ໜັງສືພິມ ປະຊາຊົນ

ງານລ້ຽງນ້ຳຊາພົບປະສັງສັນ ປະຈຳປີ 2020

ເຜີຍແຜ່ໂດຍ: ທ່ານ ຈັນທະໄມຕຣີ ເທບສີເມືອງ ເວລາ: 08/12/2020 09:44:19 ຈຳນວນຢ້ຽມຊົມ 3682 ຄັ້ງ

ສະຫະພັນແມ່ຍິງກະຊວງການຕ່າງປະເທດ ໄດ້ຈັດງານລ້ຽງນໍ້າຊາພົບປະສັງສັນ ປະຈໍາປີ 2020 ຂຶ້ນໃນວັນທີ 4 ທັນວາ ຜ່ານມາ ທີ່ສູນການຮ່ວມມືສາກົນ ແລະ ຝຶກອົບຮົມ (ICTC) ໂດຍໄດ້ຮັບກຽດເປັນປະທານ ຂອງທ່ານນາງ ອາລຸນີ ກົມມະສິດ ພັນລະຍາທ່ານ ລັດຖະມົນຕີກະຊວງການຕ່າງ ປະເທດ ປະທານກິດຕິມະສັກ ສະຫະພັນແມ່ຍິງກະຊວງການຕ່າງປະເທດ ຊຶ່ງມີບັນດາເອກອັກຄະລັດຖະທູດເພດຍິງ, ນັກການທູດເພດຍິງ, ພັນລະຍາທູຕານຸທູດ ປະຈໍາຢູ່ ສປປ ລາວ, ບັນດາພັນລະຍາຂອງຄະນະນໍາ ແລະ ຄະນະກົມ ພາຍໃນກະຊວງການຕ່າງປະເທດ ພ້ອມດ້ວຍແຂກຖືກເຊີນ 400 ທ່ານ.
ງານລ້ຽງນໍ້າຊາດັ່ງກ່າວ ແມ່ນງານພົບປະສັງສັນໂດຍປົກກະຕິ ທີ່ເປັນປະເພນີຈັດຂຶ້ນທຸກປີ ລະຫວ່າງ ວົງຄະນາຍາດ ນັກການທູດຍິງ ແລະ ພັນລະຍານັກການທູດ ຢູ່ ສປປ ລາວ ຊຶ່ງການຈັດງານຄັ້ງນີ້ ແມ່ນກິດຈະກຳເຄື່ອນໄຫວປະຈຳປີ ຂອງສະຫະພັນແມ່ຍິງກະຊວງການຕ່າງປະເທດ ເພື່ອພົບປະສັງສັນ, ທໍາຄວາມຮູ້ຈັກສະໜິດສະໜົມ, ເຕົ້າໂຮມຄວາມສາມັກຄີ ແລະ ແລກປ່ຽນວັດທະນະທໍາ ທາງດ້ານການສະແດງສິລະປະ, ການວາງສະແດງເຄື່ອງຫັດຖະກໍາ ແລະ ອາຫານທີ່ເປັນເອກະລັກຂອງຊາດ ລະຫວ່າງ ສະມາຊິກສະຫະພັນແມ່ຍິງກະຊວງການຕ່າງປະເທດ ກໍຄື ພະນັກງານນັກການທູດເພດຍິງ ຂອງກະຊວງການຕ່າງປະເທດ ແຫ່ງ ສປປ ລາວ ແລະ ນັກການທູດເພດຍິງ, ພັນລະຍາທູຕານຸທູດ ຂອງສໍານັກງານຜູ້ຕາງໜ້າຕ່າງປະເທດ ປະຈໍາຢູ່ ສປປ ລາວ.
ໃນພິທີ, ທ່ານນາງ ອາລຸນີ ກົມມະສິດ ໄດ້ຍົກໃຫ້ເຫັນບົດ ບາດຄວາມສໍາຄັນຂອງເອື້ອຍນ້ອງແມ່ຍິງ ໃນ ຂົງເຂດວຽກງານການຕ່າງ ປະເທດ ກໍຄືວຽກງານການທູດ ທັງຜູ້ຮັບຜິດຊອບວຽກງານການທູດໂດຍກົງ ແລະ ຜູ້ສະໜັບສະໜູນວຽກງານການທູດທາງອ້ອມ ພ້ອມທັງຍັງເປັນແມ່ພິມໜຶ່ງຂອງຊາດ ໃນການຮັກສາສິລະປະວັດທະນະທໍາ, ຮີດຄອງປະເພນີ ເປັນຕົ້ນ ການນຸ່ງຖື, ພາສາ, ມາລະຍາດໃນການປາກເວົ້າ ແລະ ອາຫານການກິນ ເພື່ອສືບຕໍ່ສົ່ງເສີມຄວາມເປັນເອກກະລັກຂອງຊາດ. ພາຍໃນງານຄັ້ງນີ້, ໄດ້ມີການສະແດງສິລະປະ, ການວາງສະແດງເຄື່ອງຫັດຖະກໍາ, ເຄື່ອງທີ່ລະນຶກ ແລະ ຜະລິດຕະພັນທີ່ຫຼາກຫຼາຍ ແລະ ຈໍາໜ່າຍອາຫານທີ່ເປັນເອກະລັກສະເພາະຂອງແຕ່ລະຊາດ ຈາກເອື້ອຍນ້ອງແມ່ຍິງກະຊວງການຕ່າງປະເທດ ແລະ ບັນດາສະຖານທູດຕ່າງປະເທດ ປະຈໍາຢູ່ ສປປ ລາວ ຊຶ່ງໄດ້ສ້າງບັນຍາກາດທີ່ຟົດຟື້ນ, ມ່ວນຊື່ນ, ອົບອຸ່ນ ໄປດ້ວຍໄມຕີຈິດມິດຕະພາບ ແລະ ສ້າງຄວາມປະທັບໃຈ ໃຫ້ແກ່ຜູ້ເຂົ້າຮ່ວມ ພ້ອມທັງໄດ້ປະກອບສ່ວນເຂົ້າໃນການຮັດແໜ້ນຄວາມສາມັກຄີ ແລະ ການພົວພັນຮ່ວມມືທີ່ດີ ພາຍໃນວົງຄະນາຍາດນັກການທູດເພດຍິງ ແລະ ພັນລະຍາທູຕານຸທູດ ຢູ່ ສປປ ລາວ ອີກດ້ວຍ. (ຂ່າວ: ແສງຈັນ)