ທ່ານ ນາງ ປານີ ຢາທໍ່ຕູ້ ລົງຢ້ຽມຢາມ ພ້ອມມອບເຄື່ອງຊ່ວຍເຫຼືອໃຫ້ຜູ້ປະສົບໄພນໍ້າຖ້ວມ ທີ່ເມືອງຊົນນະບູລີ

ວັນທີ 31 ຕຸລາ 2020 ຜ່ານມາ, ທ່ານນາງ ປານີ ຢາທໍ່ຕູ້ ກຳມະການກົມການເມືອງສູນກາງພັກ ປະທານສະພາແຫ່ງຊາດ ພ້ອມດ້ວຍທ່ານ ສັນຕິພາບ ພົມວິຫານ ກຳມະການສູນກາງພັກ ເຈົ້າແຂວງສະຫວັນນະເຂດ ໄດ້ລົງຢ້ຽມຢາມ ແລະ ມອບເຄື່ອງຊ່ວຍໃຫ້ກັບປະຊາຊົນ ທີ່ປະສົບໄພນໍ້າຖ້ວມ ທີ່ບ້ານກອງປະທຸມວັນ ເມືອງຊົນນະບູລີ ໂດຍໄດ້ຮັບການຕ້ອນຮັບຈາກການນໍາຂັ້ນແຂວງ ແລະເມືອງ ທີ່ເດີ່ນກິລາຂອງເມືອງ.
ໂອກາດນີ້, ກໍ່ໄດ້ຮັບຟັງການລາຍງານສະພາບນໍ້າຖ້ວມຈາກ ທ່ານ ສຸວິໄລ ຫຼວງຊາລາດ ເຈົ້າເມືອງຊົນນະບູລີ ຊຶ່ງໃຫ້ຮູ້ວ່າ: ໃນທົ່ວເມືອງຊົນນະບູລີ ໄດ້ເລີ່ມປະສົບກັບໄພນໍ້າຖ້ວມເລີ່ມແຕ່ວັນທີ 12-26 ຕຸລາ 2020 ມີບ້ານທີ່ໄດ້ຮັບຜົນກະທົບຈາກໄພນໍ້າຖ້ວມທັງໝົດ 45 ບ້ານ, ມີ 4.436 ຫຼັງຄາເຮືອນ, ພົນລະເມືອງ 30.395 ຄົນ, ຍິງ 15.146 ຄົນ, ເນື້ອທີ່ຖືກຖ້ວມ 7.288 ເຮັກຕາ, ສວນພືດຜັກຖືກຖ້ວມ 176 ເຮັກຕາ, ໜອງປາ 369 ໜອງ, ລະບົບຊົນລະປະທານ 9 ແຫ່ງ, ປະຕູນໍ້າ 3 ແຫ່ງ, ນໍ້າສ້າງຕື້ນ 141 ບໍ່, ນໍ້າບາດານ 261 ບໍ່, ວິດຖ່າຍ 1.228 ໜ່ວຍ, ກ໋ອກນໍ້າປະປາຊຸມຊົນ 864 ກ໋ອກ, ສັດລ້ຽງຕາຍ ມີ ງົວ 3 ໂຕ, ໝູ 11 ໂຕ ແລະ ສັດປີກ 113 ໂຕ, ນອກນີ້ກໍ່ຍັງມີບ້ານທີ່ຖືກນໍ້າຖ້ວມບ້ານມີທັງໝົດ 15 ບ້ານຄື: ບ້ານດົງນາງາມ, ບ້ານດອນຍາໂນງ, ບ້ານທ່າຄໍາເຫຼື້ອມ, ບ້ານກອງປະທຸມວັນ, ບ້ານຊຽງຮົ່ມ, ບ້ານບຶງຊ້າງ, ບ້ານໂຄກຫົວຊ້າງ, ບ້ານດົງຫວາຍ, ບ້ານຕຸ່ມແຍ, ບ້ານນາໜອງຜໍາ, ບ້ານບຶງຮົ່ມ, ບ້ານວັງໂຄນຄໍາ, ບ້ານເມືອງໂຮງ, ບ້ານໂນນຍາງ ແລະ ບ້ານນາໂພນທອງມີ 3.114 ຫຼັງຄາ, ມີ 4.366 ຄອບຄົວ, ພົນລະເມືອງ 21.255 ຄົນ ຍິງ 10,642 ຄົນ, ເນື້ອທີ່ຖືກຖ້ວມ 4.041 ເຮັກຕາ, ໂຮງຮຽນທີ່ໄດ້ຮັບຜົນກະທົບ ແລະ ຕ້ອງໂຈະການຮຽນຊົ່ວຄາວມີ 27 ແຫ່ງ, ເສັ້ນທາງຖືກຖ້ວມ ແລະ ຕັດຂາດການສັນຈອນມີ 12 