາວ - ຫວຽດນາມ

ເຜີຍ​ແຜ່​ໂດຍ​: admin ເວ​ລາ: 27/12/2019 16:07:49 ຈຳ​ນວນ​ຜູ້​ເຂົ້າ​ຢ້ຽມ​ຊົມ 400 ຄັ້ງ

 ພະແນກແຜນການ ແລະ ການລົງທຶນ ຮ່ວມກັບອຳນາດການປົກຄອງແຂວງ ອັດຕະປື ໄດ້ຈັດກອງປະຊຸມເຜີຍແຜ່ຜົນສຳເລັດກອງປະຊຸມຄະນະກຳມະການປະສານງານຮ່ວມ ເຂດສາມ ຫຼ່ຽມພັດທະນາກຳປູເຈຍ-ລາວ- ຫວຽດນາມ (CLV) ຄັ້ງທີ 12 ຂຶ້ນ ໃນວັນທີ 29 ຕຸລາ ຜ່ານມາ ໂດຍການເປັນປະທານຂອງທ່ານ ສຸກສະໄໝ ຈັນທະມາດ ຮອງເຈົ້າແຂວງ ປະທານຄະນະອະນຸກຳມະການເຂດສາມຫຼ່ຽມພັດທະນາ, ທ່ານ ສຸລິຈັນ ພອນແກ້ ຫົວໜ້າພະແນກແຜນການ ແລະ ການລົງ ທຶນ, ມີບັນດາຂະແໜງການທີ່ກ່ຽວຂ້ອງເຂົ້າຮ່ວມ. ກອງປະຊຸມຄັ້ງນີ້ ແມ່ນເພື່ອເຜີຍແຜ່, ປຶກສາຫາລື ແລະ ແລກປ່ຽນຄວາມຄິດຄວາມເຫັນກ່ຽວກັບການຜັນຂະຫຍາຍຜົນ ຂອງກອງປະຊຸມຄະນະກຳມະການປະສານງານຮ່ວມ ເຂດສາມຫຼ່ຽມພັດທະນາກຳປູເຈຍ-ລາວ- ຫວຽດນາມ (CLV) ທີ່ຖືກຮັບຮອງເອົາແລ້ວເປັນຕົ້ນ ຖະແຫຼງການຮ່ວມຂອງກອງປະຊຸມສຸດຍອດ ກຳປູເຈຍ-ລາວ- ຫວຽດນາມ CLV, ແຜນປະຕິບັດງານວ່າດ້ວຍການເຊື່ອມຈອດເສດຖະກິດ CLV ເຖິງປີ 2030 ລວມທັງສັນຍາວ່າດ້ວຍການສົ່ງເສີມ ແລະ ອໍານວຍຄວາມສະດວກທາງດ້ານການຄ້າຢູ່ເຂດສາມຫຼ່ຽມພັດທະນາກໍາປູເຈຍ-ລາວ-ຫວຽດນາມ(CLV DTA) ທີ່ໄດ້ຮັບການລົງນາມລະຫວ່າງລັດຖະບານຂອງ 3 ປະເທດ ເພື່ອຊຸກຍູ້ການພັດທະນາເສດຖະກິດ-ສັງຄົມຢູ່ໃນ 4 ແຂວງພາກໃຕ້ ສປປ ລາວ ຄື: ອັດຕະປື, ເຊກອງ, ສາລະວັນ ແລະ ແຂວງຈຳປາສັກໃຫ້ມີການຊຸກຍູ້ການເຊື່ອມໂຍງເສດຖະກິດກັບພາກພື້ນ ແລະ ສາກົນຂຶ້ນເທື່ອລະກ້າວ, ນອກຈາກນີ້ ກອງປະຊຸມ ຍັງໄດ້ປຶກສາຫາລື ແລະ ແລກ ປ່ຽນຄວາມຄິດເຫັນກ່ຽວກັບການກະກຽມ ຄວາມພ້ອມໃນດ້ານຕ່າງໆ ໃນເຂດສາມຫຼ່ຽມພັດທະນາ ກໍາປູເຈຍ-ລາວ- ຫວຽດນາມ ເປັນຕົ້ນແຜນວຽກ ທີ່ສໍາຄັນຕ່າງໆ ແຕ່ປີ 2020- 2030 ພ້ອມດຽວກັນນີ້, ບັນດາຜູ້ເຂົ້າຮ່ວມໄດ້ຮັບຟັງການລາຍງານຄວາມຄືບໜ້າຂອງການຈັດຕັ້ງປະຕິບັດວຽກງານໃນກົນໄກການຮ່ວມມື CLV ຈາກ 4 ແຂວງພາກໃຕ້ ໃນໄລ ຍະຜ່ານມາລວມມີຜົນໄດ້ຮັບ, ຂໍ້ຄົງຄ້າງ, ຂໍ້ສະເໜີ ແລະ ທິດທາງແກ້ໄຂວຽກງານໃນຕໍ່ໜ້າອີກດ້ວຍ. (ໂດຍ: ມາລາທິບ)

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110