ຫົວ​ຂໍ້ : ລາວ-ຈີນ ສາຫາລືສົ່ງເສີມການທ່ອງທ່ຽວ ແລະ ການລົງທຶນໃນຂະແໜງທ່ອງທ່ຽວຢູ່ ລາວ

ເຜີຍ​ແຜ່​ໂດຍ​: admin ເວ​ລາ: 27/12/2019 16:34:31 ຈຳ​ນວນ​ຜູ້​ເຂົ້າ​ຢ້ຽມ​ຊົມ 284 ຄັ້ງ

ຂປລ. ກົມໂຄສະນາການທ່ອງທ່ຽວ, ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ຂອງ ສປປ ລາວ ຮ່ວມ​ກັບກົມຮ່ວມມືສາກົນ, ກະຊວງວັດທະນະທໍາ ແລະ ທ່ອງທ່ຽວຂອງ ສປ ຈີນ ​ໄດ້​ຈັດ​ສຳ​ມະ​ນາພາຍ​ໃຕ້​ຫົວ​ຂໍ້ “ການສົ່ງເສີມການ​ທ່ອງທ່ຽວ ແລະ ການລົງທຶນ ໃນຂະແໜງການທ່ອງທ່ຽວຢູ່ ສປປ ລາວ” ໃນວັນທີ 16 ທັນວາ 2019 ຢູ່ ສປ ຈີນ  ເນື່ອງໃນພິທີປິດປີທ່ອງທ່ຽວ ລາວ-ຈີນ 2019 ເພື່ອ​ເປັນ​ການເຜີຍແຜ່, ແລກປ່ຽນບົດຮຽນ ແລະ ປືກສາຫາລືກ່ຽວກັບວຽກງານສົ່ງເສີມການທ່ອງທ່ຽວ ແລະ ການລົງທຶນ ໃນຂະແໜງການທ່ອງທ່ຽວຢູ່ ສປປ ລາວ ລວມທັງວຽກງານການຕ້ອນຮັບ ແລະ ບໍລິການນັກທ່ອງທ່ຽວ ຂອງພາກສ່ວນທີ່ກ່ຽວຂ້ອງ ທັງພາກລັດ ແລະ ພາກທຸລະກິດ ແນໃສ່ ປັບປຸງຄຸນນະພາບ-ມາດຕະຖານ ການທ່ອງທ່ຽວຂອງລາວ ໃຫ້ສູງຂຶ້ນ ກໍຄືການສ້າງເງື່ອນໄຂອຳນວຍຄວາມສະດວກ ເພື່ອດຶງດູດເອົາການລົງທຶນ ຈາກນັກລົງທຶນພາຍໃນ ແລະ ຕ່າງປະເທດ ໃນຂະແໜງການທ່ອງທ່ຽວຢູ່ ສປປ ລາວ ໃຫ້ຫລາຍຂຶ້ນໃນຕໍ່ໜ້າ.

ທ່ານ ສູນ ມະນີວົງ ​ຫົວໜ້າກົມໂຄສະນາການທ່ອງທ່ຽວ, ກະຊວງ ຖວທ ໄດ້​ກ່າວ​ວ່າ: ການຈັດ​ສຳ​ມະ​ນາ​ຄັ້ງ​ນີ້ ເພື່ອເປັນການຊຸກຍູ້-ສົ່ງເສີມ ແລະ ສຸມໃສ່ການພັດທະນາການທ່ອງທ່ຽວ ຢູ່ປະເທດລາວ ໃຫ້ມີຄວາມສາມາດ ຮອງຮັບນັກທ່ອງທ່ຽວໃນປະຈຸບັນ ແລະ ອະນາຄົດ, ກະຊວງ ຖວທ ໃນນາມເປັນເຈົ້າການໃນການພັດທະນາ, ຄຸ້ມຄອງ ແລະ ໂຄສະນາ-ສົ່ງເສີມວຽກງານທ່ອງທ່ຽວ ໃຫ້ຂະຫຍາຍຕົວ ແລະ ເຂັ້ມແຂງ.

ທ່ານ ສູນ ມະນີວົງ ຍັງ​ໃຫ້​ຮູ້​ອີກ​ວ່າ: ໃນ​ໄລຍະເດືອນມັງກອນ-ເດືອນກັນຍາ 2019 ນີ້ ເຊິ່ງເປັນປີສະເຫລີມສະຫລອງປີທ່ອງທ່ຽວລາວ-ຈີນ ໄດ້ມີນັກທ່ອງທ່ຽວສາກົນເດີນທາງ ເຂົ້າມາທ່ຽວລາວ ຈຳນວນ 3.44 ລ້ານເທື່ອຄົນ ໃນນັ້ນນັກທ່ອງທ່ຽວຈາກ ສປ ຈີນ ມີ 756.952 ເທື່ອຄົນ ເຊິ່ງເພີ່ມຂຶ້ນ 26% ທຽບໃສ່ໄລຍະດຽວກັນຂອງປີ 2018 ແລະ ຄາດວ່າໃນທ້າຍເດືອນທັນວາ 2019 ນີ້ ຈະມີນັກທ່ອງທ່ຽວປະມານ 4.47 ລ້ານເທື່ອຄົນ ແລະ ນັກທ່ອງທ່ຽວຈີນ 1 ລ້ານເທື່ອຄົນ ເຊິ່ງຈະສ້າງລາຍຮັບປະມານ 855 ລ້ານໂດລາສະຫະລັດ. ໂດຍອີງຕາມຕົວເລກສະຖິຕິ ການທ່ອງທ່ຽວທີ່ໄດ້ກ່າວມານັ້ນ ສາມາດເວົ້າໄດ້ວ່າ: ການທ່ອງທ່ຽວ ຢູ່ ສປປ ລາວ ເປັນຂະແໜງການໜຶ່ງທີ່ເປັນທ່າແຮງ ໃນການປະກອບສ່ວນສ້າງລາຍຮັບເຂົ້າປະເທດ ເຊິ່ງຈັດເປັນອັນດັບທີ 4 ຮອງຈາກຂະແໜງການບໍ່ແຮ່, ອຸດສາຫະກຳອື່ນໆ ແລະ ໄຟຟ້າ.

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110