ຫົວ​ຂໍ້ : ໂຮ້ຍອານ ດຶງດູດນັກທ່ອງທ່ຽວພາຍໃນ ແລະ ຕ່າງປະເທດເຂົ້າມາ 5 ແສນເທື່ອຄົນຕໍ່ປີ

ເຜີຍ​ແຜ່​ໂດຍ​: admin ເວ​ລາ: 27/12/2019 16:35:29 ຈຳ​ນວນ​ຜູ້​ເຂົ້າ​ຢ້ຽມ​ຊົມ 347 ຄັ້ງ

ຂປລ. ນະຄອນໂຮ້ຍອານ ແຂວງ ກວາງນາມ ສສ ຫວຽດນາມ ເປັນອີກສະຖານທີ່ທ່ອງທ່ຽວໜຶ່ງທີ່ດຶງດູດນັກທ່ອງທ່ຽວ ທັງພາຍໃນ ແລະ ຕ່າງປະເທດ ເຂົ້າມາທ່ຽວຊົມເປັນຈຳນວນ ຫລວງຫລາຍ ແລະ ໄດ້ສ້າງເງິນມະຫາສານມາສູ່ຊຸມຊົນ, ໂດຍສະເລ່ຍມີນັກທ່ອງທ່ຽວເຂົ້າມາ 5 ແສນເທື່ອຄົນຕໍ່ປີ ແລະ ສ້າງລາຍຮັບໄດ້ເຖິງ 5 ຕື້ດົງ. ທ່ານ ຫງຽນ ວັນເຊິນ ຮອງປະທານຄະນະກໍາມະການ ປະຊາຊົນນະຄອນໂຮ້ຍອານ ໄດ້ລາຍງານສະພາບພົ້ນເດັ່ນ ການພັດທະນາ ເສດຖະກິດ–ສັງຄົມ ຕໍ່ຄະນະສື່ມວນຊົນລາວ ທີ່ໄດ້ເດີນທາງໄປຢ້ຽມຢາມ ແລະ ເຮັດວຽກຢູ່ ສສ ຫວຽດນາມ ໃນຕົ້ນ​ເດືອນ​ທີ່​ຜ່າ​ນມາ.

   ນະຄອນໂຮ້ຍອານ ມີເນື້ອທີ່ 60 ກິໂລຕາແມັດ ມີທ່າແຮງດ້ານການທ່ອງທ່ຽວ, ເນື່ອງຈາກມີສະຖານທີ່ທ່ອງທ່ຽວຄຸ້ມເມືອງເກົ່າ ຂຶ້ນທະບຽນ ເປັນມໍລະດົກໂລກ ທີ່ອົງການອຸຍເນສໂກຮັບຮອງ ເຊິ່ງມີວັດຖຸບູຮານທີ່ເປັນຂອງລໍ້າຄ່າເຖິງ 1.500 ອັນ ໄດ້ກາຍເປັນສະຖານທີ່ທ່ອງທ່ຽວ ສຳຄັນ ຂອງນະຄອນແຫ່ງນີ້. ພ້ອມນັ້ນ, ຍັງມີໝູ່ບ້ານປັ້ນດິນເຜົາ, ໝູ່ບ້ານຫັດຖະກໍາ ແລະ ສະຖານທາງດ້ານປະຫວັດ ສາດອື່ນໆ ທີ່ເປັນທີ່ນິຍົມຂອງນັກທ່ອງທ່ຽວ ທັງຊາວຫວຽດນາມ ແລະ ຊາວຕ່າງປະເທດ.