ເສັ້ນ, ມີຄວາມຍາວ 110 ກິໂລແມັດ, ບ້ານທີ່ຕ້ອງຢຸດສົ່ງກະແສໄຟຟ້າຊົ່ວຄາວ ເພື່ອຄວາມປອດໄພ ມີ 27 ບ້ານ. ຕໍ່ກັບສະພາບຄືດັ່ງກ່າວ, ທາງການນໍາຂອງເມືອງ ພ້ອມດ້ວຍຄະນະຕ້ານໄພພິບັດຂັ້ນເມືອງ, ອົງການຈັດຕັ້ງມະຫາຊົນ, ກໍາລັງ ປກຊ-ປກສ, ແພດໝໍ ໄດ້ສົມທົບກັບກໍາລັງກອງຮ້ອຍ ຄໍ 35 ໄດ້ລົງຊ່ວຍເຫຼືອປະຊາຊົນ ໃນການເຄື່ອນຍ້າຍປະຊາຊົນເຂົ້າສູນພັກຊົ່ວຄາວ, ຂົນເຂົ້າ, ກ່ຽວເຂົ້າ ແລະ ນຳເອົາວັດຖຸເຄື່ອງຂອງຕ່າງໆອອກຈາກພື້ນທີ່ສ່ຽງໄພ ພ້ອມທັງນໍາເອົາເຄື່ອງຊ່ວຍເຫຼືອລົງແຈກຢາຍໃຫ້ກັບປະຊາຊົນ ທີ່ໄດ້ຮັບຜົນກະທົບ ເພື່ອບັນເທົາທຸກໃນຂັ້ນເບື້ອງຕົ້ນ. ຊຶ່ງເຄື່ອງຊ່ວຍເຫຼືອດັ່ງກ່າວນັ້ນ ແມ່ນໄດ້ຈາກການນໍາຂັ້ັ້ນສູນກາງ, ການນໍາແຂວງ ແລະ ເມືອງອ້ອມຂ້າງ, ພາກສ່ວນບໍລິສັດ, ນັກທຸລະກິດ, ສາມະຄົມ, ພຣະສົງສໍາມະເນນ, ສະມາຄົມກິລາກ໊ອບ ແລະ ອີກຫຼາຍໆພາກສ່ວນ. ມາຮອດປັດຈຸບັນນີ້, ລະດັບນໍ້າແມ່ນຢູ່ໃນສະພາບປົກກະຕິແລ້ວ ແລະ ປະຊາຊົນ ກໍ່ໄດ້ກັບຄືນສູ່ບ້ານເຮືອນຂອງໃຜລາວແລ້ວ.
ຫຼັງຈາກນັ້ນ, ທ່ານ ນາງ ປານີ ຢາທໍ່ຕູ້ ກໍ່ໄດ້ສະແດງຄວາມເປັນຫ່ວງເປັນໃຍພໍ່ແມ່ປະຊາຊົນທີ່ໄດ້ຮັບຜົນກະທົບ ພ້ອມທັງໃຫ້ທິດຊີ້ນໍາໃນການແກ້ໄຂ ແລະ ຟື້ນຟູຫຼັງນໍ້າຖ້ວມ ໂດຍສະເພາະການກະກຽມແນວພັນເຂົ້າ ເພື່ອສະໜອງໃຫ້ປະຊາຊົນ ໂດຍເນັ້ນໃຫ້ບ້ານທີ່ມີທ່າແຮງເຮັດນາແຊງ ເພື່ອທົດແທນເຂົ້ານາປີທີ່ຖືກເສຍຫາຍຈາກໄພນໍ້າຖ້ວມ, ສໍາລັບບັນຫານ້ໍາດື່ມ ແລະ ບັນຫາສຸຂະພາບຂອງປະຊາຊົນ ແມ່ນຕ້ອງໄດ້ເລັ່ງແກ້ໄຂຢ່າງຮີບດ່ວນເຊັ່ນດ່ຽວກັນ. ໃນໂອກາດດັ່ງກ່າວນີ້ ທ່ານນາງ ປານີ ຢາທໍ່ຕູ້ ພ້ອມດ້ວຍທ່ານ ສັນຕິພາບ ພົມວິຫານ ກໍໄດ້ມອບເຄື່ອງຊ່ວຍເຫຼືອໃຫ້ກັບພໍ່ແມ່ປະຊາຊົນ ຊຶ່ງເຄື່ອງທີ່ນໍາມາມອບໃນຄັ້ງນີ້ມີທັງເຂົ້າສານອາຫານແຫ້ງ ທີ່ໄດ້ຈາກການຊ່ວຍເຫຼືອຂອງທະນາຄານຮ່ວມມືທຸລະກິດລາວ-ຫວຽດນາມ ມູນຄ່າ 100 ລ້ານກີບ ແລະ ບໍລິສັດເອັນທີພີການຄ້ານໍ້າມັນເຊື້ອໄຟມະຫາຊົນ ມູນຄ່າ 100 ລ້ານກີບ.

ໂດຍ: ຂ່າວສະຫວັນ