ໜັງສືພິມ ປະຊາຊົນ

ສ່ືມວນຊົນລາວ ເຂົ້າຮ່ວມກອງປະຊຸມທາງໄກ ແມ່ນໍ້າຂອງ-ແມ່ນໍ້າລ້ານຊ້າງ

ເຜີຍແຜ່ໂດຍ: ທ່ານ ສິດທິພອນ ຣາຊະພົນ ເວລາ: 25/11/2020 16:38:23 ຈຳນວນຢ້ຽມຊົມ 16587 ຄັ້ງ

ກອງປະຊຸມສຸດຍອດສື່ມວນຊົນ 2020 ໃນຂອບເຂດການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ ຜ່ານທາງອອນລາຍ (LMC Media Online) ໄດ້ຈັດຂຶ້ນໃນວັນທີ 24 ພະຈິກຜ່ານມາ ທີ່ສໍານັກງານໜັງສືພິມພາ ສາຕ່າງປະເທດ ພາຍໃຕ້ຫົວ ຂໍ້ “ເພີ່ມທະວີການຮ່ວມມືກັນຕ້ານການແຜ່ລະບາດພະຍາດອັກເສບປອດໂຄວິດ-19 ແລະ ຟື້ນຟູເສດຖະກິດ” ໂດຍການເປັນປະທານຂອງທ່ານ ຖົວ ເຈີນ ປະທານໜັງສືພິມປະຊາຊົນລາຍວັນຈີນ; ມີບັນດາທ່ານຜູ້ ຕາງໜ້າສື່ມວນຊົນຈາກ 6 ປະ ເທດປະກອບມີລາວ, ຈີນ, ຫວຽດ ນາມ, ກໍາປູເຈຍ, ໄທ ແລະ ມຽນມາ ຊຶ່ງສື່ມວນຊົນ ສປປ ລາວ ແມ່ນນໍາໂດຍທ່ານ ໂພສີ ແກ້ວມະນີວົງ ຜູ້ອໍານວຍການ ໃຫຍ່ວິທະຍຸກະຈາຍສຽງແຫ່ງຊາດລາວ; ທ່ານ ທອງຫຼໍ່ ດວງສະຫວັນ ຫົວໜ້າບັນນາ ທິການໜັງສືພິມພາສາຕ່າງປະ ເທດ ແລະ ສື່ຈາກຫຼາຍພາກ ສ່ວນເຂົ້າຮ່ວມ.

