ໜັງສືພິມ ປະຊາຊົນ

ພລາວມີ ເວັບໄຊຊື້-ຂາຍທາງອອນລາຍ ຫວັງເພີ່ມຍອດຂາຍໃຫ້ SMEs ຂອງລາວ

ເຜີຍແຜ່ໂດຍ: ທ່ານ ຈັນທະໄມຕຣີ ເທບສີເມືອງ ເວລາ: 15/12/2020 09:28:56 ຈຳນວນຢ້ຽມຊົມ 7173 ຄັ້ງ

ພາກລັດ ໄດ້ມີນະໂຍບາຍຊຸກຍູ້ສົ່ງເສີມໃຫ້ຜູ້ປະກອບການທຸລະກິດ/ຜູ້ຜະລິດພາຍໃນ ດ້ວຍການສົ່ງເສີມການຊື້- ຂາຍສິນຄ້າລາວ ທາງອອນລາຍຜ່ານເວັບໄຊ www.Plaosme.com (ພລາວມີ) ໃຫ້ກາຍເປັນເວັບໄຊຊື້-ຂາຍໃນລະດັບຊາດ ເພື່ອເພີ່ມຍອດຂາຍ ແລະ ສ້າງລາຍຮັບໃຫ້ທຸ ລະກິດ SMEs ຂອງ ສປປ ລາວ ໃຫ້ເຂັ້ມແຂງເປັນຖານເກັບລາຍຮັບໃຫ້ແກ່ລັດຖະບານຢ່າງຍືນຍົງ ຊຶ່ງຄາດວ່າຈະເປີດໃຫ້ມີການຊື້-ຂາຍທາງເອເລັກໂຕຣນິກໄດ້ ໃນເດືອນມັງກອນປີ 2021.
ພິທີຖະແຫຼງຂ່າວ “ແນວຄວາມຄິດລິເລີ່ມ Plaosme 2.0 (ເວີຊັນ 2.0) ເພື່ອສົ່ງເສີມຫົວໜ່ວຍທຸລະກິດ ແລະ ການຄ້າທາງເອເລັກໂຕຣນິກ ເພື່ອສະໜັບສະໜູນ SMEs ຂອງ ລາວ ໄດ້ຈັດຂຶ້ນໃນວັນທີ 14 ທັນວານີ້ ທີ່ສະພາການຄ້າ ແລະ ອຸດສາຫະກຳແຫ່ງຊາດລາວ ໂດຍມີທຸກພາກສ່ວນກ່ຽວຂ້ອງເຂົ້າຮ່ວມ.
ທ່ານ ໄຊສົມເພັດ ນໍລະສິງ
ຫົວໜ້າກົມສົ່ງເສີມການຄ້າກະ ຊວງອຸດສາຫະກຳ ແລະ ການຄ້າ ໄດ້ກ່າວວ່າ: ເວັບໄຊພລາວມີ ເປັນໂຄງການສົ່ງເສີມການຄ້າຂອງລັດຖະບານ ໂດຍມີເປົ້າໝາຍຫັນມານໍາໃຊ້ນະວັດຕະກຳເຕັກໂນໂລຊີໃໝ່ ເພື່ອນຳ ປະເທດໄປສູ່ທັນສະໄໝຫຼຸດ ຜ່ອນຕົ້ນທຶນຊື້-ຂາຍສິນຄ້າ ແລະ ເວລາໃນການຂົນສົ່ງ, ສ້າງໃຫ້ທຸລະກິດ SMEs ຂອງລາວ ໃຫ້ມີຄວາມເຂັ້ມແຂງ, ສາມາດນໍາໃຊ້ເຄື່ອງມືທາງດ້ານເຕັກໂນໂລຊີ ແລະ ເພີ່ມຊ່ອງທາງການຊື້-ຂາຍ ຜ່ານເວັບໄຊ www.plaosme.com ທາງອອນລາຍໃຫ້ກາຍເປັນເວັບໄຊຊື້-ຂາຍໃນລະດັບຊາດ ແລະ ສົ່ງເສີມໃຫ້ມີການຂາຍສູ່ຕ່າງປະເທດ. ກົມສົ່ງເສີມການຄ້າຈະຊ່ວຍຊຸກຍູ້ອອກແບບຜະລິດຕະພັນລາວ ແລະ ຊ່ວຍສ້າງກົນໄກການຕະຫຼາດໃຫ້ຫົວໜ່ວຍທຸລະກິດ SMEs ພ້ອມທັງປະສານສົມທົບຮ່ວມມືກັບບັນດາທະນາຄານ ເພື່ອອຳນວຍຄວາມສະດວກໃນການຊື້-ຂາຍຜ່ານທາງເອເລັກໂຕຣນິກ ຊຶ່ງຄາດວ່າຈະເປີດໃຫ້ ມີການຊື້-ຂາຍ ໃນເດືອນມັງ ກອນ ປີ 2021.
ທ່ານ ບຸນເຖິງ ດວງສະ ຫວັນ ຫົວໜ້າກົມສົ່ງເສີມທຸລະກິດຂະໜາດນ້ອຍ ແລະ ກາງ ກະຊວງອຸດສາຫະກຳ ແລະ ການຄ້າກ່າວວ່າ: ເວັບໄຊ ພລາວມີ ໄດ້ລິເລິ່ມມີການພັດ ທະນາເປີດເວັບໄຊ ໃນວັນທີ 30 ສິງຫາ 2017 ໃນເວີຊັນ 1.0 ມາຮອດເດືອນ 11 ປີ 2020 ໄດ້ພັດທະນາເປັນເວີຊັນ 2.0 ໂດຍມີ 612 ຫົວໜ່ວຍທຸລະກິດທີ່ເປັນສະມາຊິກ ແລະ ໄດ້ນຳເອົາສິນຄ້າມາວາງຂາຍແລ້ວ 1674 ລາຍການ ແລະ ໄດ້ມີການຮ່ວມມືກັບ M-money ເພື່ອໃຫ້ມີຄວາມສະດວກໃນການຊໍາລະສະສາງການຊື້ສິນຄ້າ. ເວັບໄຊ ພລາວມີ ຈະເພີ່ມຍອດຂາຍ ແລະ ສ້າງລາຍຮັບໃຫ້ທຸລະກິດ SMEs ຂອງ ສປປ ລາວ ໃຫ້ເຂັ້ມແຂງ ເພື່ອເປັນລາຍຮັບໃຫ້ ແກ່ລັດຖະບານຢ່າງຍືນຍົງ.
ທ່ານ ດາວວອນ ພະຈັນທະວົງ ຮອງປະທານສະພາການຄ້າ ແລະ ອຸດສາຫະກຳແຫ່ງຊາດລາວກ່າວວ່າ: ປັດຈຸບັນ ເວັບໄຊ ພລາວມີ ໄດ້ເອື້ອອຳ ນວຍໃຫ້ການຊື້-ຂາຍໄດ້ມີຄວາມສະດວກສະບາຍຂຶ້ນ ໂດຍສະເພາະການຊໍາລະສະສາງ ແລະ ການຂົນສົ່ງ ຊຶ່ງເວັບໄຊ ພລາວມີ ຈະຊ່ວຍສ້າງໃຫ້ SMEs ຂອງລາວ ໄດ້ຮັບຜົນປະໂຫຍດສູງສຸດ.
(ຂ່າວ - ພາບ: ສຸກສະຫວັນ)