ໜັງສືພິມ ປະຊາຊົນ

ເມືອງເງິນ ໄດ້ຮັບອຸປະກອນການຮຽນ-ການສອນ

ເຜີຍແຜ່ໂດຍ: ທ່ານ ຈັນທະໄມຕຣີ ເທບສີເມືອງ ເວລາ: 14/12/2020 15:06:56 ຈຳນວນຢ້ຽມຊົມ 7730 ຄັ້ງ

ເມື່ອບໍ່ດົນມານີ້, ບໍລິສັດພະລັງງານບົວສະຫວັນ ຮ່ວມກັບ ອະດີດນັກສຶກສາ ອຸດົມຟ້າງຸ່ມ ສົກປີ 1983 ໄດ້ມອບອຸປະກອນ ການຮຽນ-ການສອນ ໃຫ້ໂຮງຮຽນ 9 ແຫ່ງຢູ່ເຂດຫ່າງໄກ ສອກຫຼີກ ເມືອງເງິນ ແຂວງ ໄຊຍະບູລີ.

ເຄື່ອງທີ່ນຳມາມອບໃນຄັ້ງນີ້ ປະກອບມີອຸປະກອນການຮຽນ-ການສອນ, ເຄື່ອງກິລາ ເຄື່ອງນຸ່ງຫົ່ມ, ເສື້ອກັນໜາວ, ເຄື່ອງບໍລິໂພກອີກຈຳນວນໜື່ງ ແລະ ເຄື່ອງໃຊ້ອື່ນໆ ລວມມູນຄ່າ 74 ລ້ານກີບ. ນຳໄປມອບໃຫ້ນັກຮຽນທີ່ຢູ່ເຂດຫ່າງໄກສອກຫຼີກ ຈຳນວນ 9 ໂຮງຮຽນຄື: ໂຮງຮຽນ ປະຖົມສົມບູນ ປຸ່ງຝາດ, ປະຖົມຫ້ວຍເຜີ້ງ, ປະຖົມຜາແດງ, ປະຖົມປາກແຄນ, ປະຖົມນ້ຳເງິນ, ມ ຕົ້ນດອກເຜີ້ງ, ມ ຕົ້ນສາມັກຄີໄຊ, ມັດທະຍົມສົມບູນສິນໄຊ ແລະ ໂຮງຮຽນມັດທະຍົມສົມບູນບ້ານທອງ ມີທັງໝົດ 1.560 ຄົນ, ຍິງ 732 ຄົນ.

ທ່ານ ບາແກ້ວ ລາດຊະວົງ ຕາງໜ້າ ບໍລິສັດ ພະລັງງານ ບົວສະຫວັນ ແລະ ອະດີດນັກສຶກສາ ອຸດົມຟ້າງຸ່ມ ສົກປີ 1983 ໃຫ້ຮູ້ຕື່ມວ່າ: ເຄື່ອງດັ່ງກ່າວ ແມ່ນໄດ້ລະດົມທືນຈາກ ບໍລິສັດ ພະລັງງານ ບົວສະຫວັນແຕ່ລະສາຂາ ແລະ ອະດີດນັກສຶກສາ ອຸດົມຟ້າງຸ່ມ ສົກປີ 1983 ເພື່ອນຳໄປຊື້ເຄືອງຈຳນວນດັ່ງກ່າວ ເພື່ອເປັນການແບ່ງປັນນໍ້າໃຈໃຫ້ ນັກຮຽນ ທີ່ຢູ່ເຂດຫ່າງໄກສອກຫຼີກ ເພື່ອໃຫ້ເຂົາເຈົ້າໄດ້ໃຊ້ອຸປະກອນການຮຽນມີຄຸນນະພາບ ທັງເປັນການຊ່ວຍແບ່ງເບົາການໃຊ້ຈ່າຍໃນຄອບຄົວ.

ໃນໂອກາດນີ້, ທາງບໍລິສັດພະລັງງານບົວສະຫວັນ ແລະ ອະດີດ ນັກສຶກສາ ອຸດົມຟ້າງຸ່ມ ສົກປີ 1983 ກໍໄດ້ມອບເງິນສົດ ໃຫ້ກອງທຶນໄພພິບັດເມືອງເງິນ ຈຳນວນ 26 ລ້ານກີບ.

ໂດຍ: ອິນແປງ ແຫວນຄຳ

ໂທ:020 555 678 15