ທ່ານ ຫງຽນ ວັນເຊິນ ກ່າວຕື່ມວ່າ: ໃນແຕ່ລະປີມີນັກທ່ອງທ່ຽວ ເຂົ້າມາທ່ຽວຊົມນະຄອນແຫ່ງນີ້ ເປັນຈຳນວນຫລວງຫລາຍ ແລະ ໄດ້ສ້າງເງິນມະຫາສານ ມາສູ່ຊຸມຊົນ ​ເຮັດ​ໃຫ້​ເສດຖະກິດ​ຄອບຄົວ​ຂອງ​ປະ​ຊາ​ຊົນ​ດີ​ຂຶ້ນ ​ແລະ ​ເຮັດ​ໃຫ້​ຊຸມ​ຊົນ​ແຫ່ງ​ນີ້ບໍ່​ມີ​ຄອບຄົວ​ທຸກ​ຍາກ​, ປັດໄຈທີ່ເຮັດໃຫ້ ຂະແໜງທ່ອງທ່ຽວ ດ້ານວັດທະນະທໍາ ມີຄວາມສໍາເລັດເປັນທີ່ສົນໃຈ ນອກຈາກທາງປູຊະນີຍະສະຖານແລ້ວ ຍັງແມ່ນການຈັດງານເທດສະການຕ່າງໆ ທີ່ເປັນລັກສະນະຊາດ ແລະ ແບບສາກົນ ເປັນຕົ້ນແມ່ນ ເທດ ສະການອາຫານຫວຽດນາມ -ຍີ່ປຸ່ນ, ສ.ເກົາຫລີ ເຊິ່ງ​ເປັນ​ການການດຶງດູດ ບັນດາ​ນັກ​ທ່ອງ​ທ່ຽວໄດ້ເປັນຢ່າງດີ ລວມທັງພາກລັດ ກໍຄື ນະຄອນໂຮ້ຍອານ ໄດ້ຈັດນັກສະແດງ ໄປສະແດງຢູ່ຕ່າງປະເທດ ເປັນຕົ້ນແມ່ນ ເຢຍລະມັນ, ອິຕາລີ. ພ້ອມນັ້ນ, ຍັງໄດ້ແຮງສະໜັບສະໜູນ ຈາກພາກເອກະຊົນ ເປັນ ຕົ້ນແມ່ນໂຮງແຮມ, ຮ້ານອາຫານ, ບໍລິສັດທ່ອງທ່ຽວ ໂດຍໂຄສະນາຜ່ານເວັບໄຊຂອງເຂົາເຈົ້າ.

     ໂອກາດດັ່ງກ່າວ, ທ່ານ ສົມສະຫວາດ ພົງສາ ຮອງຫົວໜ້າກົມສື່ມວນຊົນ ຫົວໜ້າຄະນະສື່ມວນຊົນລາວ ໄດ້ສະແດງຄວາມຍ້ອງຍໍຊົມເຊີຍ ແລະ ຕີລາຄາສູງຕໍ່ໝາກຜົນ ທີ່ການນໍານະຄອນໂຮ້ຍອານຍາດມາໄດ້ໃນຫລາຍປີຜ່ານມາ, ພ້ອມໄດ້ແລກປ່ຽນບົດຮຽນ ສະພາບການຄຸ້ມຄອງ ສະຖານທີ່ທ່ອງທ່ຽວ, ການຄຸ້ມຄອງບັນດາຮ້ານອາຫານ, ໂຮງແຮມ, ການຮັກສາຄວາມສະຫງົບ, ການບູລະນະປະ ຕິສັງຂອນວັດຖຸບູຮານ, ການສ້າງທ່າແຮງປິ່ນອ້ອມສະຖານທີ່ທ່ອງທ່ຽວ ທັງໝົດເພື່ອນໍາເອົາ ບົດຮຽນກັບຄືນມາເປັນແຜນພັດທະນາ ແລະ ຍຸດທະສາດ ປັບປຸງສະຖານທີ່ທ່ອງທ່ຽວຂອງລາວ ເຮົາລວມທັງຜູ້ປະກອບການ ໃຫ້ມີຄວາມພ້ອມຮອງຮັບ ນັກທ່ອງທ່ຽວທີ່ເພີ່ມຂຶ້ນ.

ຂ່າວ-ພາບ: ມະນີ​ທອນ

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110