ທ່ານ ປອ ບົວຄົງ ນາມມະວົງ ກຳມະການສຳຮອງສູນກາງພັກ ເລຂາ ພັກແຂວງ ເຈົ້າແຂວງບໍ່ແກ້ວ. ພ້ອມຄະນະໄດ້ລົງຊຸກຍູ້ຕິດຕາມກວດກາ, ຄວາມຄືບໜ້າ ການຈັດຕັ້ງປະຕິບັດ ບັນດາໜ້າວຽກຂອງໂຄງການພັດທະນາຕົວເມືອງ ຕາມແລວທາງອະນຸພາກພື້ນແມ່ນ້ຳຂອງ 2.ADB ໃນວັນທີ 30 ຕຸລາ 2020 ຜ່ານມາ. ທ່ານ ເພັດນະຄອນ ວົງລໍຄໍາ ຫົວໜ້າ ຫ້ອງການຈັດຕັ້ງປະຕິບັດໂຄງການ. ໄດ້ລາຍງານວ່າ: ໂຄງການສວນສາທາລະນະໜອງຖານ, ແມ່ນໂຄງການໜຶ່ງ ທີ່ມີຄວາມສຳຄັນ ໃນການພັດທະນາແຂວງບໍ່ແກ້ວ. ມີເນື້ອທີ່ 39 ເຮັກຕາ, ມູນຄ່າ 2.100.000 ກວ່າໂດລາ ຊຶ່ງບໍລິສັດຄຳຟອງກຣຸບເປັນຜູ້ຮັບເໝົ່າ ໄດ້ແບ່ງອອກເປັນສອງສັນຍາ, ສັນຍາທີໜຶ່ງ ແມ່ນໄດ້ດຳເນີນການກໍ່ສ້າງມາແຕ່ຕົ້ນເດືອນ ກຸມພາ ມາຮອດປະຈຸບັນມີຄວາມຄືບໜ້າໄປແລ້ວ 15% .
ໃນໂອກາດດັ່ງກ່າວ ທ່ານ ເຈົ້າແຂວງໄດ້ກ່າວວ່າ: ການລົງມາຕິດຕາມຊຸກຍູ້ ການຈັດຕັ້ງປະຕິບັດໂຄງການພັດທະນາສວນສາທາລະນະແຫຼ່ງທ່ອງທ່ຽວໜອງຖານ ຊຶ່ງເປັນໂຄງການໜຶ່ງທີ່ສຳຄັນໃນການຈັດຕັ້ງປະຕິບັດ ແຜນຍຸດທະສາດພັດທະນາແຂວງບໍ່ແກ້ວ ໂດຍເລັ່ງໃສ່ສ້າງແຂວງບໍ່ແກ້ວ ໃຫ້ເປັນແຂວງບໍລິການດ້ານການທ່ອງທ່ຽວ ໃຫ້ມີຄຸນນະພາບ ເຊື່ອມຕໍ່ບັນດາແຂວງພາກເໜືອຂອງລາວ ກັບ ບັນດາປະເທດໃກ້ຄຽງໂດຍສະເພາະແມ່ນແຂວງພາກເໜືອຂອງໄທ ຊຶ່ງໂຄງການດັ່ງກ່າວນີ້ ໄດ້ເລີມຈັດຕັ້ງປະຕິບັດມາແຕ່ປີຜ່ານມາ ໂດຍໄດ້ຮັບການສະໜັບສະໜູນຈາກໂຄງການ ADB. ສະນັ້ນ, ຂໍຮຽກຮ້ອງໃຫ້ບັນດາພະແນກການທີ່ກ່ຽວຂ້ອງ ແລະ ພໍ່ແມ່ປະຊາຊົນ ຈົ່ງເປັນເຈົ້າການອຳນວຍຄວາມສະດວກ ແລະ ຮ່ວມມືພ້ອມກັນພັດທະນາເຮັດໃຫ້ແຫຼ່ງທ່ອງທ່ຽວແຫ່ງນີ້ສຳເລັດດ້ວຍໄວ. ຈາກນັ້ນ, ທ່ານ ເຈົ້າແຂວງໄດ້ສືບຕໍ່ໄປກວດກາການບູລະນະທາສີຄືນໃໝ່ຂອງຫໍຫຼັກເມືອງໃຫ້ມີຄວາມສະງ່າລາສີສວຍງາມ ເປັນຫຼັກບ້ານຫຼັກເມືອງທີ່ເປັນສະຖານທີ່ກາບໄຫວ້ ແລະ ສັກກະລະບູຊາ ຂອງປະຊາຊົນລາວບັນດາເຜົ່າໂດຍສະເພາະປະຊາຊົນແຂວງບໍ່ແກ້ວ ໃຫ້ມີລາສີໂດດເດັ່ນກວ່າເກົ່າ. ໂດຍໄດ້ຮັບການ ອຸປະຖຳ ຈາກ ທ່ານ ນາງ ບຸນຖະໜອມ ນາມມະວົງ ຄອບຄົວຂອງທ່ານເຈົ້າແຂວງບໍ່ແກ້ວ. ໃນມູນຄ່າ 20 ລ້ານກີບ.

ພາບ-ຂ່າວ: ຄຳພັນ ແກ້ວມະນີ