ໃນກອງປະຊຸມຄັ້ງນີ້, ຜູ້ເຂົ້າຮ່ວມໄດ້ມີການແລກປ່ຽນບົດຮຽນການສົນທະນາປະກອບຄໍາຄິດຄໍາເຫັນກ່ຽວກັບ ການແຜ່ລະບາດຂອງພະຍາດໂຄວິດ-19 ໄດ້ສ້າງຄວາມຫຍຸ້ງ ຍາກຫຼາຍຕໍ່ການພັດທະນາ ເສດຖະກິດທົ່ວໂລກ ແລະ ເຮັດໃຫ້ເກີດຄວາມປ່ຽນແປງຫຼາຍຢ່າງຕໍ່ກັບວິຖີການດໍາລົງຊີວິດຂອງສັງຄົມ ລວມເຖິງການເຮັດວຽກຂອງສື່ມວນຊົນ. ສໍາລັບຢູ່ ສປປ ລາວ, ນັບຕັ້ງແຕ່ເລີ່ມມີການລະບາດຂອງພະຍາດ COVID-19 ໃນທ້າຍປີ 2019 ເປັນຕົ້ນມາ, ລັດຖະບານໄດ້ຊີ້ນໍາຢ່າງໃກ້ຊິດເປັນພິເສດຕໍ່ການສະກັດກັ້ນ ແລະ ປ້ອງກັນ ພະຍາດດັ່ງກ່າວ ໂດຍໄດ້ແຕ່ງ ຕັ້ງຄະນະສະເພາະກິດຂຶ້ນໃນເດືອນມັງກອນ ປີ 2020 ເພື່ອ ຕິດຕາມ, ປະເມີນ ແລະ ວາງ ມາດຕະການປ້ອງກັນພະຍາດ ດັ່ງກ່າວ. ຈົນມາຮອດວັນທີ 24 ມີນາ 2020 ລາວກວດພົບຜູ້ຕິດເຊື້ອພະຍາດ COVID-19 ຈໍານວນ 2 ຄົນທໍາອິດ, ນາຍົກ ລັດຖະມົນຕີ ແຫ່ງ ສປປ ລາວ ຈິ່ງອອກຄໍາສັ່ງເລກທີ 06, ລົງວັນທີ 29 ມີນາ 2020 ວ່າດ້ວຍການເພີ່ມທະວີມາດຕະການສະກັດກັ້ນ, ກັນລະບາດ, ຄວບຄຸມ ແລະ ກຽມຄວາມພ້ອມຮອບດ້ານ ເພື່ອຕ້ານພະຍາດ COVID-19 ທີ່ໄດ້ກໍານົດຫຼາຍ ມາດຕະການເຂັ້ມງວດທີ່ສຸດ ເປັນຕົ້ນ ປິດປະເທດ, ໂຈະກິດຈະກໍາທີ່ມີຄົນເຕົ້າໂຮມຫຼາຍ, ປິດສະຖານການສຶກສາ, ປິດສະຖານບັນເທີງ, ຫ້າມປະຊາ ຊົນອອກຈາກທີ່ພັກອາໄສ, ຍົກເວັ້ນກໍລະນີຈໍາເປັນ ແລະ ອື່ນໆ. ຫຼັງຈາກນັ້ນຄໍາສັ່ງດັ່ງ ກ່າວ ໄດ້ຮັບການຜ່ອນຜັນເປັນແຕ່ລະໄລຍະພາຍຫຼັງທີ່ລາວສາ ມາດຄວບຄຸມການລະບາດຂອງພະຍາດ COVID-19 ໄດ້.ເຖິງຢ່າງໃດກໍຕາມລັດຖະບານໄດ້ສືບຕໍ່ວາງນະໂຍບາຍ ແລະ ແນວທາງຕ່າງໆຢ່າງເໝາະສົມ ແລະ ທັນການ ເພື່ອຮັບປະ ກັນສະຖຽນລະພາບດ້ານການ ເມືອງ, ສັງຄົມມີຄວາມສະຫງົບແລະ ຄວາມເປັນລະບຽບຮຽບ ຮ້ອຍ, ສ້າງເງື່ອນໄຂສະດວກ ໃຫ້ການຈັດຕັ້ງປະຕິບັດແຜນພັດທະນາເສດຖະກິດບາງຂະ ແໜງການສືບຕໍ່ມີການຂະ ຫຍາຍຕົວ ເປັນຕົ້ນການລົງທຶນໃນໂຄງການຂະໜາດໃຫຍ່ຈໍາ ນວນໜຶ່ງມີການດໍາເນີນໄປຕາມແຜນທີ່ໄດ້ກໍານົດໄວ້ເຊັ່ນ: ໂຄງການຂຸດຄົ້ນແຮ່ທາດ, ພະ ລັງງານໄຟຟ້າ, ໂຄງການທາງລົດໄຟລາວ-ຈີນ,ໂຄງການທາງ ດ່ວນ ນະຄອນຫຼວງວຽງຈັນ-ວັງວຽງ ແລະ ອື່ນໆ. ພ້ອມໆກັບການນໍາສະເໜີສະພາບການພັດທະນາປະເທດ, ດ້ວຍບົດບາດຂອງສື່ມວນຊົນໄດ້ຕິດ ຕາມ ແລະ ນໍາສະເໜີສະພາບການຕ່າງໆທີ່ກ່ຽວຂ້ອງກັບການ ລະບາດຂອງພະຍາດໂຄ ວິດ-19 ທັງພາຍໃນ ແລະ ຕ່າງ ປະເທດຢ່າງໃກ້ຊິດ ໂດຍສະ ເພາະແຜນປະຕິບັດງານຂອງລັດຖະບານກ່ຽວກັບການກຽມຄວາມພ້ອມ ເພື່ອປ້ອງກັນ ແລະ ສະກັດກັ້ນການລະບາດຂອງພະຍາດດັ່ງກ່າວໃນທົ່ວປະເທດ. ພ້ອມທັງນຳສະເໜີ ຂໍ້ມູນກ່ຽວກັບການກະກຽມ ຄວາມພ້ອມດ້ານຕ່າງໆ ເພື່ອສືບຕໍ່ຈັດຕັ້ງປະຕິບັດແຜນເຝົ້າ ລະວັງເພື່ອຕອບໂຕ້ການລະ ບາດຂອງພະຍາດໂຄວິດ-19 ແລະ ແຜນຟື້ນຟູເສດຖະກິດຫຼັງການລະບາດຂອງພະຍາດໂຄວິດ-19 ຂອງລັດຖະບານເພື່ອໃຫ້ທຸກຄົນໄດ້ປັບຕົວໃຫ້ເຂົ້າກັບການດໍາລົງຊີວິດແບບໃໝ່, ການເຮັດວຽກແບບໃໝ່, ການປະກອບທຸລະກິດຕາມວິຖີການດໍາລົງຊີວິດແບບໃໝ່, ສ້າງຄວາມໝັ້ນໃຈໃຫ້ກັບທຸກຄົນໃນການດໍາລົງຊີວິດ; ເມື່ອສັງຄົມມີຄວາມສະຫງົບທຸກຄົນກໍມີຄວາມພ້ອມທີ່ປະກອບສ່ວນເຂົ້າໃນການຂັບເຄື່ອນແຜນພັດທະນາເສດຖະກິດ-ສັງຄົມ ຂອງລັດຖະບານ. ທັງໝົດນີ້ຄືພາລະ ແລະ ໜ້າທີ່ຂອງສື່ມວນ ຊົນລາວທີ່ຈະຕ້ອງປະຕິບັດທັງໃນປັດຈຸບັນ ແລະ ສະເພາະໜ້າພ້ອມດຽວກັນນັ້ນກໍສືບຕໍ່ເສີມຂະຫຍາຍການພົວພັນຮ່ວມມືກັບສື່ມວນຊົນສາກົນໃນການ ແລກປ່ຽນຂໍ້ມູນຂ່າວສານຢ່າງ ຮອບດ້ານ ແລະ ມີປະສິດທິຜົນເພື່ອພ້ອມກັນຂ້າມຜ່ານໄລຍະເວລາອັນຫຍຸ້ງຍາກໃນຄັ້ງນີ້.

(ຂ່າວ: ຍຸພິນ, ພາບ: ສໍານານ)