ໜ່ວຍຊາວໜຸ່ມຮາກຖານ ທສກ ຮັບໃບຢັ້ງຢືນນາມມະຍົດ 4 ບຸກ

       ໜ່ວຍຊາວໜຸ່ມຮາກຖານ ທະນາຄານສົ່ງເສີມກະສິກຳ ສາຂາ ແຂວງອັດຕະປື. ໄດ້ຈັດພິທີ ປະກາດ ມອບໃບຢັ້ງຢືນນາມມະຍົດ ເປັນໜ່ວຍຊາວໜຸ່ມ 4 ບຸກ ຄັ້ງທີ III ຕິດຕໍ່ກັນ ຂຶ້ນ​ເມື່ອບໍ່​ດົນ​​ມານີ້, ທີ່ຫ້ອງປະຊຸມທະນາຄານດັ່ງກ່າວ ໂດຍພາຍໃຕ້ການເຂົ້າ​ຮ່ວມ​ຂອງສະຫາຍ ໄຊລະຄອນ ອິນທິວົງ ຮອງເລຂາຄະນະບໍລິຫານງານຊາວໜຸ່ມແຂວງ, ມີສະຫາຍ ສີວິໄຊ ສໍສາລະພູມ ຮອງຫົວໜ້າທະນາຄານສົ່ງເສີມກະສິກຳ ສາຂາ ແຂວງອັດຕະປື. ມີແຂກທີ່ຖືກເຊີນ ພ້ອມດ້ວຍສະມາຊິກຊາວໜຸ່ມພາຍໃນໜ່ວຍເຂົ້າຮ່ວມ.

      ໃນປະຊຸມ, ສະຫາຍ ນາງ ພຸດທະນົງ ແກ້ວພິຈິດ ເລຂາໜ່ວຍຊາວໜຸ່ມຮາກຖານ ທະນາຄານສົ່ງເສີມກະສິກຳ ສາຂາແຂວງອັດຕະປື ໄດ້ຜ່ານບົດສະຫຼຸບເພື່ອສັງເກດຕີລາຄາຄືນໃນການຈັດຕັ້ງປະຕິບັດແຜນສ້າງໜ່ວຍຊາວໜຸ່ມ 4 ບຸກ ໃນໄລຍະ 1 ປີຜ່ານມາ, ຜ່ານການປະເມີນຕົວຈິງສົມທຽບກັບມາດຖານໃນແຕ່ລະດ້ານສາມາດປະຕິບັດໄດ້ຄື: ດ້ານແນວຄິດບຸກໄດ້ 91,88%, ດ້ານການຝຶກຝົນຫຼໍ່ຫຼອມຮ່ຳຮຽນບຸກໄດ້ 91,66%, ດ້ານການປັບປຸງການຈັດຕັ້ງບຸກໄດ້ 92,24% ແລະ ດ້ານວິຊາຊີບ - ສ້າງວຽກເຮັດງານທຳບຸກໄດ້ 92,14% ຕໍ່ຜົນການປະເມີນຂອງແຕ່ລະດ້ານນັ້ນເຫັນວ່າໜ່ວຍສາມາດປະຕິບັດໄດ້ລື່ນຄາດໝາຍແຜນການທີ່ວາງໄວ້.  ຈຶ່ງໄດ້ປະກາດມອບ-ຮັບໃບຢັ້ງຢືນນາມມະຍົດເປັນໜ່ວຍຊາວໜຸ່ມຕາມເນື້ອໃນຂໍ້ແຂ່ງຂັນ 4 ບຸກ. ຈາກນັ້ນ, ຄະນະໜ່ວຍ ຍັງໄດ້ຜ່ານທິດທາງແຜນການສືບຕໍ່ການສ້າງໜ່ວຍຊາວໜຸ່ມ 4 ບຸກ ໃນໜຶ່ງປີຕໍ່ໜ້າທີ່ຄະນະໜ່ວຍ ພ້ອມດ້ວຍສະມາຊິກຈະຕ້ອງໄດ້ສືບຕໍ່ຮັກສາມູນເຊື້ອໃຫ້ໜ່ວຍໄດ້ຮັບນາມມະຍົດເປັນໜ່ວຍຊາວໜຸ່ມ 4 ບຸກ ໃນທຸກໆປີ. ນອກນັ້ນ, ກໍໄດ້ມອບໃບຢັ້ງຢືນເປັນໜ່ວຍຊາວໜຸ່ມ 4 ບຸກ ຄັ້ງທີ III ຕິດຕໍ່ກັນ, ມອບໃບຍ້ອງຍໍ 17 ສະຫາຍ, ຍິງ 11 ສະຫາຍ, ມອບໃບຊົມເຊີຍ 2 ສະຫາຍ.

ຂ່າວ: ຄຳດິດ ມຽງລາວັນ