ທ່ານ ສອນໄຊ ສີພັນດອນ ລົງຊຸກຍູ້ບັນດາໂຄງການກໍ່ສ້າງຢູ່ແຂວງອັດຕະປື

ວັນ​ທີ 11 ພະຈິກຜ່ານ​ມາ ນີ້, ທ່ານ ສອນ​ໄຊ ສີ​ພັນ​ດອນ ຮອງ​ນາຍົກລັດຖະມົນຕີ ລັດຖະ ມົນຕີ​ກະຊວງ​ແຜນການ​ແລະ ການ​ລົງທຶນ ພ້ອມ​ດ້ວຍ​ຄະນະ​ໄດ້​ລົງ​ເຄື່ອນ​ໄຫວ​ຊຸກຍູ້​ບັນດາ​ໂຄງການ​ຕ່າງໆ​ຢູ່​ແຂວງ ອັດ​ຕະ​ປື ເຊັນ: ໂຄງການ​ກໍ່ສ້າງ​ເຮືອນ​ພັກ​ຖາວອນ​ຜູ້​ປະສົບ​ໄພ ເມືອງ​ສະໜາມ​ໄຊ ແລະ ໂຄງການ​ກໍ່ສ້າງ​ສວນ​ເຈົ້າ​ໄຊ​ຍະ​ເຊ​ດ​ຖາ​ທິ​​ຣາດ​ເມືອງ​ໄຊ​ເຊດຖາ ໂດຍ​ການ​ຕ້ອນຮັບ​ຈາກ ທ່ານ​ ເລັດ ໄຊ​ຍະ​ພອນ ເຈົ້າແຂວງ​ອັດ​ຕະ​ປື  ພ້ອມ​ຄະນະ​. ໃນ​ໂອກາດ​ນີ້​ ທ່ານ​ຮອງ​ນາຍົກລັດຖະມົນຕີ​ໄດ້​ລົງ​ສໍາ​ຫຼວດ​ເຂດ​ການ​ກໍ່ສ້າງ​ເຮືອນ​ພັກ​ຖາວອນ​ຈຸດ​ຕະ​ມໍ​ຢອດ, ຈຸດ​ດົງ​ບາກໃໝ່​ຫີນ​ຄໍາ ແລະ ເຂດ​ທໍາ​ການ​ຜະລິດ, ເຂດ​ຊົນລະປະທານ​ເຂດ​ບ້ານ​ສະໝອງ​ໃຕ້​ພ້ອມ​ນີ້​ທ່ານ​ຍັງ​ໄດ້​ຮັບ​ຟັງ​ການ​ລາຍ​ງານ​ຄວາມ​ຄືບ​ໜ້າ​ຂອງ​ໂຄງການ​ກໍ່ສ້າງ​ສວນ​ເຈົ້າ​ໄຊ​ຍະ ເຊ​ດ​ຖາ​ທິ​ຣາດ ຈາກ​ບໍລິສັດ​ວັງ​ຕັດ​ຂຸດ​ຄົ້ນ​ບໍ່​ແຮ່​ຈໍາ​ກັດ ວ່າ: ການ​ກໍ່ສ້າງ​ແມ່ນ​ໄດ້​ມີ​ຄວາມ​ຄືບ​ໜ້າ​ຕາມ​ແຜນການ​ວາງ​ໄວ້​ເປັນຕົ້ນ​ການ​ຖົມ​ດິນ​ອັດແໜ້ນ​ສໍາ​ເລັດ 100%, ວຽກ​ກໍ່ສ້າງ​ຫໍ​ວັງ​ສໍາ​ເລັດ 90%, ວຽກ​ຫ້ອງ​ສາ​ທາ​ລະ​ນະ​ສໍາ​ເລັດ 70%, ວຽກ​ກໍ່ສ້າງ​ກຳແພງ​ຮົ້ວ​ສໍາ​ເລັດ90%, ວຽກ​ກໍ່ສ້າງ​ເດີ່ນ ແລະ ຮ່ອງ​ລະ​ລາຍ​ນໍ້າສໍາ​ເລັດ 85%, ວຽກ​​​ທາງ​ຍ່າງ​ອ້ອມ ສວນ ແລະ ລານ​ຈອດ​ລົດ​ສໍາ​ເລັດ 90%,  ຕົບ​ແຕ່ງ​ນໍ້າ​ຕົກ ມີ​ນາກ​ພົ່ນ​ນໍ້າສໍາ​ເລັດ40%, ວຽກ​ກໍ່ສ້າງ​ຖານ​ຮອງ​ຮັບ​ຫຼໍ່​ຮູບ​ປັ້ນ ແລະ ຕົບແຕ່ງ​ແຕ້ມ​ພາບ​ອ້ອມ​ຖານ​ກົມ​ມະ​ລຽນ​ສໍາ​ເລັດ 90%, ວຽກ​ປູກ​ຕົ້ນໄມ້, ປູກ​ຫຍ້າ ແລະ ດອກ​ໄມ້​ປະ​ດັບ​ສໍາ​ເລັດ80% ພ້ອມ​ດຽວ​ກັນ​ນີ້ ທ່ານ ຮອງ​ນາຍົກລັດຖະມົນຕີ ກໍ​ໄດ້​ສະແດງ​ຄວາມ​ຍ້ອງຍໍ​ຊົມ ເຊີຍ​ຕໍ່​ຜົນ​ສໍາ​ເລັດ​ດັ່ງກ່າວ  ແລະ  ໃຫ້​ທາງ​ການ​ນໍາ​ຂອງ​ແຂວງ​ເອົາ​ໃຈໃສ່​ຊຸກຍູ້​ດ້ານ​ວຽກ​ງານ​ການ​ກໍ່ສ້າງ​ໃຫ້​ສໍາ​ເລັດ​ ເພື່ອ​ເປັນ​ການ​ເຜີຍແຜ່​ທາງ​ດ້ານ​ການທ່ອງທ່ຽວ ​ແລະ​ ດຶງ​ດູດ​ນັກ​ທ່ອງ​ທ່ຽວ​ມາ​ແຂວງ​ອັດ​ຕະ​ປື​ ໃຫ້​ຫຼາຍ​ຂຶ້ນ.
(ພາບ - ຂ່າວ: ມະນີ​ວອນ)