ໜັງສືພິມ ປະຊາຊົນ

ຮັກສາການເຈົ້າແຂວງຄຳມ່ວນ ໂອ້ລົມພະນັກງານຫຼັກແຫຼ່ງເມືອງທ່າແຂກ

ເຜີຍແຜ່ໂດຍ: ທ່ານ ຈັນທະໄມຕຣີ ເທບສີເມືອງ ເວລາ: 10/11/2020 10:30:54 ຈຳນວນຢ້ຽມຊົມ 3390 ຄັ້ງ

ເມື່ອບໍ່ດົນມານີ້ ທ່ານ ວັນໄຊ ຟອງສະຫວັນ ຮັກສາການເຈົ້າແຂວງຄຳມ່ວນ ໄດ້ລົງພົບປະ ແລະ ໂອ້ລົມພະນັກງານການນຳໃນທົ່ວເມືອງທ່າແຂກ ໂດຍມີທ່ານ ແກ້ວລັນດອນ ຈັນທະປານີ ເຈົ້າເມືອງທ່າແຂກ ພ້ອມດ້ວຍການນຳຂັ້ນຕ່າງໆ ແລະ ບັນດານາຍບ້ານໃນທົ່ວເມືອງທ່າແຂກເຂົ້າຮ່ວມ.

ທ່ານ ແກ້ວລັນດອນ ຈັນ ທະປານີ ໄດ້ລາຍງານກ່ຽວກັບສະພາບ ຈຸດພິເສດ ລວມເຖິງການຊີ້ນຳ-ນຳພາຮອບດ້ານໃນໄລຍະຜ່ານມາ ຊຶ່ງຄະນະນຳແຕ່ລະຂັ້ນແມ່ນໄດ້ສຸມທຸກເຫື່ອແຮງ ແລະ ສະຕິປັນຍາ ເພື່ອຊີ້ນຳ-ນຳພາ ແລະ ຈັດຕັ້ງປະຕິບັດຢ່າງເປັນເຈົ້າການ, ຂຸດ ຄົ້ນ ແລະ ນຳໃຊ້ທ່າແຮງບົ່ມ ຊ້ອນເຂົ້າໃນການພັດທະນາເສດຖະກິດ-ສັງຄົມ, ສ້າງເງື່ອນ ໄຂດຶງດູດການຊ່ວຍເຫຼືອ,ການ ລົງທຶນ ທັງພາຍໃນ ແລະ ຕ່າງ ປະເທດເຮັດໃຫ້ເມືອງທ່າແຂກ ມີການພັດທະນາຢ່າງຕໍ່ເນື່ອງ ໂດຍສະເພາະທາງດ້ານເສດ ຖະກິດ, ວັດທະນະທຳ-ສັງຄົມ, ການແກ້ໄຂຄວາມທຸກຍາກ ແລະ ອື່ນໆ.

ໂອກາດດັ່ງກ່າວ ທ່ານ ວັນໄຊ ຟອງສະຫວັນ ຮັກສາການເຈົ້າແຂວງຄຳມ່ວນ ກໍໄດ້ ໂອ້ລົມຕໍ່ຄະນະນຳຂັ້ນເມືອງ ໃຫ້ເອົາໃຈໃສ່ສຶກສາອົບຮົມທາງດ້ານການເມືອງ-ແນວ ຄິດໃຫ້ແກ່ສະມາຊິກພັກ-ພະ ນັກງານໃຫ້ມີສະຕິ ແລະ ມີຄວາມຕື່ນຕົວໃນການຈັດຕັ້ງປະຕິບັດຕໍ່ໜ້າທີ່ວຽກງານດ້ວຍຄວາມຮັບຜິດຊອບສູງ, ເພີ່ມທະວີວຽກງານກໍ່ສ້າງພັກ-ພະນັກງານໃຫ້ຫັນເຂົ້າສູ່ຄຸນນະພາບຫຼາຍຂຶ້ນ, ເອົາໃຈໃສ່ເພີ່ມທະວີວຽກງານກໍ່ສ້າງຮາກຖານການເມືອງ, ພັດທະນາຊົນນະບົດຢ່າງຮອບດ້ານ ຕິດພັນກັບການແກ້ໄຂປະກົດການຫຍໍ້ທໍ້ໃນສັງຄົມ, ຂຸດຄົ້ນ ພ້ອມທັງເສີມຂະຫຍາຍທາງດ້ານທ່າແຮງບົ່ມຊ້ອນ ແລະ ຄວາມອາດສາມາດຂອງເມືອງໃນການພັດທະນາເສດຖະກິດໃຫ້ມີການຂະຫຍາຍຕົວ ພ້ອມທັງສົ່ງເສີມການຜະລິດເປັນສິນຄ້າຂອງປະຊາຊົນໃຫ້ຫຼາຍຂຶ້ນ, ເອົາໃຈໃສ່ທາງດ້ານການດຶງດູດການລົງທຶນທັງພາຍໃນ ແລະ ຕ່າງປະເທດ ໃຫ້ເຂົ້າມາລົງທຶນຫຼາຍຂຶ້ນ ຕິດພັນກັບການສ້າງຖານລາຍຮັບທີ່ໝັ້ນຄົງ ແລະ ຖາວອນ, ສຸມໃສ່ແກ້ໄຂ, ປັບປຸງ ແລະ ພັດທະນາທາງດ້ານການທ່ອງທ່ຽວ ແລະ ການປັບປຸງຂອດການບໍລິການ ເພື່ອດຶງດູດນັກທ່ອງທ່ຽວ ພ້ອມທັງເອົາໃຈໃສ່ຄຸ້ມຄອງວຽກງານຊາຍແດນໃຫ້ມີຄວາມສະຫງົບ, ສ້າງເງື່ອນໄຂອຳນວຍຄວາມສະດວກໃຫ້ປະຊາຊົນໄດ້ມີການພົວພັນແລກປ່ຽນຊື້-ຂາຍ ສິນຄ້າຢ່າງເປັນປົກກະຕິ ບົນພື້ນຖານຄວາມຖືກຕ້ອງ ແລະ ສອດຄ່ອງຕາມລະບຽບກົດໝາຍ, ສຸມໃສ່ພັດທະນາເມືອງທ່າແຂກໃຫ້ເປັນໃຈກາງ ທາງດ້ານເສດຖະກິດ, ວັດທະ ນະທຳ-ສັງຄົມ ຕາມວິໄສທັດ ເປັນເມືອງທ່ອງທ່ຽວ, ສະອາດ, ສີຂຽວ ແລະ ເປັນເມືອງທີ່ໜ້າຢູ່.

(ຂ່າວ: ກອງຄຳ)

ຂ່າວທີ່ໄດ້ຮັບຄວາມນິຍົມ